Oʻzbekiston Respublikasi Prezidentining “Respublika oliy taʼlim muassasalari xodimlari mehnatiga haq toʻlash tizimini takomillashtirish va uni moddiy ragʻbatlantirishni kuchaytirish chora-tadbirlari toʻgʻrisida” 2008-yil 24-iyuldagi PQ-926-son qarorini bajarish yuzasidan Vazirlar Mahkamasi qaror qiladi:

1. Oliy taʼlim muassasalarining professor-oʻqituvchilar tarkibi va rahbar xodimlari mehnatiga haq toʻlashning 1—3-ilovalarga muvofiq bazaviy lavozim maoshlari 2008-yil 1-sentabrdan boshlab amalga kiritilsin.

2. Oliy taʼlim muassasalari xodimlari mehnatiga haq toʻlash toʻgʻrisidagi Nizom 4-ilovaga muvofiq tasdiqlansin.

3. Oʻzbekiston Respublikasi Oliy va oʻrta maxsus taʼlim vazirligi Mehnat va aholini ijtimoiy muhofaza qilish vazirligi bilan birgalikda 2008-yil 1-sentabrgacha oliy taʼlim muassasalari xodimlari mehnatiga haq toʻlashning takomillashtirilgan tizimini joriy etish boʻyicha zarur tushuntirish ishlarini va tashkiliy ishlarni amalga oshirsin.

Amalga oshirilgan ishlar toʻgʻrisida Vazirlar Mahkamasining 2008-yil 9 oyi yakunlari boʻyicha majlisida axborot berilsin.

4. Oʻzbekiston Respublikasi Oliy va oʻrta maxsus taʼlim vazirligi, Moliya vazirligi, oliy taʼlim muassasalariga ega boʻlgan vazirliklar va idoralarning 2009/2010 oʻquv yilidan boshlab kunduzgi oʻqish boʻyicha oliy taʼlim yoʻnalishlari va mutaxassisliklariga qarab bir oʻqituvchiga toʻgʻri keladigan talabalar soni nisbatining cheklangan normativlarini 1:12,5 etib bosqichma-bosqich koʻpaytirish toʻgʻrisidagi taklifiga rozilik berilsin.

5. Oʻzbekiston Respublikasi Oliy va oʻrta maxsus taʼlim vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

idoraviy normativ hujjatlarni mazkur qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

1. Mazkur Nizom Oʻzbekiston Respublikasi Prezidentining “Respublika oliy taʼlim muassasalari xodimlari mehnatiga haq toʻlash tizimini takomillashtirish va uni moddiy ragʻbatlantirishni kuchaytirish chora-tadbirlari toʻgʻrisida” 2008-yil 24-iyuldagi PQ-926-son qaroriga muvofiq ishlab chiqilgan hamda Davlat budjetidan yoki aralash tarzda mablagʻ bilan taʼminlanadigan oliy taʼlim muassasalarining professor-oʻqituvchilar tarkibi va rahbar xodimlari mehnatiga haq toʻlash tartibi va shartlarini belgilaydi.

2. Ushbu Nizomning amal qilishi budjet tashkilotlari uchun qoʻllanadigan Yagona tarif setkasi asosida amalga oshiriladigan oliy taʼlim muassasalarining oʻquv-yordamchi, texnik va xizmat koʻrsatuvchi xodimlari mehnatiga haq toʻlashga tatbiq etilmaydi.

3. Oliy taʼlim muassasalari xodimlarining ish haqi bazaviy lavozim maoshini, shuningdek qonun hujjatlarida va ushbu Nizomda nazarda tutilgan ustamalar va qoʻshimcha toʻlovlarni oʻz ichiga oladi.

4. Oliy taʼlim muassasalari xodimlarining lavozim maoshlari:

oliy taʼlim muassasalari professor-oʻqituvchilar tarkibi va rahbar xodimlarining har bir lavozimi uchun belgilanadigan bazaviy lavozim maoshlari;

xodimlarga qonun hujjatlarida belgilangan ustamalar va qoʻshimcha toʻlovlar asosida shakllantiriladi.

5. Professor-oʻqituvchilar tarkibining bazaviy lavozim maoshlari:

shtatdagi lavozimga;

ilmiy daraja, ilmiy unvon mavjudligiga qarab tabaqalashtiriladi.

6. Oliy taʼlim muassasalari rahbarlarining bazaviy lavozim maoshlari oliy taʼlim muassasasi mansub boʻlgan guruhdan kelib chiqqan holda belgilanadi.

Birinchi guruhga talabalar kontingenti 2000 nafardan ortiq boʻlgan oliy taʼlim muassasasi kiradi.

Ikkinchi guruhga talabalar kontingenti 2000 nafardan kam boʻlgan oliy taʼlim muassasasi kiradi.

7. Rahbarlar tarkibiga oliy taʼlim muassasasining rektori, prorektori, dekani, dekan oʻrinbosari, oliy taʼlim muassasasi filialining direktori, direktor oʻrinbosari lavozimlaridagi shaxslar kiradi.

8. Professor-oʻqituvchilar tarkibiga kafedra mudiri, professor, dotsent, katta oʻqituvchi, assistent, oʻqituvchi, tajriba orttiruvchi oʻqituvchi lavozimidagilar kiritiladi.

Oliy taʼlim muassasasining kafedra mudiri, professor, dotsent, katta oʻqituvchi, assistent, oʻqituvchi, tajriba orttiruvchi oʻqituvchi lavozimlari Vazirlar Mahkamasining 2006-yil 10-fevraldagi 20-son qarori bilan tasdiqlangan Oliy taʼlim muassasalariga pedagog xodimlarni tanlov asosida ishga qabul qilish tartibi toʻgʻrisidagi Nizomga muvofiq egallanadi.

9. Bazaviy lavozim maoshlari sxemalarida ikkita maosh nazarda tutilgan lavozimlar boʻyicha professor-oʻqituvchilar tarkibi shtat jadvallarini tasdiqlashda ushbu lavozimlar boʻyicha lavozim maoshlari oliy taʼlim muassasasi rektori tomonidan xodimlar soni va tegishli vazirlik (idora) tomonidan ushbu oliy taʼlim muassasasi uchun mazkur xodimlar toifasi boʻyicha hisoblangan ish haqi fondi doirasida belgilanadi. Bunda oʻtalgan ilmiy maktab, ish staji, oʻquv-tarbiya jarayoniga qoʻshilgan faol hissa va oliy taʼlim muassasasi rahbari tomonidan belgilanadigan boshqa koʻrsatkichlar hisobga olinadi.

10. Oliy taʼlim muassasalari xodimlarining bazaviy lavozim maoshlarini oʻzgartirish:

Oʻzbekiston Respublikasi Prezidenti farmonlariga muvofiq budjet tashkilotlari xodimlarining ish haqi oshganda;

xodim oliy taʼlim muassasasida boshqa lavozimga oʻtganda amalga oshiriladi.

Bazaviy lavozim maoshini oʻzgartirish oliy taʼlim muassasasi boʻyicha buyruq bilan rasmiylashtiriladi.

11. Oʻzbekiston Respublikasi Prezidentining ish haqini oshirish toʻgʻrisidagi farmonlari munosabati bilan bazaviy lavozim maoshlari oʻzgargan taqdirda Oʻzbekiston Respublikasi Oliy va oʻrta maxsus taʼlim vazirligi hamda Mehnat va aholini ijtimoiy muhofaza qilish vazirligining pedagog va rahbar xodimlarning bazaviy lavozim maoshlari miqdorlarini oʻzgartirish toʻgʻrisidagi qoʻshma buyrugʻi chiqariladi.

12. Xodim oliy taʼlimning bitta muassasasida boshqa lavozimga oʻtgan taqdirda va shu munosabat bilan bazaviy lavozim maoshi oʻzgarganda mehnat shartnomasi oʻzgarishi tartibini belgilaydigan Oʻzbekiston Respublikasining Mehnat kodeksi qoidalari qoʻllaniladi (VI bob, 3-§).

13. Yuqori kasb mahoratiga ega boʻlgan va oʻquv-tarbiya jarayoni sifatini oshirishga hamda ilmiy tadqiqotlarga aniq hissa qoʻshayotgan professor-oʻqituvchilar tarkibi vakillari mehnatini moddiy taqdirlash va ragʻbatlantirish maqsadida ular uchun budjet muassasalari va tashkilotlari xodimlarini moddiy ragʻbatlantirish maxsus jamgʻarmasidan belgilangan tartibda toʻlanadigan har oylik ustamalar belgilanadi.

14. Hukumatning alohida qarorlari bilan belgilangan va tarif boʻyicha lavozim maoshiga nisbatan foizlarda hisoblanadigan qoʻshimcha toʻlov va ustamalarning boshqa turlari miqdori ushbu Nizom kuchga kirgan vaqtdan boshlab bazaviy lavozim maoshiga nisbatan foizlarda hisoblanadi.

15. Pedagog xodimlar mehnatiga soatbay haq toʻlash:

shtatdagi oʻqituvchilar tomonidan ushbu toifadagi xodimlarga soatbay haq toʻlash shartlari toʻgʻrisida amaldagi nizomlarga muvofiq bajarilgan oʻquv ishlari uchun;

belgilangan normativlarga muvofiq mehnatga soatbay haq toʻlagan holda oʻquv ishlarini bajarishga jalb etiladigan rektorlar, prorektorlar va boshqa rahbar xodimlarga;

boshqa tashkilotlardan jalb etiladigan oʻqituvchilar va boshqa mutaxassislarning oʻquv ishlari uchun haq toʻlashda qoʻllaniladi.

16. Oliy taʼlim muassasalarining pedagog xodimlari mehnatiga soatbay haq toʻlash stavkalari miqdori belgilangan tartibda aniqlanadi.

17. Professor-oʻqituvchilar tarkibi mehnatini normalashtirish har yili kelgusi oʻquv yili uchun tuziladigan va belgilangan tartibda tasdiqlanadigan shaxsiy ish rejalariga asoslangan.

Yillik shaxsiy ish rejasi oʻquv, ilmiy-metodik, ilmiy-tadqiqot, tashkiliy-metodik, maʼnaviy-axloqiy va tarbiyaviy tusdagi asosiy tadbirlar roʻyxatini, tadbirlardan har biri boʻyicha soatlar miqdorini koʻrsatgan holda, oʻz ichiga oladi.

Yillik shaxsiy ish rejasi 1540 soat miqdoridagi ish vaqtining jamlangan hisobidan kelib chiqadi.

Oliy taʼlim muassasasi professor-oʻqituvchilar tarkibining oʻquv, ilmiy-metodik, ilmiy-tadqiqot, tashkiliy-metodik, maʼnaviy-axloqiy va tarbiyaviy ishlar yuklamasi lavozimlar (kafedra mudiri, professor, dotsent, katta oʻqituvchi, assistent, oʻqituvchi, oʻqituvchi-stajyor) boʻyicha Oʻzbekiston Respublikasi Oliy va oʻrta maxsus taʼlim vazirligi tomonidan belgilanadi.