Oʻzbekiston Respublikasi Prezidentining “Ulgurji va chakana savdoni liberallashtirish hamda uni rivojlantirish uchun qulay shart-sharoit yaratish chora-tadbirlari toʻgʻrisida” 2006-yil 23-fevraldagi PF-3722-sonli Farmonini ijro etish yuzasidan hamda ulgurji-xarid va tovar ayirboshlash operatsiyalarini kengaytirish, moddiy-texnika bazasini mustahkamlash va transport vositalarini sotib olish uchun ixtisoslashtirgan ulgurji baza-kontoralarining aylanma mablagʻlarini shakllantirishga koʻmaklashish maqsadida:

1. 2006-yil 1-iyundan boshlab Ulgurji savdo korxonalari uyushmasi tizimiga kiruvchi respublika Ixtisoslashtirilgan ulgurji baza-kontoralari va ularning hududiy (viloyat, viloyatlararo va tumanlararo) bazalari uch yil muddatga yalpi daromad soligʻi toʻlashdan ozod etilsin.

2. 2006-yil 1-iyundan boshlab shunday tartib oʻrnatilsinki, unga muvofiq Ulgurji savdo korxonalari uyushmasi tizimiga kiruvchi respublika Ixtisoslashtirilgan ulgurji baza-kontoralari va ularning hududiy (viloyat, viloyatlararo va tumanlararo) bazalari davlat maqsadli jamgʻarmalariga va Oʻzbekiston Respublikasi Moliya vazirligi huzuridagi Maktab taʼlimi budjetdan tashqari jamgʻarmasiga savdo korxonalari uchun belgilangan amaldagi stavkalar boʻyicha yalpi daromaddan ajratmalar oʻtkazadilar.

3. Oʻzbekiston Respublikasi Adliya vazirligi boshqa manfaatdor idoralar bilan birgalikda ikki hafta muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

Oʻzbekiston Respublikasi Moliya vazirligi, Davlat soliq qoʻmitasi Adliya vazirligi bilan birgalikda idoraviy normativ hujjatlarning ushbu qarorga muvofiq boʻlishini taʼminlasin.

4. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.