Oʻzbekiston Respublikasi Prezidentining
Qarori
Aholiga nevrologik yordam koʻrsatishni takomillashtirish chora-tadbirlari toʻgʻrisida
Oʻtgan davrda aholiga koʻrsatilayotgan ixtisoslashtirilgan tibbiy yordamning hammabopligi va tezkorligini oshirish boʻyicha kompleks ishlar amalga oshirildi, tashxis qoʻyish va davolashning zamonaviy usullari joriy etilmoqda, aholiga koʻrsatilayotgan tibbiy xizmatlar sifati sezilarli darajada oshdi.
Shu bilan birga, nevrologik kasalliklarga tashxis qoʻyish, ularni profilaktika qilish va davolash, shuningdek, ixtisoslashtirilgan tibbiy yordamning hammabopligini taʼminlash sohasidagi ayrim muammo va kamchiliklar saqlanib qolmoqda.
Xususan, soʻnggi oʻn yilda oʻlim bilan yakunlanish darajasi yuqoriligi bilan ajralib turadigan ayrim nevrologik kasalliklar bilan xastalanish barqaror ortib bormoqda, reabilitatsiya tadbirlarining darajasi pastligi esa aholi oʻrtasida nogironlikning koʻpayishiga olib kelmoqda.
Profilaktika va davolash ishlarini tashkil etish, nevrologik kasalliklarni erta aniqlash xamda bu yoʻnalishda ilmiy-amaliy tadqiqotlar oʻtkazishni taʼminlaydigan yagona markazlashgan tizim mavjud emas.
Zamon talablariga javob beradigan neyroreabilitatsiya tadbirlari va nevrologik yordam koʻrsatishni takomillashtirish, shuningdek, ixtisoslashtirilgan yordam turlarini kengaytirish, uning sifatini yaxshilash va hammabopligini oshirish maqsadida:
1. Oʻzbekiston Respublikasi Sogʻliqni saqlash vazirligi va Iqtisodiyot vazirligining Nevrologiya va neyroreabilitatsiya milliy tibbiyot markazini (keyingi oʻrinlarda Markaz deb yuritiladi) tashkil etish toʻgʻrisidagi taklifiga rozilik berilsin.
(1-band Oʻzbekiston Respublikasi Prezidentining 2025-yil 19-avgustdagi PQ-254-sonli qarori tahririda — Qonunchilik maʼlumotlari milliy bazasi, 22.08.2025-y., 07/25/254/0763-son)
2. Quyidagilar Markaz faoliyatining asosiy vazifa va yoʻnalishlari etib belgilansin:
nevrologik kasalliklar profilaktikasi, diagnostikasi va ularni davolashning yagona vertikal tizimini tashkil etish va davlat tibbiyot muassasalarining ixtisoslashtirilgan nevrologiya boʻlimlariga tashkiliy-uslubiy jihatdan rahbarlik qilish;
eksperimental va klinik nevrologiya sohasida, shu jumladan kompyuter, stimulyatsiya va robotlashtirilgan texnologiyalardan foydalangan holda nevrologik kasalliklarni profilaktika, diagnostika qilish va davolash uchun yangi usullarini joriy etishga qaratilgan kompleks ilmiy-amaliy tadqiqotlarni amalga oshirish;
umuman respublika boʻyicha va har bir hududda nevrologik kasallanish tendensiyalarini oʻz vaqtida aniqlash boʻyicha ilmiy-tadqiqot va tahliliy ishlarni amalga oshirish, sogʻliqni saqlash muassasalari uchun mazkur kasalliklarni profilaktika qilish, erta aniqlash va davolash sxemalarini ishlab chiqish;
skrining-soʻrov usulidan foydalangan va nevrologik kasalliklar rivojlanishi xatarining yakka tartibdagi darajasini hisobga olgan holda ushbu kasalliklar rivojlanish xavfi boʻlgan bemorlarni, shuningdek, kasallikning erta bosqichlaridagi bemorlarni faol aniqlash;
nevrologik kasalliklarning hujayra va gen terapiyasiga doir innovatsion yondashuvlarni ishlab chiqish, davlat tibbiyot tashkilotlarining ushbu yoʻnalishdagi ixtisoslashtirilgan boʻlimlarida insult, tutqanoq va boshqa keng tarqalgan nevrologik kasalliklar bilan xastalangan bemorlarni skrining tekshiruvlari hamda populyatsiya registrini joriy etish;
nevrologiya va neyroreabilitologiya sohasida kadrlar tayyorlash, qayta tayyorlash va ularning malakasini oshirish tizimini takomillashtirish, davlat tibbiyot muassasalari nevrologiya boʻlimlarining kadrlar salohiyatini mustahkamlash;
yetakchi xorijiy mutaxassislarni jalb etgan holda sogʻliqni saqlash tizimi birlamchi boʻgʻini mutaxassislari ishtirokida nevrologiya va neyroreabilitologiya boʻyicha seminar-treninglar, mahorat saboqlari, vebinarlar va telekoʻpriklar tashkil etish;
nevrologiya va neyroreabilitologiya sohasidagi xorijiy ilmiy-tadqiqot markazlari, klinikalari va oliy taʼlim muassasalari bilan hamkorlik aloqalarini rivojlantirish, ular bilan qoʻshma ilmiy loyihalarni amalga oshirish hamda xorijiy grantlarni jalb etish;
mavjud tibbiyot texnikasi va apparatlari parkini muntazam yangilash va modernizatsiya qilishni taʼminlash, Markazni jahonning ilgʻor yutuqlari darajasida nevrologiya sohasida ixtisoslashtirilgan yuqori texnologiyali tibbiy yordam koʻrsatish imkonini beradigan zamonaviy tibbiyot uskunalari bilan jihozlash.
3. Belgilansinki, davlat tibbiyot tashkilotlarining ixtisoslashtirilgan nevrologiya boʻlimlari Markazning tashkiliy-uslubiy boʻlinmalari hisoblanadi.
4. Aholiga ixtisoslashtirilgan nevrologik yordam koʻrsatish samaradorligini oshirish chora-tadbirlari dasturi (keyingi oʻrinlarda — Chora-tadbirlar dasturi) 1-ilovaga muvofiq tasdiqlansin.
Vazirlik va idoralar rahbarlari Chora-tadbirlar dasturida belgilangan tadbirlarning oʻz vaqtida, toʻliq va sifatli amalga oshirilishi uchun shaxsan javobgar ekanliklari belgilansin.
5. Aholiga ixtisoslashtirilgan nevrologik yordam koʻrsatish samaradorligini oshirish chora-tadbirlari dasturini monitoring qilish boʻyicha ishchi komissiya (keyingi oʻrinlarda — Komissiya) 2-ilovaga muvofiq tarkibda tashkil etilsin.
Quyidagilar Komissiyaning asosiy vazifalari etib belgilansin:
masʼul ijrochilarning mazkur qarorda koʻzda tutilgan chora-tadbirlarni amalga oshirish boʻyicha faoliyatini muvofiqlashtirish, shuningdek, ularning oʻz vaqtida, sifatli va samarali ijrosini tashkil etish;
Markaz faoliyatiga nevrologik yordam koʻrsatish sohasidagi ilm-fan va texnika yutuqlarini, zamonaviy texnologiyalar va ilgʻor tajribani tatbiq etishga koʻmaklashish;
Markaz oldiga qoʻyilgan vazifalarni bajarishda yuzaga kelayotgan muammolarni va ularni keltirib chiqarayotgan shart-sharoitlarni aniqlash, nevrologik yordam koʻrsatish tizimini yanada takomillashtirish boʻyicha takliflar ishlab chiqish;
nevrologiya xizmati faoliyatini, tibbiyot xodimlari zimmasiga insult va nevrologik kasalliklar bilan xastalangan bemorlarga yuqori malakali yordam koʻrsatish boʻyicha yuklangan majburiyatlarning samarali bajarilishini nazorat qilish;
nevrologik yordam koʻrsatishni amalga oshirayotgan tibbiyot muassasalari tomonidan bemorlarning ishlab chiqilgan standartlar asosida davolanishi jarayonini, shu jumladan joylarga chiqqan holda oʻrganish.
6. Oʻzbekiston Respublikasi Sogʻliqni saqlash vazirligining 2019/2020 oʻquv yilidan boshlab oliy tibbiyot taʼlim muassasalarida “neyroreabilitologiya” mutaxassisligi boʻyicha yangi magistratura va klinik ordinatura yoʻnalishlarini ochish toʻgʻrisidagi taklifiga rozilik berilsin.
7. Toshkent shahar, Yashnobod tumani, S. Mashhadiy koʻchasi, 217-uyda joylashgan Toshkent davlat stomatologiya instituti qoshidagi akademik litsey (keyingi oʻrinlarda — Akademik litsey) binolari Markazga operativ boshqarish huquqi bilan berilsin.
Toshkent shahar hokimligi Oʻzbekiston Respublikasi Sogʻliqni saqlash vazirligi bilan birgalikda Akademik litseyning joylashtirilishini taʼminlasin.
Belgilansinki, Akademik litsey oʻquvchilari litsey joylashtirilgunga qadar Markazga berilgan binolarda oʻqishni davom ettiradi.
8. Quyidagilar Markaz faoliyatini moliyalashtirish manbalari etib belgilansin:
Oʻzbekiston Respublikasi Davlat budjeti mablagʻlari;
faoliyat turi boʻyicha ishlarni bajarish va xizmatlar koʻrsatishdan tushadigan mablagʻlar;
jismoniy va yuridik shaxslarning homiylik va xayriya mablagʻlari;
xalqaro moliya institutlari va xorijiy tashkilotlarning grantlari;
qonun hujjatlari bilan taqiqlanmagan boshqa manbalar.
9. Vazirlar Mahkamasining 2004-yil 8-iyundagi “Sogʻliqni saqlash tizimida eksperimentni tugallash va islohotlarni chuqurlashtirish chora-tadbirlari toʻgʻrisida”gi 264-son qarori bilan tasdiqlangan:
Tashxis qoʻyish va davolash sifati standartlariga rioya qilgan holda aholiga pulli asosda yuqori malakali ixtisoslashtirilgan tibbiy yordam koʻrsatish qoidalari;
Imtiyozli toifaga kiruvchi bemorlarga order berish, ularni shifoxonaga joylashtirish va davlat budjeti mablagʻlari hisobiga davolash qiymatini toʻlash tartibi;
Shoshilinch tibbiy yordamga muhtoj bemorlarni shifoxonaga joylashtirish toʻgʻrisidagi nizom;
Respublika ixtisoslashtirilgan tibbiyot markazlari daromadlarini shakllantirishning asosiy manbalari va ular faoliyatini moliyalashtirish tartibi toʻgʻrisidagi nizomning amal qilishi Markazga tatbiq etilsin.
10. Oʻzbekiston Respublikasi Investitsiyalar va tashqi savdo vazirligi Iqtisodiy taraqqiyot va kambagʻallikni qisqartirish vazirligi va Moliya vazirligi bilan birgalikda 2019-2020-yillarda Oʻzbekiston Respublikasini rivojlantirish davlat dasturlarini shakllantirishda tasdiqlangan loyiha-smeta hujjatlariga muvofiq Markaz bino va inshootlarini rekonstruksiya qilish, mukammal taʼmirlash va jihozlash, shuningdek, uni tibbiy asbob-uskunalar bilan taʼminlash loyihalarini belgilangan tartibda ularga kiritsin.
(10-band Oʻzbekiston Respublikasi Prezidentining 2020-yil 27-sentabrdagi PF-6075-sonli Farmoni tahririda — Qonun hujjatlari maʼlumotlari milliy bazasi, 28.09.2020-y., 06/20/6075/1330-son)
11. Oʻzbekiston Respublikasi Sogʻliqni saqlash vazirligi:
bir oy muddatda Markaz Nizomi va toʻzilmasini tasdiqlasin hamda uning davlat roʻyxatidan oʻtkazilishini taʼminlasin;
ikki oy muddatda Markazni oldiga qoʻyilgan vazifalarni yuqori va professional darajada bajarishga qodir boʻlgan malakali mutaxassislar bilan taʼminlasin;
2019-yil 1-dekabrga qadar muddatda davolash-diagnostika xizmatlarini koʻrsatishning isbotlovchi tibbiyotga asoslangan zamonaviy texnologiya va usullarini joriy etishni hisobga olgan holda nevrologik kasalliklar diagnostikasi va ularni davolash standartlari hamda klinik protokollarni qayta koʻrib chiqsin va yangilasin;
bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
12. Oʻzbekiston Respublikasi Moliya vazirligi Sogʻliqni saqlash vazirligiga 2018-yilda Davlat budjetining “Sogʻliqni saqlash” sohasi boʻyicha xarajatlar parametrlari doirasida ushbu qaror ijrosini taʼminlash uchun zarur budjet mablagʻlarini ajratsin, 2019-yildan boshlab esa har yili Oʻzbekiston Respublikasi Davlat budjeti parametrlarida zarur mablagʻlarni nazarda tutsin.
13. Oʻzbekiston Respublikasi Sogʻliqni saqlash vazirligi Investitsiyalar va tashqi savdo vazirligi va Moliya vazirligi bilan birgalikda Markazni yuqori texnologiyali tibbiy uskunalar bilan jihozlash uchun xorijiy davlatlar, xalqaro moliya institutlarining imtiyozli kreditlari (zayomlari) va grantlarini hamda boshqa budjetdan tashqari mablagʻlarni jalb etish boʻyicha zarur choralar koʻrsin.
(13-band Oʻzbekiston Respublikasi Prezidentining 2020-yil 27-sentabrdagi PF-6075-sonli Farmoni tahririda — Qonun hujjatlari maʼlumotlari milliy bazasi, 28.09.2020-y., 06/20/6075/1330-son)
14. Quyidagilarga:
Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga — nazarda tutilgan barcha tadbirlarning oʻz vaqtida va toʻliq moliyalashtirilishi, shuningdek, Markaz binosi va xonalari rekonstruksiya qilinishi, mukammal taʼmirlanishi, zamonaviy ilmiy va laboratoriya uskunalari, zarur butlovchi qismlar va sarf materiallari bilan taʼminlanishi;
Bosh vazir oʻrinbosari — Investitsiyalar va tashqi savdo vaziri S.Oʻ. Umurzakov zimmasiga — Markazni zamonaviy yuqori texnologik tibbiyot uskunalari bilan jihozlash uchun xalqaro moliya institutlari va donor tashkilotlarning texnik koʻmaklashish mablagʻlari va grantlari jalb etilishi;
(14-bandning uchinchi xatboshisi Oʻzbekiston Respublikasi Prezidentining 2020-yil 27-sentabrdagi PF-6075-sonli Farmoni tahririda — Qonun hujjatlari maʼlumotlari milliy bazasi, 28.09.2020-y., 06/20/6075/1330-son)
Oʻzbekiston Respublikasi sogʻliqni saqlash vaziri A.K. Shadmanov zimmasiga — Markaz va tuman (shahar) tibbiyot birlashmalarining ixtisoslashtirilgan nevrologiya boʻlimlari faoliyatining samarali tashkil etilishi uchun shaxsiy javobgarlik yuklansin.
15. Mazkur qarorning ijrosini nazorat qilish Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Prezidentining maslahatchisi A.A. Abduvoxitov va Oʻzbekiston Respublikasi Bosh vazirining oʻrinbosari A.A. Abduhakimov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 30-avgust,
PQ-3925-son
Oʻzbekiston Respublikasi Prezidentining 2018-yil 30-avgustdagi PQ-3925-son qaroriga
1-ILOVA
Aholiga ixtisoslashtirilgan nevrologik yordam koʻrsatish samaradorligini oshirish chora-tadbirlari
DASTURI

T\r

Chora-tadbirlar nomlanishi

Amalga oshirish mexanizmi

Bajarish muddatlari

Narxi

Moliyalashtirish manbalari

Bajaruvchilar

I. Nevrologiya sohasida tibbiy xizmatlar sifatini oshirishga qaratilgan normativ-huquqiy bazani takomillashtirish

1.

Respublika ixtisoslashtirilgan nevrologiya va insult ilmiy-amaliy tibbiyot markazi (keyingi oʻrinlarda — Markaz) nizomi va tuzilmasini tasdiqlash.

Sogʻliqni saqlash vazirining buyrugʻi

2019-yil sentabr

-

-

Sogʻliqni saqlash vazirligi (A. Shodmonov), Moliya vazirligi (A. Haydarov), Bandlik va mehnat munosabatlari vazirligi (Sh. Qudbiyev)

2.

Markaz faoliyatini tashkil etishda, zamon talablaridan kelib chiqqan holda, nevrologiya xizmati muassasalari faoliyatini tartibga soluvchi idoraviy meʼyoriy hujjatlarni toʻliq xatlovdan oʻtkazish va qayta koʻrib chiqish.

Normativ-huquqiy hujjatlarning loyihalari

2019-yil yanvar

-

-

Sogʻliqni saqlash vazirligi (A. Shodmonov), Adliya vazirligi (R. Davletov)

3.

Nevrologiya sohasida davolash-diagnostika xizmatlari koʻrsatishning zamonaviy va ilmiy tasdiqlangan uslublari va texnologiyalarini hisobga olgan holda, nevrologik kasal bemorlarni diagnostika qilish va davolashning zamonaviy standartlarini ishlab chiqish va tasdiqlash.

Sogʻliqni saqlash vazirining buyrugʻi

2019-yil dekabr

-

-

Sogʻliqni saqlash vazirligi (A. Shodmonov), Adliya vazirligi (R. Davletov), “Oʻzstandart “(J. Shukurov)

4.

Markazning nizomi, tuzilmasi va moddiy-texnik taʼminlash meʼyorlarini tasdiqlash, shuningdek, uni davlat roʻyxatidan oʻtkazish.

Tashkiliy chora-tadbirlar kompleksi

2018-yil dekabr

-

-

Sogʻliqni saqlash vazirligi (A. Shodmonov), Moliya vazirligi (A. Haydarov), Bandlik va mehnat munosabatlari vazirligi(Sh. Qudbiyev)

II. Nevrologik kasalliklarni, shu jumladan insultantni barvaqt diagnostika qilish va oldini olish chora-tadbirlarini takomillashtirish

5.

Shahar (tuman) tibbiyot birlashmalarida nevrologiya boʻlimlari (keyingi oʻrinlarda –Markaz boʻlinmalari) faoliyatini tashkil qilish.

Tashkiliy chora-tadbirlar kompleksi

2019-2020 yy.

-

-

Sogʻliqni saqlash vazirligi (A. Shodmonov), Moliya vazirligi (A. Haydarov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

6.

Nevrologik kasalliklar va uning asoratlari bilan ogʻrigan bemorlarning yagona elektron bazasini yaratish.

Maʼlumotlar bazasi

2019-2020 yy.

-

-

Sogʻliqni saqlash vazirligi (A. Shodmonov), Axborot texnologiyalari va kommunikatsiyalarini rivojlantirish vazirligi (Sh. Sadikov), Moliya vazirligi (A. Haydarov)

7.

Markazning barcha boʻlinmalarida insultni boshdan kechirgan hamda epilepsiya bilan kasallangan bemorlarning populyatsiya registrini joriy etish, keng tarqalgan nevrologik kasalliklar boʻyicha skrining tadqiqotlarni takomillashtirish va bosqichma-bosqich joriy etish.

Tashkiliy chora-tadbirlar kompleksi

2022-2023 yy.

-

-

Sogʻliqni saqlash vazirligi (A. Shodmonov), Axborot texnologiyalari va kommunikatsiyalarini rivojlantirish vazirligi (Sh. Sadikov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

8.

Sanatoriya-kurort davolash-profilaktika muassasalari bazasida nevrologik kasalliklarni boshdan kechirgan bemorlarga reabilitatsiya yordamini koʻrsatishni tashkil etish va amalga oshirish.

Tashkiliy chora-tadbirlar kompleksi

2019-2020 yy.

-

-

Sogʻliqni saqlash vazirligi (A. Shodmonov), Oʻzbekiston Kasaba uyushmalari federatsiyasi Kengashi (K. Rafikov)

9.

Nevrologiya kasalliklari boʻyicha sanitariya-targʻibot ishlarini, shu jumladan aholi orasida nevrologik kasalliklar profilaktikasi boʻyicha ishlarni, quyidagilar orqali amalga oshirish:

ijtimoiy tele va radio koʻrsatuvlarning qamrovi va sonini kengaytirish;

bosma va elektron ommaviy axborot vositalarida materiallarni eʼlon qilish;

nevrologik kasalliklar, shu jumladan insultantlar rivojlanishi omillari xatarlari toʻgʻrisida mavzuga oid seminarlar oʻtkazish;

xavf-xatarlar rivojlanishini kamaytirish boʻyicha tavsiyalar ishlab chiqish;

olib borilgan axborot-targʻibot chora-tadbirlari natijalarini monitoring qilish va baholash.

Axborot-targʻibot chora-tadbirlari kompleksi

Doimo

-

-

Sogʻliqni saqlash vazirligi (A. Shodmonov), MTRK (A. Xodjayev), Oʻzbekiston Matbuot va axborot agentligi (L. Tangriyev)

III. Nevrologiya sohasida kadrlar salohiyatini mustahkamlash, xalqaro hamkorlikni rivojlantirish

10.

Markaz va uning boʻlinmalari shifokorlari, nevrologlari va ilmiy xodimlarini zamonaviy klinika diagnostikasi va laboratoriya tahlillari natijalarini izohlash, shu jumladan yuqori texnologik asbob-uskunalarda nevrologik kasalliklarni davolash boʻyicha zamonaviy metodlarga oʻqitish.

Amaliy chora-tadbirlar

Doimiy

-

-

Sogʻliqni saqlash vazirligi (A. Shodmonov)

11.

Aholiga amaliy tibbiy yordam koʻrsatish bilan bir qatorda, Markaz mutaxassislari tomonidan respublika hududlarida nevrolog shifokorlar uchun nevrologiya kasalliklari va insult bilan ogʻrigan bemorlarni diagnostika qilish va davolashning yangi metodlarini joriy etish boʻyicha mahorat darslarini tashkil etish.

Mahorat darslari dasturlari

Doimiy, dasturga muvofiq

-

-

Sogʻliqni saqlash vazirligi (A. Shodmonov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

12.

Yetakchi xorijiy tibbiyot markazlari va klinikalari bilan sheriklikni mustahkamlash orqali nevrologik kasalliklar va insult bilan ogʻrigan bemorlarni diagnostika qilish va davolashning milliy amaliyotiga ilmiy tadqiqotlarning zamonaviy jahon tajribasini joriy etish.

Xorijiy davlatlarning yetakchi klinikalari mutaxassislari ishtirokida nevrologiya va insult boʻyicha ilmiy konferensiyalar, trening va mahorat darslarini tashkil etish va oʻtkazish.

Memorandum va kelishuvlar

2019 — 2021 yy.

-

-

Sogʻliqni saqlash vazirligi (A. Shodmonov), TIV (A. Komilov)

13.

Nevrologiya va neyroreabilitologiya mutaxassisliklari boʻyicha klinik ordinaturada har yili 15 nafar nevrolog va
10 nafar neyroreabilitologlarni tayyorlash yoʻli orqali Respublika ixtisoslashtirilgan nevrologiya va insult ilmiy-amaliy tibbiyot markazining kadrlar salohiyatini mustahkamlash.

Sogʻliqni saqlash vazirining buyrugʻi

2019-2020 yy.

-

-

Sogʻliqni saqlash vazirligi (A. Shodmonov)

14.

Xorijiy markazlar va klinikalar bilan hamkorlik toʻgʻrisidagi ikki tomonlama tuzilgan shartnomalar asosida har yili kamida 10 ta Markaz mutaxassislari malakasini oshirish.

Hamkorlik shartnomasi

2019-2020 yy.

-

-

Sogʻliqni saqlash vazirligi (A. Shodmonov), TIV (A. Komilov)

15.

Insultni boshdan kechirgan shaxslar va nevrologik bemorlarni parvarish qilish boʻyicha patronaj hamshiralar tayyorlashni oʻz ichiga olgan Avstriyaning “AUREUS” reabilitologlar jamiyati bilan birga keyinchalik joylarda mutaxassislarni tayyorlashni koʻzda tutgan holda 5 yil davomida milliy neyroreabilitologlarni Avstriyaning nevrologiya klinikalarida oʻqitishni nazarda tutish masalalarini oʻrganish.

Hamkorlik shartnomasi

2018 — 2022 yy.

-

-

Sogʻliqni saqlash vazirligi (A. Shodmonov), TIV (A. Komilov)

IV. Nevrologik kasalliklar va insultni oldini olish, diagnostika qilish va davolashning yangi metodlarini ishlab chiqish hamda joriy etishga qaratilgan fundamental, amaliy va innovatsion ilmiy tadqiqotlar olib borish

16.

Nevrologik kasalliklar va insultlarda birinchi va reabilitatsion yordam koʻrsatishni yaxshilash boʻyicha ishlab chiqilgan ilmiy platformaga muvofiq, nevrologik kasallanishni prognozlash va davolashning zamonaviy qarashlarini ishlab chiqish.

Ilmiy tadqiqotlar natijalari

2022-2023 yy.

-

-

Sogʻliqni saqlash vazirligi (A. Shodmonov), Fanlar akademiyasi (B. Yuldashev), Innovatsion rivojlanish vazirligi (I. Abdurahmonov)

17.

Nevrologiya kasalliklarini davolashning klinik kechishi va davolash natijalarining neyroimmunologik, molekulyar-biologik, molekulyar-genetik, itogenetik va molekulyar-genetik xususiyatlarini oʻrganish.

Ilmiy loyihalar

2022-2023 yy.

-

-

Sogʻliqni saqlash vazirligi (A. Shodmonov)

18.

Markaz amaliyotiga quyidagi zamonaviy davolash metodlarini joriy qilish:

tizimli trombolizis va tromboekstraksiya;

epilepsiyaning VNS — terapiyasi;

insultdan keyingi barvaqt reabilitatsiya usullari;

parkinsonizm bilan kasallanganlarni ultratovushli ablyatsiya uslublari;

ergoterapiya, kinezioterapiya va robotlashtirilgan texnika yordamida nevrologik bemorlarni reabilitatsiya qilish uslublari;

umurtqa pogʻonasi va orqa miya hosilalarini jarrohlik davolash;

magnit va elektr stimulyatsiyaning terapevtik usullari;

botulinoterapiya;

tana hujayralari yordamida insult va epilepsiyani davolash.

Sogʻliqni saqlash vazirining buyrugʻi

2022-2023 yy.

-

-

Sogʻliqni saqlash vazirligi (A. Shodmonov)

19.

Markaz boʻlinmalari amaliyotiga davolashning zamonaviy uslublarini joriy etish, shu jumladan:

insultdan keyingi barvaqt reabilitatsiyasi;

nevrologik bemorlarni kinezioterapiya va robotlashtirilgan texnika yordamida reabilitatsiya qilish, ergoterapiya;

magnit va elektr stimulyatsiya terapiya bilan davolash.

Sogʻliqni saqlash vazirining buyrugʻi

2022-2023 yy.

-

-

Sogʻliqni saqlash vazirligi (A. Shodmonov)

V. Nevrologiya xizmati moddiy-texnik bazasini mustahkamlash

20.

Toshkent davlat stomatologiya instituti huzuridagi Akademik litsey binolarini rekonstruksiya qilish va taʼmirlash boʻyicha loyiha-smeta hujjatlarini ishlab chiqish.

Loyiha-smeta hujjatlari

2018-yil dekabr

-

Sogʻliqni saqlash vazirligi (A. Shodmonov), Qurilish vazirligi (A. Tuxtayev), Moliya vazirligi (A. Haydarov)

21.

Toshkent davlat stomatologiya instituti huzuridagi Akademik litsey binolarini rekonstruksiya qilish va kapital taʼmirlash.

Davlat rivojlantirish dasturlari doirasida

2019-2020 yy.

Loyiha-smeta hujjatlariga muvofiq

Taʼlim va tibbiyot muassasalarining moddiy-texnik bazasini rivojlantirish jamgʻarmasi mablagʻlari hisobidan

Sogʻliqni saqlash vazirligi (A. Shodmonov), Investitsiyalar boʻyicha davlat qoʻmitasi (S. Bekenov), Moliya vazirligi (A. Haydarov), Iqtisodiyot vazirligi (B. Xodjayev), Qurilish vazirligi (A. Toʻxtayev)

24.

Har bir hisob birligining texnik holatini xatlovdan oʻtkazgan holda, nevrologiya xizmati muassasalarining tibbiyot asbob-uskunalaridan foydalanish samaradorligi boʻyicha yagona axborot maʼlumotlar bazasini yaratish.

Sogʻliqni saqlash vazirining buyrugʻi

2019 — 2021 yy.

-

-

Sogʻliqni saqlash vazirligi (A. Shodmonov)

Izoh: xarajatlarning yakuniy miqdori loyiha-smeta hujjatlari belgilangan tartibda ekspertizadan oʻtkazilishi va tasdiqlanishi natijasida aniqlanadi.
(1-ilova Oʻzbekiston Respublikasi Prezidentining 2025-yil 19-avgustdagi PQ-254-sonli qarori tahririda — Qonunchilik maʼlumotlari milliy bazasi, 22.08.2025-y., 07/25/254/0763-son)
Oʻzbekiston Respublikasi Prezidentining 2018-yil 30-avgustdagi PQ-3925-son qaroriga
 2-ILOVA
Aholiga ixtisoslashtirilgan nevrologik yordam koʻrsatish samaradorligini oshirish chora-tadbirlari dasturini monitoring qilish boʻyicha ishchi komissiyasi
TARKIBI

1.

A.A. Abduhakimov

—

Oʻzbekiston Respublikasi Bosh vazirining oʻrinbosari, Ishchi komissiyasi raisi

2.

B.K. Yusupaliyev

—

Oʻzbekiston Respublikasi sogʻliqni saqlash vazirining birinchi oʻrinbosari, Ishchi komissiyasi raisi oʻrinbosari

3.

Lavozim boʻyicha

—

Oʻzbekiston Respublikasi innovatsion sogʻliqni saqlash milliy palatasi raisi

4.

G.V. Urmanova

—

Oʻzbekiston Respublikasi sogʻliqni saqlash vazirining oʻrinbosari

5.

R.R. Azimov

—

Oʻzbekiston Respublikasi Vazirlar Mahkamasi shuʼba mudiri

6.

F.R. Sharipov

—

Oʻzbekiston Respublikasi sogʻliqni saqlash vazirligi boshqarma boshligʻi

7.

U.S. Ismailov

—

Oʻzbekiston Respublikasi sogʻliqni saqlash vazirligi boshqarma boshligʻi

8.

A.A. Karimov

—

Respublika ixtisoslashtirilgan nevrologiya va insult ilmiy-amaliy tibbiyot markazi direktori

9.

B.G. Gafurov

—

Toshkent vrachlar malakasini oshirish instituti kafedra mudiri

10.

G.S. Raximbayeva

—

Toshkent tibbiyot akademiyasi kafedra mudiri

Izoh. Davlat komissiyasi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

(Qonun hujjatlari maʼlumotlari milliy bazasi, 03.09.2018-y., 07/18/3925/1822-son; 28.09.2020-y., 06/20/6075/1330-son; Qonunchilik maʼlumotlari milliy bazasi, 27.01.2022-y., 07/22/103/0070-son; 22.08.2025-y., 07/25/254/0763-son)