Автомототранспорт воситаларини рўйхатдан ўтказиш, қайта рўйхатдан ўтказиш ва уларнинг ҳисобини олиб бориш, миллий давлат рақами белгиларини бериш ва уларни алмаштириш ишларини тартибга солиш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикасида автомототранспорт воситаларини рўйхатдан ўтказиш, қайта рўйхатдан ўтказиш ва уларнинг ҳисобини олиб бориш, миллий давлат рақами белгиларини бериш ва уларни алмаштириш қоидалари 1-иловага мувофиқ;

Автомототранспорт воситаларига бериладиган миллий давлат рақами белгиларининг ҳудудий код рақамлари тақсимоти 2-иловага мувофиқ;

Оммавий ва мулкдорлар тасарруфидаги автомототранспорт воситаларига бериладиган миллий давлат рақами белгилари 3-иловага мувофиқ;

Ўзбекистон чет эл ваколатхоналари, халқаро ташкилотлар, хорижий фирмалар, чет эл фуқаролари ва фуқаролиги бўлмаган шахсларнинг автомототранспорт воситаларига бериладиган махсус давлат рақами белгилари 4-иловага мувофиқ;

Рўйхатга олинган ва халқаро автомобиль ҳаракатида қатнашувчи транспорт воситаларининг фарқловчи белгиси 5-иловага мувофиқ тасдиқлансин.

3. Ўзбекистон Республикаси Ички ишлар вазирлиги (Алматов)га:

республика Давлат стандарти талабларига жавоб берадиган миллий давлат рақами белгилари, қайд этиш гувоҳномаларини тайёрлашга буюртма бериш, таъминлаш ва уларни серия рақамлари бўйича жойларга тақсимлаш;

1998 йилнинг охирига қадар автомототранспорт воситаларини марказлашган тартибда ҳисобга олиш (компьютер ва бошқа техник жиҳозлар асосида), уни шакллантириш учун мажбурий маълумотномалар рўйхатини тузиш;

автомототранспорт воситалари билан савдо қилувчи корхона, фирма ва бошқа ташкилотларни ягона намунадаги ҳисоб маълумотномалари билан таъминлаш;

миллий давлат рақами белгиларини қайд этиш ва излаб топишни компьютерлаштириш дастурини жорий этиш юклансин.

4. Ўзбекистон Республикаси Молия вазирлиги (Гуськова) 1997 йил бюджетида кўрсатилган маблағлар ҳисобидан автомототранспорт воситаларини марказлашган тартибда ҳисобга олиш, мажбурий маълумотлар тузишда фойдаланиш учун республика Давлат автомобиль назоратига 28 та компьютер сотиб олишга керакли маблағ ажратсин.

5. «Ўзэлтехсаноат» уюшмаси (Саримсоқов) Ички ишлар вазирлигининг буюртмасига биноан миллий давлат рақами белгиларини «Алгоритм» ҳиссадорлик жамиятида ишлаб чиқаришда мазкур белгиларни ҳимоялаш ва улар тайёрланадиган жойни муҳофаза қилиш учун зарур шарт-шароитларни таъминласин.

6. Мазкур қарорнинг бажарилишини назорат қилиш Вазирлар Маҳкамасининг Транспорт ва алоқа бўлимига юклансин.

Механик транспорт воситалари ва тиркамаларни* рўйхатдан ўтказиш, қайта рўйхатдан ўтказиш ва уларнинг ҳисобини олиб бориш** автомототранспорт воситаларининг*** йўлларда ҳаракатланишда, шу жумладан, халқаро йўлларда ҳаракатланишда иштирок этишига давлат томонидан рухсат берилиши тадбири ҳисобланади. Транспорт воситаларини қайд этиш транспорт воситаларининг конструкциялари, техник ҳолати ва жиҳозланганлиги ҳаракатланиш хавфсизлигининг белгиланган талабларига мувофиқ келиши устидан назоратни таъминлаш, транспорт воситалари харид қилиш, олиш, улардан фойдаланиш, уларни ўзгаларга ўтказиш, яроқсиз деб топиш тартибига риоя қилиш мажбуриятларининг бажарилишини, йиғимларни тўлашга доир қонунларга лозим даражада риоя этилишини, транспорт воситаларининг марказлашган ва ҳудудий ҳисобини таъминлаш, жиноятчилик ва бошқа ҳуқуқбузарликларга қарши курашиш мақсадида амалга оширилади.

Механик транспорт воситалари ва тиркамаларни давлат томонидан қайд этиш қоидалари**** учун Ўзбекистон Республикасида қуйидаги тушунчалар қўлланилади:

«транспорт воситаларини давлат томонидан рўйхатдан ўтказиш» деганда Давлат автомобиль назорати*****нинг транспорт воситаларига қонун ҳужжатларига мувофиқ амалга ошириладиган йўлларда ҳаракатланишда иштирок этишини тасдиқлайдиган давлат қайд этиш белгиларини ва расмий ҳужжатларни бериш, транспорт воситаларини ҳисобга олиш борасидаги фаолияти тушунилади;

«қайта рўйхатдан ўтказиш» деганда тегишли юридик асослар мавжуд бўлганида транспорт воситаларининг ҳисобга олишга доир маълумотлари ва ҳужжатларига ўзгартиришлар ҳамда қўшимчалар киритиш тушунилади;

«рўйхатдан ўтказиш жойи» деганда транспорт воситаларини рўйхатдан ўтказиш бўйича юридик аҳамиятга эга бўлган ишларни бажарувчи давлат автомобиль назоратининг бўлинмаси тушунилади;

«транспорт воситасининг эгаси (транспорт воситаси эгасининг вакили)» деганда транспорт воситасининг мулкдори ёки қонун ҳужжатларида белгиланган асослар ва доирада транспорт воситасига эгалик қилувчи ёки ундан фойдаланувчи ёхуд уни тасарруф этувчи фуқаро ёки юридик шахс тушунилади;

«қайд этиш ҳужжатлари» деганда у транспорт воситалари учун расмий ҳужжат ҳисобланиб, уларнинг йўлларда ҳаракатланишда иштирок этишини тасдиқловчи қайд этишга доир гувоҳнома, техник паспорт, техник талон, халқаро йўлларда ҳаракатланишда иштирок этиш учун қайд қилиш тўғрисидаги белгиланган намунадаги гувоҳнома тушунилади.

1. Ушбу қоидалар транспорт воситаларини қайд этиш, қайд этиш гувоҳномалари ва давлат рақами белгиларини бериш тартибини белгилаб беради, улар Ўзбекистон Республикасининг барча ҳудудида амал қилади.

2. Транспорт воситаларини қайд этиш Қорақалпоғистон Республикаси Ички ишлар вазирлиги, Тошкент шаҳар ички ишлар бош бошқармаси ва вилоятлар ички ишлар бошқармалари* ДАН бошқармаларининг рўйхатдан ўтказиш ва имтиҳон олиш бўлим (бўлинма) лари, туманлараро рўйхатдан ўтказиш ва имтиҳон олиш бўлим (бўлинма)лари** томонидан амалга оширилади.

3. Ушбу қоидалар транспорт воситаларини ишлаб чиқариш, сотиш ва улардан фойдаланиш билан шуғулланувчи барча юридик ва жисмоний шахслар учун мажбурийдир.

4. Двигателининг иш ҳажми 50 куб см ва ундан ортиқ ҳамда конструкциясида кўрсатилган тезлиги соатига 50 км ва ундан ортиқ транспорт воситалари, улар учун ишлаб чиқарилган тиркамлар ва ярим тиркамлар ДАН органлари томонидан рўйхатга олинади.

5. Юридик ва жисмоний шахслар томонидан сотиб ёки қабул қилиб олинганда ва ҳужжатларга ўзгартиришлар киритиш лозим бўлганда, транспорт воситасининг техник ҳолатидан қатъи назар, 10 кун мобайнида жойлардаги ДАН органларига мурожаат этилиши шарт.

6. Рўйхатга олинаётган транспорт воситаларининг конструкциялари хавфсизлик талабларига, Ўзбекистон Республикасида амал қилаётган стандартлар, қоидалар, меъёрларнинг ҳаракатланиш хавфсизлиги ва атроф-муҳитни муҳофаза қилиш талабларига мувофиқ келиши лозим.

7. Транспорт воситалари фақат юридик шахс ҳисобланган ташкилотлар, муассасалар, корхоналар, фирмалар, уюшмалар, ширкатлар ва ҳ.к. номига рўйхатдан ўтказилади.

Фуқароларнинг шахсий мулки бўлган транспорт воситалари фақат бир киши, яъни эгаси номига рўйхатдан ўтказилади.

8. Рўйхатдан ўтказилган автомобилларга бир жуфт давлат рақами белгиси ва қайд этиш гувоҳномаси;

мототранспорт воситалари, тиркама ва ярим тиркамаларга бир дона давлат рақами белгиси ва қайд этиш гувоҳномаси берилади.

9. Транспорт воситаларини қайд этиш ва бошқа ўзгартиришлар киритиш учун асос бўлиб хизмат қилган ҳужжатлар тўплами ДАН органларида камида 3 йил муддатда давомида сақланади (қайд этиш, қатъий ҳисобдаги ДАН бланклари ва рақам белгиларининг кирим-чиқим дафтарлари бундан мустасно).

10. Транспорт воситаларини қайд этиш (шу жумладан, вақтинча ҳисобга олиш) ни ташкил этиш ва амалга ошириш, уларнинг конструкцияларига мувофиқлиги ва техник ҳолатининг хавфсизлик талабларига мувофиқлигини баҳолаш, қайд этишга тегишли йиғимлар ундириш, иш юритиш Ўзбекистон Республикаси ИИВнинг ушбу қоидаларни қўллашга оид йўриқномалари билан белгиланади.

11. Ўзбекистон Республикаси Ички ишлар вазирлигига Ўзбекистон Республикаси қонунлари, Ҳукуматнинг қарор ва фармойишлари асосида ушбу қоидаларга қўшимча ва ўзгартиришлар киритиб бориш ҳуқуқи берилади.

12. Ҳисобга олинган транспорт воситалари ва уларнинг эгаларига доир маълумотларни олиш ҳуқуқига эга бўлган корхоналарнинг рўйхати, ана шундай маълумотларни ҳисобга олиш жойида бериш тартиби Ўзбекистон Республикаси ИИВ томонидан белгиланади.

13. Транспорт воситаларини қайд этишга доир белгиланган тартибни бузганлик учун транспорт воситалари эгалари ва мансабдор шахслар амалдаги қонунларга мувофиқ жавобгарликка тортиладилар.

1. Автотранспорт воситалари 18 ёшга тўлган, мототранспорт воситалари 16 ёшга тўлган, мототранспорт воситалари эса 16 ёшга тўлган шахслар номига рўйхатдан ўтказилади (лоторея ва шунга ўхшаш бошқа оммавий ўйинларда ютуққа чиққан, васиятнома ва қонун билан белгиланган тартибда мерос асосида ўтган автомототранспорт воситалари бундан мустасно).

Мустасно тарзида автотранспорт воситаларини 18 ёшга, мототранспорт воситаларини 16 ёшга тўлмаган шахслар номига рўйхатдан ўтказилганда, транспорт воситаларининг қайд этиш гувоҳномаси шу шахсларнинг номига расмийлаштирилади ва гувоҳномага ҳамда автомототранспорт воситаларини ҳисобга олиш карточкасига «Транспорт воситаси эгаси 18 (16) ёшга тўлгунга қадар ҳомийлик ёки васийлик қилувчи идораларнинг рухсатисиз ҳисобдан чиқариш тақиқланади» деб ёзиб қўйилади.

2. Жисмоний шахсларга қарашли транспорт воситалари уларнинг доимий турар-жойларига, доимий турар-жойи бўлмаган тақдирда вақтинчалик турар-жойларига Ўзбекистон Республикасининг амалдаги қонун ҳужжатларига мувофиқ муомала лаёқатига эга бўлган фуқаролар номига рўйхатдан ўтказилади.

Транспорт воситалари муомала лаёқатига эга бўлмаган фуқаролар номига ҳам рўйхатдан ўтказилиши мумкин, башарти ана шу транспорт воситалари эгалик қилиш ҳуқуқи мерос қолдириш, қонунда назарда тутилган ҳадя этиш ёки бошқа ҳоллар оқибатида юзага келса.

3. Республикада ташқарига ўқишга, ишга, ҳарбий хизматга, узоқ муддатли хизмат сафарига кетган Ўзбекистон Республикаси фуқароларига ёзма аризалари асосида уларга қарашли транспорт воситаларини уларнинг розилиги билан қариндошларнинг турар-жойларига, шунингдек, эгасининг аввалги турар-жой майдони яшаш учун унинг номида сақланиб қолган бўлса, аввалги турар-жойига рўйхатдан ўтказиш учун рухсат этилади.

Айрим сабабларга кўра транспорт воситасининг эгаси рўйхатдан ўтказиш бўлимларига кела олмаса, транспорт воситаси эгасининг вакили томонидан нотариал идораларидан берилган ишонч қоғози ва қонуний сотиб олинганлигини тасдиқловчи ҳужжатлар асосида рўйхатдан ўтказилади.

Транспорт воситаларини ҳарбий хизматчилар номига рўйхатдан ўтказиш турар-жойга рўйхатдан ўтказилганлиги тўғрисидаги ички ишлар органи ёки уй-жой ажратилганлиги тўғрисида ҳарбий қисм томонидан берилган маълумотномаларга асосан амалга оширилади.

4. Транспорт воситалари юридик шахслар амалда яшаётган манзилда рўйхатдан ўтказилади. Агар маҳаллий ҳокимиятларнинг қарорларида кўрсатилган бўлса, корхоналарга қарашли транспорт воситаларини уларнинг юридик шахс ҳисобланмаган филиаллари, бир тизимдаги бошқа бўлим ва бўлинмалари жойлашган ерда транспорт воситасини ижарага олган корхона жойлашган ерда рўйхатдан ўтказишга рухсат этилади. Бундай ҳолларда қайд этиш гувоҳномасида транспорт воситаси эгасининг номи, унинг манзили ва қўшимча равишда транспорт воситаси турадиган жой кўрсатилади.

5. Техник жиҳатдан соз деб рўйхатдан ўтказилган транспорт воситаларига қайд этиш гувоҳномаси ва давлат рақами белгилари билан биргаликда давлат техника кўригидан ўтганлиги тўғрисида махсус талон берилади. Техник носоз деб топилган транспорт воситалари рўйхатдан ўтказилганда қайд этиш гувоҳномаси ва давлат рақами белгилари берилади, лекин махсус талон берилмайди, Техник носозлик бартараф этилгач, махсус талон ҳудудий ДАН органлари томонидан берилади.

6. Бир транспорт воситасига бириктирилган давлат рақами белгиларини бошқа транспорт воситасига ўрнатиб фойдаланиш қатъиян ман этилади.

7. ДАН органларида юридик ёки жисмоний шахсларга тегишли транспорт воситалари эгаси (корхона) нинг ёзма аризаси ҳамда қонуний сотиб олинганлигини, рўйхатдан ўтказиш учун белгиланган йиғимлар тўланганлигини тасдиқловчи ҳужжатлар асосида рўйхатдан ўтказилади.

8. Кредитга берилган транспорт воситасининг қайд этиш гувоҳномасига ҳамда унинг ҳисоб карточкасига «Кредитга олинган» белгиси қўйилади ва кредитга берган ташкилотнинг розилигисиз у ДАН ҳисобидан чиқарилмайди.

9. Транспорт воситаларини, уларнинг рақамли агрегатларини рўйхатдан ўтказишда, эгаси ўзгариши билан қайта рўйхатдан ўтказишда, ҳисобдан чиқариш вақтида транспорт воситаси ҳақидаги маълумотлар ДАН РИБ (ТРИБ) лари томонидан Ўзбекистон ва Қорақалпоғистон Республикаси ИИВ, Тошкент шаҳар ИИББ ва вилоятлар ИИБ ахборот марказларидаги олиб қочилган ёки ўғирланган транспорт воситалари рўйхати билан солиштирилади.

10. Фуқароларга қарашли юк, юк-йўловчи ташувчи автомобиллар, автобус ва мўъжаз автобуслар тегишли ҳудудий солиқ органлари ва мудофаа ишлари бўйича бўлимларда ҳисобга қўйилганидан сўнг рўйхатдан ўтказилади.

11. Қайд этиш ҳужжатларига ўзгартиришлар киритиш зарурати бўлган вақтда техник кўрикдан ўтказиш ҳамда рақамли агрегатларнинг техник ҳужжатларга мос келишини солиштириш учун транспорт воситалари жойлардаги ДАН РИБ (ТРИБ) ларига келтирилиши шарт. Транспорт воситаси носозлиги туфайли олиб келишнинг иложи бўлмаганда ҳудудий ДАН органи томонидан муҳр билан тасдиқланган транспорт воситасини якка тартибда техник кўрикдан ўтказиш далолатномаси тақдим этилади.

12. Мустақил равишда тайёрланган транспорт воситаси унинг чизмаси, конструкциясининг ҳаракатланиш хавфсизлиги талабларига жавоб бериши ҳақидаги хулоса, ИИВ ДАН бошқармасининг рухсати ва агрегатларнинг қонуний харид этилганлигини тасдиқловчи ҳужжатлар асосида рўйхатга олинади.

13. Мотоциклга ён кажавани ўрнатиш двигатели цилиндрининг иш ҳажми 35 куб см дан ортиқ бўлган ҳамда уни ишлаб чиқарувчи завод томонидан кўзда тутилган бўлса рухсат этилади.

14. Фуқароларга ижтимоий таъминот идоралари томонидан бепул ёки имтиёзли шартлар асосида берилган транспорт воситасининг қайд этиш гувоҳномасига «Ижтимоий таъминот идораларининг рухсатисиз рўйхатдан чиқарилмайди» – деган ёзув киритилади.

15. Ногиронлар томонидан бошқариладиган транспорт воситаларига қўл бошқаруви мосламасини, «Ногирон» белгисини ўрнатиш ногироннинг ёзма аризасига мувофиқ рухсат этилади ва бу ҳақда қайд этиш гувоҳномасига ёзиб қўйилади.

16. Фирмалар, ширкатлар, қўшма, хусусий ва кичик корхоналар транспорт воситаларини қайд этиш вақтида ушбу ташкилотларни рўйхатдан ўтказувчи органлар томонидан давлат рўйхатидан ўтказилганлиги ҳақидаги ҳужжати ва низомлари кўчирмасини тақдим этадилар.

Транспорт воситалари уларни қайд этишдан олдин ҳудудий мудофаа ишлари бўйича бўлимларда рўйхатдан ўтказилади ёки рўйхатдан чиқарилади.

Янги ташкил этилган автохўжаликларни рўйхатдан ўтказиш вақтида транспорт воситаларини сақлаш учун етарли жой майдони (гараж, автосарой) мавжудлиги ёки бундай жой ижарага олинганлиги ҳақидаги шартномадан нусха, ҳудудий ДАН органи томонидан шу жойнинг кўрикдан ўтказилгани тўғрисидаги далолатнома тақдим этилади.

17. Ўзбекистон Республикаси Ички ишлар вазирлиги ДАН бошқармаси томонидан автомобиллар ишлаб чиқарувчи ёки уларни тузатувчи заводларнинг техник шартлари бўйича тажриба синовидан ўтаётган транспорт воситаларига заводнинг ёзма мурожаати ва автотранспортнинг техник шартларга мувофиқлиги тўғрисидаги экспертиза хулосасига асосан маълум муддатга (ой, чорак, йил) «Тажриба» давлат рақами белгилари ва қайд этиш гувоҳномаси берилади.

18. Синовдан ўтаётган транспорт воситаларининг тажриба намуналари ишлаб чиқариш корхонасининг ёзма мурожаати ва транспорт воситалари ҳаракатланиш хавфсизлиги ва техник шартларга мувофиқлиги тўғрисидаги экспертиза хулосаси асосида бир йилгача бўлган муддатга рўйхатдан ўтказилиб, уларга «Синов» белгиси қўйилган қайд этиш гувоҳномаси ва амалдаги давлат рақами белгилари берилади.

19. Ўзбекистон Республикаси ҳудудида махсус жиҳоз ва мосламалар ўрнатилган ёки конструкциясига ўзгартиришлар киритилган транспорт воситаларини рўйхатга олишда унга асос бўладиган ҳужжатларга қўшимча равишда қайта жиҳозлаган завод (корхона) томонидан берилган ҳужжатлар (паспорт, қабул қилиш-топшириш далолатномаси) ҳамда Ўзбекистон Республикаси ИИВ ДАН бошқармалари томонидан берилган конструкциясининг ҳаракатланиш хавфсизлиги талабларига мослиги ҳақидаги гувоҳнома нусхаси тақдим этилади.

20. Қуйидаги транспорт воситалари:

ушбу қоидаларнинг 7-бандида белгиланган ҳужжатлари бўлмаган;

агрегатлардан ва эҳтиёт қисмлардан йиғилган;

яроқсизлиги учун ДАН ҳисобидан чиқарилгандан сўнг қайта тикланган;

ёпиқ жойларда фойдаланиладиган технологик транспорт воситалари;

конларда, шахталарда ва карьерларда ишлатиладиган махсус транспорт воситалари;

Ўзбекистон Республикаси Ички ишлар вазирлиги Давлат автомобиль назорати бошқармаси билан келишилмаган ҳолда мустақил тайёрланган ёки техник шартларга хилоф равишда қайта жиҳозланган транспорт воситалари;

руль бошқаруви ўнг томонда бўлган автомобиллар ДАН томонидан рўйхатдан ўтказилмайди.

Ўзбекистон Республикаси Мудофаа вазирлиги, Миллий хавфсизлик хизмати ва ИИВ ички қўшинларга тегишли ҳарбий транспорт воситалари, юридик ва жисмоний шахсларга тегишли тракторлар, трактор тиркамалари ва ўзиюрар механизмлар, умумфойдаланиш йўлларида ишлатилмайдиган «БелАЗ», «МоАЗ» русумли автомобиллар, шунингдек, трамвай, троллейбуслар ДАН органлари томонидан рўйхатдан ўтказилмайди. Уларни рўйхатдан ўтказиш тегишли вазирлик, Давлат техника назорати ва бошқа идоралар томонидан белгиланган тартибда амалга оширилади.

1. Ўзбекистон Республикаси ҳудудига бошқа давлатлардан вақтинчалик фойдаланиш учун олиб келинган транспорт воситалари вақтинчалик рўйхатдан ўтказилиши шарт.

2. Вақтинчалик рўйхатдан ўтказишда транспорт воситасининг аввалги техник ҳужжатлари (техпаспорт, техталон, қайд этиш гувоҳномаси) ва давлат рақами белгилари олиб қолиниб, улар РИБ (ТРИБ) ларида сақланади. Уларнинг ўрнига қайд этиш гувоҳномаси ва илгари фойдаланиладиган миллий давлат рақами белгилари берилади. Транспорт воситасидан фойдаланувчининг номига қайд этиш гувоҳномаси тўлдирилади. Қайд этиш гувоҳномасининг орқа томонига ҳақиқий эгаси (ташкилот) нинг номи, манзили ва техник ҳужжати, давлат рақами белгиси тўғрисидаги маълумотлар ҳамда вақтинчалик рўйхатдан ўтганликнинг амал қилиш муддати ёзиб қўйилади.

3. Транспорт воситалари 2 йилгача муддатга вақтинчалик рўйхатдан ўтказилади ва зарур бўлган ҳолларда эгасининг илтимосига кўра бу муддат узайтириб берилиши мумкин, лекин узайтириш муддати 6 ойда ошмаслиги керак.

4. Транспорт воситаларини вақтинчалик рўйхатдан ўтказишдан олдин улар ҳақидаги маълумотлар Ўзбекистон ва Қорақалпоғистон Республикаси ИИВ, Тошкент шаҳар ИИББ ва вилоятлар ИИБ ахборот марказларидаги ўғирланган ва олиб қочилган транспорт воситалари рўйхати билан солиштирилади.

5. Ўзбекистон Республикасининг бошқа ҳудудларидан келган транспорт воситаларини вақтинчалик рўйхатдан ўтказишда транспорт воситаларининг вақтинчалик рўйхатдан ўтказишда транспорт воситаларининг давлат рақами белгилари ва техник ҳужжатлари олинмайди, балки қайд этиш гувоҳномаси (техпаспорт, техталонга) га вақтинчалик рўйхатдан ўтказилганлиги ҳақида белги қўйилади. Вақтинчалик рўйхатдан ўтказиш учун нотариал идораси томонидан берилган ишонч қоғози, ижара шартномаси, меҳнат шартномаси, хизмат сафари гувоҳномаси нусхалари асос бўлиб хизмат қилади.

Шахсий транспорт воситасида 6 ойдан ортиқ муддатга келган фуқаролар паспортида яшаш жойи бўйича вақтинчалик рўйхатдан ўтганлиги (прописка) ҳақида белги бўлиши шарт.

6. Республикага ташқаридан олиб келинган транспорт воситаси ҳужжатларининг қонуний эканлигига шубҳа туғилганда ёки бошқа бирор аниқлик киритиш зарур бўлган вазият вужудга келганда, транспорт воситаси вақтинчалик рўйхатдан ўтказилади ҳамда унга вақтинчалик қайд этиш гувоҳномаси ва илгари фойдаланишда бўлган давлат рақами белгилари берилиб, транспорт воситаси аввал ҳисобда турган ДАН органларига ёки савдо ташкилотларига сўров хати юборилади.

1. Енгил автомобилларни қуйидаги тартибда қайта жиҳозлашга рухсат этилади:

«Москвич» нинг 401 моделидан кейинги барча модель ва модификацияларига;

М-20 ва М-72 «Победа» дан – ГАЗ-21, 22, 24, 2401, 2417, 31, 3102, 31029, 3105 ва кейинги енгил тоифадаги модель модификацияларига;

ГАЗ-21 ва ГАЗ-22 дан – ГАЗ-24 ва унинг кейинги модификацияларидан ГАЗ-31 ва унинг енгил тоифадаги модификацияларига;

ГАЗ-67 ГАЗ-69 ёки ГАЗ-69 «а» ёки – УАЗ-469 ва унинг кейинги енгил тоифадаги модификацияларига;

2. «Жигули» автомобилининг «ВАЗ-2101» русумидан ВАЗ заводи томонидан ишлаб чиқарилган (ВАЗ-2108, ВАЗ-2109, ВАЗ-2121дан ташқари) бурча турларига.

3. Мустақил Давлатлар Ҳамдўстлиги мамлакатларидан ташқарида ишлаб чиқарилган автомобилларнинг двигателларини ёки кузовларини алмаштириш, бир русумдан бошқасига қайта жиҳозлаш ишлаб чиқарувчи завод томонидан кўзда тутилган ҳоллардагина Ўзбекистон Республикаси Ички ишлар вазирлиги ДАН бошқармаси рухсати билан амалга оширилади.

4. Ўзбекистон Республикасида ишлаб чиқарилган «ДЭУ» русумли автомобилларни «ЎзДЭУавтоКО» қўшма корхонаси тавсияномаси асосида қайта жиҳозлашга рухсат этилади.

5. Кузовнинг ташқи кўринишида сезиларли ўзгаришлар бўлмаган қуйидаги автомобиллар кузовининг ўзаро алмашиши қайта жиҳозлаш деб ҳисобланмайди:

М-408 дан 412 га ва аксинча;

М-2136 дан М-2137 га ва аксинча;

М-2138 дан М-2140 га ва аксинча;

ВАЗ-2101 дан ВАЗ 21011 га ва аксинча;

ВАЗ-2103 дан ВАЗ-2106 га ва аксинча;

ВАЗ-2105 дан ВАЗ-2107 га ва аксинча;

ВАЗ-2108 дан ВАЗ-2109 га ва аксинча;

ГАЗ-24 дан ГАЗ-2401, ГАЗ-2410, ГАЗ-2417 га ва аксинча;

ГАЗ-31029 дан ГАЗ-3102, ГАЗ-3105 га ва аксинча;

ЗАЗ 966 дан ЗАЗ 968 га ва аксинча;

ЛУАЗ-969 дан ЛУАЗ-969А, 969М ва аксинча.

Бундай кузовларни юридик шахсларга тегишли транспорт воситалари учун автотеххизмат шаҳобчалари ёки автокорхона устахоналари шароитида, шахсий автомобиллар эгаларига эса автотеххизмат шаҳобчаларида ёки мустақил равишда алмаштиришга рухсат этилади.

Мустақил равишда алмаштирилган кузовларни қайта рўйхатдан ўтказишда эгаси томонидан кузовнинг қонуний харид этилганлигини тасдиқловчи ҳужжат ва техник хизмат кўрсатиш шаҳобчасининг шу автомобилнинг йўлларда ҳаракатланиш хавфсизлиги талабларига мувофиқлиги ҳақидаги маълумотномаси тақдим этилади.

6. Қайта жиҳозлангандан ва алмаштирилгандан сўнг бўшаган кузов ва бошқа рақамли агрегатларни ДАН томонидан берилган маълумотнома асосида нотариал идоралари орқали ҳадя қилиш, айирбошлаш ёки сотиш мумкин.

7. Агар шахсий транспорт воситаси эгасининг номида шу транспорт воситаси русумига мос келувчи қўшимча двигатель бўлса, двигателнинг тури ва рақам белгилари қайд этиш гувоҳномасининг орқа томонига ёзилиб, РИБ (ТРИБ) бошлиғи ёки унинг ўринбосари имзоси ва муҳр билан тасдиқлаб берилади.

8. Ногиронларга тегишли бўлган транспорт воситалари уларнинг соғлиги тўғрисидаги тиббий хулосага кўра автотеххизмат корхоналари орқа қўл бошқарувига ўтказилишига ёки унинг аксига қайта жиҳозлашга рухсат этилади.

9. Мотоцикл ва мотороллёрларни, уларга бошқа турдаги рама, двигатель ўрнатиш Билан, қайта жиҳозлаш тақиқланади.

10. Жойлардаги РИБ, ТРИБ лари корхоналарга тегишли бўлган юк автомобиллари ва тиркамаларни мураккаб бўлмаган қайта жиҳозлашга ИИВ томонидан белгиланган тартибда автокорхоналарнинг устахоналари шароитида амалга оширишга рухсат беради.

11. Жойлардаги РИБ, ТРИБ лари фуқароларга тегишли бўлган транспорт воситаларини мураккаб бўлмаган қайта жиҳозлашга ИИВ томонидан белгиланган тартибда автотузатиш заводлари ёки автокорхоналарнинг устахоналари шароитида амалга оширишга рухсат беради.

12. Газ ёнилғиси билан ишловчи мослама ўрнатилиб қайта жиҳозланган автомобилларни қайта рўйхатдан ўтказиш учун белгиланган тартибда бундай қайта рўйхатдан ўтказиш учун белгиланган тартибда бундай қайта жиҳозлаш ишларига рухсати бўлган корхоналар томонидан берилган қабул қилиш-топшириш ва синовдан ўтказиш далолатномаси (паспорти), Ўзбекистон Республикаси ИИВ ДАН бошқармасидан берилган конструкциясининг ҳаракатланиш хавфсизлиги талабларига мувофиқлиги ҳақидаги гувоҳнома асос бўлиб хизмат қилади.

13. Ўзбекистон Республикаси ИИВ ДАН бошқармаси, Қорақалпоғистон Республикаси ИИВ, Тошкент шаҳар ИИББ ва вилоятлар ИИБ ДАН бошқарма-бўлимлари бошлиқлари томонидан давлараро иқтисодий ҳамкорлик алоқаларида иштирок этаётган ва узоқ (1000 км дан ортиқ) масофага қатнайдиган юк автомобилларига қўшимча ёнилғи идишини ўрнатишга рухсат этилади.

14. Юк автомобилларининг корхонаси тент билан жиҳозлаш ва бортини кўтариш ИИВ ДАН бошқармаси белгиланган тартибда амалга оширилади.

15. Транспорт воситаларининг конструкциясига ушбу қоидаларда кўзда тутилмаган ўзгартиришлар киритиб қайта жиҳозлаш Ўзбекистон Республикаси ИИВ ДАН бошқармаси рухсати асосида амалга оширилади.

1. Транспорт воситалари ушбу ҳолларда қайта рўйхатдан ўтказилади:

Транспорт воситаларининг турган ўрни ёки эгасининг яшаш жойи ўзгарганда, қуйидаги ҳужжатлар асосида:

белгиланган тартибдаги ариза;

техник ҳужжат (қайд этиш гувоҳномаси, техник паспорт, техник талон);

корхона ва ташкилотлар транспорт воситаларининг турган ўрни ўзгаришига асос бўлган ҳужжат (буйруқ, ижара шартномаси, ҳокимлик қарори);

транспортларнинг турган ўрнини ҳудудлардаги ДАН органлари томонидан кўрикдан ўтказилганлиги ҳақидаги далолатнома;

фуқаролар учун шахсий паспорт ёки унинг ўрнига берилган ҳужжат.

Ташкилотнинг номи, эгасининг фамилияси, исми ва отасининг исми ўзгарганда, қуйидаги ҳужжатлар асосида:

белгиланган тартибдаги ариза;

номи ўзгарганлигини тасдиқловчи ҳужжат (буйруқ, фармойиш, қарор);

фуқаролар учун шахсий паспорт, фамилияси, исми ва отасининг исми ўзгарганлигини тасдиқловчи ҳужжат (фуқаролик ҳолатини қайд этиш органи ёки суд органи томонидан берилган ҳужжат).

Эгаси ўзгарганда, қуйидаги ҳужжатлар асосида:

белгиланган тартибдаги ариза;

нотариал идоралари томонидан берилган олди-сотди, ҳадя, айирбошлаш шартномалари, ворислик, мерос ва мулкка эгалик қилиш ҳуқуқини берувчи гувоҳномалар;

суд қарори;

Ўзбекистон Республикаси Давлат мулки қўмитаси идоралари томонидан берилган ордер;

четдан келтирилган ва божхона назорати остида турган транспорт воситалари учун божхона идораси томонидан бериладиган махсус гувоҳнома;

бир вазирликка қарашли ва бир молиявий тизимдаги ташкилотлар учун юқори органларнинг ДАН рўйхатида бўлган транспорт воситаларини балансдан балансга бепул ажратилганлиги тўғрисидаги буйруғидан кўчирма.

Қайта жиҳозлаш, ранги, рақамли агрегатлари ўзгарганда, қуйидаги ҳужжатлар асосида:

белгиланган тартибдаги ариза;

рақамли агрегатлар қонуний сотиб олинганлиги тўғрисида ҳужжат (ҳисоб-маълумотнома, олди-сотди шартномаси, божхона гувоҳномаси) кирим касса ордери ва юк хати (накладной), автотузатиш заводининг паспорти, қабул қилиш-топшириш далолатномаси);

бир заводда ишлаб чиқарилган, бир-бирига мос келадиган транспорт воситаларининг (ВАЗ-2101-21011, М-408-412, ГАЗ-24-2410, шунга ўхшаш) баъзи қисмлари (бампер, фара, огоҳлантириш ёритгичлари, олд ва орқа панели, капот ва қанотлари) ўзгарганда, техник хизмат кўрсатиш шаҳобчалари томонидан берилган буюртма-наряд, маълумотномалар (агар шу эҳтиёт қисмлар бозордан сотиб олинган бўлса, бундан ташқари, эгасининг тушунтириш хати);

транспорт воситаси уй шароитида мустақил равишда бўялганда эгасининг тушунтириш хати.

Қайта жиҳозланган транспорт воситаларини қайта рўйхатдан ўтказиш, қуйидаги ҳужжатлар асосида амалга оширилади:

юридик шахслар учун:

белгиланган тартибдаги ариза;

давлат ташкилотлари учун юқори ташкилотнинг буйруғи, нодавлат ташкилотлари учун умумий мажлис баёни ёки қарори (буйруғи);

яроқсиз, кераксиз эҳтиёт қисмлар ёки махсус мосламалар хўжалик ҳисобидан чиқарилганлиги ёки ечиб олинганлиги тўғрисидаги далолатнома;

ҳудудий ДАН бошқармалари РИБ (ТРИБ) ларидан берилган хулоса;

давлат ташкилотига тегишли транспорт воситалари ва шахсий юк автомобиллари; автобус, мўъжаз автобуслар учун ҳудудлардаги мудофаа ишлари бўйича бўлимнинг ёзма рухсатномаси;

қайта жиҳозланган транспорт воситасига РИБ (ТРИБ) лари томонидан техник ҳолат тўғрисида тузилган далолатнома;

ўрнатилган двигателга автоузатиш корхонаси томонидан берилган паспорт;

қайта жиҳозланган автомобилни қабул қилиш-топшириш далолатномаси;

махсус мослама ўрнатилган транспорт воситалари учун Ўзбекистон Республикаси ИИВ ДАН бошқармаси томонидан конструкцияси келишилганлиги тўғрисида берилган гувоҳнома нусхаси.

Транспорт воситаси автотузатиш корхонаси томонидан қайта жиҳозланган бўлса, қайд этиш гувоҳномасида унинг қайта жиҳозланган вақти, ўрнатилган агрегат рақамлари ҳақида шу корхонанинг белгиси бўлиши лозим.

Шахсий фойдаланишдаги автомобиллар учун:

белгиланган тартибдаги ариза;

рақамли агрегатлар ва транспорт воситасига ўрнатилган эҳтиёт қисмлар қонуний равишда сотиб олинганлиги тўғрисидаги ҳужжат (олди-сотди шартномаси, ҳисоб-маълумотнома), агар бозордан сотиб олинган бўлса (рақамли агрегатлардан ташқари), эгасининг тушунтириш хати;

қайта жиҳозланган транспорт воситасига РИБ (ТРИБ) лари томонидан техник ҳолат тўғрисида тузилган далолатнома;

ҳудудий ДАН бошқармалари РИБ (ТРИБ) ларидан берилган хулоса;

техник хизмат кўрсатиш шаҳобчаларининг буюртма-наряди ёки автотузатиш заводларидан берилган қабул қилиш-топшириш далолатномаси;

ўрнатилган двигателга паспорт.

Мустақил равишда қайта жиҳозланган транспорт воситаларини қайта рўйхатдан ўтказишда эгасининг ёзма тушунтириш хати ва техник хизмат кўрсатиш шохобчасининг шу автомобиль қай даражада тўғри қайта жиҳозланганлиги ҳамда йўлларда ҳаракатланиш хавфсизлиги талабларига мос келиши ҳақидаги маълумотномаси тақдим этилади.

2. Қайта жиҳозланган транспорт воситалари қайд этиш гувоҳномасининг «ишлаб чиқарилган йили» бандига ( — ) чизиб қўйилади ва гувоҳноманинг «Алоҳида белгилар» бўлимига «Автомобиль _____________ русумдан ___________ русумга қайта жиҳозланган, кузовнинг рақами ________________» деб ёзилади ва РИБ (ТРИБ) лари бошлиғи имзоси ва муҳр билан тасдиқланади.

3. Транспорт воситасининг ҳадя шартномасида ёки мерос ҳуқуқи гувоҳномасида бир неча шахс кўрсатилган бўлса, барча мулк эгаларининг ёзма розилигига асосан транспорт воситаси улардан фақат биттасининг номига қайта рўйхатдан ўтказилади. 18 ёшга тўлмаган меросхўр номидан ёзма рухсатномани васийлик ва ҳомийлик идоралари беради.

4. Бир вазирлик, идора, ташкилотларга қарашли ва бир молиявий тизимдаги бир ташкилот балансидан иккинчи ташкилот балансига транспорт воситалари юқори идораларнинг бепул ажратилганлиги тўғрисидаги буйруғидан кўчирма асосида қайта рўйхатдан ўтказилади.

5. Суд ёки божхона идоралари қарорлари билан мусодара қилинган транспорт воситаларини маҳаллий ҳокимият қарори билан махсус ажратилган савдо шаҳобчалари орқали сотишга рухсат этилади. Бундай транспорт воситалари ҳисоб-маълумотнома, суд ёки божхона идораси қарори нусхаси асосида техник ҳужжат (тех-паспорт, қайд этиш гувоҳномаси) ларсиз рўйхатдан ўтказилади.

Мусодара қилинган транспорт воситаларини солиқ, молия, божхона, прокуратура, суд, ички ишлар, адлия органлари ҳамда уни сотган ташкилотнинг ходимлари сотиб олиши тақиқланади.

6. Ички ишлар органлари томонидан белгиланган жойларда сақлаш муддати тугаган ва эгасиз деб топилган, жойлардаги ҳокимликлар қарорлари билан давлат ҳисобига ўтказилган ва 5-бандда кўрсатилган савдо шаҳобчалари орқали сотилган транспорт воситалари уларнинг янги эгалари номига ҳисоб-маълумотнома ва ҳокимлик қароридан кўчирма асосида техник ҳужжат (қайд этиш гувоҳномаси, техник паспорт, техник талон)ларсиз белгиланган тартибда рўйхатдан ўтказилади.

7. Яроқсиз ҳолга келиб қолган ёки йўқолган давлат рақами белгилари ва қайд этиш гувоҳномалари ўрнига янгилари транспорт воситаси эгасининг аризасига асосан тегишли тўловлар ундирилгандан, рақамли агрегатлар текширилгандан сўнг берилади. Йўқолган қайд этиш гувоҳномаси (техпаспорт) ўрнига янгиси ҳисоб карточкасидаги маълумотлар асосида тўлдирилади ҳамда гувоҳноманинг «Алоҳида белгилар» бўлимига «Такрорий» деган белги қўйилади.

8. Эгаси ўзгарганлиги туфайли ҳисобдан чиқарилиб олиб келинган транспорт воситасининг қайд этиш гувоҳномаси (техпаспорт, техталон) рўйхатдан ўтказиш бўлимига мурожаат этгунга қадар йўқолган бўлса, у ҳолда транспорт воситаси аввалги ҳисобда турган жойдаги ДАН РИБ (ТРИБ) ларидан олинган тасдиқнома асосида рўйхатдан ўтказилади.

9. Фуқаролар томонидан 1991 йил 1 октябрга қадар сотиб олинган ва рўйхатдан ўтказилмаган кажавасиз мототранспорт воситасининг ҳужжатлари йўқолган бўлса, унинг нусхасини тиклашнинг ёки тасдиқномасини олишнинг иложи бўлмаса, мототранспорт эгасининг манзили бўйича ИИБ бошлиғи томонидан тасдиқланган участка вакилининг хулосаси асосида ҳамда ИИВ (ИИБ) ахборот марказидаги олиб қочилган ва ўғирланган мототранспортлар рўйхатидан текширилгандан сўнг рўйхатдан ўтказилади.

10. Эски намунадаги қайд этиш гувоҳномалари (техник паспортлар, техник талонлар) транспорт воситалари эгаларининг аризаларига асосан умумий белгиланган тартибда янги намунадаги қайд этиш гувоҳномаларига алмаштирилади.

1. Транспорт воситалари қуйидаги ҳолларда ДАН ҳисобидан чиқарилади:

транспорт воситалари фойдаланишга яроқсиз деб топилганда;

транспорт воситалари эгаси,эгасининг доимий турар-жойи ўзгарганда, РИБ (ТРИБ) хизмат кўрсатувчи ҳудуд (шаҳар, вилоят, республика) дан ташқарига олиб чиқиб кетиш зарурати туғилганда.

2. Юридик шахсларга тегишли транспорт воситаларининг барча турлари ва фуқароларга тегишли юк, юк-йўловчи ташувчи, автобус ва мўъжаз автобуслар ДАН ҳисобидан чиқарилишидан олдин ҳудудий мудофаа ишлари бўйича бўлимлар ҳисобидан чиқарилиши лозим.

3. Транспорт воситаларини ҳисобдан чиқаришда уларнинг агрегат рақами белгилари қайд этиш ҳужжатларига мос келишини аниқлаш учун улар РИБ (ТРИБ) ларида ёки жойлардаги ДАН бўлим (бўлинма) ларида техник кўрикдан ўтказилади (яроқсиз ҳолга келган транспорт воситалари бундан мустасно).

4. Транспорт воситаларининг Қорақалпоғистон Республикаси, Тошкент шаҳри ҳамда вилоятлар ҳудудидан олиб чиқиб кетилиши муносабати билан ҳисобдан чиқаришда уларни давлат рақами белгилари топширилиб, ўрнига «Транзит» рақами белгилари берилади ва транспорт воситасини қайд этиш гувоҳномасига ҳисобдан чиқариш сабаблари, кимнинг номига берилганлиги, қаерга кетаётганлиги ва қачон ҳисобдан чиқарилганлиги ёзиб берилади.

5. Фойдаланишга яроқсиз деб топилган транспорт воситаларининг қайд этиш гувоҳномалари, давлат рақами белгилари РИБ (ТРИБ) ларига топширилади.

6. Давлат рақами белгилари йўқолган транспорт воситасини ҳисобдан чиқаришда, ҳудудий ДАН органларида текширилганидан сўнг бу ҳақда қайд этиш гувоҳномасига ва ҳисоб карточкасига ёзиб қўйилади.

Қайд этиш гувоҳномаси (техпаспорти, техталони) йўқолган транспорт воситасини ҳисобдан чиқаришда аризага ҳудудий ДАН органларида текширилганлиги ҳақида белги қўйилганидан сўнг эгаси номига маълумотнома ёзиб берилади.

7. Ижтимоий таъминот идоралари томонидан бепул ёки имтиёзли равишда берилган, турли ташкилотлар томонидан кредитга сотилган транспорт воситалари шу идоралар ва ташкилотларнинг рухсати асосида ҳисобдан чиқарилади.

8. Қуйидаги ҳолларда транспорт воситалари ҳисобдан чиқарилмайди:

юридик шахсларга тегишли транспорт воситалари бошқа вилоят, шаҳар, республикага хизмат юзасидан сафарга юборилаётган ёки фойдаланиш учун ижарага берилаётган бўлса;

юридик ва жисмоний шахсларнинг транспорт воситаларини суриштирув органлари ҳисобдан чиқаришни тақиқлаган бўлса.

Иш юритиш Ўзбекистон Республикаси Ички ишлар вазирлиги томонидан тасдиқланадиган тартибга асосан олиб борилади.

1. Шахсий транспорт воситаларига бериладиган миллий давлат рақами белгилари

Бу давлат рақами белгиларининг фони оқ рангда, четки қисми, рақами ва ҳарфлари қора рангда. Ҳудудий код рақами ҳаво рангда.

Ўзбекистон Республикаси фуқароларининг шахсий енгил, юк, юк йўловчи ташиш автомобиллари ва автобусларига бир жуфт (орқа ва олд томонига) берилади.

2. Давлат идоралари, муассасалари, жамоа ташкилотлари, ширкатлар ва бошқа юридик шахсларга тегишли транспорт воситаларига бериладиган миллий давлат рақами белгилари

Бу давлат рақами белгиларининг фони оқ рангда, четки қисми, рақами ва ҳарфлари қора рангда. Ҳудудий код рақами ҳаво рангда.

Давлат органлари, муассасалари, жамоа ташкилотлари, ширкатлари ва бошқа юридик шахсларга тегишли транспорт воситаларига берилади. Енгил автомобиллар учун бир жуфт (олд ва орқа) ҳамда юк, юк йўловчи ташиш автомобиллари, автобусларга бир дона (олд томонига) берилади.

3. Давлат органлари, муассасалари, жамоа ташкилотлари, ширкатлари ва бошқа юридик шахсларга тегишли юк, юк-йўловчи ташиш автомобиллари ва автобусларга бериладиган орқа миллий давлат рақами белгилари

Бу давлат рақами белгиларининг фони оқ рангда, код рақами ҳаво ранг, қолган рақам ва ҳарфлари қора рангда.

Давлат органлари, муассасалари, жамоа ташкилотлари, ширкатлар ва бошқа юридик шахсларга тегишли юк, юк-йўловчи ташиш автомобиллари, автобусларга бир дона (орқа томонига) берилади.

4. Мотоцикл, мопед, моторёллёр, мотокажаваларга бериладиган миллий рақами белгиси

Бу давлат рақами белгиларининг фони оқ рангда, ҳудудий код рақами ҳаво ранг, қолган рақам ва ҳарфлар қора рангда.

Кимга қарашлигидан қатъи назар, ҳамма мотоцикл, мопед, мотороллёр, мотокажаваларга орқа давлат рақами белгиси сифатида берилади.

5. Автомобиль тиркамалари ва ярим тиркамаларга бериладиган давлат рақами белгилари

Бу давлат рақами белгиларининг фони оқ рангда, ҳудудий код рақами ҳаво ранг, қолган рақам ва ҳарфлар қора рангда.

Ушбу давлат рақами белгилари автомобиль тиркамлари (мотоцикл ва мотороллёрнинг орқа тиркамлари билан) ва ярим тиркамларига берилади.

1. Чет эл дипломатик ваколатхоналари бошлиқлари транспорт воситаларига бериладиган давлат рақами белгилари

«CMD» серияли махсус рақам белгиси чет эл дипломатик ваколатхоналари раҳбарларининг хизмат ёки шахсий автомобилларига элчихонанинг сўров хати ҳамда Ўзбекистон Республикаси Ташқи ишлар вазирлиги томонидан тақдим этилган рўйхат асосида берилади.

Ушбу давлат рақами белгиларининг фони яшил рангда, ҳарф ва рақамлари оқ рангда. Олдинги иккита рақам дипломатик ваколатхона рақами ва охирги икки рақам автомобилнинг рақами белгисидир.

2. Чет эл дипломатик ва консуллик ваколатхоналари ходимлари ҳамда уларнинг оила аъзоларига тегишли автомобилларга бериладиган давлат рақами белгилари.

«D»серияли махсус рақам белгиси хорижий давлат элчиларига тенглаштирилган шахслар, шунингдек, чет эл ваколатхоналари, ташкилотларининг дипломат даражасидаги ходимларининг хизмат автомобилларига ва уларнинг оила аъзоларига тегишли транспорт воситаларига элчихона ва консуллик ваколатхоналарининг сўров хати ҳамда Ўзбекистон Республикаси Ташқи ишлар вазирлиги томонидан тақдим этилган рўйхат асосида берилади. «D» серияли махсус рақам белгиларини олиш учун Ўзбекистон Республикаси Ташқи ишлар вазирлиги томонидан берилган дипломатик, консуллик карточкаси тақдим этилиши лозим.

Ушбу давлат рақами белгиларининг фони яшил рангда, ҳарф ва рақамлари оқ рангда. Олдинги иккита рақам дипломатик ваколатхона рақами ва охирги икки рақам автомобилнинг рақами белгисидир.

3. «UN» серияли махсус рақам белгиси бирлашган Миллатлар Ташкилотининг (БМТ) республикамиздаги вакилларига берилади.

Рақам белгилари ташкилотнинг сўров хати ҳамда Ўзбекистон Республикаси Ташқи ишлар вазирлиги томонидан берилган дипломатик карточкалар ёки миллий паспортлар асосида тақдим этилади.

4. Чет эл дипломатик ва консуллик ваколатхоналари, халқаро банк ва ташкилотларнинг маъмурий-техник ва хизмат кўсатувчи ходимларига тегишли автомобилларга бериладиган давлат рақами белгилари

«Т» серияли махсус рақам белгиси элчихона, консуллик ваколатхонаси ёки халқаро ташкилотларнинг сўров хати ҳамда Ўзбекистон Республикаси Ташқи ишлар вазирлиги томонидан тақдим этилган рўйхат асосида берилади. Шахсий автомобилларга «Т» серияли рақам белгиларини олиш учун Ўзбекистон Республикаси Ташқи ишлар вазирлиги томонидан берилган дипломатик, консуллик карточкаси тақдим этилади.

Ушбу давлат рақами белгиларининг фони яшил рангда, ҳарф ва рақамлари оқ рангда олдинги иккита рақам дипломатик ваколатхона рақами ва охирги икки рақам автомобилнинг рақами белгисидир.

5. Ўзбекистон Республикаси ҳудудида доимий аккредитация қилинган ва белгиланган тартибда фаолият кўрсатаётган чет эл фирмалари, ширкатлари, банклари, авиакомпаниялари, қўшма корхоналарига ва уларнинг ходимлари транспорт воситаларига бериладиган давлат рақами белгилари

«М» серияли махсус рақам белгиси Ўзбекистон Республикаси Ташқи ишлар вазирлигининг хати асосида берилади.

Шахсий транспорт воситаларига «М» серияли рақам белгиларини олиш учун эса ички ишлар органларида қайд этилган миллий паспортлар ҳам тақдим этилиши лозим.

Ушбу давлат рақами белгиларининг фони мовий рангда, ҳарф ва рақамлари оқ рангда. Олдинги сон чет давлатнинг шифр рақами ва охирги икки сон – автомобилнинг рақами белгисидир.

6. Чет эл оммавий ахборот воситаларининг ваколатхоналари ҳамда уларнинг ходимларининг автомобилларига бериладиган давлат рақами белгилари.

«К» серияли махсус рақам белгиси Ўзбекистон Республикаси Ташқи ишлар вазирлигининг хатига асосан берилади.

Шахсий транспорт воситаларига «К» серияли рақам белгилари олиш учун мухбирларнинг ёки Ўзбекистон Республикаси Ташқи ишлар вазирлиги томонидан берилган гувоҳномаси, уларнинг оила аъзолари учун эса ички ишлар органларида қайд этилган миллий паспорт ҳам тақдим этилиши лозим.

Ушбу давлат рақами белгиларининг фони мовий рангда, ҳарф ва рақамлари оқ рангда. Олдинги иккита сони чет давлатнинг шифр рақами ва охирги икки сон — автомобилнинг рақами белгисидир.

7. Ўзбекистонда доимий яшаётган чет эл фуқаролари ва фуқаролиги бўлмаган шахсларнинг транспорт воситаларига бериладиган давлат рақами белгилари

«Н» серияли махсус рақам белгиси Ўзбекистон Республикасига шахсий, хизмат ишлари билан ёки ўқишга келган хорижий фуқароларга ижарага берилган, виза бўйича доимий яшовчи хорижий фуқаролар ёки фуқаролиги бўлмаган шахсларнинг транспорт воситаларига берилади.

Транспорт воситалари ушбу шахсларнинг номига умумий тартибда ҳисобга олинади. Ички ишлар органлари томонидан қайд этилган миллий паспортлар, фуқаролиги бўлмаган шахсларнинг паспортлари ёки келиш визаларига асосан хорижга чиқиш-келиш ва фуқаролик бўлимлари томонидан рўйхатга олинганидан сўнг рақам белгиси ва қайд этиш гувоҳномаси берилади.

Ушбу давлат рақами белгиларининг фони сариқ рангда, ҳарф ва рақамлари оқ рангда. Ҳудудий кон рақами ҳаво рангда.

8. Ўзбекистондан бутунлай чиқиб кетаётган чет эл ваколатхоналари, фуқаролари ва фуқаролиги бўлмаган шахсларнинг транспорт воситаларига бериладиган давлат рақами белгилари

Транспорт воситасига «Р» серияли махсус рақам белгиси бериш учун хорижий фуқароларга кетиш визалари, фуқаролиги бўлмаган шахслар учун «фуқаролиги бўлмаган шахс гувоҳномаси ва гувоҳномага кетиш визаси» асос бўлади.

Ушбу давлат рақами белгиларининг фони сариқ рангда, ҳарф ва рақамлари оқ рангда Ҳудудий код рақами ҳаво рангда.

Ушбу давлат рақами белгилари бутунлай чиқиб кетаётган чет Эл ваколатхоналари транспортларига ҳамда чет эл фуқаролари ва фуқаролиги бўлмаган шахсларнинг транспорт воситаларига берилади.

9. Бошқа давлатлардан Ўзбекистон хорижий фуқаролар ёки ташкилотлар томонидан олиб келинган транспорт воситалари божхона гувоҳномаси ёки декларациясидан кўрсатилган муддатга вақтинчалик рўйхатдан ўтказилиб, «Н» сериясидаги рақам белгилари ва фойдаланиш муддати кўрсатилган қайд этиш гувоҳномаси берилади.

Бундай транспорт воситаларининг фойдаланиш муддати тугатгандан кейин давлат рақами белгилари топширилиб, қайд этиш гувоҳномасига «Ўзбекистон Республикаси ҳудудида вақтинчалик фойдаланиш учун олиб келинган муддати тугагандан сўнг рўйхатдан чиқарилди», — деб ёзиб берилади ва «Р» турдаги давлат рақами белгилари берилади.