Уруғлик чигитни ишлаб чиқариш, унинг сифати, сақланиши ҳамда уни қайта ишлашдан олинадиган маҳсулотлардан оқилона фойдаланилиши устидан назоратни кучайтириш мақсадида Вазирлар Маҳкамаси қарор қилади:

1. «Сифат» Ўзбекистон пахта толасини сертификатлаш маркази тузилмасида Пахта чигитидан фойдаланишни назорат қилиш инспекцияси ташкил этилсин.

2. Қуйидагилар «Сифат» Ўзбекистон пахта толасини сертификатлаш маркази Пахта чигитидан фойдаланишни назорат қилиш инспекциясининг асосий вазифалари этиб белгилансин:

пахта чигити ишлаб чиқаришни, унинг миқдорини, сифатини, ундан мақсадли фойдаланишни, мулкчилик шаклларидан қатъи назар, пахта тозалаш, ёғ-мой корхоналарида пахта чигитини ҳамда уни қайта ишлашдан олинадиган маҳсулотларни сифатли сақлашнинг таъминланишини, ташиш вақтида нобуд бўлишини қисқартиришни, шунингдек қишлоқ хўжалиги корхоналарида уруғлик чигитдан фойдаланишни назорат қилиш;

пахта чигитига ва уни қайта ишлашдан олинадиган маҳсулотларга норматив-техник ҳужжатлар талабларига, шунингдек қабул қилиб олиш, юклаб жўнатиш, сақлаш, қайта ишлаш ва экспорт-импорт операцияларида уларнинг сифатини синаш методларига риоя этилишини мунтазам равишда назорат қилиш;

пахта тозалаш корхоналарида ишлаб чиқарилаётган техник чигитнинг ҳар қайси туркумини мувофиқлик сертификати берган ҳолда синашни амалга ошириш;

пахта тозалаш ва ёғ-мой саноати корхоналарига пахта чигитини сақлаш, тозалаш, қуритиш, унга ишлов бериш бўйича, шунингдек пахта тозалаш корхоналарида норматив-техник ҳужжатларни ва илғор технологияларни белгиланган тартибда жорий этиш, техник чигитни топшириш-қабул қилиб олиш механизмини такомиллаштириш масалаларида методик ёрдам кўрсатиш.

3. Пахта тозалаш корхоналари бошқарув органларининг пахта тозалаш корхоналари уруғчилик лабораторияларини хоналар, асбоб-ускуналар ва ходимлар сони билан бирга «Сифат» Ўзбекистон пахта толасини сертификатлаш маркази балансига текин бериш тўғрисидаги таклифи қабул қилинсин.

4. Қуйидагилар:

«Сифат» Ўзбекистон пахта толасини сертификатлаш маркази Пахта чигитидан фойдаланишни назорат қилиш инспекциясининг ташкилий тузилмаси 1-иловага мувофиқ;

«Сифат» Ўзбекистон пахта толасини сертификатлаш марказининг Пахта чигитидан фойдаланишни назорат қилиш инспекцияси тўғрисидаги низом 2-иловага мувофиқ;

«Сифат» Ўзбекистон пахта толасини сертификатлаш марказининг ташкилий тузилмаси ва марказий аппарати тузилмаси 3-иловага мувофиқ тасдиқлансин.

5. Қуйидагилар:

Ўзбекистон Республикаси Вазирлар Маҳкамаси ҳузуридаги «Сифат» Ўзбекистон пахта толасини сертификатлаш маркази марказий аппарати ходимларининг чекланган умумий сони 105 нафар, шу жумладан бошқарув ходимлари сони 54 нафар этиб;

пахта чигитидан фойдаланишни назорат қилиш бўйича инспекторлар сони 36 нафар, шу жумладан марказий аппаратда — 5 штат бирлиги ва минтақавий инспекторлар сони 31 нафар этиб;

лабораториялар ходимлари сони 260 нафар, шу жумладан Марказий лаборатория ходимлари сони 4 нафар ва пахта тозалаш корхоналаридан «Сифат» Ўзбекистон пахта толасини сертификатлаш маркази тасарруфига бериладиган уруғчилик лабораториялари ходимлари сони 256 нафар этиб белгилансин.

Пахта чигитидан фойдаланишни назорат қилиш инспекцияси аппаратининг ва унинг ҳудудий органлари жорий фаолиятини молиялаштириш «Сифат» Ўзбекистон пахта толасини сертификатлаш маркази томонидан, техник чигитни сертификатлаш бўйича хизматлар кўрсатишдан ҳамда бошқа хўжалик фаолиятидан тушадиган маблағлар ҳисобига амалга оширилиши белгилаб қўйилсин.

6. «Сифат» Ўзбекистон пахта толасини сертификатлаш маркази:

бир ой муддатда «Сифат» Ўзбекистон пахта толасини сертификатлаш маркази тўғрисидаги низомни қайта кўриб чиқсин ва тасдиқлаш учун Ўзбекистон Республикаси Вазирлар Маҳкамасига белгиланган тартибда тақдим этсин;

2005 йил 1 сентябргача уруғчилик лабораторияларини пахта чигитининг сифат параметрларини амалдаги давлат стандартларига мувофиқ аниқлаш имконини берадиган замонавий асбоб-ускуналар билан жиҳозлашни таъминласин;

икки ой муддатда Пахта чигитидан фойдаланишни назорат қилиш инспекциясини малакали ва тажрибали кадрлар билан таъминласин, уларни пахта чигитини миқдори ва сифати жиҳатидан ҳисобга олишнинг замонавий методларига ўқитсин.

7. Ёғ-мой корхоналарининг техник чигитни миқдори ва сифати бўйича қабул қилишни Ўзбекистон «Сифат» марказининг Пахта чигитидан фойдаланишни назорат қилиш инспекцияси вакиллари иштирокида бевосита пахта тозалаш корхоналарида амалга ошириши тартиби белгилаб қўйилсин.

8. «Ўзпахтасаноат» ва «Ўзпахтаёғ» акциядорлик жамиятлари ўз таркибига кирадиган ташкилотлар ҳамда «Ўзбекистон пахта маҳсулотларини сертификатлаш «Сифат» маркази» давлат корхонаси билан биргаликда ҳар йили пахта хом ашёси ва чигитни қайта ишлаш тугаллангандан кейин барча пахта тозалаш ва ёғ-мой корхоналарида пахта чигитини хатловдан ўтказсинлар ва омборларни тозаласинлар. Хатлов натижалари бўйича материаллар ҳар йили ҳисобот йилининг 1 августигача Вазирлар Маҳкамасига ва Ўзбекистон Республикаси Иқтисодиёт вазирлигига тақдим этилсин.

9. «Ўзстандарт» агентлиги «Сифат» Ўзбекистон пахта толасини сертификатлаш маркази, Ўзбекистон Республикаси Қишлоқ ва сув хўжалиги вазирлиги, «Ўзпахтасаноат» ва «Ёғмойтамакисаноат» уюшмалари билан биргаликда икки ой муддатда:

пахта чигити учун барча норматив ҳужжатларни ва амалдаги стандартларни хатловдан ўтказсин ҳамда зарурат бўлганда уларга белгиланган тартибда тегишли ўзгартиришлар киритсин;

техник чигитни сертификатлаш тартибини ишлаб чиқсин ва белгиланган тартибда тасдиқласин.

10. «Сифат» Ўзбекистон пахта толасини сертификатлаш маркази бюджетга даромад (фойда) солиғи ва мулк солиғи тўлашдан бир йил муддатга озод қилинсин, бўшайдиган маблағлар пахта чигитини сертификатлаш ва назорат қилиш тизимини ривожлантиришга мақсадли йўналтирилсин.

11. Вазирлар Маҳкамасининг «Сифат» Ўзбекистон пахта толасини сертификатлаш маркази фаолиятини такомиллаштириш тўғрисида» 2004 йил 7 майдаги 220-сон қарори 2-бандининг иккинчи хатбоши, 3-бандининг биринчи хатбоши ва ушбу қарорга 1-илова ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.

1. Пахта чигитидан фойдаланишни назорат қилиш инспекцияси (кейинги ўринларда Инспекция деб юритилади) «Сифат» Ўзбекистон пахта толасини сертификатлаш марказининг пахта чигити ресурсларининг ҳамда уларни қайта ишлашдан олинадиган маҳсулотларнинг сифати, сақланиши ва улардан оқилона фойдаланилиши устидан давлат назоратини амалга оширадиган таркибий бўлинмаси ҳисобланади.

2. Инспекция ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек мазкур Низомга амал қилади.

3. Инспекция, унинг ҳудудий инспекторлари ва лабораториялари давлат бошқарувининг бошқа органлари, ҳуқуқни муҳофаза қилиш органлари, маҳаллий давлат ҳокимияти органлари, жамоат бирлашмалари ва бошқа ташкилотлар билан ўзаро ҳамкорлик қилади.

4. Инспекциянинг моддий-техника таъминоти, шунингдек Инспекция ходимлари меҳнатига ҳақ тўлаш техник чигитни сертификатлаш бўйича хизматлар кўрсатишдан ва бошқа хўжалик фаолиятидан тушадиган маблағлар ҳисобига «Сифат» Ўзбекистон пахта толасини сертификатлаш маркази томонидан амалга оширилади.

5. Қуйидагилар Инспекциянинг асосий вазифалари ҳисобланади:

пахта чигити ишлаб чиқаришни, унинг миқдорини, сифатини, улардан мақсадли фойдаланишни, мулкчилик шаклларидан қатъи назар, пахта тозалаш, ёғ-мой корхоналарида пахта чигитини ҳамда уни қайта ишлашдан олинадиган маҳсулотларни сифатли сақлашнинг таъминланишини, ташиш вақтида нобуд бўлишини қисқартиришни, шунингдек қишлоқ хўжалиги корхоналарида уруғлик чигитдан фойдаланишни назорат қилиш;

пахта чигитига ва уни қайта ишлашдан олинадиган маҳсулотларга норматив-техник ҳужжатлар талабларига, шунингдек қабул қилиб олиш, юклаб жўнатиш, сақлаш, қайта ишлаш ва экспорт-импорт операцияларида унинг сифатини синаш методларига риоя этилишини мунтазам равишда назорат қилиш;

пахта тозалаш корхоналарида ишлаб чиқарилаётган техник чигитнинг ҳар қайси туркумини мувофиқлик сертификати берган ҳолда синашни амалга ошириш;

пахта тозалаш ва ёғ-мой саноати корхоналарига пахта чигитини сақлаш, тозалаш, қуритиш, уларга ишлов бериш бўйича, шунингдек пахта тозалаш корхоналарида норматив-техник ҳужжатларни ва илғор технологияларни белгиланган тартибда жорий этиш, техник чигитни топшириш-қабул қилиб олиш механизмини такомиллаштириш масалаларида методик ёрдам кўрсатиш.

6. Инспекция ўзига юкланган вазифаларни бажариш учун қуйидаги функцияларни амалга оширади:

пахта чигитининг ва уни қайта ишлашдан олинадиган маҳсулотларнинг сифати, сақланиши ва улардан оқилона фойдаланилиши устидан давлат назоратини амалга оширади;

мувофиқлик сертификати берган ҳолда техник чигитнинг ҳар бир туркумини синовдан ўтказади. Синовлар ўтказиш ва мувофиқлик сертификати бериш Ўзбекистон Республикаси Молия вазирлиги томонидан тасдиқланган нархлар бўйича тўлов асосида амалга оширилади;

пахта чигит ва уни қайта ишлашдан олинадиган маҳсулотларнинг миқдор ва сифат жиҳатидан ҳисобга олиниши тўғри юритилишини, мулкчиликнинг барча шаклларидаги корхоналарда сақлашда табиий камайиш нормалари қўлланилишининг асосланганлигини назорат қилади;

республика ҳудудида хўжалик юритувчи субъектлар ўртасида пайдо бўладиган низоли ҳолатларда, шунингдек экспорт-импорт операцияларида ўз ваколатлари доирасида уруғлик чигитнинг сифати бўйича синовлар ўтказади ҳамда жисмоний ва юридик шахслар учун хулосалар беради;

пахта чигити ва уни қайта ишлашдан олинадиган маҳсулотларнинг балансларини тузишда қатнашади, харид қилиш мўлжалланаётган хом ашёнинг сифати, шу жумладан импорт бўйича, шунингдек уни экспорт қилишда таклифлар киритади;

уруғлик чигитни ишлаб чиқариш, сақлаш ва қайта ишлаш билан шуғулланувчи корхоналар ва ташкилотлар раҳбарларининг пахта чигитининг сифати, сақланиши ва улардан оқилона фойдаланиш масалалари бўйича ҳисоботларини эшитади;

пахта чигити ва уни қайта ишлашдан олинадиган маҳсулотлардан фойдаланиш билан боғлиқ бўлган технология жараёнлари билан тартибга солинган сифат, сақлаш, оқилона фойдаланиш, ҳисобни юритиш масалалари бўйича, шу жумладан ишлаб чиқариш, ташиш ва сақлаш пайтида маҳсулот чиқиши миқдорини аниқлаш, уларнинг табиий камайиши нормалари масалалари бўйича норматив-техник ҳужжатларни белгиланган тартибда ишлаб чиқиш, тасдиқлаш ва манфаатдор идоралар билан келишишда иштирок этади;

пахта чигитидан фойдаланиш устидан назорат бўйича давлат инспекторларининг иш тартибини белгилаб берадиган текшириш қоидаларини, шунингдек пахта чигити ва уни қайта ишлашдан олинадиган маҳсулотларнинг мувофиқлик сертификатлари шаклларини ишлаб чиқади ва белгиланган тартибда тасдиқлайди;

пахта чигити ва уни қайта ишлашдан олинадиган маҳсулотларнинг сифатини ошириш ва улардан оқилона фойдаланиш давлат дастурларини тайёрлашда қатнашади;

пахта чигити сифатининг ёмонлашиши, нобудгарчилиги ҳолатлари ва сабабларини аниқлайди, зарурат бўлганда, уларни бартараф этиш юзасидан кўрсатмалар беради ҳамда Ўзбекистон Республикаси Вазирлар Маҳкамасини, маҳаллий давлат ҳокимияти органларини пахта чигити ресурслари ва уларни қайта ишлашдан олинадиган маҳсулотлар сақланиши ва улардан фойдаланиш билан боғлиқ ишларнинг ҳолати тўғрисида хабардор қилади;

пахта тозалаш ва ёғ-мой корхоналари билан биргаликда янги ҳосилдан олинган пахта чигити сифатини ҳар йили текширади, уларнинг технологик тавсифларини ўрганиб чиқади.

7. Инспекция ўзига юкланган вазифалар ва функцияларни бажариш учун қуйидаги ҳуқуқларга эга:

пахта чигити ресурслари ва уларни қайта ишлашдан олинадиган маҳсулотларни ишлаб чиқарадиган, сақлайдиган, қайта ишлайдиган ва сотадиган корхоналар ва ташкилотларни белгиланган тартибда текшириш;

корхоналар ва ташкилотларни текшириш билан боғлиқ масалалар бўйича уларнинг ҳужжатлари билан танишиш;

пахта чигити ва уни қайта ишлашдан олинадиган маҳсулотлар намуналарини корхоналарда белгиланган тартибда танлаб олиш, ўрганиб чиқиш учун уларнинг лабораторияларидан фойдаланиш ва текшириш билан боғлиқ ишларни бажариш учун зарурат бўлганда корхоналарнинг мутахассисларини жалб этиш, зарурат бўлганда пахта чигити ва уни қайта ишлашдан олинадиган маҳсулотлар намуналарини қўшимча равишда текшириш учун тегишли лабораторияларга жўнатиш;

зарурат бўлганда пахта тозалаш ва ёғ-мой корхоналари билан биргаликда автомобиль ва темир йўл транспортида келтирилган ва уларга юкланадиган пахта чигити ва уларни қайта ишлашдан олинадиган маҳсулотлар туркуми вазнини назорат тартибида тортиб кўриш;

пахта чигити ва маҳсулотлар қолдиқлари тўғрисидаги маълумотларнинг ишончлилиги асосли равишда шубҳа туғдирган ҳолларда пахта чигити ресурслари ва уларни қайта ишлашдан олинадиган маҳсулотлар қолдиқларини қайта тортиб кўрган ёки стандарт массага ўралган маҳсулотни қайта ҳисоблаб чиққан ҳолда навбатдан ташқари хатлов тайинлаш;

пахта чигити ва уни қайта ишлашдан олинадиган маҳсулотларни сақлаш учун яроқсиз бўлган идишларда сақлашни тақиқлаш, технология ва санитария режимларини қўпол равишда бузиш аниқланган тақдирда ушбу бузишлар бартараф этилгунга қадар алоҳида ишлаб чиқаришлар, цехлар ва корхоналарнинг ишини, шунингдек норматив ва техник ҳужжатлар талабларига жавоб бермайдиган пахта чигити ва уни қайта ишлашдан олинадиган маҳсулотларни мақсадли йўналиш бўйича реализация қилишни тўхтатиб қўйиш;

хўжалик юритувчи субъектларга, бирлашмаларга ва бошқа товар ишлаб чиқарувчиларга пахта чигити ва уни қайта ишлашдан олинадиган маҳсулотларнинг сифатини баҳолаш, шунингдек ўз ваколатлари доирасида хизматларнинг бошқа турларини кўрсатиш бўйича шартнома асосида хизматлар кўрсатиш.

Инспекция Ўзбекистон Республикаси қонун ҳужжатларига мувофиқ бошқа ҳуқуқларга ҳам эга бўлиши мумкин.

8. Инспекция ўзига юкланган вазифаларнинг самарали бажарилиши учун жавоб беради.

9. Инспекциянинг мансабдор шахслари ўз хизмат мажбуриятлари зарур даражада бажарилмаганлиги, шунингдек текширилаётган корхоналар ва ташкилотларнинг давлат ва тижорат сири ошкор қилинганлиги учун қонун ҳужжатларида белгиланган тартибда жавоб берадилар.

10. Инспекцияга қонун ҳужжатларида белгиланган тартибда лавозимга тайинланадиган ва лавозимдан озод қилинадиган бошлиқ бошчилик қилади.

Инспекция бошлиғи айни бир вақтда «Сифат» Ўзбекистон пахта толасини сертификатлаш маркази бош директорининг ўринбосари ҳисобланади.

11. Инспекция бошлиғи:

Инспекциянинг фаолиятига умумий раҳбарлик қилади ҳамда Инспекцияга юкланган вазифалар ва функцияларнинг бажарилиши учун шахсан жавоб беради;

қонун ҳужжатларига мувофиқ бошқа ваколатларни амалга оширади.

12. Инспекцияни тугатиш ва қайта ташкил этиш қонун ҳужжатларида белгиланган тартибда амалга оширилади.