Ўзбекистон Республикаси Президентининг «Ўзбекистон Республикаси Вазирлар Маҳкамаси ҳузурида Ўзбекистон Қишлоқ хўжалиги илмий-ишлаб чиқариш марказини ташкил этиш тўғрисида»ги Фармонини амалга ошириш, қишлоқ хўжалиги фанининг ишлаб чиқариш билан алоқасини мустаҳкамлаш, қишлоқ, ўрмон ва сув хўжалигини илмий таъминлашни бошқаришни такомиллаштириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Қишлоқ хўжалиги илмий-ишлаб чиқариш маркази (кейинги ўринларда Марказ деб аталади) таркибига кирувчи ҳудудий бўлимлар, бирлашмалар, корхоналар ва ташкилотлар рўйхати 1-иловага мувофиқ;

Марказнинг марказий аппарати тузилмаси 2-иловага мувофиқ, унинг ходимларининг чекланган сони 57 (хизмат кўрсатувчи ходимлардан ташқари) нафар ва унинг ҳудудий бўлимлари ходимларининг сони 70 нафардан иборат этиб тасдиқлансин, уларнинг харажатлари республика бюджети ҳисобидан амалга оширилади:

Ўзбекистон Қишлоқ хўжалиги илмий-ишлаб чиқариш маркази тўғрисида Низом 3-иловага мувофиқ;

Марказ ҳудудий бўлимларининг намунавий тузилмаси 4-иловага мувофиқ тасдиқлансин.

2. Марказга бош директор бошчилик қилади. Марказ бош директорининг икки нафар ўринбосари, шу жумладан бир нафар биринчи ўринбосари бўлишига рухсат берилсин. Бош директор ва унинг ўринбосарлари Вазирлар Маҳкамаси томонидан тайинланади.

Марказда Илмий-техника кенгаши ташкил этилади, унинг таркибига лавозимига кўра Марказ бош директори (Кенгаш раиси), унинг ўринбосарлари ва бош илмий котиб, Фан ва техника давлат қўмитаси раиси, Фанлар академияси президенти, Қишлоқ ва сув хўжалиги вазири, Олий ва ўрта махсус таълим вазири, Давлат ўрмон қўмитаси раиси, Гидрометеорология бош бошқармаси бошлиғи, шунингдек етакчи олимлар ва мутахассислар кирадилар. Илмий-техника кенгаши аъзоларининг шахсий таркиби (кенгаш таркибига лавозимига кўра кирадиганлардан ташқари) Вазирлар Маҳкамаси томонидан тасдиқланади.

Ўзбекистон Қишлоқ хўжалиги илмий-ишлаб чиқариш маркази бош директори мақоми ҳамда моддий ва маиший таъминот шароитларига кўра Ўзбекистон Республикаси вазирига, Марказ бош директорининг биринчи ўринбосари — вазирнинг биринчи ўринбосарига, Марказ бош директорининг ўринбосарлари Ўзбекистон Республикаси вазир ўринбосарларига тенглаштирилсин.

3. Марказ, Қорақалпоғистон Республикаси вазирлар кенгаши, вилоятлар ҳокимликлари Марказнинг ҳудудий бўлимларини ташкил этиш бўйича ташкилий тадбирларни бир ой муддатда амалга оширсинлар.

Белгилансинки, Марказнинг Қорақалпоғистон республика ва вилоятлар бўлимларининг раҳбарлари тегишли равишда Қорақалпоғистон Республикаси Вазирлар Кенгашининг ва вилоятлар ҳокимликларининг тақдимномасига кўра Марказ бош директори томонидан тайинланади.

Марказнинг Қорақалпоғистон республика бўлими ходимлари учун Қишлоқ хўжалиги фанлари академиясида амалда бўлган меҳнатга ҳақ тўлаш шартлари сақлаб қолинсин. Марказнинг вилоят бўлимлари ходимлари меҳнатга ҳақ тўлаш бўйича вилоятларнинг қишлоқ ва сув хўжалиги бошқармалари ходимларига тенглаштирилсин.

4. Марказ ва Ўзбекистон Республикаси Адлия вазирлиги икки ҳафта муддатда Марказнинг ҳудудий бўлимлари тўғрисида Намунавий низомни тасдиқласинлар.

5. Белгилаб қўйилсинки, бюджет маблағлари ва хўжалик фаолиятидан олинган даромадлар Марказ илмий-тадқиқот институтлари фаолиятини маблағ билан таъминлаш манбалари ҳисобланади.

Илмий-тадқиқот институтлари фаолиятини хўжалик шартномалари бўйича (хўжалик ҳисоби) фаолиятдан маблағ билан таъминлаш 2000 йилга бориб 50 фоизгача етказилиши лозимлиги белгилаб қўйилсин.

Марказ, унинг илмий ташкилотлари ходимлари учун Қишлоқ хўжалиги фанлари академиясида амалда бўлган меҳнатга ҳақ тўлаш шартлари сақлаб қолинсин.

6. Белгилаб қўйилсинки, Фанлар академияси ҳамда Қишлоқ ва сув хўжалиги вазирлигининг 5-иловага мувофиқ илмий-тадқиқот ташкилотлари илмий-тематик режаларининг агросаноат мажмуини ривожлантириш муаммоларига тегишли қисми Марказнинг Илмий-техника кенгаши билан келишиб олинади.

7. Марказга Марказнинг (бюджет маблағларидан ташқари) хўжалик ва тадбиркорлик фаолиятидан олинадиган, шунингдек жалб этилган бошқа маблағлар ҳисобига махсус молия ва инновация (илмий-техник ривожлантириш, инновациялар, олимларни ижтимоий ҳимоя қилиш ва бошқалар) жамғармалари ташкил этиш ҳуқуқи берилсин.

Жамғармалар тўғрисидаги низом, уларнинг маблағларини шакллантириш ва сарфлаш тартиби Ўзбекистон Республикаси Молия вазирлиги билан келишиб олинади.

8. Ўзбекистон Қишлоқ хўжалиги илмий-ишлаб чиқариш маркази Тошкент шаҳар, Усмон Юсупов кўчасидаги 1-уйга жойлаштирилсин.

9. Ўзбекистон Республикаси Молия вазирлиги:

1997-1998 йилларда Марказ буюртманомаларига биноан Марказни ва унинг ҳудудий бўлимларини замонавий компьютер ва ахборот тизимлари билан таъминлаш, уларнинг моддий-техника базасини мустаҳкамлаш учун зарур маблағлар;

Марказга 3 та енгил автомобилни янгилаш учун маблағлар ва ҳудудий бўлимлар учун 13 та енгил автомобиль харажатларига лимит ажратсин.

10. Ўзбекистон Республикаси Алоқа вазирлиги Марказни белгиланган тартибда телефон ва телекс алоқаси, шу жумладан ҳукумат алоқаси билан таъминласин.

11. Ўзбекистон Республикаси Вазирлар Маҳкамасининг 1991 йил 5 октябрдаги 252-сон ва 1996 йил 16 январдаги 26-сон қарорлари ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Қ.Ғ. Обидов зиммасига юклансин.

1. Республика ташкилотлари:

«Пахта» илмий-ишлаб чиқариш бирлашмаси, Тошкент вилояти;

«Ғўза селекцияси ва уруғчилиги» илмий-ишлаб чиқариш бирлашмаси, Тошкент вилояти;

«Племэлита» илмий-ишлаб чиқариш бирлашмаси, Тошкент вилояти;

«Дон» илмий-ишлаб чиқариш бирлашмаси, Жиззах шаҳри;

«Қоракўл» илмий-ишлаб чиқариш бирлашмаси, Самарқанд шаҳри;

Боғдорчилик, узумчилик ва виночилик илмий-ишлаб чиқариш корпорацияси, Тошкент вилояти;

Ўзбекистон ўсимликларни ҳимоя қилиш илмий-тадқиқот институти, Тошкент вилояти;

Ўзбекистон ўрмон хўжалиги илмий-тадқиқот институти, Тошкент вилояти;

Ўзбекистон сабзавот-полиз экинлари ва картошкачилик илмий-тадкиқот институти, Тошкент вилояти;

Ўзбекистон шоликорлик илмий-тадқиқот институти, Тошкент вилояти;

Ўзбекистон деҳқончилик илмий-тадқиқот институти, Тошкент вилояти;

Ўзбекистон ветеринария илмий-тадқиқот институти, Самарқанд шаҳри;

Ўзбекистон қишлоқ хўжалигини механизациялаш ва электрлаштириш илмий-тадқиқот институти, Тошкент вилояти;

Ўзбекистон пиллачилик илмий-тадқиқот институти, Тошкент шаҳри;

Ўзбекистон бозор ислоҳотлари илмий-тадқиқот институти, Тошкент шаҳри;

Деҳқончилик илмий-тадқиқот институти, Чимбой шаҳри;

А. Чудная номидаги илғор тажриба мактаби, Тошкент вилояти;

Пахтачилик бўйича марказий назорат-уруғчилик станцияси, Тошкент вилояти;

Каноп экинлари тажриба станцияси, Тошкент вилояти;

2. Марказнинг Қорақалпоғистон Республика бўлими:

Ўзбекистон шоликорлик илмий-тадқиқот институтининг Қорақалпоғистон филиали;

Ўзбекистон ўсимликларни ҳимоя қилиш илмий-тадқиқот институтининг Қорақалпоғистон филиали;

«Дон» илмий-ишлаб чиқариш бирлашмасининг Қорақалпоғистон филиали;

Ўрмон хўжалиги илмий-тадқиқот институтининг Қорақалпоғистон филиали;

Боғдорчилик, узумчилик ва виночилик илмий-ишлаб чиқариш корпорациясининг Қорақалпоғистон филиали;

«Племэлита» илмий-ишлаб чиқариш бирлашмасининг Қорақалпоғистон филиали;

Бозор ислоҳотлари илмий-тадқиқот институтининг Қорақалпоғистон филиали;

Ветеринария илмий-тадқиқот институтининг Қорақалпоғистон филиали.

3. Марказнинг вилоят бўлимлари.

1. Ўзбекистон Республикаси Вазирлар Маҳкамаси ҳузуридаги Ўзбекистон Қишлоқ хўжалиги илмий-ишлаб чиқариш маркази (кейинги ўринларда Марказ деб аталади) Ўзбекистон Республикаси Президентининг 1997 йил 6 январдаги Фармони билан ташкил этилган.

2. Марказ қишлоқ хўжалиги соҳасидаги илмий-тадқиқот институтлари, конструкторлик бюролари, илмий-ишлаб чиқариш бирлашмалари ҳамда бошқа илмий ва илмий-ёрдамчи ташкилотларнинг бирлашмаси ҳисобланади.

3. Идоравий мансублигидан қатъи назар, республика илмий муассасалари ва олий ўқув юртлари томонидан агросаноат мажмуида ўтказиладиган илмий тадқиқотларни мувофиқлаштириб борувчи орган вазифасини бажаради.

4. Марказ ўз ишларини Ўзбекистон Республикаси Қишлоқ ва сув хўжалиги вазирлиги, Фанлар академияси, Фан ва техника давлат қўмитаси ҳамда бошқа вазирликлар ва идоралар, илмий-тадқиқот ташкилотлари ва олий ўқув юртлари билан биргаликда олиб боради.

5. Марказ ўз фаолиятида Ўзбекистон Республикаси қонунларига, Ўзбекистон Республикаси Олий Мажлиси қарорларига ва бошқа ҳужжатларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга ҳамда бошқа норматив ҳужжатларга амал қилади.

6. Марказ юридик шахс ҳисобланади, Ўзбекистон Республикаси Давлат герби тасвири туширилган ва Марказнинг номи давлат тилида ёзилган муҳрга эга бўлади, Марказнинг амалдаги қонунчиликка мувофиқ банкларда жорий ва валюта ҳисоб-китоб счётлари бўлади, ўзига ажратилган маблағларни тақсимлайди ва уларни мустақил равишда тасарруф этади.

7. Қуйидагилар Ўзбекистон қишлоқ хўжалиги илмий-ишлаб чиқариш марказининг асосий вазифалари ҳисобланади:

Ватанимиз ва жаҳон илм-фани ва амалиётининг энг яхши ютуқларидан тўлароқ фойдаланишни ҳисобга олган ҳолда республика агросаноат мажмуининг энг муҳим муаммолари бўйича илмий тадқиқотларни ташкил этиш. Уларнинг натижаларини қишлоқ хўжалиги самарадорлигини янада ошириш мақсадида қишлоқ хўжалиги ишлаб чиқаришига жорий этиш;

суғориладиган, лалми ерларнинг ва ўрмон ерларининг, тоғли, чўл ҳудудлари ва яйловларнинг унумдорлигини ҳамда улардан фойдаланиш самарадорлигини ошириш илмий-услубий асосларини ишлаб чиқиш. Қишлоқ хўжалиги экинларини ўстириш, ҳосилини сақлаш ва қайта ишлашнинг, чорва моллари ва парранда ўстиришининг, ер ва сув ресурсларидан оқилона фойдаланишнинг ресурсларни тежовчи технологияларини жорий этиш;

селекция ва уруғчилик соҳасидаги тадқиқотларни кенгайтириш, селекцияга оид ютуқларни синаб кўриш ва муҳофаза қилиш;

чорвачиликнинг илмий муаммоларини, ветеринариянинг назарий асосларини ишлаб чиқиш, даволаш-олдини олиш тадбирларининг илмий асосланган тизимларини яратиш;

ўсимликларни ҳимоя қилишнинг биологик ва уйғунлаштирилган усуллари соҳасидаги тадқиқотларни ташкил этиш, кам заҳарли ербицидларни, пестицидларни, ўстириш кўмакчиларини ҳамда атроф-муҳит ва экологик жиҳатдан тоза маҳсулот олиш учун хавфсиз бўлган бошқа юқори сифатли бирикмаларни қидириб топиш;

илмий тадқиқотлар соҳасида шартнома муносабатларини ривожлантириш, тугалланган, ишланмаларни қишлоқ хўжалиги ишлаб чиқаришига жорий қилиш учун илмий ходимлар ва мутахассисларнинг манфаатдорлигини ҳамда масъулиятини рағбатлантирувчи чора-тадбирларни ишлаб чиқиш;

қишлоқ ва сув хўжалигида иқтисодий ислоҳотларни чуқурлаштириш муаммоларини ишлаб чиқиш, юқори самарали, ижтимоий йўналтирилган кўп укладли иқтисодиётни шакллантириш, товар ишлаб чиқарувчиларнинг иқтисодий мустақиллигини кенгайтириш, хўжалик ичидаги муносабатлар механизмини такомиллаштириш, қишлоқда хусусий тадбиркорликни ва кичик бизнесни ташкил қилиш;

юқори унум билан ишлайдиган, мустаҳкам ва тежамкор қишлоқ хўжалиги машиналари ва механизмларининг янги турларини яратиш ва жорий этиш;

эскидан суғориб келинаётган ерларнинг мелиоратив ҳолатини яхшилаш ва реконструкция қилишнинг илмий асосларини ишлаб чиқиш ва жорий этиш, янги ерларни ўзлаштириш, суғоришнинг илғор усулларини ва сувни тежовчи технологияларни жорий этиш;

қишлоқ хўжалигини ташкил этиш ва юритишнинг жаҳон илғор тажрибасини ўрганиш ва ижодий қўллаш, халқаро ва хориждаги етакчи илмий-тадқиқот марказлари билан ҳамкорликни ривожлантириш, тасарруфидаги ташкилотлар илмий ходимларининг чет эл илмий муассасаларида малака оширишини ташкил этиш;

юқори малакали илмий кадрлар (фан докторлари ва номзодлари) тайёрлаш;

республикада ҳамда хорижда қишлоқ ва сув хўжалиги раҳбарлари ва мутахассисларини қайта тайёрлаш ва уларнинг малакасини оширишни ташкил этишда қатнашиш;

институтлар ва олимларнинг илмий асарларини нашр этиш, илмий билимларни оммалаштириш.

8. Илмий тадқиқотларни ташкил этиш соҳасида:

республикада қишлоқ, сув ва ўрмон хўжалиги бўйича илмий тадқиқотларни мувофиқлаштиради;

ўз муассасалари кучи билан агросаноат мажмуини ривожлантиришнинг муҳим йўналишларига доир фундаментал ҳамда амалий тадқиқотлар лойиҳалари ва дастурларини ишлаб чиқади;

белгиланган тартибда илмий-тадқиқот муассасаларини, уларнинг филиалларини ва тасарруфидаги бошқа ташкилотларни ташкил қилади, қайта ташкил этади ва тугатади;

агросаноат мажмуининг муҳим долзарб йўналишлари бўйича илмий, илмий-амалий конференциялар, симпозиумлар уюштиради;

фундаментал ва амалий тадқиқотларнинг муҳим йўналишлари бўйича илмий кенгашлар, жамиятлар ва бошқа бирлашмалар ташкил қилади;

республика агросаноат мажмуини ривожлантиришнинг илмий техник потенциалини ривожлантириш, илм-фаннинг моддий базасини мустаҳкамлаш бўйича таклифлар тайёрлайди;

Вазирлар Маҳкамасининг топшириқларига, вазирликлар ва идоралар талабларига биноан агросаноат мажмуини ривожлантиришнинг йирик илмий, илмий-техник, ижтимоий-иқтисодий лойиҳалари ва дастурларини экспертизадан ўтказади, ўз ваколатлари доирасида манфаатдор ташкилотлар ва муассасалар билан биргаликда уларни муҳокама қилади;

илмий ахборотларнинг амалий банкини ташкил қилади;

Марказ ҳар йили ўз фаолияти тўғрисида Ўзбекистон Республикаси Вазирлар Маҳкамасига ҳисобот топширади.

9. Фан ва техника ютуқларини жорий этиш соҳасида:

Ўзбекистон Республикаси Қишлоқ ва сув хўжалиги вазир ҳамда бошқа идоралар билан биргаликда деҳқончилик ва чорвачиликнинг, тупроқ унумдорлигини, қишлоқ хўжалиги экинлари ҳосилдорлигини ва чорва моллари маҳсулдорлигини ошириш, қишлоқ хўжалигини интенсификациялаш, қишлоқ хўжалиги экинларининг янги серҳосил навларини минтақалаштириш бўйича ресурсларни ва энергияни тежовчи замонавий технологияларнинг илмий асосланган тизими дастурини тузади;

Марказ ташкилотлари томонидан бажарилган илмий ва техник ишланмаларнинг деҳқончилик, чорвачилик, ирригация, мелиорация ва ўрмон хўжалигига жорий этилиши устидан муаллифлик назоратини амалга оширади;

қишлоқ хўжалигининг фан ютуқларига нисбатан таъсирчанлигини ошириш, жорий этиш хизматини яхшилаш, илмий муассасалар, қишлоқ хўжалиги ҳамда сув хўжалиги корхона ва ташкилотлари ўртасидаги хўжалик ҳисоби бўйича, муносабатларни ривожлантириш бўйича таклифлар тайёрлайди;

республиканинг уруғчилик хўжаликларини бошоқли дон экинларининг, ғўза, шоли, сабзавот, ем-хашак ва бошқа экинларнинг сара ва сара уруғлари билан таъминлайди;

молларнинг янги зотларини яратиш бўйича наслчилик ишлари яхшилашга доир тадбирларни амалга оширади;

лойиҳалаш ва конструкторлик ташкилотларининг қишлоқ хўжалиги машинасозлиги, ер тузиш, мелиорация ва сув хўжалиги соҳасидаги ҳамкорлигини мустаҳкамлайди;

Марказда ҳамда жойларда фан ва техника ютуқларини ишлаб чиқаришга жорий этиш учун хўжалик ҳисобидаги бўлинмаларни ташкил қилади.

10. Марказ ўзига қарашли бўлинмаларнинг мустақиллигини ҳар томонлама таъминлаб ўз ишини коллегиаллик, яккабошчилик ва марказлаштирилган раҳбарликни бирга қўшиш асосида ташкил этади.

11. Марказга Ўзбекистон Республикаси Вазирлар Маҳкамаси томонидан тайинланадиган бош директор бошчилик қилади.

12. Марказда Ўзбекистон Республикаси Вазирлар Маҳкамаси томонидан тайинланадиган бош директорнинг биринчи ўринбосари ва ўринбосари лавозимлари жорий этилади.

13. Марказда илмий-техник кенгаш ва ҳайъат ташкил этилади.

14. Марказ ҳайъатининг қарорлари бош директорнинг буйруқлари билан ҳаётга жорий этилади.

15. Марказнинг бош илмий котиби мақомига кўра бош директорнинг ўринбосарига тенглаштирилади.

16. Марказ ўз олдида турган вазифалар доирасида вазирлик-идоралар, Қорақалпоғистон Республикаси Вазирлар Кенгаши, вилоятлар ҳокимликлари, корхоналар ташкилотлар, муассасалар олий ўқув юртларидан Марказнинг фаолияти учун зарур ахборотини белгиланган тартибда сўраш ва олиш ҳуқуқига эгадир. Зарурат бўлганда Марказ бошқа вазирликлар, идоралар ва муассасалар билан биргаликда қарорлар, буйруқлар ва йўриқномалар қабул қилади.

17. Марказнинг бош директори:

Марказга умумий раҳбарликни амалга оширади, жорий масалаларни ҳал этади, марказдаги ишларнинг аҳволи юзасидан Ўзбекистон Республикаси Вазирлар Маҳкамаси олдида шахсан жавоб беради;

юқори давлат органлари, илмий муассасалар ва хорижий ташкилотларда Марказ номидан вакиллик қилади, унинг манфаатларини ҳимоя қилади;

илмий-техник кенгаш, Марказ ҳайъати ва унинг аппарати ишини ташкил этади;

тадқиқотлар дастурини тасдиқлайди, энг муҳим илмий-тадқиқот ишлари бажарилиши устидан назоратни амалга оширади;

илмий асарлар нашр этилиши режаларини тасдиқлайди ва уларнинг бажарилишини назорат қилади;

илмий кадрлар тайёрлаш ва уларнинг малакасини ошириш ишларига раҳбарлик қилади;

долзарб илмий ва илмий-техник муаммоларни ҳал этиш, шунингдек, ташкилий масалалар учун олимлар ва мутахассисларнинг доимий ва вақтинчалик илмий ва маслаҳат жамоаларини ташкил этади;

Марказ молиявий ресурсларининг бош бошқарувчиси ҳисобланади ҳамда улардан тўғри фойдаланилиши устидан назоратни амалга оширади;

ходимларнинг белгиланган сони доирасида Марказ марказий аппарати, бюджетдан маблағ билан таъминланадиган ўзига қарашли корхоналар ва ташкилотларнинг штат жадвалини, ўзига қарашли муассасалар ва ташкилотлар тўғрисидаги низомлар (уставлар)ни тасдиқлайди;

Қорақалпоғистон Республикаси Вазирлар Кенгаши, вилоятлар ҳокимликларининг тақдимномасига кўра Марказнинг Қорақалпоғистон республика ва вилоят бўлинмалари раҳбарларини лавозимга тайинлайди ва эгаллаб турган лавозимдан озод қилади;

Марказ аппарати ходимларини, ўзига қарашли институтлар, корхоналар, ташкилотлар ва муассасаларнинг раҳбар ходимларини белгиланган тартибда лавозимга тайинлайди ва лавозимдан озод қилади;

Марказ барча таркибий бўлинмалари раҳбарларининг ва аппарати ходимларининг жавобгарлиги даражасини белгилайди, белгиланган тартибда рағбатлантириш ва жазо чораларини қўллайди.

кўп йиллик меҳнати, ўз вазифаларига виждонан муносабатда бўлганлиги, алоҳида муҳим вазифаларни бажарганлиги учун марказий аппарат ходимларининг айрим тоифалари, ўзига қарашли институтлар ва ташкилотларнинг раҳбарлари мансаб маошлар устамалар белгилайди;

Марказий аппарат, ҳудудий бўлинмалар ва ўзига қарашли институтлар, корхоналарнинг алоҳида ўрнак кўрсатган ходимларини белгиланган тартибда давлат мукофотлари билан мукофотлашга ва фахрий унвонлар беришга тақдим этади, ходимларни Марказнинг фахрий ёрлиқлари, қимматли совғалар ёки пул мукофотлари билан тақдирлайди.

18. Марказ илмий-тармоқ ва ҳудудий принцип бўйича қурилади, Унинг таркибига тармоқ бўлимлари, Марказнинг Қорақалпоғистон республика ва вилоят бўлимлари, илмий-ишлаб чиқариш бирлашмалари, илмий-тадқиқот институтлари, конструкторлик бюролари, экспериментал заводлар, хўжаликлар, кутубхоналар ва бошқа илмий ҳамда илмий-ёрдамчи бўлинмалар киради.

19. Марказнинг тасарруфидаги асосий фондлар ва бошқа мол-мулк давлат мулки ҳисобланади.

20. Марказ ва унинг муассасалари ҳузурида амалдаги қонун ҳужжатларига мувофиқ мулкчиликнинг турли шаклларидаги ташкилотлар ва корхоналарни бирлаштирувчи, энг юқори репродукцияларни ишлаб чиқариш, наслчилик ишлари, янги технологияларни кенг фойдаланиш, қишлоқ хўжалиги маҳсулотларини қайта ишлаш, қишлоқда ислоҳотларни чуқурлаштиришга доир тавсияларни текшириш ва бошқа илмий-ишлаб чиқариш фаолияти билан шуғулланувчи фирмалар, кичик ва қўшма корхоналар, хўжалик жамиятлари, ширкатлар ва уюшмалар ташкил этилиши мумкин.

21. Марказ, унинг Қорақалпоғистон республика ва вилоятлар бўлимлари, мустақил илмий-тадқиқот институтлари, илмий-ишлаб чиқариш бирлашмалари ва уларга тенглаштирилган ташкилотлар давлат рўйхатидан, ўтказилган пайтдан бошлаб юридик шахс ҳисобланади.

22. Қорақалпоғистон республика ва вилоятлар бўлимлари тўғрисидаги низом Марказ ҳайъати томонидан тасдиқланади.

23. Илмий-техник кенгаш таркибига лавозимига кўра Марказнинг бош директори (кенгаш раиси), унинг ўринбосарлари ва бош илмий котиб, Фан ва техника давлат қўмитаси раиси, Фанлар академияси президенти, Қишлоқ ва сув хўжалиги вазири, Олий ва ўрта махсус таълим вазири, давлат ўрмон қўмитаси раиси, «Бош-гидромет» бошлиғи шунингдек, етакчи олимлар ва мутахассислар киради. Илмий-техник кенгаш аъзоларининг шахсий таркиби (унинг таркибига лавозимига кўра кирувчи шахслардан ташқари) Ўзбекистон Республикаси Вазирлар Маҳкамаси томонидан тасдиқланади.

24. Илмий-техник кенгаш:

Ўзбекистонда деҳқончилик фани ривожланишининг муҳим масалаларини кўриб чиқади ва уни ривожлантиришнинг устувор йўналишларини белгилайди. Фанлар академияси илмий-тадқиқот ташкилотлари ҳамда Қишлоқ ва сув хўжалиги вазирлигининг деҳқончилик саноати мажмуини ривожлантириш муаммоларига оид илмий-тематик режалари Марказнинг илмий-техник кенгаши билан келишилади;

республика деҳқончилик саноати мажмуидаги инновациялар тўғрисидаги ахборотни эшитади ҳамда фан ва техника ютуқларини ишлаб чиқаришга жорий этишни фаоллаштиришга доир тавсияларни ишлаб чиқади.

25. Марказда 11 аъзодан иборат таркибда ҳайъат ташкил этилади. Марказнинг бош директори, унинг ўринбосари ва бош илмий котиб лавозимларига кўра ҳайъат аъзолари ҳисобланадилар. Ҳайъат аъзоларининг шахсий таркиби Ўзбекистон Республикаси Вазирлар Маҳкамаси билан келишилади.

26. Марказ ҳайъати:

илмий тадқиқотлар режаларини ҳамда фан ва техника ютуқларини жорий этиш режаларини тасдиқлайди;

марказнинг тегишли бўлимлари орқали илмий-тадқиқот муассасалари фаолиятига раҳбарликни амалга оширади;

илмий маърузаларни ва фаннинг долзарб йўналишлари бўйича ахборотларни эшитади;

фундаментал ва амалий тадқиқотларни мувофиқлаштиради уларнинг илмий даражасини назорат қилади;

деҳқончилик фанининг энг муҳим муаммолари бўйича илмий кенгашлар, қўмиталар, комиссияларни тасдиқлайди ва улар фаолиятига раҳбарлик қилади;

Марказга юкланган вазифаларни бажариш учун белгилан тартибда илмий-тадқиқот, илмий-ёрдамчи муассасалар ва корхоналар ташкил этади, ушбу муассасалар, корхоналар тўғрисидаги низомларни ва уларнинг уставларини тасдиқлайди, шунингдек, ташкил этиладиган илмий-тадқиқот муассасаларининг иш йўналиши ихтисослашувини белгилайди;

илмий конференциялар ва кенгашлар чақиради, мунозаралар ўтказади, тадқиқот экспедициялари ташкил этади;

фан ва техникани ривожлантириш йўналишлари бўйича Марказнинг фаолияти тўғрисидаги ҳисоботларни тасдиқлайди;

Марказ тизимида малакали кадрлар тайёрлаш бўйича режаларни муҳокама қилади ва ушбу ишларга раҳбарлик қилади;

Марказ бўлимлари ва илмий муассасаларнинг фанга ажратган маблағлардан самарали фойдаланиш тўғрисидаги ҳисоботларни эшитади;

илмий муассасалар ва корхоналарнинг халқаро алоқалар тўғрисидаги ҳисоботларини эшитади;

институтларнинг тақдимномаси ва Марказ бўлимларининг тавсияси бўйича илмий муассасалар илмий кенгашлари таркибини тасдиқлайди;

диссертацияларни ҳимоя қилиш бўйича ихтисослаштирилган кенгашлар таркибини Олий аттестация комиссияси тасдиқлаши учун тақдим этади ҳамда ихтисослаштирилган кенгашлар раисларининг ўз фаолияти тўғрисидаги ҳисоботларини эшитади;

илмий тадқиқотлар ва тажриба-конструкторлик ишлари натижаларидан амалиётда фойдаланишга кўмаклашади;

мазкур Низомга Марказнинг барча муассасалари ва мансабдор шахслари томонидан риоя этилиши устидан назоратни амалга оширади;

кадрлар масалаларини кўриб чиқади.

27. Марказ ҳайъати унинг мажлисида ўз аъзоларининг камида учдан икки қисми қатнашган тақдирда қарор қабул қилиш ҳуқуқи эга бўлади.

28. Ҳайъатнинг қарори очиқ кўпчилик овоз билан қабул қилинади.

29. Ҳайъат қарорлари Марказ бош директори томонидан тасдиқланади.

30. Марказнинг илмий-тадқиқот ва илмий-ишлаб чиқариш фаолияти унинг илмий-тадқиқот муассасаларида (институтлар, илмий-ишлаб чиқариш бирлашмалари, конструкторлик бюролари ва бошқа муассасаларда) жамланган.

31. Институтлар, илмий-ишлаб чиқариш бирлашмалари ўз фаолиятини Марказ бўлимларининг услубий раҳбарлигида амалга оширадилар.

32. Илмий-ишлаб чиқариш бирлашмалари, илмий-тадқиқот институтлари директорлари, директорларнинг ўринбосарлари Марказнинг бош директори томонидан йирик олимлар, одатда, фан докторлари орасидан контракт асосида беш йилгача муддатга тайинланадилар.

33. Институтлар, илмий-ишлаб чиқариш бирлашмалари директорлари ўзлари раҳбарлик қилаётган илмий муассасалар, ишлаб чиқариш корхоналари фаолияти ҳамда фан ютуқлари ишлаб чиқаришга жорий этилиши учун шахсан жавоб берадилар.

34. Институтнинг илмий котиби, илмий-тадқиқот бўлинмалари институт бўлими, шуъбаси, лабораторияси, илмий-ишлаб чиқариш бирлашмаси) мудирлари директор томонидан контракт асосида, одатда танловдан ўтган фан докторлари орасидан тайинланадилар.

35. Илмий-тадқиқот институтлари, илмий-ишлаб чиқариш бирлашмалари ҳузурида белгиланган тартибда саноат корхоналари, конструкторлик, технологик ва лойиҳа бюролари, ҳисоблаш марказлари, тажриба хўжаликлари, шунингдек, кооперативлар, кичик қўшма корхоналар ташкил этилиши мумкин.

36. Илмий-тадқиқот муассасалари (институтлар, илмий-ишлаб чиқариш бирлашмалари, конструкторлик бюролари) ва Марказнинг барча ишлаб чиқариш тузилмалари мазкур Низом ва Марказ ҳайъати томонидан тасдиқланадиган намунавий уставлар асосида фаолият кўрсатади.

37. Марказ фаолиятининг иқтисодий асосини ишлаб чиқариш фондлари ҳамда эгалик қилиш ва фойдаланиш учун унга давлат томонидан берилган бошқа мол-мулк, институтлар, илмий-ишлаб чиқариш бирлашмалари ва бошқа илмий муассасаларнинг, шунингдек, Марказ тизимига қўшиб олинган ишлаб чиқариш корхоналарининг ишлаб чиқариш фондлари ва мол-мулки ташкил этади.

38. Марказ ва унинг муассасалари амалдаги қонун ҳужжатларга мувофиқ ташқи иқтисодий фаолиятда қатнашишлари мумкин.

39. Ўзбекистон Республикаси давлат бюджети маблағлари хўжалик шартномаси (хўжалик ҳисоби) фаолиятидан олинган даромадлар Марказ илмий муассасалари фаолиятини маблағ билан таъминлаш манбалари ҳисобланади.

40. Илмий-тадқиқот, хўжалик, ташқи иқтисодий фаолият ҳамда Ўзбекистон Республикаси қонун ҳужжатлари билан назарда тутилган бошқа фаолиятдан тушган маблағлар Марказнинг мулки ҳисобланади.

41. Марказнинг илмий тадқиқот ташкилотлари жорий ишларни ва бошқа ишларни бажариш учун асосий фондлардан ва унинг ихтиёридаги айланма маблағлардан фойдаланадилар.

42. Марказнинг хўжалик ҳисобидаги муассасалари, бирлашмалари, илмий-тадқиқот ташкилотлари ўз хўжалик, тадбиркорлик илмий ва инновация фаолиятини ушбу фаолиятдан олинган дароматлар ва бюджетдан ажратиладиган маблағлар ҳисобига амалга оширадилар.

43. Марказ ўз маблағлари (бюджет маблағларидан ташқари ўз муассасаларининг хўжалик ва тадбиркорлик фаолиятидан олган даромадларнинг бир қисми, шунингдек, бошқа жалб қилинган маблағлар ҳисобига махсус молиявий ва инновация жамғармалари (илмий-техник ва ижтимоий ривожланиш, олимларни ижтимоий ҳимоя қилиш, инновация ва бошқа жамғармалар) ташкил этиш мумкин. Маблағларни шакллантириш ва сарфлаш тартиби Марказ томонидан Ўзбекистон Республикаси Адлия вазирлиги билан келишув бўйича ишлаб чиқилган махсус низомга мувофиқ белгиланади.

44. Илмий асарларни, шунингдек, агросаноат мажмуидаги инновация масалалари бўйича тавсиялар ва услубий ишланмаларни нашр этиш.

45. Олимларнинг қўлёзмалари ва архивларини, ўз муассасаларининг фан учун қимматли ҳисобланган архив материаллари ва бошқа материалларни сақлаш.

46. Бошқа хил илмий муассасалар, бошқа мамлакатларнинг олий юртлари, кутубхоналари, музейлари, нашриётлари ва муассалари билан босма нашрларни айирбошлаш.

1. Бўлим раҳбари

2. Иқтисодий ислоҳотлар масалалари бўйича бош мутахассис

3. Илмий-техник ишланмаларни жорий этиш бўйича бош мутахассис

4. Маркетинг бўйича етакчи мутахассис

5. Технологиялар бўйича етакчи мутахассис

6. Бухгалтер-кассир

Сув муаммолари институти

Тупроқшунослик ва агрокимё институти

Ўсимликлар генетикаси ва экспериментал биологияси институти

«Ўзбекистон ирригация илмий-тадқиқот институти» илмий-ишлаб чиқариш бирлашмаси