Ўзбекистон Республикаси Бош прокуратураси ҳузуридаги Солиққа оид жиноятларга қарши курашиш департаменти томонидан солиқларни ва бюджетга бошқа мажбурий тўловларни тўлашдан бош тортиш ҳолларини аниқлаш, солиққа оид жиноятлар ва қонун бузилишларининг олдини олиш, солиққа тортиладиган базани кенгайтириш ва давлатга етказилган зарарни ундириш бўйича чора-тадбирлар кўрилмоқда.

Шу билан бирга, Департамент ва унинг жойлардаги органлари ишларининг натижадорлиги улар олдига қўйилган вазифаларга, биринчи навбатда «яширин» иқтисодий фаолиятни аниқлаш ва олдини олиш, хўжалик, молия-валюта соҳасида белгиланган қонун нормаларини бузиш йўли билан давлат манфаатларига етказилаётган жиддий зарарни аниқлаш бўйича қўйилган вазифаларга тўлиқ жавоб бермаяпти.

Департаментнинг ахборот-таҳлилий ишлари даражаси, қўлланилаётган таҳлил методлари замонавий талабларга жавоб бермайди. Кўп ҳолларда қонун ҳужжатларининг кўриниб турган бузилишлари аниқланмоқда. Айни бир вақтда жиддий жиноятларга олиб келаётган чуқур сабаблар эътибордан четда қолмоқда.

Солиқ ва иқтисодий жиноятларга қарши курашишда қатъият етишмаяпти, солиқларни тўлашдан бош тортишнинг мавжуд механизмлари ва йўлларини аниқлашга доир ишлар етарли самара билан олиб борилмаяпти.

Ҳуқуқни муҳофаза қилиш ва солиқ органлари, Молия вазирлиги ва унинг жойлардаги тузилмалари билан ўзаро ҳамкорликни таъминлаш ишлари қониқарсиз йўлга қўйилган.

Валюта соҳасида йўл қўйилаётган қонун бузилишлари ва жиноятлар фаолият доирасидан четда қолмоқда.

Солиқ ва валютага оид жиноятларга қарши курашишни янада кучайтириш ва унинг самарадорлигини ошириш мақсадида Вазирлар Маҳкамаси қарор қилади:

1. Ўзбекистон Республикаси Бош прокуратураси ҳузуридаги Солиққа оид жиноятларга қарши курашиш департаменти Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаментига (кейинги ўринларда Департамент деб юритилади) айлантирилсин.

2. Ўзбекистон Республикаси Вазирлар Маҳкамасининг 2001 йил 6 июлдаги 291-сон қарори билан илгари тасдиқланган функцияларга қўшимча равишда, Департаментга ва унинг ҳудудий бўлинмаларига валютага оид жиноятларга қарши курашишни кучайтириш бўйича қуйидаги вазифалар юклансин:

хорижий валютада операцияларни амалга оширишда қонун бузилишларини аниқлаш, уларни бартараф этиш, олдини олиш ва профилактика қилиш;

хорижий валюта маблағларининг четга чиқиб кетиши механизмлари ва йўлларини, уларнинг ноқонуний айланишини, хорижий валютани сотиш бўйича мажбуриятлардан бош тортиш ҳолларини аниқлаш бўйича оператив-таҳлилий, қидирув ишларини ўтказиш;

республика ҳудудида резидентлар ва норезидентлар томонидан хорижий валютада иш ҳақи тўлаш ва ҳисоб-китоб қилиш ҳолларини аниқлаш ва уларни бартараф этиш;

хорижий валютадаги тўловлар амалга оширилишининг қонунийлигини, валюта операциялари бўйича ҳисоб ва ҳисоботларнинг тўлиқлиги ва объективлигини текшириш;

норматив-ҳуқуқий базани, энг аввало валюта алмаштириш операциялари, шунингдек валюта маблағларини ноқонуний олиб келиш ва олиб чиқиб кетиш соҳасида қонун бузилишларининг олдини олиш ва профилактикаси соҳасидаги норматив-ҳуқуқий базани такомиллаштириш бўйича чора-тадбирларни ишлаб чиқиш ва таклифлар тайёрлаш;

амалдаги қонун ҳужжатларини бузган ҳолда ўтказилаётган хорижий валютадаги операциялар тўғрисидаги ахборотларни йиғиш, улар билан ишлаш ва ҳар томонлама таҳлил қилиш;

валюта соҳасидаги қонун бузилишлари ва уларни содир қилган шахслар тўғрисидаги маълумотларнинг ягона марказлаштирилган ҳисобини юритиш ва маълумотларнинг компьютер базасини яратиш;

хорижий валютани сотиб олиш ва импорт-экспорт ҳамда воситачилик операцияларини амалга ошириш билан боғлиқ валютага оид қонун бузилишларини ўрганиш ва таҳлил қилиш;

Ўзбекистон Республикасининг халқаро шартномаларига мувофиқ хорижий давлатларнинг ваколатли органлари билан валютани тартибга солиш соҳасида ўзаро ҳамкорлик қилишни ва ахборотлар алмашишни амалга ошириш, бунда жиноий йўллар билан олинган даромадларнинг қонунийлаштирилишига (ҳалоллаб олинишига) қарши курашиш масалаларига алоҳида эътибор бериш.

3. Ходимларнинг штатдаги умумий сони доирасида:

Ўзбекистон Республикаси Бош прокуратураси ҳузуридаги Департамент тузилмасида 10 кишидан иборат;

Тошкент шаҳар прокуратураси ҳузуридаги Солиқ ва валютага оид жиноятларга қарши курашиш бошқармаси тузилмасида 20 кишидан иборат бўлган валютага доир жиноятларни аниқлаш, бартараф этиш ва олдини олиш бўлимлари ташкил этилсин.

Белгилаб қўйилсинки, кўрсатиб ўтилган функциялар бошқа минтақаларда Қорақалпоғистон Республикаси ва вилоятлар прокуратуралари ҳузуридаги солиқ ва валютага оид жиноятларга қарши курашиш бошқармаларининг солиқ ва валютага оид жиноятларни аниқлаш, бартараф этиш ва олдини олиш бўлимлари томонидан бажарилади.

4. Қуйидагилар:

Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаментининг ташкилий-штат тузилмаси 1-иловага мувофиқ;

Қорақалпоғистон Республикаси, вилоятлар ва Тошкент шаҳар прокуратуралари ҳузуридаги солиқ ва валютага оид жиноятларга қарши курашиш бошқармаларининг, шунингдек туман (шаҳар) прокуратураси ҳузуридаги солиқ ва валютага оид жиноятларга қарши курашиш туман (шаҳар) бўлимларининг намунавий ташкилий-штат тузилмалари 2, 2а, 3, 3а-иловаларга мувофиқ;

Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти тўғрисидаги Низом 4-иловага мувофиқ тасдиқлансин.

5. Ўзбекистон Республикаси Бош прокурори:

валютага оид жиноятлар тўғрисидаги ишларни тергов қилишга ихтисослашган суриштирувчилар ва терговчиларни қайта тайёрлашни, тергов давомида ноқонуний валюта операцияларининг барча қатнашчиларини, энг аввало жиноий гуруҳларнинг ташкилотчиларини, шунингдек хорижий валютанинг ноқонуний айланиши молиявий манбалари ва йўлларини аниқлашга доир чора-тадбирлар кўришни таъминласин;

ташкил этилган бўлинмаларни юқори касб малакасига ва таҳлил қилиш қобилиятига эга бўлган малакали кадрлар билан бутлашни бир ой муддатда таъминласин;

Департамент ва унинг ҳудудий бўлинмалари ходимларини уларнинг эгаллаб турган лавозимларига мувофиқлиги юзасидан аттестациядан ўтказиш бўйича махсус комиссия тузсин.

Комиссия аттестацияни икки ой муддатда амалга оширсин, бунда ходимларнинг касб бўйича тайёргарлик даражасининг қўйиладиган талабларга мувофиқлигини, уларнинг таҳлилий фикрлаш қобилиятини, шунингдек ишчанлик ва шахсий сифатларини танқидий баҳоласин.

6. Ўзбекистон Республикаси Бош прокурорига Департамент ва унинг ҳудудий бўлинмалари тузилмасига ходимларнинг белгиланган чекланган сони доирасида ўзгартиришлар киритиш ҳуқуқи берилсин.

7. Валюта назоратини амалга оширувчи органлар ва агентларга ягона марказлаштирилган компьютер ҳисобини юритиш учун зарур бўлган валютага оид қонун бузилишлари тўғрисидаги маълумотларни Департаментга тақдим этиш юклансин.

Бош прокуратура манфаатдор вазирликлар ва идоралар билан биргаликда валюта назорати органлари ва агентлари томонидан аниқланган қонун бузилишлари тўғрисидаги маълумотларни тақдим этиш тартибини икки ҳафта муддатда ишлаб чиқсин ва тасдиқласин.

8. Ўзбекистон Республикаси Вазирлар Маҳкамасининг «Иқтисодиёт ва солиқ соҳасидаги жиноятларга қарши курашишни кучайтириш чора-тадбирлари тўғрисида» 2001 йил 6 июлдаги 291-сон қарори (Ўзбекистон Республикаси ҚТ, 2001 й., 7-сон, 32-модда)га 5-иловага мувофиқ ўзгартириш ва қўшимчалар киритилсин.

9. Бош прокуратура Ўзбекистон Республикаси Адлия вазирлиги ҳамда манфаатдор вазирликлар ва идоралар билан биргаликда бир ой муддатда амалдаги қонун ҳужжатларига ушбу қарордан келиб чиқадиган ўзгартиришлар ва қўшимчалар юзасидан таклифлар киритсин.

10. Макроиқтисодиёт ва статистика вазирлиги, Молия вазирлиги Бош прокуратура билан биргаликда 2003 йилги инвестиция дастурига Департаментда валюта соҳасидаги қонун бузилишлари тўғрисидаги маълумотларнинг ягона компьютер базасини яратишни киритсинлар.

11. Мазкур қарорнинг бажарилишини назорат қилиш Ўзбекистон Республикасининг Бош вазири Ў. Султонов ва Ўзбекистон Республикаси Президентининг Давлат маслаҳатчиси А. Азизов зиммасига юклансин.

1. Мазкур Низом Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти фаолиятининг ҳуқуқий асосларини, вазифалари ва функцияларини, тизими ва тузилмасини, ваколатлари ва жавобгарлигини белгилайди.

2. Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти (кейинги ўринларда Департамент деб юритилади) мустақил ихтисослаштирилган ҳуқуқни муҳофаза қилиш органи ҳисобланади, солиқ ва валютага оид жиноятларга ва ҳуқуқ бузилишларига қарши курашиш соҳасида тезкор-таҳлилий, қидирув ишларини ташкил этиш ва ўтказиш, солиқ интизомини мустаҳкамлаш унинг асосий мақсади ҳисобланади.

3. Департамент ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига амал қилади.

4. Қуйидагилар Департаментнинг асосий вазифалари ҳисобланади:

солиқ ва валютага оид жиноятлар ва ҳуқуқ бузилишларини аниқлаш, уларнинг олдини олиш ва уларни бартараф этиш;

солиқ сиёсати амалга оширилишини таъминлаш, солиқ солиш базасини кенгайтириш, солиқ тўловчилар тўлиқ қамраб олиниши ва ҳисобга олиниши, нақд пул маблағлари муомаласининг белгиланган тартиби бузилишига барҳам бериш;

экспорт, бартер ва консигнация контрактлари бўйича валюта маблағларининг хориждан ўз вақтида ва тўлиқ қайтарилишини назорат қилиш;

хорижий нақд валютанинг ноқонуний муомаласига барҳам бериш, қалбаки банкнотларни аниқлаш;

валюта алмаштириш операциялари соҳасида суиистеъмолликлар ва бошқа қонун бузилиши ҳолларини аниқлаш, уларни бартараф этиш юзасидан тезкор тадбирларни амалга ошириш;

республика ҳудудида резидентлар ва норезидентлар томонидан хорижий валютада иш ҳақи тўлаш ва ҳисоб-китоб қилиш ҳолларини аниқлаш ва уларни бартараф этиш;

миллий ва хорижий валютадаги тўловларнинг асосланганлигини, ҳисоб ва ҳисоботнинг тўлиқлигини ва объективлигини текшириш;

хорижий валюта маблағларининг ноқонуний айланиши, четга чиқиб ва яшириб қолинишининг мавжуд механизмлари ва йўлларини, уларнинг ноқонуний айланишини, солиқлар ва мажбурий тўловларни тўлашдан, хорижий валютани сотиш бўйича мажбуриятлардан бўйин товлаш, бош тортиш ҳолларини, «яширин» иқтисодиётни шакллантириш йўлларини, коррупция ҳолларини аниқлашга қаратилган самарали оператив-таҳлилий, қидирув ишларини ташкил этиш ва ўтказиш;

амалдаги қонун ҳужжатлари бузилган ҳолда ўтказилаётган хорижий валютадаги операциялар тўғрисидаги ахборотларни йиғиш, улар билан ишлаш ва ҳар томонлама таҳлил қилиш;

валюта соҳасидаги қонун бузилишлари ва уларни содир қилган шахслар тўғрисидаги маълумотларнинг ягона марказлаштирилган ҳисобини юритиш ва маълумотларнинг компьютер базасини яратиш;

хорижий валютани сотиб олиш ва импорт-экспорт ҳамда воситачилик операцияларини амалга ошириш билан боғлиқ валютага оид қонун бузилишларини ўрганиш ва таҳлил қилиш;

Ўзбекистон Республикасининг халқаро шартномаларига мувофиқ хорижий давлатларнинг ваколатли органлари билан валютани тартибга солиш соҳасида ўзаро ҳамкорлик қилишни ва ахборотлар алмашишни амалга ошириш, бунда жиноий йўллар билан олинган даромадларни қонунийлаштиришга (ҳалоллаб олинишига) қарши курашиш масалаларига алоҳида эътибор бериш;

норматив-ҳуқуқий базани, энг аввало солиқ соҳасида ва валюта муомаласи соҳасида ҳуқуқни бузишларнинг олдини олиш ва профилактикаси соҳасидаги норматив-ҳуқуқий базани такомиллаштириш бўйича чора-тадбирлар ишлаб чиқиш ва таклифлар тайёрлаш;

одамларнинг ҳуқуқий онгини мустаҳкамлашга доир мунтазам иш олиб бориш, фуқароларда иқтисодий фаолият, солиқ сиёсатини амалга ошириш ва валютани тартибга солиш соҳасида конституциявий нормалар ва амалдаги қонун ҳужжатлари бажарилиши зарурлигини тушунишни шакллантириш;

аҳолида солиқ тўлашдан бўйин товлаш, иқтисодиёт, валюта ва солиқ соҳасида жиноятлар содир этганлик учун жазонинг муқаррарлигини тушунишни тарбиялаш.

5. Департамент ўзига юкланган вазифаларга мувофиқ қуйидаги функцияларни бажаради:

тезкор-қидирув фаолияти соҳасида:

а) қуйидагиларнинг механизмларини ўрганади ва аниқлайди:

ишлаб чиқариш, фойда (даромад) ҳажмларини яшириш, сотилган маҳсулот, товарлар (ишлар, хизматлар) ҳажмларини пасайтириш;

хўжалик субъектлари томонидан ҳисобга олинмаган (тасдиқловчи ҳужжатларга эга бўлмаган) маҳсулотлар (товарлар) сотилиши;

«яширин» иқтисодиётнинг вужудга келиши, қарор топиши ва фаолият кўрсатиши, унинг ривожланишига кўмаклашувчи сабаблар ва шарт-шароитлар;

тадбиркорлик фаолиятини амалга оширувчи юридик ва жисмоний шахсларнинг давлат солиқ инспекцияларида ҳисобга туришдан бўйин товлаши;

хорижий валюта маблағларининг яшириб қолиниши, четга чиқиб кетиши, ноқонуний айланиши ва хорижий валютани сотиш бўйича мажбуриятлардан бўйин товлаш йўлларини;

б) қуйидагиларни амалга оширади:

нақд пул муомаласига эга бўлган хўжалик юритувчи субъектлар томонидан нақд пул маблағлари айланишининг қонун ҳужжатларида белгиланган тартиби бузилишини, шунингдек акциз солиғи солинадиган товарларнинг ғайриқонуний ишлаб чиқарилиши ва айланишини аниқлаш, олдини олиш ва бартараф этишга доир махсус тадбирларни;

солиқлар, йиғимлар ва бошқа тўловлар тўлашдан, солиқ органларига ҳисоботлар, солиқ декларациялари ва ҳисоб-китоблар тақдим этишдан қасддан бўйин товловчи солиқ тўловчиларнинг турар жойини аниқлашга доир тезкор-қидирув тадбирларини;

солиқ ва валюта ҳақидаги қонунларга риоя этилишини назорат қилиш соҳасида:

хўжалик юритувчи субъектлар томонидан бюджетга солиқлар ва тўловлар тўғри ҳисоблаб чиқилиши, тўлиқ ва ўз вақтида тўланишини текшириш йўли билан солиқ ҳақидаги қонунларга риоя этилиши устидан назоратни амалга оширади;

хўжалик юритувчи субъектларни муқобил текширади, текширилаётган (тафтиш қилинаётган) ташкилотдаги ҳужжатлар ва маълумотларни пул маблағлари, моддий бойликлар ва ҳужжатлар олинган ёки улар берилган ташкилотлардаги ёзувлар, ҳужжатлар ва маълумотлар билан солиштиради;

қонун ҳужжатларига мувофиқ давлат солиқ хизмати органлари мансабдор шахсларининг ўз мажбуриятларини ноҳалол бажариши ҳолларини аниқлаш мақсадида давлат солиқ хизмати органларини назорат тартибида текширишни ташкил этади;

хорижий валютадаги операцияларни амалга оширишда қонун бузилишларини аниқлаш, бартараф этиш, олдини олиш, профилактика қилиш чора-тадбирларини кўради;

республика ҳудудида резидентлар ва норезидентлар томонидан хорижий валютада иш ҳақи тўланиши ва ҳисоб-китоблар ўтказилиши ҳолларини аниқлайди ва бартараф этади;

амалдаги қонун ҳужжатлари бузилган ҳолда ўтказилаётган хорижий валютадаги операциялар тўғрисидаги ахборотларни тўплаш, улар билан ишлаш ва уларни атрофлича таҳлил қилишни амалга оширади;

Ўзбекистон Республикасининг халқаро шартномаларига мувофиқ хорижий давлатларнинг ваколатли органлари билан валютани тартибга солиш соҳасида ҳамкорлик қилади, бунда жиноий йўллар билан олинган даромадларнинг қонунийлаштирилишига (ҳалоллаб олинишига) қарши кураш масалаларига алоҳида эътибор беради;

суриштирув олиб бориш соҳасида:

жиноий ишлар қўзғайди, солиқ ва валютага оид жиноятлар содир этилиши ҳоллари юзасидан суриштирувгача текширишларни ташкил этади ва амалга оширади;

Департаментнинг ҳудудий бўлинмаларида суриштирув олиб борилишини назорат қилади;

ташкилий-назоратни таъминлаш соҳасида:

солиқ ва иқтисодиёт соҳасида ҳуқуқ бузилишларини аниқлаш, олдини олиш ва барҳам беришга қаратилган режали, режадан ташқари тадбирлар ва бошқа тадбирлар ишлаб чиқилиши ва бажарилишига доир ташкилий чора-тадбирларни амалга оширади;

ўз ҳудудий бўлинмаларининг фаолиятини ижро ва хизмат интизомига, амалдаги қонун ҳужжатларига риоя этилиши юзасидан улар томонидан ўз функционал мажбуриятлари бажарилиши бўйича идоравий текширишлар ўтказади;

кадрлар билан таъминлаш соҳасида:

кадрларни танлаш ва жой-жойига қўйиш, Департамент ва унинг жойлардаги бўлинмалари кадрлари захирасини шакллантиришга доир тадбирларни ишлаб чиқади ва амалга оширади;

Департамент ва унинг ҳудудий бўлинмалари жамоасида соғлом маънавий-психологик муҳит яратишга доир ташкилий чора-тадбирларни амалга оширади, Департамент ходимларининг касб тайёргарлиги ва ижтимоий муҳофазаси ташкил этилишини таъминлайди;

ахборот-таҳлилий ишлар, мувофиқлаштириш ва ҳуқуқий таъминлаш соҳасида:

Ўзбекистон Республикасининг иқтисодий хавфсизлигини таъминлашга доир қонун ҳужжатлари қўлланилиши амалиётини умумлаштиради, Ўзбекистон Республикасининг қонунлари ва бошқа норматив-ҳуқуқий ҳужжатларини, шу жумладан валюта алмаштириш операциялари, валюта маблағларининг ноқонуний олиб келиниши ва олиб чиқиб кетилиши соҳасидаги қонун бузилишларининг олдини олиш ҳамда профилактикаси борасидаги норматив-ҳуқуқий ҳужжатларни такомиллаштириш юзасидан таклифларни ишлаб чиқади ва Бош прокурорга киритади;

солиқ ва валюта ҳақидаги қонун ҳужжатлари бузилиши ҳолларини йиғади, атрофлича таҳлил қилади ва баҳолайди ҳамда тегишли органларга иқтисодиёт, солиқ ва валютага оид жиноятлар содир этилишига олиб келувчи сабаблар ва шарт-шароитларни бартараф этиш тўғрисида таклифлар киритади;

валюта соҳасидаги қонун бузилишларининг ва уларни содир қилган шахсларнинг марказлаштирилган компьютер ҳисобини юритади;

тезкор-хизмат фаолиятини ахборот-таҳлилий жиҳатдан таъминлайди;

прокуратура раҳбариятига иқтисодиёт соҳасидаги жиноятларга қарши курашиш натижалари ва муаммолари тўғрисида ахборот беради;

Департамент ва унинг ҳудудий бўлинмалари фаолиятини такомиллаштиришга доир услубий ишларни олиб боради;

ходимларни ўқитишни, шу жумладан ишда замонавий фан ютуқлари ва янги технологиялардан фойдаланиш бўйича ўқитишни ташкил этади ва амалга оширади.

6. Департамент қуйидаги бўлинмалардан иборат бўлади:

Солиқ ва валютага оид жиноятларга қарши курашишни мувофиқлаштириш ва ахборот-таҳлилий таъминлаш бошқармаси;

Солиққа оид жиноятларни аниқлаш, бартараф этиш ва олдини олиш бўлими;

Валютага оид жиноятларни аниқлаш, бартараф этиш ва олдини олиш бўлими;

Криминалистика лабораторияси;

Тезкор гуруҳ;

Солиқ ва валютага оид жиноятларни суриштириш бўлими;

Ҳужжатли текширишлар бўлими;

Норматив-ҳуқуқий база бўлинмаси;

Шахсий таркиб бўйича инспекция;

Кадрлар бўлими;

Молия-хўжалик бўлинмаси;

Департаментнинг ҳудудий бўлинмалари (Қорақалпоғистон Республикаси, вилоятлар ва Тошкент шаҳар прокуратуралари ҳузуридаги солиқ ва валютага оид жиноятларга қарши курашиш бошқармалари, шунингдек туман (шаҳар) прокуратуралари ҳузуридаги солиқ ва валютага оид жиноятларга қарши курашиш туман (шаҳар) бўлимлари).

7. Департаментга мақомига кўра Бош прокурорнинг ўринбосарига тенглаштирилган ва Ўзбекистон Республикаси Президенти томонидан тайинланадиган Департамент бошлиғи раҳбарлик қилади.

Департамент бошлиғининг ўринбосарлари лавозимга Департамент бошлиғи тақдимномасига биноан ва Ўзбекистон Республикаси Президенти билан келишган ҳолда Бош прокурор томонидан тайинланади.

Ҳудудий бошқармалар бошлиқлари ва уларнинг ўринбосарлари, Департаментнинг туман (шаҳар) бўлимлари бошлиқлари тегишли лавозимларга Департамент бошлиғининг тақдимномасига биноан Бош прокурор томонидан тайинланади.

8. Департамент мустақил юридик шахс ҳисобланади, банк муассасаларида ҳисоб-китоб, жорий ва бошқа ҳисоб рақамларига, Ўзбекистон Республикасининг герби тасвири туширилган ва Департаментнинг номи тўлиқ ёзилган муҳрга эгадир.

9. Департамент ва унинг ҳудудий бўлинмалари ўзларига юкланган вазифаларга ва бажарадиган функцияларига мувофиқ қуйидаги ҳуқуқларга эгадир:

солиқлар, йиғимлар ва бюджетга бошқа мажбурий тўловлар бўйича ҳисоб ва ҳисобот бузилиши ҳоллари аниқланган тақдирда давлат солиқ хизмати органлари бўлинмаларининг телекоммуникация воситалари ва маълумотлар компьютер базалари, шунингдек солиқ тўловчиларнинг ҳужжатлари билан қонунда белгиланган тартибда танишиш;

солиқ органлари ва бошқа органлар ходимлари томонидан ҳуқуқни бузишлар яширилиши тўғрисида ишончли маълумотлар мавжуд бўлган тақдирда қонунда белгиланган тартибда такрорий текширишларни амалга ошириш;

суриштирувгача текширишларни амалга ошириш ва жиноий ишлар қўзғаш;

Ўзбекистон Республикаси фуқароларини, хорижий фуқароларни ва фуқаролиги бўлмаган шахсларни Департамент бўлинмалари ваколатига кирувчи масалалар бўйича тушунтиришлар, маълумотномалар, маълумотлар олиш учун таклиф қилиш;

агар фуқаролар ва мансабдор шахслар солиқ ва хорижий валюта айланиши соҳасида жиноят содир этганликда шубҳаланиш учун етарли асослар мавжуд бўлса белгиланган тартибда уларнинг зарур ҳужжатларини текшириш;

вазирликлар, идоралар, банклардан, шунингдек мулкчилик шаклларидан қатъи назар корхоналар, муассасалар ва ташкилотлардан, жисмоний шахслардан Департаментга юкланган вазифалар бажарилиши учун зарур бўлган ахборотни талаб қилиш, бундай ахборот олишнинг қонун томонидан махсус тартиби белгиланган ҳоллар бундан мустасно. Департамент томонидан олинган ахборотдан фақат хизмат мақсадларида фойдаланилади ва у ошкор қилиниши мумкин эмас;

хўжалик юритувчи субъектлар (солиқ тўловчилар)нинг даромад (фойда) олиш учун фойдаланиладиган ёхуд солиқ солиш объектларини сақлаш билан боғлиқ бўлган ишлаб чиқариш, омбор, савдо биноларини ва бошқа бинолари ва жойларини уларнинг жойлашган жойидан ва мулкчилик шаклларидан қатъи назар, текшириш, бажарилган ишлар ва кўрсатилган хизматларни назорат тартибида ўлчаш, товар-моддий бойликларни хатлаш;

қурилиш, монтаж, таъмирлаш ишлари ва бошқа ишларни назорат тартибида ўлчаш учун мутахассисларни белгиланган тартибда жалб этиш;

текшириш, тадқиқ этиш ва экспертиза ўтказиш учун товарлар, буюмлар, хом ашё, материаллар ва ярим тайёр маҳсулотлар намуналарини, шунингдек ҳужжатларни олиб қўйиш;

маъмурий ҳуқуқбузарлик тўғрисидаги ишларни қонун ҳужжатларида белгиланган тартибда кўриб чиқиш ва маъмурий жазо бериш;

қонун ҳужжатларига мувофиқ валюта назорати органлари ва агентларига берилган функцияларни бажариш;

юридик ва жисмоний шахслардан улар фаолиятига тегишли маълумотлар, маълумотномалар, ҳужжатларни олиш;

хўжалик юритувчи субъектлар (солиқ тўловчилар)нинг ҳисоб-китоб рақамлари ва бошқа рақамлари бўйича содир этилган операциялар тўғрисидаги банк ва бошқа кредит-молия муассасалари маълумотларини олиш;

божхона органлари ва Ташқи иқтисодий алоқалар агентлигидан импорт-экспорт операцияларининг бажарилиши тўғрисидаги маълумотларни ва хўжалик юритувчи субъектлар (солиқ тўловчилар) тўғрисидаги бошқа ахборотни олиш.

11. Департамент ходимларига Ўзбекистон Республикаси қонун ҳужжатларида белгиланган бошқа ҳуқуқлар ҳам берилади.

12. Департамент ходимлари давлат, хизмат, тижорат сирини, жисмоний шахсларнинг омонатлари тўғрисидаги маълумотлар сирини ва улар ўз хизмат мажбуриятларини бажариш чоғида олган бошқа ахборотни сир сақлашлари керак. Сир ошкор қилинган тақдирда ходим қонунда белгиланган тартибда жавоб беради.

13. Департамент берилган ваколатларга мувофиқ ўз ҳудудий бўлинмалари фаолияти устидан улар фаолиятининг бутун доираси бўйича тезкор назоратни амалга оширади.

14. Бош прокурор ва унга бўйсунувчи прокурорлар Департамент бўлинмалари ва унинг ҳудудий бўлинмалари томонидан тушадиган хабарлар ва аризалар ҳисобга олиниши, рўйхатдан ўтказилиши ва кўриб чиқилишининг белгиланган тартибига риоя қилинишига, текширишлар, суриштирувлар ва улар билан боғлиқ процессуал ҳаракатлар амалга оширилиши, солиқ ҳақидаги қонунлар бажарилиши текширилиши ҳамда прокурорнинг ваколатига тегишли бўлган бошқа масалалар материаллари бўйича қабул қилинадиган қарорларнинг қонунийлигига риоя қилиш бўйича фаолияти устидан назорат қилинишини таъминлайдилар.

15. Солиқ ва валютага оид жиноятларни аниқлаш ва уларга барҳам бериш бўйича процессуал ҳаракатларнинг жиноий иш қўзғашдан бошлаб уни судда кўриб чиқишга қадар узвийлиги ва изчиллиги Департамент ва унинг ҳудудий бўлинмаларининг иқтисодий ва солиқ соҳасидаги жиноятлар бўйича жиноий ишларни тергов қиладиган, судда улар бўйича давлат айбловини қўллаб-қувватлайдиган барча даражалардаги прокуратура органлари билан мустаҳкам ўзаро ҳамкорлиги ва хатти-ҳаракатларни мувофиқлаштириши натижасида таъминланади.

16. Ўзбекистон Республикаси Бош прокуратурасига ва унинг жойлардаги органларига:

иқтисодиёт, солиқ ва валютага оид жиноятлар ҳоллари бўйича жиноий ишларни ўз вақтида тергов қилиш масалалари, уларнинг тезроқ судга берилиши юкланади, бунда жиноий иш қўзғатилган вақтдан бошлаб суд қарори қабул қилингунга қадар жиноий ишни кўриб чиқиш муддатларини энг кўп даражада қисқартириш назарда тутилади;

иқтисодиёт, солиқ ва валютага оид жиноятларга қарши кураш олиб бориш давомида қонунийликка ва жиноят, жиноят-процессуал, фуқаролик ва фуқаролик-процессуал кодекслар нормаларига риоя этишни умумий назорат қилиш юкланади.

17. Департамент Ўзбекистон Республикасининг Бош прокурори томонидан белгиланган муддатларда Департамент ва унинг ҳудудий бўлинмаларининг иши тўғрисидаги ҳамда солиқ соҳасида ҳамда валюта айланиши соҳасида қонунийликнинг ҳолати ҳақида ҳисобот, ахборот ва ҳисобга олиш-таҳлилий маълумотлар тақдим этилишини таъминлайди.

18. Валютани тартибга солиш, солиқ солиш ва бюджетга тўловлар соҳасида қонунийликнинг ҳолати тўғрисидаги маълумотлар асосида амалга ошириладиган Департамент тадбирларини жорий ва истиқболли режалаштириш Ўзбекистон Республикаси Бош прокурори билан келишган ҳолда амалга оширилади.

19. Бош прокурорнинг ўз ваколатлари доирасида қабул қилган буйруқлари ва кўрсатмалари, шунингдек Ўзбекистон Республикаси Прокуратураси ҳайъатининг Департамент ва унинг ҳудудий бўлинмалари фаолиятини ташкил этиш масалалари бўйича қарорлари Департамент ва унинг ҳудудий бўлинмаларининг барча ходимлари томонидан сўзсиз бажарилиши керак.

20. Солиқ, бюджет соҳаларида ва валютани тартибга солиш соҳасида қонунийликни мустаҳкамлаш, даромадлар ва солиқ солиш объектлари ҳисобга олишдан яширилганлиги, солиқлар ва бюджетга бошқа мажбурий тўловлар тўлашдан бўйин товланганлиги учун жазонинг муқаррарлиги тамойилини таъминлаш бўйича қўшма тадбирлар амалга оширилишида Департамент ва унинг ҳудудий бўлинмаларининг прокуратура органлари билан ўзаро ҳамкорлик қилиши тартиби Ўзбекистон Республикаси Бош прокурори томонидан тасдиқланади.

21. Департамент давлат солиқ хизмати органлари, валютани назорат қилиш органлари ва агентлари билан қуйидаги йўналишлар бўйича ўзаро ҳамкорлик қилади:

солиқ ва валютага оид ҳуқуқни бузишларни аниқлаш, олдини олиш ва бартараф этиш, уларнинг профилактикаси бўйича ҳар ойлик, чораклик ва йиллик тадбирларга мувофиқ тегишли тафтишлар ўтказилишини ташкил этиш;

прогноз кўрсаткичлар бажарилишида, солиқлар ва бюджетга бошқа мажбурий тўловлар бўйича муддатида тўланмаган тўловларни ундиришда давлат солиқ инспекцияларига кўмаклашиш;

валютани назорат қилиш органлари ва агентлари томонидан валютага оид ҳуқуқ бузилишлари тўғрисида маълумотлар тақдим этиш;

солиқ ва валютага оид ҳуқуқни бузишларни аниқлаш, олдини олиш ва бартараф этиш бўйича қўшма рейдлар ўтказиш;

тезкор аҳамиятли ахборотларни айирбошлаш.

22. Ўзаро ҳамкорлик Департаментнинг вазифалари, функциялари ва мажбуриятлари ҳисобга олинган ҳолда белгиланган тартибда бошқа йўналишлар бўйича ҳам амалга оширилади.

23. Департамент бошлиғи Ўзбекистон Республикаси Бош прокурори билан келишган ҳолда, прокуратура томонидан амалга ошириладиган қонунийликни мустаҳкамлаш ва жиноятчиликка қарши курашиш бўйича ҳуқуқни муҳофаза қилиш органларининг фаолиятини мувофиқлаштириш доирасида:

бошқа ҳуқуқни муҳофаза қилиш органларининг тегишли хизматлари билан ўзаро ҳамкорлик қилади, солиқ ва валютага оид жиноятларга қарши курашишнинг узоқ муддатли ва жорий дастурларини ишлаб чиқади ва амалга оширади;

солиқ ва валютага оид жиноятлар бўйича қўзғатилган жиноий ишларни тергов қилишга процессуал кўмаклашиш учун масалаларнинг бутун доираси юзасидан прокуратуранинг бошқа бўлинмалари билан ўзаро ҳамкорлик қилишни таъминлайди;

прокуратура органлари билан ўзаро ҳамкорликда Департамент ва унинг ҳудудий бўлинмалари томонидан қўзғатилган жиноий ишлар бўйича улар қўзғатилган ва тергов ҳаракатлари ўтказилган вақтдан бошлаб ишлар кўриб чиқилишига ва суд инстанцияларида қарор қабул қилинишига қадар назоратни амалга оширади;

ички ишлар органлари билан биргаликда тезкор ахборотни айирбошлаш, солиқ тўлашдан бўйин товлаган ҳамда солиқ ва валютага оид жиноятлар содир этган шахсларни қидириш ва ушлаш тадбирларини амалга оширади;

ҳуқуқни муҳофаза қилиш органлари билан биргаликда ушбу соҳада ҳуқуқни бузишларнинг ҳолати тўғрисидаги ахборотни ўзаро айирбошлайди.

24. Департамент ходимлари ўз функционал вазифалари бажарилмаганлиги ёхуд зарур даражада бажарилмаганлиги учун Ўзбекистон Республикасининг қонун ҳужжатларида назарда тутилган тартибда жавоб берадилар.

25. Ходимларни интизомий жавобгарликка тортиш масаласи Ўзбекистон Республикасининг қонун ҳужжатлари ҳамда Солиқ ва валютага оид жиноятларга қарши курашиш департаментида хизматни ўташ тартиби тўғрисидаги Низом билан тартибга солинади.

26. Департамент Ўзбекистон Республикаси Вазирлар Маҳкамасининг қарори билан ташкил этилади ва тугатилади.

1. 1-банднинг биринчи хатбошида «Ўзбекистон Республикаси Прокуратураси ҳузурида Солиққа оид жиноятларга қарши курашиш департаменти» сўзлари «Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти» сўзлари билан алмаштирилсин.

2. 2-бандда «Ўзбекистон Республикаси Прокуратураси ҳузуридаги» ва «Солиққа оид жиноятларни» сўзлари тегишли равишда «Ўзбекистон Республикаси Бош прокуратураси ҳузуридаги», «солиқ ва валютага оид жиноятларни» сўзлари билан алмаштирилсин.

3. 4-банднинг биринчи, тўртинчи ва бешинчи хатбошиларида «солиққа», «солиқ» сўзлари тегишли равишда «солиқ ва валютага», «солиқ ва валюта» сўзлари билан алмаштирилсин;

4. 5-бандда:

биринчи хатбошида «солиққа оид жиноятларни» ва «иқтисодий ва солиқ соҳасидаги» сўзлари тегишли равишда «солиқ ва валютага оид жиноятларни» ва «иқтисодиёт ва солиқ соҳасидаги ҳамда хорижий валюта айланиши соҳасидаги» сўзлари билан алмаштирилсин;

иккинчи хатбошида «Ўзбекистон Республикаси Прокуратурасига» сўзлари «Ўзбекистон Республикаси Бош прокуратурасига» сўзлари билан алмаштирилсин;

учинчи хатбошида «биринчи навбатда» сўзлари чиқариб ташлансин, «иқтисодиёт ва солиққа оид» сўзлари «иқтисодиёт, солиқ ва валютага оид» сўзлари билан алмаштирилсин;

тўртинчи хатбошида «иқтисодиёт ва солиққа оид» сўзлари «иқтисодиёт, солиқ ва валютага оид» сўзлари билан алмаштирилсин.

5. 7-бандда:

иккинчи, учинчи ва бешинчи хатбошилар ўз кучини йўқотган деб ҳисоблансин;

олтинчи хатбошида «Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти» сўзлари «Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти» сўзлари билан алмаштирилсин.

6. 8-банднинг иккинчи, тўртинчи ва олтинчи хатбошиларда «Ўзбекистон Республикаси Прокуратурасининг» сўзлари «Ўзбекистон Республикаси Бош прокуратурасининг» сўзлари билан алмаштирилсин.

7. 9, 10, 12-бандларда ва 14-банднинг биринчи хатбошида «Ўзбекистон Республикаси Прокуратураси» сўзлари «Ўзбекистон Республикаси Бош прокуратураси» сўзлари билан алмаштирилсин.

8. 14-банднинг бешинчи ва олтинчи хатбошиларида «Солиққа оид жиноятларга» сўзлари «Солиқ ва валютага оид жиноятларга» сўзлари билан алмаштирилсин.

9. 1, 2, 2а, 3, 3а, 5-иловалар ўз кучини йўқотган деб ҳисоблансин.

10. 4 ва 4а-иловаларнинг номланишидаги «Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти» сўзлари «Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти» сўзлари билан алмаштирилсин.

11. 6-иловада:

илованинг номланишида, 1-бандида ва иловада «Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти» сўзлари «Ўзбекистон Республикаси Бош прокуратураси ҳузуридаги Солиқ ва валютага оид жиноятларга қарши курашиш департаменти» сўзлари билан алмаштирилсин.