Прокуратура, ички ишлар, Давлат солиқ қўмитаси органлари, бошқа ҳуқуқни муҳофаза қилиш органлари томонидан иқтисодиёт ва солиқ соҳасидаги жиноятларга қарши курашиш, солиқлар ва тўловларнинг давлат бюджетига тўлиқ тушишини таъминлаш, иқтисодиёт соҳасидаги жиноятлар ва солиққа оид қонунлар бузилишининг олдини олиш чора-тадбирлари амалга оширилмоқда.

Давлат солиқ қўмитаси ҳузуридаги Солиқ соҳасидаги қонун бузилишларига қарши тезкор курашиш бош бошқармаси ходимлари томонидан кўрилаётган тезкор чора-тадбирлар натижасида солиқлар ва мажбурий тўловларни тўлашдан бош тортиш, акциз солиғига тортиладиган товарларни ноқонуний ишлаб чиқариш ва сотиш ҳамда бошқа иқтисодий жиноятлар билан боғлиқ ҳолатлар мунтазам равишда аниқланмоқда.

Шу билан бирга, Давлат солиқ қўмитаси ҳузуридаги тезкор бош бошқарма фаолияти ушбу хизмат олдига қўйилган талабларга тўлиқ жавоб бермайди:

ишда батартиблик ва изчиллик йўқ, саъй-ҳаракатларнинг майда бузилишлар ва жиноятларга қарши курашга тарқоқ ҳолда йўналтирилишига йўл қўйилмоқда, коррупция, иқтисодий ва солиққа оид жиноятларни келтириб чиқарувчи муҳим сабабларни топиш ва чеклаш маҳорати етишмаяпти;

бевосита солиқ хизматлари, тергов органлари, тезкор-қидирув бўлинмалари хатти-ҳаракатларида лозим даражали ва зарур алоқа, уйғунлик йўқ, натижада қонун нормаларининг йўл қўйилган бузилишлари учун жазо муқаррарлиги принципининг бажарилишига эришилмаяпти;

кадрларни танлаш, тайёрлаш, қайта тайёрлаш ва алмаштириб туришнинг амалдаги тизими жиддий яхшилашни талаб қилади.

Иқтисодиёт ва солиққа оид жиноятларга қарши курашиш самарадорлигини ошириш, давлат, юридик ва жисмоний шахсларнинг иқтисодий манфаатларини ҳимоя қилиш мақсадида Вазирлар Маҳкамаси қарор қилади:

1. Ўзбекистон Республикаси Давлат солиқ қўмитаси ҳузуридаги Солиқ соҳасидаги қонун бузилишларига қарши тезкор курашиш бош бошқармаси базасида ва унинг мавжуд штатдаги ходимлари доирасида Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти (кейинги ўринларда Департамент деб аталади) ва унинг жойлардаги бўлинмалари ташкил этилсин.

Ўзбекистон Республикаси Давлат солиқ қўмитаси тузилмасидаги Солиқ соҳасидаги қонун бузилишларига қарши тезкор курашиш бош бошқармаси ва унинг ҳудудий бўлинмалари тугатилсин, бўшайдиган 1172 нафар штат янги ташкил этилаётган Департамент таркибига берилсин.

2. Белгилаб қўйилсинки, Департамент Ўзбекистон Республикаси Прокуратураси ҳузуридаги ихтисослаштирилган мустақил орган ҳисобланади, солиқ интизомини мустаҳкамлаш соҳасида тезкор-таҳлилий, қидирув ишларини ташкил этиш ва амалга ошириш, солиққа оид жиноятларни ва қонун бузилишларига қарши курашиш, давлатга етказилган иқтисодий зарарни ундириб олиш унинг асосий мақсади ҳисобланади.

3. Қуйидагилар Департаментнинг асосий вазифалари этиб белгилансин:

солиққа оид жиноятлар ва қонун бузилишларини аниқлаш, олдини олиш ва бартараф этиш;

солиқ сиёсати амалга оширилишини таъминлаш, солиққа тортиш базаларини кенгайтириш, солиқ тўловчиларнинг қамраб олиниши ва ҳисобининг тўлиқлигини таъминлаш, нақд пул маблағлари муомалада бўлиши белгиланган тартиби бузилишларининг олдини олиш;

солиқларни тўлашдан бош тортиш, қочишнинг мумкин бўлган каналлари ва механизмларини, яширин иқтисодиётнинг шаклланиш йўлларини, коррупция ҳолларини аниқлашга йўналтирилган самарали тезкор-таҳлилий, қидирув ишларини ташкил этиш ва амалга ошириш;

норматив-ҳуқуқий базани, энг аввало солиққа оид қонун бузилишларининг олдини олиш ва бартараф этиш соҳасидаги норматив-ҳуқуқий базани такомиллаштириш бўйича таклифлар тайёрлаш;

одамларнинг ҳуқуқий онгини мустаҳкамлаш, фуқароларда иқтисодий фаолият ва солиқ сиёсатини амалга ошириш соҳасидаги конституциявий нормаларни ҳамда амалдаги қонун ҳужжатларини бажаришнинг зарурлиги тушунчасини шакллантириш;

аҳолида солиқларни тўлашдан бош тортганлик, иқтисодиёт, солиқ соҳасида содир этилган жиноятлар учун жазонинг муқаррарлиги тушунчасини тарбиялаш.

4. Белгилаб қўйилсинки, Департамент олдидаги вазифаларнинг бажарилиши солиқ соҳасидаги қонун бузилишларини олдини олиш, аниқлаш ва бартараф этиш тадбирларини амалга ошириш, жиноий ишлар қўзғатиш, уларни судда кўриб чиқиш, маъмурий тартибда жарималар солиш, етказилган зарарни ундириш йўли билан рўёбга чиқарилади.

Департамент ва унинг жойлардаги бўлинмалари иши кўриб чиқилган ва қўзғатилган жиноий ишлар сонига эмас, балки энг аввало профилактика ишларининг самарадорлиги ва ундирилган зарар миқдорига қараб баҳолансин.

Департамент ўзига юкланган вазифаларни бажаришда:

солиқ соҳасидаги қонун бузилишларини аниқлаш, олдини олиш ва бартараф этиш, тегишли тафтишлар ўтказиш бўйича Давлат солиқ қўмитаси ва, энг аввало, унинг вилоят ва туман бўлинмалари билан ҳар ойлик ва ҳар чораклик тадбирлар режалари асосида;

тезкор ахборот айирбошлаш, солиқларни тўлашдан бош тортган ва солиққа оид жиноятлар содир этган шахсларни қидириш ва ушлаш бўйича ички ишлар органлари билан ўзаро ҳамкорлик қилади.

5. Белгилансинки, жиноий ишни қўзғашдан тортиб уни судда кўриб чиқишгача бўлган жараёнда солиққа оид жиноятларни аниқлаш ва бартараф этиш бўйича процессуал ҳаракатларнинг кетма-кетлиги ва изчиллиги Департамент ва унинг ҳудудий бўлинмаларининг иқтисодий ва солиқ соҳасидаги жиноятлар бўйича жиноий ишларни кўриб чиқаётган, судда улар бўйича давлат айбномасини қўллаб-қувватловчи барча даражалардаги прокуратура органлари билан узвий ўзаро ҳамкорлиги ва ҳаракатларни мувофиқлаштириши натижасида таъминланади.

Белгилаб қўйилсинки, Ўзбекистон Республикаси Прокуратурасига ва унинг жойлардаги органларига:

биринчи навбатда, иқтисодиёт ва солиққа оид жиноятлар фактлари бўйича жиноий ишларни ўз вақтида текшириш, бунда уни қўзғаш вақтидан бошлаб суд томонидан қарор чиқарилгунгача бўлган даврда жиноий ишни кўриб чиқиш муддатларини мумкин қадар қисқартиришни назарда тутган ҳолда уларни тезда судга ошириш масалалари;

иқтисодиёт ва солиққа оид жиноятларга қарши курашиш давомида қонунчиликка, жиноий, жиноий-процессуал, фуқаролик ва фуқаролик-процессуал кодекслар нормаларига, бошқа норматив-ҳуқуқий ҳужжатларга риоя этилиши устидан умумий назоратни амалга ошириш юкланади.

6. Белгилаб қўйилсинки:

Департаментга лавозими бўйича Бош прокурор ўринбосарига тенглаштириладиган ва Ўзбекистон Республикаси Президенти томонидан тайинланадиган Департамент бошлиғи бошчилик қилади;

Департамент бошлиғининг ўринбосари лавозимга Департамент бошлиғи тақдимномасига биноан ва Ўзбекистон Республикаси Президенти билан келишган ҳолда Бош прокурор томонидан тайинланади;

Департаментнинг ҳудудий бошқармалари бошлиқлари ва уларнинг ўринбосарлари, туман ва шаҳар бўлимлари бошлиқлари тегишли лавозимларга Департамент бошлиғининг тақдимномасига биноан Бош прокурор томонидан тайинланади.

7. Қуйидагилар:

Ўзбекистон Республикаси прокуратураси ҳузуридаги Солиққа оид жиноятларга қарши курашиш департаментининг ташкилий-штат тузилмаси 1-иловага мувофиқ;

Қорақалпоғистон Республикаси, вилоятлар ва Тошкент шаҳар прокуратуралари ҳузуридаги солиққа оид жиноятларга қарши курашиш бошқармаларининг, шунингдек туман (шаҳар) прокуратураси ҳузуридаги солиққа оид жиноятларга қарши курашиш туман (шаҳар) бўлимларининг намунавий ташкилий-штат тузилмалари 2, 2а, 3, 3а- иловаларга мувофиқ;

Департамент ходимларининг даражали махсус унвонлари, шунингдек эгаллаб турилган лавозимлар бўйича даражали махсус унвонлари 4 ва 4а-иловаларга мувофиқ;

Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти тўғрисидаги Низом 5-иловага мувофиқ;

Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаментида хизматни ўташ тўғрисидаги Низом 6-иловага мувофиқ тасдиқлансин.

8. Иқтисодиёт ва солиқ соҳасидаги жиноятлар бўйича жиноий ишларнинг ўз вақтида ва сифатли кўриб чиқилишини таъминлаш мақсадида:

Ўзбекистон Республикаси Прокуратурасининг Иқтисодий жиноят ва коррупцияга қарши курашиш бош бошқармаси, шунингдек Ташқи иқтисодий фаолиятдаги коррупция, ўғирликлар ва бошқа суиистеъмолларга қарши курашиш бошқармаси базасида Ўзбекистон Республикаси Прокуратурасининг Иқтисодий жиноят ва коррупцияга қарши курашиш бошқармаси;

ҳудудий ва уларга тенглаштирилган прокуратура органларининг иқтисодий жиноят ва коррупцияга қарши курашиш бўлимлари, шунингдек ташқи иқтисодий фаолиятдаги коррупция, ўғирликлар ва бошқа суиистеъмолларга қарши курашиш бўлимлари базасида ҳудудий ва уларга тенглаштирилган прокуратура органларининг иқтисодий жиноят ва коррупцияга қарши курашиш бўлимлари ташкил этилсин.

Белгилаб қўйилсинки, Ўзбекистон Республикаси Прокуратурасининг Иқтисодий жиноятлар ва коррупцияга қарши курашиш бошқармаси ҳамда прокуратура ҳудудий органларининг тегишли бўлимларига ҳам Департамент, ҳам бошқа идоралар, ҳуқуқни муҳофаза қилиш органлари ва Прокуратуранинг ўзи томонидан қўзғатилган иқтисодий ҳамда солиққа оид жиноятлар бўйича жиноий ишларни кўриб чиқиш вазифаси юкланади.

Иқтисодий жиноятлар ва коррупцияга қарши курашиш бошқармасининг штатдаги ходимларининг чекланган сони 11 киши, ҳудудий ҳамда уларга тенглаштирилган прокуратура органлари иқтисодий жиноятлар ва коррупцияга қарши курашиш бўлимлари бўйича 4—6 киши (Тошкент шаҳар прокуратурасида 7 кишигача) этиб белгилансин.

Белгилаб қўйилсинки, Ўзбекистон Республикаси Прокуратурасининг Иқтисодий жиноятлар ва коррупцияга қарши курашиш бош бошқармасини, шунингдек Ташқи иқтисодий фаолиятда коррупция, ўғирликлар ва бошқа суиистеъмолларга қарши курашиш бошқармасини қайта ташкил этиш натижасида бўшаб қоладиган 18 кишидан иборат штатдаги ходимлар сони прокуратура ҳудудий органларининг тергов бўлинмаларини мустаҳкамлашга йўналтирилади.

9. Ўзбекистон Республикаси Прокуратураси (Р. Қодиров), Молия вазирлиги (М. Нурмуродов) солиққа оид жиноятларга қарши курашиш бўлинмалари таъминоти харажатлари сметасига тегишли ўзгартиришлар киритсинлар.

10. Ўзбекистон Республикаси Прокуратураси (Р. Қодиров) Макроиқтисодиёт ва статистика вазирлиги (Р. Азимов), Молия вазирлиги (М. Нурмуродов) ва Давлат солиқ қўмитаси (Б. Хўжаев) билан биргаликда Департаментни ва унинг ҳудудий бўлинмаларини транспорт, махсус техника ва бошқа моддий-техника воситалари билан таъминласин.

11. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари бир ой муддатда Департаментни ҳамда унинг жойлардаги бўлинмаларини зарур бинолар ва хоналар билан таъминлаш чора-тадбирларини кўрсинлар.

12. Макроиқтисодиёт ва статистика вазирлиги (Р. Азимов) ва Молия вазирлиги (М. Нурмуродов) Ўзбекистон Республикаси Прокуратурасининг асосланган ҳисоб-китобларига биноан ушбу қарорда назарда тутилган тадбирларни амалга ошириш учун зарур маблағлар ажратсинлар.

13. Давлат солиқ қўмитаси солиқ соҳасидаги қонун бузилишларига қарши тезкор курашиш бош бошқармасига ва унинг ҳудудий бўлинмаларига тегишли бўлган бино, автотранспорт, ташкилий техника, мебель ва бошқа моддий-техника воситаларини Департамент балансига берсин.

14. Ўзбекистон Республикаси Прокуратураси (Р. Қодиров) икки ой муддатда:

Ўзбекистон Республикаси прокуратура органлари бўлинмаларининг ташкилий-штат тузилмасини ушбу қарорга мувофиқлаштирсин;

Департамент раҳбарияти билан биргаликда унинг аппаратини ва жойлардаги бўлинмаларини юқори малакали кадрлар билан таъминласин;

Адлия вазирлиги (А. Полвон-зода) билан биргаликда амалдаги қонун ҳужжатларига ушбу қарордан келиб чиқадиган тегишли ўзгартириш ва қўшимчалар киритиш тўғрисида таклифлар тайёрласин;

Олий ва ўрта махсус таълим вазирлиги (С. Ғуломов) ва Давлат солиқ қўмитаси (Б. Хўжаев) билан биргаликда 2002/2003 ўқув йилида Ўзбекистон Республикаси Давлат солиқ қўмитаси ҳузуридаги солиқ ва божхона органлари академиясининг «Солиқлар ва солиққа тортиш» факультетига Солиққа оид жиноятларга қарши курашиш департаменти учун тингловчилар қабул қилиш бўйича таклифлар киритсин;

Ички ишлар вазирлиги (З. Алматов) билан биргаликда Ўзбекистон Республикаси Ички ишлар вазирлиги Академияси базасида Солиққа оид жиноятларга қарши курашиш департаменти бўлинмалари ходимларини қайта тайёрлашни таъминласин.

15. Ҳукуматнинг 7-иловага мувофиқ айрим қарорларига ўзгартириш ва қўшимчалар киритилсин.

16. Мазкур қарорнинг бажарилишини назорат қилиш Ўзбекистон Республикасининг Бош вазири Ў. Султонов ва Ўзбекистон Республикаси Президентининг Давлат маслаҳатчиси Т. Худойбергенов зиммасига юклансин.

2-даражали Давлат адлия маслаҳатчиси

3-даражали Давлат адлия маслаҳатчиси

Адлия катта маслаҳатчиси

Адлия маслаҳатчиси

Адлия кичик маслаҳатчиси

1-даражали юрист

2-даражали юрист

3-даражали юрист

1. Мазкур Низом Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти фаолиятининг ҳуқуқий асосларини, вазифалари ва функцияларини, тизими ва тузилмасини, ваколатлари ва жавобгарлигини белгилаб беради.

2. Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаменти (кейинги ўринларда «Департамент» деб юритилади) Ўзбекистон Республикаси Прокуратураси ҳузуридаги мустақил ихтисослаштирилган ҳуқуқни муҳофаза қилиш органи ҳисобланади, солиққа оид жиноятларга ва ҳуқуқ бузилишларига қарши курашиш соҳасида тезкор-таҳлилий, қидирув ишларини ташкил этиш ва ўтказиш, солиқ интизомини мустаҳкамлаш унинг асосий мақсади ҳисобланади.

3. Департамент ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, «Солиққа оид жиноятларга қарши курашиш департаментида хизматни ўташ тўғрисида»ги Низомга, шунингдек мазкур Низомга амал қилади.

4. Қуйидагилар Департаментнинг асосий вазифалари ҳисобланади:

солиққа оид жиноятлар ва ҳуқуқни бузишларни аниқлаш, уларнинг олдини олиш ва уларга барҳам бериш;

солиқ сиёсати амалга оширилишини таъминлаш, солиқ солиш базасини кенгайтириш, солиқ тўловчилар тўлиқ қамраб олиниши ва ҳисобга олиниши, нақд пул маблағлари муомаласининг белгиланган тартиби бузилишига барҳам бериш;

солиқ тўлашдан бўйин товлаш, қочишнинг эҳтимол тутилган йўллари ва механизмларини, яширин иқтисодиёт, коррупция ҳоллари шаклланиши йўлларини аниқлашга қаратилган самарали тезкор-таҳлил, қидирув ишларини ташкил этиш ва олиб бориш;

норматив-ҳуқуқий базани, энг аввало солиққа оид ҳуқуқни бузишларнинг олдини олиш ва профилактикаси соҳасидаги норматив-ҳуқуқий базани такомиллаштириш юзасидан таклифлар тайёрлаш;

одамларнинг ҳуқуқий онгини мустаҳкамлашга доир мунтазам иш олиб бориш, фуқароларда иқтисодий фаолият ва солиқ сиёсатини амалга ошириш соҳасида конституциявий нормалар ва амалдаги қонун ҳужжатлари бажарилиши зарурлигини тушунишни шакллантириш;

аҳолида солиқ тўлашдан бўйин товлаш, иқтисодий, солиқ соҳасида жиноятлар содир этганлик учун жазонинг муқаррарлигини тушунишни тарбиялаш.

Департамент ўзига юкланган вазифаларга мувофиқ қуйидаги функцияларни бажаради:

5. Тезкор-қидирув фаолияти соҳасида:

а) қуйидагилар механизмини ўрганади ва аниқлайди:

ишлаб чиқариш, фойда (даромад) ҳажмларини яшириш, сотилган маҳсулот, товарлар (ишлар, хизматлар) ҳажмларини пасайтириш;

хўжалик субъектлари томонидан ҳисобга олинмаган (тасдиқловчи ҳужжатларга эга бўлмаган) маҳсулотлар (товарлар) сотилиши;

«хуфёна иқтисодиёт» туғилиши, қарор топиши ва фаолият кўрсатиши, унинг ривожланишига кўмаклашувчи сабаблар ва шарт-шароитлар;

тадбиркорлик фаолиятини амалга оширувчи юридик ва жисмоний шахсларнинг давлат солиқ инспекцияларида ҳисобга туришдан бўйин товлаши;

б) қуйидагиларни амалга оширади:

нақд пул муомаласига эга бўлган хўжалик юритувчи субъектлар томонидан нақд пул маблағлари айланишининг қонун ҳужжатларида белгиланган тартиби бузилишини, шунингдек акциз солиғи солинадиган товарларнинг ғайриқонуний ишлаб чиқарилиши ва айланишини аниқлаш, олдини олиш ва барҳам беришга доир махсус тадбирларни;

солиқлар, йиғимлар ва бошқа тўловлар тўлашдан, солиқ органларига ҳисоботлар, солиқ декларациялари ва ҳисоб-китоблар тақдим этишдан қасддан бўйин товловчи солиқ тўловчиларнинг турар жойини аниқлашга доир тезкор-қидирув тадбирларини.

6. Солиқ ҳақидаги қонунларга риоя этилишини назорат қилиш соҳасида:

хўжалик юритувчи субъектлар томонидан бюджетга солиқлар ва тўловлар тўғри ҳисоблаб чиқилиши, тўлиқ ва ўз вақтида тўланишини текшириш йўли билан солиқ ҳақидаги қонунларга риоя этилиши устидан назоратни амалга оширади;

хўжалик юритувчи субъектларни муқобил текширади: текширилаётган (тафтиш қилинаётган) ташкилотдаги ҳужжатлар ва маълумотларни пул маблағлари, моддий бойликлар ва ҳужжатлар олинган ёки улар берилган ташкилотлардаги ёзувлар, ҳужжатлар ва маълумотлар билан солиштириш;

қонун ҳужжатларига мувофиқ давлат солиқ хизмати органлари мансабдор шахсларининг ўз мажбуриятларини ноҳалол бажариши ҳолларини аниқлаш мақсадида давлат солиқ хизмати органларини назорат тартибида текширишни ташкил этади.

7. Суриштирув олиб бориш соҳасида:

жиноий ишлар қўзғайди, солиққа оид жиноятлар содир этилиши ҳоллари юзасидан суриштирувгача текширишларни ташкил этади ва олиб боради;

Департаментнинг ҳудудий бўлинмаларида солиққа оид жиноятлар бўйича суриштирув олиб борилишини назорат қилади.

8. Ташкилий-назоратни таъминлаш соҳасида:

солиқ ва иқтисодий соҳада ҳуқуқни бузишларни аниқлаш, олдини олиш ва барҳам беришга қаратилган режали, режадан ташқари тадбирлар ва бошқа тадбирлар ишлаб чиқилиши ва амалга оширилишига доир ташкилий чора-тадбирларни амалга оширади;

ўз ҳудудий бўлинмаларининг фаолиятини ижро ва хизмат интизомига, амалдаги қонун ҳужжатларига риоя этилиши юзасидан улар томонидан ўз функционал мажбуриятлари бажарилиши бўйича идоравий текширишлар ўтказади.

9. Кадрлар билан таъминлаш соҳасида:

кадрларни танлаш ва жой-жойига қўйиш, Департамент ва унинг жойлардаги бўлинмалари кадрлари захирасини шакллантиришга доир тадбирларни ишлаб чиқади ва амалга оширади;

Департамент ва унинг ҳудудий бўлинмалари жамоасида соғлом маънавий-психологик муҳит яратишга доир ташкилий чора-тадбирларни амалга оширади, Департамент ходимларининг касб тайёргарлиги ва ижтимоий муҳофазаси ташкил этилишини таъминлайди.

10. Ахборот-таҳлилий ишлар, мувофиқлаштириш ва ҳуқуқий таъминлаш соҳасида:

Ўзбекистон Республикасининг иқтисодий хавфсизлигини таъминлашга доир қонун ҳужжатлари қўлланилиши амалиётини умумлаштиради, қонунларни ва Ўзбекистон Республикасининг бошқа норматив-ҳуқуқий ҳужжатларини такомиллаштириш юзасидан таклифларни ишлаб чиқади ва Бош прокурорга киритади;

солиқ ҳақидаги қонунлар бузилиши ҳолларини йиғади, таҳлил қилади ва баҳолайди, тегишли органларга иқтисодий жиноятлар ва бошқа солиққа оид жиноятлар содир этилишига олиб келувчи сабаблар ва шарт-шароитларни бартараф этиш тўғрисида таклифлар киритади;

тезкор-хизмат фаолиятини ахборот-таҳлилий таъминлайди;

иқтисодиёт соҳасидаги жиноятлар натижалари ва уларга қарши курашиш муаммолари тўғрисида прокуратура раҳбариятига ахборот беради;

Департамент ва унинг ҳудудий бўлинмалари фаолиятини такомиллаштиришга доир услубий ишларни олиб боради;

ходимларни ўқитишни, шу жумладан ишда замонавий фан ютуқлари ва янги технологиялардан фойдаланишни ташкил этади ва амалга оширади.

11. Департамент қуйидаги бўлинмалардан иборатдир:

Солиққа оид жиноятларга қарши курашишни мувофиқлаштириш ва ахборот-таҳлилий таъминлаш бошқармаси;

Солиққа оид жиноятларни аниқлаш, бартараф қилиш ва олдини олиш бўлими;

Солиққа оид жиноятларни суриштириш бўлими;

Ҳужжатли текширишлар бўлими;

Норматив-ҳуқуқий база бўлинмаси;

Шахсий таркиб бўйича инспекция;

Кадрлар бўлими;

Молия-хўжалик бўлинмаси;

Департаментнинг ҳудудий бўлинмалари (Қорақалпоғистон Республикаси, вилоятлар ва Тошкент шаҳар прокуратуралари ҳузуридаги солиққа оид жиноятларга қарши курашиш бошқармалари, шунингдек туман (шаҳар) прокуратуралари ҳузуридаги солиққа оид жиноятларга қарши курашиш туман (шаҳар) бўлимлари).

12. Департаментга лавозимига кўра Бош прокурорнинг ўринбосарига тенглаштирилган ва Ўзбекистон Республикаси Президенти томонидан тайинланадиган Департамент бошлиғи бошчилик қилади.

Департамент бошлиғининг ўринбосари лавозимга Департамент бошлиғи тақдимномасига биноан ва Ўзбекистон Республикаси Президенти билан келишган ҳолда Бош прокурор томонидан тайинланади.

Ҳудудий бошқармалар бошлиқлари ва уларнинг ўринбосарлари, Департаментнинг туман ва шаҳар бўлимлари бошлиқлари тегишли лавозимларга Департамент бошлиғининг тақдимномасига биноан Бош прокурор томонидан тайинланади.

13. Департамент мустақил юридик шахс ҳисобланади, банк муассасаларида ҳисоб-китоб, жорий ҳисоб рақамларига ва бошқа ҳисоб рақамларига, Ўзбекистон Республикасининг герби тасвирланган ва Департаментнинг номи тўлиқ ёзилган муҳрга эгадир.

14. Департамент ва унинг ҳудудий бўлинмалари ўзларига юкланган вазифаларга ва бажарадиган функцияларига мувофиқ қуйидаги ҳуқуқларга эгадир:

солиқлар, йиғимлар ва бюджетга бошқа мажбурий тўловлар бўйича ҳисоб ва ҳисобот бузилиши ҳоллари аниқланган тақдирда давлат солиқ хизмати органлари бўлинмаларининг телекоммуникация воситалари ва маълумотлар компьютер базалари, шунингдек солиқ тўловчиларнинг ҳужжатлари билан қонунда белгиланган тартибда танишиш;

солиқ органлари ва бошқа органлар ходимлари томонидан ҳуқуқни бузишлар яширилиши тўғрисида ишончли маълумотлар мавжуд бўлган тақдирда қонунда белгиланган тартибда такрорий текширишларни амалга ошириш;

солиққа оид жиноятлар тўғрисидаги ишлар бўйича суриштирувгача текширишларни амалга ошириш;

Ўзбекистон Республикаси фуқароларини, чет эллик фуқароларни ва фуқаролиги бўлмаган шахсларни Департамент бўлинмалари ваколатига кирувчи масалалар бўйича тушунтиришлар, маълумотномалар, маълумотлар олиш учун таклиф қилиш;

агар фуқаролар ва мансабдор шахслар солиқ соҳасида жиноят содир этганликда шубҳаланиш учун етарли асослар мавжуд бўлса белгиланган тартибда уларнинг зарур ҳужжатларини текшириш;

вазирликлар, идоралар, банклардан, шунингдек мулкчилик шаклларидан қатъи назар корхоналар, муассасалар ва ташкилотлардан, жисмоний шахслардан Департаментга юкланган вазифалар бажарилиши учун зарур бўлган ахборотни талаб қилиш, бундай ахборот олишнинг қонун томонидан махсус тартиби белгиланган ҳоллар бундан мустасно. Департамент томонидан олинган ахборотдан фақат хизмат мақсадларида фойдаланилади ва у ошкор қилиниши мумкин эмас;

хўжалик юритувчи субъектлар (солиқ тўловчилар)нинг даромад (фойда) олиш учун фойдаланиладиган ёхуд солиқ солиш объектларини сақлаш билан боғлиқ бўлган ишлаб чиқариш, омбор, савдо биноларини ва бошқа бинолари ва жойларини уларнинг жойлашган жойидан ва мулкчилик шаклларидан қатъи назар текшириш, бажарилган ишлар ва кўрсатилган хизматларни назорат тартибида ўлчаш, товар-моддий бойликларни хатлаш;

қурилиш, монтаж, тузатиш ишлари ва бошқа ишларни назорат тартибида ўлчаш учун белгиланган тартибда мутахассисларни жалб этиш;

текшириш, тадқиқ этиш ва экспертиза ўтказиш учун товарлар, буюмлар, хомашё, материаллар ва ярим тайёр маҳсулотлар намуналарини, шунингдек ҳужжатларни олиб қўйиш.

Бундан ташқари, қонун ҳужжатларига мувофиқ Департамент ва унинг ҳудудий бўлинмалари:

юридик ва жисмоний шахслардан улар фаолиятига тегишли маълумотлар, маълумотномалар, ҳужжатларни ва уларнинг нусхаларини;

хўжалик юритувчи субъектлар (солиқ тўловчилар)нинг ҳисоб-китоб рақамлари ва бошқа рақамлари билан содир этилган операциялар тўғрисидаги банк ва бошқа кредит-молия муассасалари маълумотларини;

божхона органлари ва Ташқи иқтисодий алоқалар вазирлигидан импорт-экспорт операцияларининг бажарилиши тўғрисидаги маълумотларни ва хўжалик юритувчи субъектлар (солиқ тўловчилар) тўғрисидаги бошқа ахборотни олиш ҳуқуқига эгадир.

16. Департамент ходимларига Ўзбекистон Республикаси қонун ҳужжатларида белгиланган бошқа ҳуқуқлар ҳам берилади.

17. Департамент ходимлари давлат, хизмат, тижорат сирини, жисмоний шахсларнинг омонатлари тўғрисидаги маълумотлар сирини ва улар ўз хизмат мажбуриятларини бажариш чоғида олган бошқа ахборотни сир сақлашлари керак. Сир ошкор қилинган тақдирда ходим қонунда белгиланган тартибда жавоб беради.

18. Департамент берилган ваколатларга мувофиқ ўз ҳудудий бўлинмалари фаолияти устидан улар фаолиятининг бутун доираси бўйича тезкор назоратни амалга оширади.

19. Бош прокурор ва унга бўйсунувчи прокурорлар Департамент бўлинмалари ва унинг ҳудудий бўлинмалари томонидан тушадиган хабарлар ва аризалар ҳисобга олиниши, рўйхатдан ўтказилиши ва кўриб чиқилишининг белгиланган тартибига риоя қилинишига, текширишлар, суриштирувлар ва улар билан боғлиқ процессуал ҳаракатлар амалга оширилиши, солиқ ҳақидаги қонунлар бажарилиши текширилиши ҳамда прокурорнинг ваколатига тегишли бўлган бошқа масалалар материаллари бўйича қабул қилинадиган қарорларнинг қонунийлигига риоя қилиш бўйича фаолияти устидан назорат қилинишини таъминлайдилар.

20. Солиққа оид жиноятларни аниқлаш ва уларга барҳам бериш бўйича процессуал ҳаракатларнинг жиноий иш қўзғашдан бошлаб уни судда кўриб чиқишга қадар узвийлиги ва изчиллиги Департамент ва унинг ҳудудий бўлинмаларининг иқтисодий ва солиқ соҳасидаги жиноятлар бўйича жиноий ишларни тергов қиладиган, судда улар бўйича давлат айбловини қўллаб-қувватлайдиган барча даражалардаги прокуратура органлари билан мустаҳкам ўзаро ҳамкорлиги ва хатти-ҳаракатларни мувофиқлаштириши натижасида таъминланади.

21. Ўзбекистон Республикаси Прокуратурасига ва унинг жойлардаги органларига:

биринчи навбатда, иқтисодий ва солиқ жиноятлари ҳоллари бўйича жиноий ишларни ўз вақтида тергов қилиш масалалари, уларнинг тезроқ судга берилиши юкланади, бунда жиноий иш қўзғатилган пайтдан бошлаб суд қарори қабул қилингунга қадар жиноий ишни кўриб чиқиш муддатларини энг кўп даражада қисқартириш назарда тутилади;

иқтисодий ва солиқ жиноятларига қарши кураш олиб бориш давомида қонунийликка ва жиноят, жиноят-процессуал, фуқаролик ва фуқаролик-процессуал кодекслар нормаларига риоя этишни умумий назорат қилиш юкланади.

22. Департамент Ўзбекистон Республикасининг Бош прокурори томонидан белгиланган муддатларда Департамент ва унинг ҳудудий бўлинмаларининг иши тўғрисидаги ҳамда солиқ соҳасида қонунийликнинг ҳолати ҳақида ҳисобот, ахборот ва ҳисобга олиш-таҳлилий маълумотлар тақдим этилишини таъминлайди.

23. Солиқ солиш ва бюджетга тўловлар соҳасида қонунийликнинг ҳолати тўғрисидаги маълумотлар асосида амалга ошириладиган Департамент тадбирларини жорий ва истиқболли режалаштириш Ўзбекистон Республикаси Бош прокурори билан келишган ҳолда амалга оширилади.

24. Бош прокурорнинг ўз ваколатлари доирасида қабул қилган буйруқлари ва кўрсатмалари, шунингдек Ўзбекистон Республикаси Прокуратураси ҳайъатининг Департамент ва унинг ҳудудий бўлинмалари фаолиятини ташкил этиш масалалари бўйича қарорлари Департамент ва унинг ҳудудий бўлинмаларининг барча ходимлари томонидан сўзсиз бажарилиши керак.

25. Солиқ ва бюджет соҳаларида қонунийликни мустаҳкамлаш, даромадлар ва солиқ солиш объектлари ҳисобга олишдан яширилганлиги, солиқлар ва бюджетга бошқа мажбурий тўловлар тўлашдан бўйин товланганлиги учун жазонинг муқаррарлиги тамойилини таъминлаш бўйича қўшма тадбирлар амалга оширилишида Департамент ва унинг ҳудудий бўлинмаларининг прокуратура органлари билан ўзаро ҳамкорлик қилиши тартиби Ўзбекистон Республикаси Бош прокурори томонидан тасдиқланади.

26. Департамент давлат солиқ хизмати органлари билан қуйидаги йўналишлар бўйича ўзаро ҳамкорлик қилади:

солиққа оид ҳуқуқни бузишларни аниқлаш, олдини олиш ва уларга барҳам бериш, профилактика бўйича ойлик, чораклик ва йиллик тадбирларга мувофиқ тегишли тафтишлар ўтказилишини ташкил этиш;

прогноз кўрсаткичлар бажарилишида, солиқлар ва бюджетга бошқа мажбурий тўловлар бўйича муддатида тўланмаган тўловларни ундиришда давлат солиқ инспекцияларига кўмаклашиш;

солиққа оид ҳуқуқни бузишларни аниқлаш, олдини олиш ва уларга барҳам бериш бўйича қўшма рейдлар ўтказиш;

тезкор аҳамиятли ахборотни айирбошлаш.

27. Ўзаро ҳамкорлик Департаментнинг вазифалари, функциялари ва мажбуриятлари ҳисобга олинган ҳолда белгиланган тартибда бошқа йўналишлар бўйича ҳам амалга оширилади.

28. Департамент бошлиғи Ўзбекистон Республикаси Бош прокурори билан келишган ҳолда, прокуратура томонидан амалга ошириладиган қонунийликни мустаҳкамлаш ва жиноятчиликка қарши курашиш бўйича ҳуқуқни муҳофаза қилиш органларининг фаолиятини мувофиқлаштириш доирасида:

бошқа ҳуқуқни муҳофаза қилиш органларининг тегишли хизматлари билан ўзаро ҳамкорлик қилади, солиққа оид жиноятларга қарши курашишнинг узоқ муддатли ва жорий дастурларини ишлаб чиқади ва амалга оширади;

солиққа оид жиноятлар бўйича қўзғатилган жиноий ишларни тергов қилишга процессуал кўмаклашиш учун масалаларнинг бутун доираси юзасидан прокуратуранинг бошқа бўлинмалари билан ўзаро ҳамкорлик қилишни таъминлайди;

прокуратура органлари билан ўзаро ҳамкорликда Департамент ва унинг ҳудудий бўлинмалари томонидан қўзғатилган жиноий ишлар бўйича улар қўзғатилган ва тергов ҳаракатлари ўтказилган пайтдан бошлаб ишлар кўриб чиқилишига ва суд инстанцияларида қарор қабул қилинишига қадар назоратни амалга оширади;

ички ишлар органлари билан биргаликда тезкор ахборотни айирбошлаш, солиқ тўлашдан бўйин товлаган ва солиққа оид жиноятлар содир этган шахсларни қидириш ва ушлаш тадбирларини амалга оширади;

ҳуқуқни муҳофаза қилиш органлари билан биргаликда ушбу соҳада ҳуқуқни бузишларнинг ҳолати тўғрисидаги ахборотни ўзаро айирбошлайди.

29. Департамент ходимлари ўз функционал вазифалари бажарилмаганлиги ёхуд зарур даражада бажарилмаганлиги учун Ўзбекистон Республикасининг қонун ҳужжатларида назарда тутилган тартибда жавоб берадилар.

30. Ходимларни жиноий жавобгарликка тортиш масаласи Ўзбекистон Республикасининг қонун ҳужжатлари ва «Солиққа оид жиноятларга қарши курашиш департаментида хизматни ўташ тўғрисида»ги Низом билан тартибга солинади.

31. Департамент Ўзбекистон Республикаси Вазирлар Маҳкамасининг қарори билан ташкил этилади ва тугатилади.

1. Мазкур Низом Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаментига (кейинги ўринларда «Департамент» деб юритилади) хизматга қабул қилиш ва Департаментда хизматни ўташ тартибини белгилаб беради.

Департаментда хизмат қилиш қонунийлик, инсон ва фуқаронинг ҳуқуқ ва эркинликларини ҳурмат қилиш ва уларга риоя этиш, ошкоралик, назорат қилиниш ва ҳисобот бериш тамойилларига мувофиқ қурилади.

2. Департамент ходимлари Ўзбекистон Республикаси Президенти томонидан тасдиқланган формали кийим-бош киядилар. Уларга Ўзбекистон Республикаси Бош прокурори томонидан белгиланган шаклдаги хизмат гувоҳномалари берилади.

Хизмат гувоҳномаси Департамент ходимининг шахсини, унинг лавозими ва даражали махсус унвонини тасдиқловчи ҳужжат ҳисобланади.

3. Департаментда хизмат қилиш учун олий юридик, иқтисодий, молиявий маълумотга эга бўлган ҳамда соғлиғига кўра хизмат мажбуриятларини бажаришга қодир бўлган зарур касб-кор ва маънавий фазилатларга эга бўлган Ўзбекистон Республикаси фуқаролари қабул қилинадилар.

Департаментда хизматни ўташнинг ички тартиби Департамент бошлиғи томонидан тасдиқланади. Ишдан ташқари, дам олиш ва байрам кунларидаги иш учун амалдаги қонун ҳужжатларига мувофиқ ҳақ тўланади.

4. Департаментга биринчи марта хизматга кирувчи шахслар учун 3 ойгача бўлган синов муддати белгиланади.

Синов муддати вақти кўп йиллик хизмати учун фоиз устамаси тўлаш ва пенсия тайинлаш ҳуқуқини берувчи Департаментдаги иш стажига қўшилади.

Синов муддатини ўтаётган шахслар:

агар уларнинг қўйилаётган талабларга номувофиқлиги аниқланса Департамент бўлинмалари раҳбариятининг ташаббуси билан;

хизматга кирган шахснинг ташаббуси билан (ўз хоҳишига кўра, оилавий шароитлар бўйича ва бошқа узрли сабабларга кўра) Департаментдан хизматдан бўшатилиши мумкин.

5. Департамент ходимини хизматга қабул қилиш ва лавозимга тайинлаш Ўзбекистон Республикаси Бош прокурори ёки Департамент бошлиғининг ваколатлари доирасида уларнинг буйруқлари билан расмийлаштирилади. Департаментнинг ҳудудий бошқармаларида ёрдамчи шахслар ва техник ходимларни хизматга қабул қилишни ушбу бошқармалар бошлиқлари амалга оширадилар.

Хизматга қабул қилиш тўғрисидаги буйруқ ходимга имзо қўйдириб эълон қилинади.

6. Агар шахс:

Ўзбекистон Республикаси фуқароси бўлмаса;

суднинг қарори билан ҳуқуқий лаёқатсиз ёки ҳуқуқий лаёқати чекланган деб эътироф этилган бўлса;

судланган бўлса;

сиёсий партиялар ва ҳаракатлар аъзоси бўлса Департаментга хизматга қабул қилиниши мумкин эмас.

7. Департаментнинг аттестациядан ўтказилган ходимларига даражали махсус унвонлар берилади. Даражали махсус унвонлар рўйхати Ўзбекистон Республикаси ҳукумати томонидан белгиланади.

8. Департамент ходимига тадбиркорлик фаолияти билан шуғулланиш, корхоналар, муассасалар ва ташкилотларда ўриндошлик бўйича ишлаш тақиқланади, ижодий, илмий ва ўқитувчилик фаолияти бундан мустасно.

9. Департамент ходимлари лавозимлари рўйхати Департамент бошлиғи томонидан тасдиқланадиган штат жадвали билан белгиланади.

10. Департамент ходими мазкур Низомга иловага мувофиқ қасамёд қабул қилади. Қасамёд Департаментнинг раҳбарлари ва мансабдор шахслари ҳозирлигида тантанали вазиятда қабул қилинади.

Қасамёд якка тартибда қабул қилинади. Қасамёд қабул қилувчи шахс қасамёд матнини овоз чиқариб ўқийди ва унга имзо чекади.

Қасамёд матни ёзилган имзоланган варақ ходимнинг шахсий ҳужжатлари йиғма жилдида сақланади.

11. Департамент ходимларини хизматда лавозимга кўтариш уларнинг ишчанлик ва шахсий фазилатларига, ишнинг топширилган участкаларида эришилган натижаларга ва юқори лавозим вазифаларини бажариш учун намоён қилинган қобилиятларга мувофиқ, шунингдек аттестация хулосаларини амалга ошириш тартибида амалга оширилади.

12. Ходимнинг қўйиладиган талабларга хизмат бўйича мувофиқлигини аниқлаш мақсадида қонун ҳужжатларида белгиланган муддатларда аттестация ўтказилади.

Аттестация ўтказишда аттестациядан ўтказилаётган мансабдор шахснинг касб-кор бўйича яроқлилиги ва эгаллаб турган лавозимига мувофиқлиги, шунингдек унинг бундан буён хизмат қилишига ва даражали махсус унвон беришга доир таклифлар кўриб чиқилади.

Лавозимига Бош прокурорнинг буйруқлари билан тайинланадиган ходимлар Ўзбекистон Республикаси Бош прокурори ҳузуридаги махсус инспекция томонидан, Департамент бошлиғининг буйруқлари билан лавозимга тайинланадиган ходимлар — Департаментнинг аттестация комиссияси томонидан аттестациядан ўтказилади.

13. Ўзбекистон Республикаси қонун ҳужжатларига мувофиқ мазкур Низом Департамент ходимларига даражали махсус унвонлар белгилаш ва бериш тартибини белгилаб беради.

14. Даражали махсус унвон бериш ходимнинг ишчанлик ва шахсий фазилатларини ҳисобга олган ҳолда ва эгаллаб турган лавозими ва иш стажига мувофиқ изчил тартибда амалга оширилади.

15. Даражали махсус унвонлар рўйхати ва уларнинг лавозимларга мувофиқлиги Ўзбекистон Республикаси Вазирлар Маҳкамаси томонидан белгиланади.

16. Ҳар бир даражали махсус унвонда бўлишнинг қуйидаги муддатлари белгиланади:

3 — даражали юрист — 2 йил

2 — даражали юрист — 2,5 йил

1 — даражали юрист — 3 йил

адлия кичик маслаҳатчиси — 3 йил

адлия маслаҳатчиси — 3,5 йил

Департамент ходимларининг 2 ва 3 - даражалардаги Давлат адлия маслаҳатчиси ва адлия катта маслаҳатчиси унвонларини эгаллаб туриш муддати белгиланмайди.

17. 2 ва 3-даражали давлат адлия маслаҳатчиси даражали махсус унвонлар Бош прокурорнинг тақдимномасига кўра Ўзбекистон Республикаси Президенти томонидан берилади.

Бошқа даражадаги махсус унвонлар Департамент бошлиғининг тақдимномасига кўра Ўзбекистон Республикаси Бош прокурори томонидан берилади.

18. Бошқа ҳуқуқни муҳофаза қилиш органларида ва ўзга ташкилотлардан Департаментга ишга ўтган ходимларга даражали махсус унвонлар уларнинг Департаментда тайинланган лавозими, олдинги унвони ва иш тажрибаси ҳисобга олинган ҳолда берилади.

19. Ўзбекистон Республикаси Бош прокурори қуйидаги ҳуқуқларга эга:

айрим ҳолларда Департамент ходимларига хизмат мажбуриятларини намунали бажарганлиги учун Департамент бошлиғининг тақдимномасига кўра навбатдаги даражали махсус унвонларни мазкур Низомнинг 16-бандида кўрсатилган муддат тугамасдан аввал бериш;

юқорироқ лавозимга тайинлаганда Департамент бошлиғининг тақдимномасига кўра унвонни навбатдан ташқари, лекин ходим эгаллаб турган унвондан кўпи билан икки поғона юқори унвон бериш;

2 ва 3-даражали Давлат адлия маслаҳатчиси махсус унвонини бериш тўғрисидаги тақдимнома билан Ўзбекистон Республикаси Президентига мурожаат этиш.

20. Департаментнинг даражали махсус унвонлар берилган ходимлари мазкур унвонга умрбод эга бўлиб қоладилар. Ходим ўзини бадном қиладиган қилмиши учун Департаментдан бўшатилганда даражали махсус унвондан маҳрум этилиши мумкин. Департамент ходими ўз хизмат бурчини қўпол равишда бузган тақдирда ёки нолойиқ хулқ-атвори учун унинг унвони пасайтирилиши мумкин.

21. Департамент ходимларини олий даражали махсус унвонлардан маҳрум этиш ёки уларнинг олий даражали махсус унвонларини пасайтириш Ўзбекистон Республикаси Президенти томонидан, бошқа даражали махсус унвонлардан маҳрум этиш ёки унвонни пасайтириш Ўзбекистон Республикаси Бош прокурори томонидан амалга оширилади.

Департамент ходимларини даражали махсус унвонлардан маҳрум этиш суднинг ҳукми бўйича амалга оширилиши мумкин.

22. Департаментнинг даражали махсус унвонларга эга бўлган ходимларига лавозим маошларига тегишли пул устамалари тўланади.

23. Департаментнинг даражали махсус унвонга эга бўлган ходимлари хизмат вазифаларини бажариш даврида алоҳида кўринишдаги белгилар тақилган махсус либос киядилар. Олий даражали махсус унвонга ва адлия катта маслаҳатчиси даражали махсус унвонга эга бўлиб, пенсияга чиқиши муносабати билан хизматдан бўшаган Департамент ходимлари алоҳида кўринишдаги белгилар тақилган махсус либосни кийиб юриш ҳуқуқини сақлаб қолади.

24. Департамент ходимлари хизмат вазифаларини виждонан ва намунали бажарганликлари, ташаббускорлиги ва ишдаги тезкорлиги учун рағбатлантириладилар.

25. Рағбатлантиришларнинг қуйидаги турлари мавжуд:

ташаккурнома;

пул мукофоти;

илгари берилган жазони олиб ташлаш;

фахрий ёрлиқ;

совға;

қимматбаҳо совға;

белгиланган муддат тўлишидан аввал навбатдаги даражали махсус унвон бериш.

Шунингдек Ўзбекистон Республикаси Бош прокурорининг ҳамда Давлат органлари ходимлари касаба уюшмалари уюшмаси Марказий Қўмитаси ва жамоат ташкилотларининг Фахрий ёрлиғи билан мукофотлаш мумкин.

Департаментнинг ходимлари алоҳида хизматлари учун Ўзбекистон Республикаси давлат мукофотларига тақдим этилиши мумкин.

Иш ҳақи, бошқа мукофотлар, меҳнатга ҳақ тўлаш тизимида назарда тутилган қўшимча ҳақ ва устамалар рағбатлантириш турларига кирмайди.

Департамент бошлиғига ўзининг шахсий фармойиши билан оддий ходимдан бошлаб Департамент бошлиғи ўринбосаригача ходимларнинг лавозим маошларига бир йиллик лавозим маоши миқдорида рағбатлантириш шаклида мукофотлаш устамалари белгилаш ҳуқуқи берилади. Ушбу масала бўйича алоҳида Низом Молия вазирлиги билан келишилади.

Департамент ва унинг ҳудудий бўлинмалари ходимларини рағбатлантириш Департамент фаолияти натижаси ва у туфайли давлат бюджети олган маблағлар миқдоридан келиб чиқиб амалга оширилади. Агар Департамент томонидан ундирилган ва давлат бюджетига тушган маблағлар Департаментнинг иш ҳақи фонди миқдоридан ортиқ бўлмаса ва унинг ходимларининг иш ҳақини қопламаса ходимларига мукофотлаш устамалари тўланмайди.

26. Берилган интизомий жазо ўз кучини йўқотмаган ходимларга нисбатан рағбатлантириш қўлланилмайди.

27. Рағбатлантириш қуйидаги тартибда амалга оширилади:

ташаккурнома эълон қилиш, пул мукофоти, совға бериш Ўзбекистон Республикаси Бош прокурори ва Департамент бошлиғи томонидан амалга оширилади;

қимматбаҳо совға билан мукофотлаш, Ўзбекистон Республикаси Бош прокурорининг Фахрий ёрлиғини бериш, белгиланган муддат тўлишидан аввал навбатдаги даражали махсус унвон бериш, Ўзбекистон Республикаси Бош прокурори ва касаба уюшмалари уюшмаси Марказий Қўмитасининг Фахрий ёрлиғини бериш, Ўзбекистон Республикасининг давлат мукофотларига тақдим этиш Ўзбекистон Республикаси Бош прокурори томонидан амалга оширилади.

28. Рағбатлантириш тўғрисида буйруқ чиқарилади ва у Департаментнинг рағбатлантирилаётган ходимига эълон қилинади. Зарур ҳолларда эса Департаментнинг барча ходимлари эътиборига етказилади. Рағбатлантириш тўғрисидаги буйруқ нусхаси ходимнинг шахсий ҳужжатлари йиғма жилдига тикиб қўйилади.

29. Департамент ходимларига нисбатан интизомий жазо ўз хизмат вазифасини бажармаганлиги, ёхуд лозим даражада бажармаганлиги ёки Департамент ходими деган номга доғ туширадиган ножўя хатти-ҳаракат содир этганлиги учун қўлланилади.

30. Қуйидагилар интизомий жазолар ҳисобланади:

ҳайфсан;

ўртача ойлик иш ҳақининг эллик фоизидан ортиқ бўлмаган миқдордаги жарима;

лавозимини пасайтириш;

даражали махсус унвонини бир поғона пасайтириш;

хизмат мажбуриятлари бир марта қўпол равишда бузилганлиги учун хизматдан бўшатиш.

Қуйидагилар хизмат вазифасини бир марта қўпол равишда бузиш ҳисобланади:

узрли сабабларсиз прогул (шу жумладан иш куни мобайнида уч соатдан ортиқ хизматда бўлмаслик);

хизматга маст ҳолда келиш, тенг равишда иш жойида спиртли ичимликлар ичиш;

жиноий жазоланадиган қилмиш ёки хатти-ҳаракат содир этиш;

Департамент ходимининг Қасамёдини бузиш.

31. Ўзбекистон Республикаси Бош прокурори Департаментнинг хизматга қабул қилиш ҳуқуқи унинг ваколатига кирувчи ходимларига нисбатан интизомий жазонинг барча турларини қўллашга ҳақлидир. Департамент бошлиғи ва ҳудудий бошқармалар бошлиқлари Департамент ёки ҳудудий бўлинмалар ходимларига нисбатан интизомий жазоларни мазкур Низомнинг 30-бандида назарда тутилган ҳайфсан ва жарима шаклида қўллашлари мумкин. Бундан ташқари, улар хизматга қабул қилиш ҳуқуқи ўз ваколатларига кирувчи ходимларнинг мансабини пасайтириши ёхуд ишдан бўшатиши мумкин.

32. Интизомий жазо қўллаш тўғрисидаги масалани ҳал этаётган мансабдор шахс содир этилган хатти-ҳаракатни шахсан ўзи аниқлаши шарт. Зарур ҳолларда хизмат текшируви тайинланиши мумкин.

Интизомий жазо қўллангунгача Департамент ходимидан тушунтириш хати талаб қилиниши керак. Ходимнинг тушунтириш хати беришдан бош тортиши у илгари содир этган қилмиши учун жазо чораси қўллашга тўсқинлик қила олмайди.

Ҳар бир қилмиш учун фақат битта интизомий жазо қўлланади.

Интизомий жазо бевосита аниқланган қилмиш учун, бироқ қилмиш аниқланган кундан бошлаб бир ойдан кечикмай қўлланилади, бу муддатга ходимнинг касал бўлган ёки меҳнат таътилида бўлган вақти кирмайди.

Интизомий жазо қилмиш содир этилган кундан бошлаб олти ой ўтгач, хизмат текшируви натижалари бўйича эса у содир этилган кундан бошлаб икки йилдан кейин қўлланиши мумкин эмас. Кўрсатиб ўтилган муддатларга жиноий ишни кўриб чиқиш вақти кирмайди.

Жазо чораси буйруқ билан берилади, у ходимга имзо қўйдирган ҳолда эълон қилинади ва унинг шахсий ҳужжатлари йиғмажилдига қўшиб қўйилади.

33. Ўзбекистон Республикаси Бош прокурори ва Департамент бошлиғи, буйруқда ўз қарорини асослаган ҳолда, жазони бекор қилиш, уни кучайтириш ёки енгиллаштириш ҳуқуқига эгадирлар. Агар интизомий жазо чораси сифатида ишдан бўшатиш қўлланган бўлса, у ҳолда Ўзбекистон Республикаси Бош прокурори ёки Департамент бошлиғи ишдан бўшатишни асоссиз деб ҳисоблаб, ходимни илгариги лавозимига тиклаш ва унга мажбурий ишланмаган вақти учун, бироқ кўпи билан бир йил учун ўртача иш ҳақини тўлаш тўғрисида буйруқ чиқарадилар.

34. Агар ходим жазо қўлланилган кундан бошлаб бир йил мобайнида янги интизомий жазо олмаган бўлса у интизомий жазо олмаган деб ҳисобланади.

35. Интизомий жазо амал қилиши муддати мобайнида ходимга нисбатан рағбатлантиришлар қўлланилмайди. Интизомий жазо мавжудлиги ходим лавозимини оширишга тўсқинлик қилувчи ҳолат деб ҳам ҳисобланади.

36. Интизомий жазолар қўлланилиши бўйича ўзларига берилган ваколатларни ошириб юборган ёки уларни Департамент ёки ҳудудий бошқармалар ходимларига нисбатан зарур даражада қўллашмаган Департамент бошлиғи, ҳудудий бошқармалар бошлиқлари Ўзбекистон Республикаси Прокурори олдида жавоб берадилар.

37. Ходимга нисбатан қўлланган интизомий жазо юзасидан интизомий жазо қўлланганлиги тўғрисидаги буйруқ ходимга эълон қилингандан кейин икки ҳафта муддатда Ўзбекистон Республикаси Бош прокурорига ёки Департамент бошлиғига шикоят қилиниши мумкин.

Шикоят у тушган кундан бошлаб ўн кун муддатда, қўшимча текширув ўтказиш зарур бўлган ҳолларда эса у тушган кундан бошлаб бир ойдан кечикмай кўриб чиқилади.

Шикоят билан мурожаат қилиш интизомий жазони ижро этишни тўхтатмайди.

38. Департамент ходимларининг пул таъминоти лавозим маошидан, даражали махсус унвон ва кўп йиллик хизмати учун устамалардан иборат бўлади.

Даражали махсус унвон учун устамалар миқдорлари лавозим маошига нисбатан фоиз ҳисобида, кўп йиллик хизмати учун ҳар йилги устамалар миқдорлари эса даражали махсус унвон учун устамани қўшган ҳолда лавозим маошларида белгиланади.

Кўп йиллик хизмати учун устамани ҳисоблаш ҳуқуқини берувчи махсус стаж Ўзбекистон Республикаси Бош прокурорининг 1995 йил 19 майдаги 247-сон буйруғи билан тасдиқланган ва Ўзбекистон Республикаси Меҳнат вазирлиги билан келишилган Ўзбекистон Республикаси прокуратура органларининг даражали махсус унвонга эга бўлган ходимларга кўп йиллик хизмати учун устамалар тўлаш тартиби тўғрисидаги Низомда белгиланган қоидалар бўйича ҳисоблаб чиқарилади.

39. Даражали махсус унвонлар берилган шахслар белгиланган нормалар бўйича бепул формали кийим билан таъминланади.

40. Департамент ходимларига 30 кунлик ҳар йилги меҳнат таътили берилади. Аттестациядан ўтган, 15 календарь йилдан ортиқ иш стажига эга бўлган ходимларга иш стажи:

15 календарь йилдан ортиқ бўлганда — 5 кун;

25 календарь йилдан ортиқ бўлганда — 10 кун ҳақ тўланадиган қўшимча меҳнат таътили берилади.

Ходимларни ҳар йилги навбатдаги таътилдан чақириб олишга хизмат бўйича ўта зарур ҳолларда, ходимнинг розилиги билан йўл қўйилади. Таътилнинг фойдаланилмаган қисми кеч муддатларга ўтказилади.

41. Департамент ходимларига оилавий шароитига кўра, шунингдек бошқа узрли сабаблар бўйича ҳақ тўланмайдиган, навбатдаги таътил ҳисобига ўтказилмайдиган қисқа муддатли таътил берилиши мумкин.

42. Департамент ходимларининг ва улар оила аъзоларининг пенсия таъминоти Ўзбекистон Республикаси қонун ҳужжатларида ички ишлар органларида хизматни ўтаган шахслар ва уларнинг оила аъзолари учун белгиланган шартлар, нормалар ва тартибга татбиқан амалга оширилади.

43. Ходимлар Ўзбекистон Республикаси Ички ишлар вазирлиги тиббий муассасаларида тиббий хизматлардан бепул фойдаланиш ҳуқуқига эга.

Департаментнинг пенсия олувчи ходимлари ва уларнинг оила аъзоларига тиббий хизматлар кўрсатиш улар рўйхатда турган даволаш муассасаларида амалга оширилади.

44. Департамент ходимлари хизмат сафарларига юборилганда барча турдаги транспорт воситаларига йўл чипталари ва меҳмонхоналарда жойларни банд қилиш ва навбатсиз олиш ҳуқуқидан фойдаланадилар.

45. Департамент ходимларини ижтимоий суғурталаш қонун ҳужжатларида белгиланган тартибда амалга оширилади.

46. Департаментда хизмат қилиш ходим ишдан бўшатилганда тўхтатилади.

Қуйидагилар хизмат қилишни тўхтатиш учун асос ҳисобланади:

ходимнинг ўз ташаббуси;

томонларнинг келишуви;

ишда ходимлар сони (штатлар)нинг қисқариши ёки хизмат хусусиятининг ўзгаришини келтириб чиқарувчи ташкилий ўзгаришлар натижасида ходимлар сонининг қисқартирилиши;

ходимнинг малакаси етарли даражада эмаслиги ёки саломатлигига кўра бажараётган вазифасига номувофиқлиги;

саломатлигига ёки бошқа узрли сабабларга кўра узоқ муддат мобайнида ўз вазифасини бажаришга ноқобиллиги;

огоҳлантирилганидан кейин ҳам мазкур Низомнинг 8-бандида кўрсатилган фаолиятни давом эттираётган бўлса;

унга нисбатан суд айблов қарорининг қонуний кучга кириши;

ходим томонидан ўз хизмат бурчининг бир марта қўпол равишда бузилиши, бундай қоидабузарлик ҳолатларининг рўйхати мазкур Низомнинг 29-бандида келтирилган;

ходим томонидан ўз хизмат бурчининг мунтазам равишда бузилиши. Хизмат бурчини мунтазам равишда бузиш деб ходим илгари содир этган хизмат бурчининг бузилиши учун интизомий жазога тортилган кундан эътиборан бир йил мобайнида интизомий қоидабузарликни такроран содир этиши ҳисобланади, агар жазо муддатидан олдин олиб ташланган бўлмаса;

Департамент ходимининг Қасамёдини бузиш, шунингдек Департамент ходимининг шаъни ва обрўсини тўкувчи қилмиш содир этиши;

ходимнинг Департаментда хизмат қилувчилар учун чекланган ёшга тўлиши;

ходимнинг Ўзбекистон Республикаси фуқаролигидан маҳрум бўлиши;

суд қарори билан унинг вафот этган деб эълон қилиниши.

47. Департамент ходимларининг хизматда бўлишлари учун чекланган ёш чегараси эркаклар учун 60 ва аёллар учун 55 ёш. Хизмат манфаатлари назарда тутилган ҳолда ходим мазкур ёшга тўлганидан кейин муддатли шартнома асосида меҳнатга ҳақ тўлаш шартлари сақланган ҳолда Департаментда хизмат қилишни давом эттириши мумкин.

Чекланган хизмат муддатининг тегишли раҳбарнинг қарорига мувофиқ 5 йилгача узайтирилишига йўл қўйилади. Чекланган хизмат муддатининг бундан кейин ҳам узайтирилишига йўл қўйилмайди.

48. Эгаллаб турган лавозимидан озод қилинган ходим кадрлар бўлими ихтиёрига, охирги хизмат жойидаги ўртача ойлик маоши сақланган ҳолда ўтказилади. Уни келгусидаги хизмат вазифасига тайинлаш масаласи бир ойдан кеч бўлмаган муддат ичида ҳал этилиши керак.

Мен (қасамёд қабул қилувчининг фамилияси, исми, отасининг исми) Ўзбекистон Республикаси Прокуратураси ҳузуридаги Солиққа оид жиноятларга қарши курашиш департаментига хизматга кирар эканман, Ўзбекистон Республикаси халқига содиқ бўлишга қасамёд қиламан.

Ўзбекистон Республикаси Конституциясига, инсон ва фуқаро ҳуқуқларига риоя этишга, бошлиқларнинг буйруқларини виждонан бажаришга, виждонли, жасур ходим бўлишга, Ватаннинг иқтисодий манфаатларини сергаклик билан қўриқлашга, давлат ва хизмат сирларини қаттиқ сақлашга қасамёд қиламан.

Агар мен қабул қилган Қасамёдни бузсам Ўзбекистон Республикаси қонунларида белгиланган жавобгарликка тортилишга тайёрман.

(Имзо)

(Сана)

1. Вазирлар Маҳкамасининг «Давлат солиқ органлари фаолиятини ташкил этишни такомиллаштириш тўғрисида» 2000 йил 13 мартдаги 87-сон қарорида:

қарорнинг 3-банди ва қарорга 3-илова ўз кучини йўқотган деб ҳисоблансин;

5-банднинг иккинчи хатбошидан «Солиқ соҳасида ҳуқуқ бузилишларга қарши тезкор курашиш бош бошқармаси ва унинг ҳудудий бошқармалари» сўзлари чиқариб ташлансин;

7-банддан «Солиқ соҳасида ҳуқуқ бузилишларга қарши тезкор курашиш бош бошқармаси ва унинг ҳудудий бошқармалари» сўзлари чиқариб ташлансин;

1, 2, ва 2а-иловалардан «Солиқ соҳасида ҳуқуқ бузилишларга қарши тезкор курашиш бош бошқармаси ва унинг ҳудудий бошқармалари» сўзлари чиқариб ташлансин.

2. Вазирлар Маҳкамасининг «Давлат солиқ хизмати органлари фаолиятини ҳуқуқий тартибга солишни такомиллаштириш тўғрисида» 2000 йил 5 майдаги 180-сон қарорида (Ўзбекистон Республикаси ҚТ, 2000 й., 5-сон, 20-модда):

1-банднинг учинчи хатбоши ва қарорга 2-илова ўз кучини йўқотган деб ҳисоблансин;

1-иловада:

5-банднинг иккинчи хатбоши чиқариб ташлансин;

8.4-банднинг иккинчи хатбошидан «тезкор-қидирув фаолиятини ташкил этади ҳамда» сўзлари чиқариб ташлансин;

9.1-банднинг «о» кичик бандидан иккинчи хатбоши чиқариб ташлансин;

9.1-банддан «п» кичик банд чиқариб ташлансин;

9.2-банднинг учинчи хатбоши қуйидаги таҳрирда баён қилинсин:

«и» — «о» кичик бандларида назарда тутилган ҳуқуқлар давлат солиқ хизмати органлари бошлиқлари ва уларнинг ўринбосарларига берилади»;

9.2-банднинг тўртинчи хатбоши чиқариб ташлансин;

16-банддан «Солиқ соҳасида ҳуқуқ бузилишларга қарши тезкор курашиш бош бошқармаси ва унинг ҳудудий бошқармалари» сўзлари чиқариб ташлансин;

қарорга 4-илова 3.1-бандининг йигирманчи хатбоши чиқариб ташлансин.