Ўзбекистон Республикаси Ҳукумати билан Саудия Арабистони Подшоҳлиги Ҳукумати (бундан кейин «Аҳдлашувчи Томонлар» деб аталадилар),

иккала мамлакат ўртасидаги мавжуд дўстона алоқаларни мустаҳкамлашни хоҳлаб,

ўз халқлари ўртасидаги тарихий, маданий ва исломий алоқаларни мустаҳкамлашга интилиб,

ўрталаридаги ҳамкорликни иккала мамлакатда амал қилаётган қонун ва қарорларга мувофиқ мустаҳкамлаш иккала давлатга ҳам фойда келтиришини тан олиб,

қуйидагилар тўғрисида аҳдлашиб олдилар:

Аҳдлашувчи Томонлар икки мамлакат ўртасидаги ҳамкорликни ҳамжиҳатлик руҳида мустаҳкамлаш ва қўллаб-қувватлашга ҳаракат қиладилар.

Аҳдлашувчи Томонлар икки мамлакат ва уларнинг фуқаролари ўртасида, шу жумладан иккала мамлакатдаги юридик ва жисмоний шахслар ўртасида, иқтисод, савдо, инвестициялар ва техника соҳаларида ҳамкорлик қилишни рағбатлантирадилар. Бундай ҳамкорлик, хусусан, қуйидаги соҳаларни қамраб олади, лекин улар билан чекланиб қолмайди:

1. Барча иқтисодий соҳаларда, шу жумладан саноат, нефть, металлургия, нефть-кимё, қишлоқ хўжалиги, чорвадорлик соҳаларида ва соғлиқни сақлаш соҳасида ҳамкорлик қилиш.

2. Фан ва техника тадқиқотларига доир маълумотлар билан алмашишни рағбатлантириш.

3. Маълум қўшма лойиҳалар учун зарур бўлган техник экспертлар билан алмашиниш ва тайёрлашни рағбатлантириш.

1. Аҳдлашувчи Томонлар ўзаро савдони фаоллаштириш ва хилма-хил қилиш учун бутун кучларини сарфлайдилар; шу мақсадларда ва халқаро қоидаларга мувофиқ Аҳдлашувчи Томонлар савдода бир-бирига энг қулай режим яратиб берадилар.

2. Бу Аҳдлашувчи Томонларнинг ҳар бири томонидан учинчи мамлакатларнинг фуқаролари ёки компанияларига уларнинг эркин савдо мақомида, бож иттифоқи, умумий бозор ёки ҳар қандай минтақавий иқтисодий ташкилотда иштирок эгишлари натижасида берилган имтиёзларга татбиқ қилинмайди.

1. Аҳдлашувчи Томонлар фуқароларнинг барча соҳаларда инвестиция қилишларига тўла эркинлик беришни рағбатлантирадилар ва осонлаштирадилар, қабул қилувчи мамлакат фуқароларининг фаолияти тақиқланган ёки фақат улар учун чекланган соҳалар бундан мустаснодир.

2. Аҳдлашувчи Томонлар иккала мамлакатда амал қилаётган инвестициялар тўғрисидаги қонун ва қоидалар доирасида қўшма инвестицион лойиҳалар яратишни рағбатлантирадилар.

Аҳдлашувчи Томонлар вакиллар, иқтисод, савдо ва техник делегациялари ва гуруҳлари ташрифлари билан алмашишни, шу жумладан хусусий сектор делегацияларининг ташрифлари билан алмашишни рағбатлантирадилар, кўргазмаларда қатнашишни рағбатлантирадилар ва шунингдек икки мамлакат ўртасидаги ҳамкорликни қўллаб-қувватлаш мақсадида уларга зарур имтиёзлар берадилар.

Аҳдлашувчи Томонлар фан-маданият, спорт соҳаларида ва ёшлар ишларида ҳамкорлик қилишни рағбатлантирадилар. Бундай ҳамкорлик, хусусан, қуйидаги соҳаларни қамраб олади, лекин улар билан чекланиб қолмайди:

1. Фан ва техникада бир-бирини қизиқтирадиган соҳалар бўйича маълумот алмашиш йўли билан ҳамкорлик қилиш; расмий шахслар, илмий ходимлар, эксперт ва техниклар ташрифлари билан алмашиш; тадқиқотчилар ва техник ходимларни ўқитиш; бир-бирида қизиқиш уйғотадиган семинар ва илмий конференцияларда иштирок этиш ва шунингдек илмий режаларни ишлаб чиқиш, лабораториялар ва илмий- тадқиқот марказларини барпо қилишдаги ҳамкорлик.

2. Маданият соҳасида маданий муассасалар, жамиятлар, давлат ва ижтимоий ташкилотлар ўртасида программалар алмашиш йўли билан ҳамкорлик қилиш, иккала мамлакатда ўтказиладиган конференция ва фестивалларда иштирок этиш, ўз мамлакатлари, халқлари мерослари ва маданиятлари ҳақида ҳужжатли ва информацион фильмлар билан алмашиш ва шунингдек ташрифлар ва мутахассислар алмашиш, маданият соҳасида кадрлар тайёрлаш, араб тилини тарқатиш ва ўқитиш ишларини уйғунлаштириш йўли билан университетлар, ўқув юртлари ва бошқа муассасалар ўртасидаги ҳамкорликни рағбатлантириш.

3. Ёшлар ишлари ва спорт бўйича ислом ва халқаро тантаналарида нуқтаи назарларини уйғунлаштириб олиш, ёшлар ва спорт муассасалари, ташкилотлар ва иттифоқлари ўртасида программалар билан алмашиш, ҳужжатлар, аудиовизуал материаллар, адабиёт, тегишли тажриба алмашиш ва шунингдек расмий шахслар ўртасида спорт соҳаси ва ёшлар ишлари бўйича тажриба алмашиш, спорт соҳаси ва ёшлар ишлари бўйича кадрлар тайёрлашда ҳамкорлик, кадрлар билан алмашиш программаларини ривожлантириш ва шу кадрларни иккала мамлакатда ташкил этиладиган миллий минтақавий ва халқаро конференция ва семинарларда иштирок этиш учун таклифномалар билан таъминлаш орқали ҳамкорлик қилиш.

Зарурат бўлганда Аҳдлашувчи Томонлар ушбу Битимнинг бажарилишини назорат қилиш бўйича Қўшма комиссия тузиш масаласида келишиб олишлари мумкин.

1. Ушбу Битим иккала мамлакатда амал қилаётган қоидаларга мувофиқ ратификация ёрлиқлари билан алмашилган кундан бошлаб кучга киради.

2. Ушбу Битимнинг амал қилиш муддати — кучга кирган кундан бошлаб 5 йил ва Томонлардан бири ушбу Битим амалини тўхтатиш хоҳиши борлиги тўғрисида муддати тамом бўлишидан олти ой илгари ёзма равишда хабар бермаса, ҳар сафар изчиллик билан бир йилга ўз-ўзидан чўзилаверади.

3. Ушбу Битимнинг амал қилиш муддати тамом бўлгандан кейин унинг қоидалари ушбу Битимга мувофиқ тузилган барча программа, лойиҳа ва битимларга, ушбу Битимга мувофиқ тузилган, лекин унинг амал қилиб турган даврида тамом бўлмаган барча контракт, мажбуриятларга ва шунингдек ушбу Битимга мувофиқ олинган, лекин унинг амал қилиб турган даврида тартибга солинмаган ҳуқуқларга, ҳукумат, юридик ва жисмоний шахсларга тегишли марказ ва жорий молия операциялари билан Битим амал муддатининг тамом бўлишига қадар боғлиқ бўлган масалаларни тартибга солишга татбиқ қилинмайди.

Иккала нусхада, ҳар бири ўзбек ва араб тилларида, имзоланди, иккала матн бир хил кучга эга.

ал-Риёз шаҳрида 1995 йилнинг ноябрь ойи 18 кунига мос келувчи ҳижрий 1416 йилнинг жумод ал-сони ойи 25 куни имзоланди.