Вазирлар Маҳкамасининг 2002 йил 24 январдаги 30-сон қарори билан тасдиқланган «Қарияларни қадрлаш йили» давлат дастурига мувофиқ ва аҳолининг ижтимоий ночор қатламларини қўллаб-қувватлаш мақсадида Вазирлар Маҳкамаси қарор қилади:

1. Вазирлар Маҳкамасининг «Болаликдан ногиронларга, қарияларга ва меҳнатга лаёқатсиз фуқароларга нафақалар тайинлаш ва тўлаш тартиби тўғрисида» 1994 йил 24 июндаги 319-сон қарорига мувофиқ ҳаёт чоғида нафақа олган шахсларнинг дафн маросими учун 2002 йил 1 майдан бошлаб энг кам ойлик иш ҳақининг икки баравари миқдорида бир йўла бериладиган нафақа белгилансин.

2. Кексалар ва меҳнатга лаёқсатсиз фуқаролар, ногирон болалар ва болаликдан ногиронларнинг дафн маросими учун бир йўла бериладиган нафақалар тайинлаш ва тўлаш тартиби тўғрисидаги Низом иловага мувофиқ тасдиқлансин.

3. Белгилаб қўйилсинки, кексалар ва меҳнатга лаёқатсиз фуқаролар, ногирон болалар ва болаликдан ногиронларнинг дафн маросими учун бир йўла бериладиган нафақаларга солиқ солинмайди.

4. Ўзбекистон Республикаси Меҳнат ва аҳолини ижтимоий муҳофаза қилиш вазирлиги бир ой муддатда амалдаги идоравий норматив ҳужжатларни мазкур қарорга мувофиқлаштирсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С.Азимов зиммасига юклансин.

1. Дафн маросими учун бир йўла бериладиган нафақани (кейинги ўринларда «бир йўла бериладиган нафақа» деб юритилади) олиш ҳуқуқига Вазирлар Маҳкамасининг «Болаликдан ногиронларга, қарияларга ва меҳнатга лаёқатсиз фуқароларга нафақалар тайинлаш ва тўлаш тартиби тўғрисида» 1994 йил 24 июндаги 319-сон қарорига мувофиқ ҳаёт чоғида нафақа олган кексалар ва меҳнатга лаёқатсиз фуқаролар, ногирон болалар ва болаликдан ногиронларни дафн этган оила аъзоларидан бири ёки жисмоний шахс эга бўлади.

2. Бир йўла бериладиган нафақа мазкур Низомнинг 1-бандида кўрсатилган фуқаролар вафот этган кунда белгиланган энг кам ойлик иш ҳақининг икки баравари миқдорида тайинланади ва тўланади.

3. Бир йўла бериладиган нафақа, уни олиш учун фуқаро вафот этган кундан бошлаб 6 ойдан кечикмай мурожаат қилинган тақдирда тайинланади.

4. Бир йўла бериладиган нафақани тайинлаш тўғрисидаги ариза вафот этган шахс нафақа олувчи сифатида ҳисобда турган туман (шаҳар) Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлимига берилади.

5. Бир йўла бериладиган нафақа тайинлаш тўғрисидаги аризага қуйидаги ҳужжатлар илова қилиниши керак:

а) бир йўла бериладиган нафақа олиш учун фуқаролик ҳолатларини қайд этиш органи томонидан вафот этганлик тўғрисида берилган маълумотнома (асл нусхаси);

б) фуқароларнинг ўзини ўзи бошқариш органининг дафн этишнинг аризачи томонидан амалга оширилишини тасдиқловчи маълумотномаси.

6. Бир йўла бериладиган нафақа тайинлаш тўғрисидаги аризани қабул қилиш:

а) агар вафот этган фуқаро нафақа олувчи сифатида туман (шаҳар) Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлимида ҳисобда турмаган бўлса;

б) нафақа тайинлаш юзасидан ушбу Низомнинг 1-бандида кўрсатилган шахслар вафот этган кундан бошлаб 6 ой ўтгандан кейин мурожаат қилинганда;

в) ушбу Низомнинг 5-бандида кўрсатилган ҳужжатлардан бирортаси тақдим этилмаганда рад қилинади.

Аризачи бир йўла бериладиган нафақа тайинлаш тўғрисидаги аризани қабул қилишнинг рад этилиши юзасидан юқори ташкилотга ёки судга белгиланган тартибда шикоят қилиши мумкин.

7. Бир йўла бериладиган нафақа тайинлаш тўғрисидаги ариза туман (шаҳар) Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлими томонидан барча зарур ҳужжатлар билан биргаликдаги ариза тушгандан кейин 3 кундан кечикмай кўриб чиқилади.

Бир йўла бериладиган нафақа тайинлаш Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлими қарорига биноан расмийлаштирилади.

8. Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлими нафақа тайинлаш тўғрисида қарор чиқарилгандан кейин 3 кундан кечикмай тегишли қарор нусхаси билан биргаликда билдиришномани аризачининг қўлига беради ёки унга почта орқали жўнатади.

9. Туман (шаҳар) Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси бўлими тайинланган бир йўла бериладиган нафақани нафақа тайинлаш тўғрисида ариза берилган ойдан кейинги ойдан кечикмай тўлайди.

Аризачининг хоҳишига кўра нафақа алоқа бўлими орқали почта жўнатмаси тарзида ёки банкдаги омонатга ўтказиш йўли билан тўланади.

10. Бир йўла бериладиган нафақаларни тўлаш бюджетдан ташқари Пенсия жамғармаси ҳисобидан амалга оширилади.

11. Бир йўла бериладиган нафақа солиққа тортилмайди ва улардан солиқ пули ушлаб қолинмайди.

12. Бир йўла бериладиган нафақа тўлаш бўйича ҳисобга олиш ва ҳисобот бериш тартиби Ўзбекистон Республикаси Молия вазирлиги томонидан белгиланади.