Жаҳон стандартларига мос келадиган юқори сифатли рақобатбардош чарм-пойабзал маҳсулотлари ва замонавий қурилиш материалларининг янги турларини ишлаб чиқаришни янада кўпайтириш ва шу асосда улар билан ички истеъмол бозорини янада тўлиқ тўлдириш ҳамда экспортга етказиб беришни кенгайтириш мақсадида:

1. Маълумот учун қабул қилинсинки, «Wenzhou Jinsheng Trade Co., Ltd» компанияси (Хитой Халқ Республикаси) ва «Sinlong» МЧЖ (Ўзбекистон Республикаси) томонидан хорижий инвестициялар иштирокида масъулияти чекланган жамият шаклидаги «Peng Sheng» қўшма корхонаси ташкил этилган бўлиб, унинг устав капитали 3,0 млн АҚШ долларига тенг, улушлар муассислар ўртасида қуйидагича тақсимланади:

«Wenzhou Jinsheng Trade Co., Ltd» компанияси (Хитой Халқ Республикаси) — 1 500 минг АҚШ доллари (50 фоиз);

«Sinlong» МЧЖ (Ўзбекистон Республикаси) — 1 500 минг АҚШ доллари (50 фоиз).

2. Ўзбекистон Республикаси Ташқи иқтисодий алоқалар, инвестициялар ва савдо вазирлиги номидан Ўзбекистон Республикаси Ҳукумати билан «Wenzhou Jinsheng Trade Co., Ltd» компанияси ўртасида 2009 йил 28 майда имзоланган, Сирдарё вилоятида «Peng Sheng» МЧЖ негизида интеграциялашган ишлаб чиқариш комплекси фаолиятини ташкил этиш бўйича хорижий инвесторнинг аниқ мажбуриятларини ва уни Ўзбекистон Республикаси Ҳукумати томонидан давлат томонидан қўллаб-қувватлаш чора-тадбирларини белгиловчи Инвестиция шартномаси тасдиқлансин.

3. Белгилансинки, кўрсатиб ўтилган Инвестиция шартномасига мувофиқ «Wenzhou Jinsheng Trade Co., Ltd» компанияси:

камида 26 млн АҚШ доллари миқдорида, шу жумладан биринчи босқичда (2010 йил 1 июнгача) — 12,3 млн АҚШ доллари миқдорида инвестиция киритиш;

2010 йилнинг иккинчи ярмидан бошлаб халқаро стандартларга мувофиқ бўлган сифатни бошқариш тизимини жорий этишни таъминлаган ҳолда тайёр чарм, пойабзал ва керамик плиткалар ишлаб чиқаришни бошлашни ташкил этиш;

«Peng Sheng» МЧЖнинг ташкил этилаётган ишлаб чиқариш қувватларида қўшма корхона лойиҳа қувватига чиққан пайтдан бошлаб (2011-2012 йиллар) 600 минг дона қорамол терисини қайта ишлашни, шунингдек йилига 4 млн кв. м керамик плиткалар ишлаб чиқаришни, 300 минг жуфт пойабзал ишлаб чиқаришни таъминлаш;

ишлаб чиқарилаётган чарм ва пойабзалнинг камида 70 фоизини ҳамда керамик плиткаларнинг 55 фоизини экспорт қилишга;

ишлаб чиқаришга ёлланган ходимлар умумий сонининг камида 70 фоизи миқдорида маҳаллий мутахассисларни жалб этиш.

Ўзбекистон Республикаси Инвестициялар бўйича давлат қўмитаси хорижий инвестор томонидан тузилган Инвестиция шартномаси доирасида қабул қилинган мажбуриятларнинг сўзсиз бажарилиши устидан назоратни таъминласин.

4. Ўзбекистон Республикаси Президентининг «Тўғридан-тўғри хусусий хорижий инвестицияларни жалб этишни рағбатлантириш борасидаги қўшимча чора-тадбирлар тўғрисида» 2005 йил 11 апрелдаги ПФ-3594-сон Фармони 1-бандининг биринчи хатбошида назарда тутилган имтиёзлар юқорида кўрсатиб ўтилган Инвестиция шартномаси кучга кирган санадан бошлаб 7 йил мобайнида «Peng Sheng» МЧЖнинг хорижий инвестициялар иштирокидаги корхоналарига ишлаб чиқарилаётган маҳсулотларнинг барча турларига татбиқ этилсин.

5. «Peng Sheng» МЧЖ:

республикада ишлаб чиқарилмайдиган ва қурилиш учун зарур бўлган, Вазирлар Маҳкамаси томонидан тасдиқланадиган рўйхатлар бўйича Сирдарё вилоятида интеграциялашган ишлаб чиқариш комплексини қуриш даврида олиб келинадиган техник ҳужжатлар, машиналар, махсус техника ва механизмлар, махсус транспорт воситалари (енгил автомобиллардан ташқари), қурилиш материаллари ва конструкциялари;

2012 йилнинг 1 январигача Вазирлар Маҳкамаси томонидан тасдиқланадиган рўйхатлар бўйича тайёр чарм, чарм маҳсулотлари, пойабзал ва керамик плиталар ишлаб чиқариш учун фойдаланиладиган, республикада ишлаб чиқарилмайдиган асбоб-ускуналар, хомашё ва материаллар.

6. Ўзбекистон Республикаси Ташқи ишлар вазирлиги «Peng Sheng» МЧЖ буюртманомаларига биноан мазкур қарорни амалга ошириш доирасида жалб этиладиган хорижий мутахассислар ва уларнинг оила аъзоларига кириш визалари белгиланган тартибда расмийлаштирилишини таъминласин.

7. Ўзбекистон Республикаси Ички ишлар вазирлиги «Peng Sheng» МЧЖнинг буюртманомалари бўйича кўп марталик визалар берилиши ва муддати узайтирилишини, шунингдек, хорижий мутахассислар ва уларнинг оила аъзолари вақтинча яшаш жойида вақтинча рўйхатдан ўтказилишини ва вақтинча рўйхатдан ўтказиш муддати узайтирилишини белгиланган тартибда таъминласин.

8. Ўзбекистон Республикаси Меҳнат ва аҳолини ижтимоий муҳофаза қилиш вазирлиги «Peng Sheng» МЧЖга кўрсатиб ўтилган лойиҳани амалга ошириш учун юқори малакали хорижий мутахассисларни Ўзбекистон Республикасига жалб этишга белгиланган тартибда рухсатномалар берилишини таъминласин.

9. Мазкур қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин