Oʻzbekiston Respublikasi Vazirlar Mahkamasining 2003-yil 28-iyundagi 290-sonli qarori bilan tasdiqlangan “Qishloq va suv xoʻjaligi vazirligi toʻgʻrisida”gi nizomga muvofiq buyuraman:

1. Fermer xoʻjaligini yuritish uchun yer uchastkalarini berishda tanlov gʻolibini aniqlash tartibi toʻgʻrisidagi nizomga (2005-yil 19-noyabr, roʻyxat raqami 1523) ilovaga muvofiq oʻzgartirish va qoʻshimchalar kiritilsin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtganidan keyin kuchga kiradi.

3. Ushbu buyruqning ijrosini nazorat qilish vazirning birinchi oʻrinbosari A. Joʻrayev zimmasiga yuklatilsin.

1. 9-band quyidagi tahrirda bayon qilinsin:

“9. Tuman hokimi ariza kelib tushgan kuniyoq arizani yer uchastkalari berish (sotish) masalalarini koʻrib chiqish boʻyicha komissiyaga yuboradi. Agar mazkur komissiyaga yuborilgan ariza va hujjatlarda kamchiliklar aniqlangan taqdirda, komissiya ariza bergan shaxsga ariza kelib tushgan kunning ertasidan kechiktirmay kamchiliklarni aniq koʻrsatgan holda asoslantirilgan yozma xabar beradi. Mazkur komissiya kotibi talabgorga tanlovda yuqori ball olishi uchun imkon beradigan barcha holatlarni tushuntirib, lozim boʻlganda uning hujjatlaridagi kamchiliklarni ishchi tartibda bartaraf etish choralarini koʻradi. Komissiya kotibi tanlovda ishtirok etish uchun qatnashuvchilarni tanlash kunigacha talabgorning baholanadigan imkoniyatlarini asoslantiruvchi hujjatlarning toʻliq taqdim qilinishini, ularning toʻgʻri rasmiylashtirilishini taʼminlashga koʻmaklashishi lozim”.

2. 14-bandning ikkinchi xatboshisidagi “ushbu xoʻjalikning boshqa loyihalari boʻyicha” soʻzlari “boshqa loyihalar boʻyicha” soʻzlari bilan almashtirilsin.

3. 15-band quyidagi tahrirda bayon qilinsin:

“15. Ariza va hujjatlarni komissiyaning kotibi qabul qiladi. Agar taqdim etilgan hujjatlarda kamchiliklar aniqlangan taqdirda, ariza bergan shaxsga shu kuniyoq kamchiliklarni aniq koʻrsatgan holda asoslantirilgan yozma xabar beriladi. Komissiyaning kotibi talabgorga tanlovda yuqori ball olishi uchun imkon beradigan barcha holatlarni tushuntirib, lozim boʻlganda uning hujjatlaridagi kamchiliklarni ishchi tartibda bartaraf etish choralarini koʻradi. Komissiya kotibi tanlovda ishtirok etish uchun qatnashuvchilarni tanlash kunigacha talabgorning baholanadigan imkoniyatlarini asoslantiruvchi hujjatlarning toʻliq taqdim qilinishini, ularning toʻgʻri rasmiylashtirilishini taʼminlashga koʻmaklashishi lozim”.

4. 19-bandning oxirgi xatboshisi quyidagi tahrirda bayon qilinsin:

“soʻnggi yillarda shartnomaviy majburiyatlarning qay darajada bajarilishi”.

5. 20-bandi boʻyicha:

a) “g” kichik bandi yettinchi qismi quyidagi tahrirdagi xatboshisi bilan toʻldirilsin:

“4) tanlovda ishtirok etish uchun talabgorga bevosita mulk huquqi asosida tegishli boʻlmagan, shu jumladan talabgor taʼsis etgan (ishtirokchisi boʻlgan) yuridik shaxslarga tegishli boʻlgan texnika vositalarini taklif etishga yoʻl qoʻyilmaydi, talabgor sifatida tanlovda ishtirok etayotgan fermer xoʻjaligi bundan mustasno”.

b) “d” kichik bandi ikkinchi xatboshisi quyidagi tahrirda bayon qilinsin:

“Agar talabgor qishloq xoʻjaligi kooperativlari (shirkat xoʻjaliklari) hamda boshqa qishloq xoʻjalik korxonalari va tashkilotlari rahbari va xodimlari (fermer xoʻjaliklari xodimlari va oilaviy pudratchilar bundan mustasno) boʻlsa, unda xoʻjalikning soʻnggi uch yildagi mahsulot yetkazib berish kontraktatsiya shartnomalarining bajarilishi toʻgʻrisidagi tuman statistika boʻlimi tomonidan berilgan maʼlumotnoma asosida 4 balldan 10 ballgacha baholanadi”.

6. 28-band quyidagi tahrirda bayon qilinsin:

“28. Tanlovda ishtirok etish uchun tanlab olingan qatnashuvchi oʻz arizasini bir loyihadan olib, ushbu loyiha boʻyicha tanlovda ishtirok etmasdan, avval toʻplagan ballarini saqlab qolgan holda shu xoʻjalikdagi boshqa loyihadagi yer maydoniga berish huquqiga ega. Bunday talabgor boshqa loyihaga tanlov oʻtkazilgunga qadar komissiyaga ariza bilan murojaat qilishi va arizaga faqatgina Tanlovda ishtirok etishga tavsiya etish toʻgʻrisidagi komissiya qarorini ilova qilishi kifoya.

Bu holda, talabgorning toʻplagan bali u ariza bergan boshqa loyihaga tanlovda ishtirok etish uchun tanlab olingan talabgorlar toʻplagan balldan kam boʻlmasligi lozim”.

7. 34-bandning birinchi xatboshisi quyidagi tahrirda bayon qilinsin:

“34. Eng koʻp yakuniy ball toʻplagan talabgor tanlov gʻolibi deb topiladi va tanlov oʻtkazilgan kundan boshlab 3 kundan kechiktirmay eʼlon qilinadi”.

8. Nizom 2-ilovasining 6-bandi ikkinchi ustuni quyidagi tahrirda bayon qilinsin:

“Oilaviy pudratchi yoki fermer xoʻjaligi boshligʻi, qishloq xoʻjaligi kooperativlari (shirkat xoʻjaliklari) hamda boshqa qishloq xoʻjalik korxonalari va tashkilotlari rahbari va xodimlari (fermer xoʻjaliklari xodimlari va oilaviy pudratchilar bundan mustasno) uchun soʻnggi uch yil davomida mahsulot yetkazib berish boʻyicha shartnomalarning bajarilishi”.

9. Ushbu oʻzgartirish va qoʻshimchalar Oʻzbekiston Respublikasi Iqtisodiyot vazirligi hamda Oʻzbekiston fermer xoʻjaliklari uyushmasi bilan kelishilgan.