Oʻzbekiston Respublikasi Prezidentining “Favqulodda vaziyatlardan muhofaza qilish sohasi uchun malakali kadrlar tayyorlash tizimini tubdan isloh qilish chora-tadbirlari toʻgʻrisida” 2026-yil 3-apreldagi PQ-123-son qarori ijrosini taʼminlash, shuningdek, favqulodda vaziyatlardan ishonchli muhofaza qilish sohasida faoliyat koʻrsatuvchi qutqaruvchilarni tayyorlash tizimini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Favqulodda vaziyatlardan muhofaza qilish sohasi uchun malakali kadrlar tayyorlash tizimini tubdan isloh qilish chora-tadbirlari toʻgʻrisida” 2026-yil 3-apreldagi PQ-123-son qarorida Favqulodda vaziyatlar vazirligi akademiyasi huzurida Qutqaruvchilarni tayyorlash texnikumi (keyingi oʻrinlarda — Texnikum) faoliyatini yoʻlga qoʻyish belgilangani maʼlumot uchun qabul qilinsin.

2. Belgilansinki:

Texnikum Oʻzbekiston Respublikasi Favqulodda vaziyatlar vazirligi akademiyasining (keyingi oʻrinlarda — Akademiya) umumiy cheklangan shtat birliklari doirasida, yagona taʼlim kampusida alohida yuridik shaxs maqomida tashkil etiladi;

Texnikum faoliyati 2027/2028 oʻquv yilidan boshlab yoʻlga qoʻyiladi;

Texnikumning tarkibiy tuzilmasi Oʻzbekiston Respublikasi favqulodda vaziyatlar vaziri tomonidan tasdiqlanadi;

Texnikum harbiy xizmatchi lavozimlarini jamlash Akademiya boshligʻining tavsiyasiga asosan Oʻzbekiston Respublikasi favqulodda vaziyatlar vazirligi tomonidan hamda xizmatchi lavozimlari Akademiya tomonidan amalga oshiriladi;

Texnikumga umumiy oʻrta taʼlim tashkilotlarining bitiruvchilari belgilangan tartibda davlat granti va toʻlov-kontrakt asosida oʻqishga qabul qilinadi hamda oʻquv jarayoni boshlangʻich, oʻrta va oʻrta maxsus kasbiy taʼlim dasturlari asosida tashkil etiladi;

2029-yildan boshlab Texnikumning kasbiy taʼlim yoʻnalishlarini tamomlagan bitiruvchilar tarkibidan favqulodda vaziyatlar organlari uchun kadrlar zaxirasi shakllantiriladi;

Texnikumda ichki va tashqi mehnat bozori ehtiyojlari, ish beruvchi tashkilotlarning takliflari hamda Oʻzbekiston Respublikasi Favqulodda vaziyatlar vazirligi buyurtmasi asosida kasbga oʻqitishga moʻljallangan qisqa muddatli kurslar tashkil etiladi;

Texnikumga respublikaning yirik iqtisodiyot va toifalangan obyektlari hamda xavfli ishlab chiqarish korxonalarida faoliyat yuritayotgan qutqaruvchilar ushbu tashkilotlarning buyurtmasi asosida toʻlov-kontrakt asosida kasbiy taʼlim yoʻnalishlariga imtiyozli oʻqishga qabul qilinadi;

Texnikumda davlat taʼlim standarti talablariga rioya qilinishi Akademiya tomonidan nazorat qilinadi;

oʻqishga qabul qilish jarayonlarini tashkil etish boʻyicha qabul komissiyasi raisi va tarkibi Akademiya boshligʻi tomonidan tasdiqlanadi;

favqulodda vaziyatlar organlarida qutqaruvchi lavozimlarida xizmat qilayotgan xodimlar Texnikumga oʻqishga qabul qilinganda, oʻqish davrida ularning oylik maoshi teng miqdorda saqlanib qoladi;

Texnikumning faoliyati amaldagi kasbiy taʼlim tashkilotlarini moliyalashtirish tartibi asosida hamda qonunchilik hujjatlarida taqiqlanmagan boshqa manbalar hisobidan Akademiya tomonidan moliyalashtiriladi.

3. Quyidagilar Texnikumning asosiy vazifalari etib belgilansin:

favqulodda vaziyatlar organlariga kasbiy taʼlim yoʻnalishlari boʻyicha zamon talablariga javob beradigan, nazariy bilim va amaliy koʻnikmalarga ega boʻlgan qutqaruvchilarni tayyorlash;

oʻquv jarayonini simulyatsiya, imitatsiya va virtual laboratoriyalar (poligon)ni tashkil etish orqali nazariya va amaliyotning uygʻunligini taʼminlash;

oʻquv dasturlarini jahonda va mamlakatda sodir boʻlayotgan oʻzgarishlar hamda yangiliklar, fan va texnikada erishilgan yutuqlarni inobatga olgan holda takomillashtirib borish;

oʻquvchilarda davlat taʼlim standartlari talablariga koʻra qutqaruvchi egallashi lozim boʻlgan malaka va koʻnikmalarni shakllantirish;

oʻquvchilarda vatanparvarlik, milliy oʻzlikni anglash, xalqning milliy, madaniy, tarixiy anʼanalariga hurmat, Vatan bilan gʻururlanish va iftixor tuygʻusini shakllantirish;

taʼlim jarayoni uchun zarur moddiy-texnik, oʻquv-metodik bazani yaratish va oʻquv jarayoniga yuqori ish tajribasiga ega boʻlgan amaliyotchi mutaxassislarni jalb etib borish.

4. Oʻzbekiston Respublikasi Favqulodda vaziyatlar vazirligi:

ikki oy muddatda Texnikumning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;

Taʼlim va ilm-fan vazirligi huzuridagi Kasbiy taʼlim agentligi bilan birgalikda uch oy muddatda Texnikum kasbiy taʼlim yoʻnalishlari boʻyicha oʻquv reja va dasturlarini ishlab chiqib, tasdiqlasin;

har yili 1-fevralga qadar favqulodda vaziyatlar organlari, respublikaning yirik iqtisodiyot va toifalangan obyektlari hamda xavfli ishlab chiqarish korxonalarining real ehtiyojlarini oʻrgangan holda, kelgusi oʻquv yili uchun qabul parametrlari boʻyicha takliflarni Taʼlim va ilm-fan vazirligi huzuridagi Kasbiy taʼlim agentligiga taqdim etib borsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va favqulodda vaziyatlar vaziri A.I. Ikramov zimmasiga yuklansin.