Respublika korxonalarida ishlab chiqarilayotgan va xorijdan keltirilayotgan traktorlar, qishloq xoʻjaligi mashinalari va asbob-uskunalarini davlat, sertifikatsiya, moslashtirish sinovlaridan va boshqa xil sinovlardan oʻtkazish sifatini tubdan yaxshilash, qishloq xoʻjaligining texnika bilan jihozlanganlik darajasini oshirish hamda qishloq xoʻjaligi ekinlarini oʻstirish va hosilini yigʻishtirish boʻyicha barcha texnologik jarayonlarni bajarishda mashina-traktor parkining puxta ishlashini taʼminlash maqsadida Vazirlar Mahkamasi qaror qiladi:

1. Oʻzbekiston mashina sinash stansiyasi (OʻzMSS) “Oʻzqishloqxoʻjaliktaʼminottuzatish” davlat-kooperativ qoʻmitasi tarkibidagi Oʻzbekiston qishloq xoʻjaligi texnikasi va texnologiyalarini sertifikatsiyalash va sinash davlat markazi (OʻzQTTDM)ga aylantirilsin.

2. Oʻzbekiston davlat markazining tashkiliy tuzilmasi va uning apparati xodimlari soni ilovaga muvofiq 130 kishidan iborat qilib tasdiqlansin.

Belgilab qoʻyilsinki, Oʻzbekiston davlat markazi tarkibiga kiruvchi tajriba xoʻjaliklari barcha turdagi texnika va texnologiyalarni sinovdan oʻtkazish maydonlari hisoblanadi, ular oʻzining ishlab chiqarish va moliyaviy mustaqilligini saqlab qolishadi.

3. Oʻzbekiston Respublikasi Moliya vazirligi koʻrsatib oʻtilgan Markazni operatsiya xarajatlari smetasi boʻyicha mablagʻ bilan taʼminlash uchun “Oʻzqishloqxoʻjaliktaʼminottuzatish” davlat-kooperativ qoʻmitasi tomonidan taqdim etiladigan hisob-kitoblarga muvofiq hamda Markazning korxonalar va tashkilotlar bilan shartnomalar boʻyicha bajariladigan ishlardan tushadigan daromadlarini hisobga olgan holda har yili budjet mablagʻlari ajratishni nazarda tutsin.

4.Belgilansinki:

respublikada yangidan yaratilayotgan traktorlar, qishloq xoʻjaligi mashinalari va asbob-uskunalarining, shuningdek xorijdan keltirilayotganlarining barcha namunalari, ularni respublika qishloq xoʻjaligida ishlatishning ishonchliligini va samaradorligini tekshirib koʻrish maqsadida, Oʻzbekiston davlat markazida majburiy tartibda davlat sinovlaridan oʻtkaziladi. Bunda xorijdan keltiriladigan texnika, qoidaga koʻra, tanlov asosida sinovdan oʻtkaziladi;

Oʻzbekiston davlat markazida tayyorlangan sinovlar natijalarini Oʻzbekiston Respublikasi Vazirlar Mahkamasining 1998-yil 5-fevraldagi 44-f-son farmoyishi bilan Oʻzbekiston Respublikasi Qishloq va suv xoʻjaligi vazirligi huzurida tashkil etilgan Qishloq xoʻjaligida texnika siyosatini amalga oshirish Kengashi koʻrib chiqadi va ular boʻyicha qarorlar qabul qiladi;

“Oʻzqishloqxoʻjalikmash-xolding” kompaniyasining va qishloq xoʻjaligi texnikasini seriyali ishlab chiqaradigan boshqa idoralarning mashinasozlik korxonalari ularni nazorat sinovlariga muntazam taqdim etishga majburdirlar.

5. “Oʻzqishloqxoʻjaliktaʼminottuzatish” davlat-kooperativ qoʻmitasi:

Oʻzbekiston qishloq xoʻjaligi texnikasi va texnologiyalarini sertifikatsiyalash va sinash davlat markazi Ustavini bir oy muddatda ishlab chiqsin va belgilangan tartibda tasdiqlasin;

qishloq xoʻjaligi texnikasini davlat sinovidan oʻtkazishning Vazirlar Mahkamasi tomonidan 1992-yil 7-aprelda tasdiqlangan tartibini qayta koʻrib chiqsin va uni bir oy muddatda Vazirlar Mahkamasiga kelishib olish uchun taqdim etsin;

Oʻzbekiston Respublikasi Qishloq va suv xoʻjaligi vazirligi bilan birgalikda, seriyalab ishlab chiqarilayotgan qishloq xoʻjaligi texnikasini Mashina va asbob-uskunalarning texnikaviy holatini nazorat qilish davlat bosh inspeksiyasining tekshirishlar dalolatnomalari boʻyicha takroriy sinovdan oʻtkazish tartibini ishlab chiqsin;

Oʻzbekiston davlat markazida joylashgan Oʻzbekiston qishloq xoʻjaligini mexanizatsiyalash tarixi muzeyining, shuningdek eng yangi qishloq xoʻjaligi texnikasi koʻrgazmasining faoliyat koʻrsatishini taʼminlash chora-tadbirlarini koʻrsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov zimmasiga yuklansin.

Jami: 130 kishi