Сўнгги йилларда туризм соҳасини жадал ривожлантириш бўйича тизимли ислоҳотлар амалга оширилиб, виза тартиботлари соддалаштирилган, транспорт инфратузилмаси ва меҳмонхоналар модернизация қилинган, шунингдек, миллий туризм брендини халқаро майдонда тарғиб этиш, ички туризмни ривожлантириш, янги сайёҳлик йўналишларини яратиш ва хизматлар сифатини оширишга устувор аҳамият берилмоқда.

Хусусан, 94 та давлат билан визасиз режим жорий этилган. 52 та мамлакат аҳолиси учун республикамизга электрон виза билан ташриф буюриш, 45 та мамлакат фуқароларига республикамизда беш кунгача транзит визасиз қолиш имкониятлари яратилган. 30 дан ортиқ давлатларда таниқли шахслар орасидан «Туризм элчилари» тайинланган.

2017 — 2025 йилларда туроператорлар, турагентлар ва туризм соҳасида хизмат кўрсатувчи бошқа ташкилотлар сони қарийб 6 баробарга ошиб, 4,4 мингни ташкил этган. 6 мингга яқин жойлаштириш воситалари фаолияти йўлга қўйилган, улардаги ўринлар сони 185,6 мингни ташкил этиб, 2017 йилга нисбатан 5 баробарга кўпайган. Гидлар сони 4 баробарга ошиб, 4,5 мингга етган.

«Тошкент сити», «Самарқанд туризм маркази», «Афсоналар водийси», «Арда Хива», «Мираки туризм маркази», «Белдерсой Ресорт» тоғ-чанғи курорти, Айдар-Арнасой кўллари тизимида қирғоқбўйи туризм дам олиш маскани каби кўплаб янги йирик туризм объектлари ишга туширилган.

Шу каби чора-тадбирлар натижасида сайёҳлар оқимида сезиларли ўсиш кузатилган. Хусусан, 2025 йилда 200 га яқин давлатдан 11,7 млн чет эл фуқароси туристик мақсадларда Ўзбекистонга ташриф буюрган. Туристлар сони 2024 йилга нисбатан 1,6 миллионга ёки 16,1 фоизга ошган (2017 йилга нисбатан 4,3 баробарга кўп).

2025 йилда туризм хизматлари экспорти 142 фоизга ўсиб, 4,8 млрд долларга етган, жами хизматлар экспортидаги улуши 50 фоизни ташкил қилган.

Ички туризм ҳам изчил ривожланган. 2017 йилда маҳаллий сайёҳлар сони 10,6 миллионни ташкил этган бўлса, 2025 йилда «Ўзбекистон бўйлаб саёҳат қил» ички туризмни ривожлантириш дастури доирасида 23,7 млн (ўсиш 2,2 баробар) фуқаро мамлакат бўйлаб саёҳат қилган.

Жаҳон иқтисодий форуми томонидан 2024 йилда эълон қилинган Туризмни ривожлантириш индексига кўра Ўзбекистон ўз позициясини аввалги рейтингга нисбатан 16 поғонага яхшилаб, 78-ўринни эгаллаган. Шунингдек, 2019 — 2024 йиллар давомида туризм жадал ривожланган давлатлар қаторидан ўрин олган.

Шу билан бирга, ўрганиш ва таҳлиллар туризм соҳасини жадал ривожлантиришга қаратилган чора-тадбирлар ижросини таъминлашда ўз ечимини кутиб турган айрим масалалар ҳамда ишга солинмаган имкониятлар мавжудлигини кўрсатди.

Ўзбекистон Республикаси Президентининг фармон ва қарорларида белгиланган туризм соҳасини ривожлантиришга оид айрим вазифалар ижроси таъминланмаган.

Жумладан, Ўзбекистон Республикаси Президентининг 2025 йил 15 майдаги ПФ-87-сонли Фармони билан Ўзбекистон Республикасининг хорижий мамлакатлардаги дипломатик ваколатхоналари томонидан 2025 йилда хорижий туристларни Ўзбекистонга жалб қилиш бўйича режа-жадвал тасдиқланган бўлиб, Қувайт, Латвия, Қатар, Австрия, Индонезия, Таиланд ва Сингапур каби хорижий мамлакатлардаги дипломатик ваколатхоналари томонидан ушбу режа-жадвал ижроси 50 фоизга ҳам бажарилмаган.

Шунингдек, ушбу Фармон билан тасдиқланган 2025 йилда туризм салоҳияти юқори бўлган туман ва шаҳарларда апарт-отель, капсула уйлар ва шу каби жойлаштириш воситаларидан иборат замонавий дам олиш масканларини ташкил этиш режаси ижроси бор-йўғи 1,5 фоизга бажарилган. Жумладан, Андижон, Наманган, Самарқанд, Сирдарё, Сурхондарё, Тошкент, Фарғона ва Хоразм вилоятларида ҳокимликлар масъуллигида бирорта капсула ва ўтов уйи, апарт-отель ҳамда модулли меҳмонхона ташкил қилинмаган.

Ўзбекистон Республикаси Президентининг 2025 йил 1 апрелдаги ПҚ-132-сонли қарори билан тасдиқланган Чортоқ туманини 2025-2026 йилларда жадал комплекс ривожлантириш дастурида белгиланган «Туризм маскани»ни ташкил этиш доирасида «Чортоқ сой» қирғоқ бўйи ҳудудидаги туризм йўналишидаги инвестиция объектлари муҳандислик коммуникацияларини яхшилаш бўйича ичимлик суви тик қудуғини қазиш, кўча чироқларини ўрнатиш ишлари Наманган вилояти ҳокимлиги, «Ўзсувтаъминот» АЖ, Автомобиль йўллари қўмитаси томонидан бажарилмаган.

Туризм қўмитаси ва «Ўзсаноатқурилишбанк» АТБ масъуллигидаги «Чимён» халқаро умуммавсумий курорти ҳудудида «Гранд Парк Чимган» МЧЖ ва «Чирчик Чемисал Траде» МЧЖ томонидан амалга оширилаётган туризм лойиҳаларини фойдаланишга топшириш ишлари (Ўзбекистон Республикаси Президентининг 2025 йил 15 сентябрдаги 57-сонли топшириқлар баёни) муддатидан кечиктирилмоқда.

Амалдаги туризм тўғрисидаги қонунчилик таҳлили кўрсатганидек, агротуризм, ижтимоий, экологик ва спорт туризми каби замонавий йўналишлар туризмнинг алоҳида турлари сифатида қонунчиликда эътироф этилган бўлса-да, уларнинг ҳуқуқий мақоми етарли даражада тартибга солинмаган. Жумладан, туризмнинг мазкур турларини ташкил этиш тартиб-таомиллари, хавфсизлик талаблари, иштирокчиларнинг ҳуқуқ ва мажбуриятлари ҳамда давлат томонидан қўллаб-қувватлаш механизмлари белгиланмаган.

Шунингдек, Ўзбекистон Республикаси ҳудудида туристик йиғимни ундириш тартиб-таомилларида жойлаштириш воситалари учун туристик йиғимни қисмларга бўлиб-бўлиб тўлаш механизми ва имконияти назарда тутилмагани тадбиркорлик субъектларининг молиявий ҳолатига таъсирини кўрсатиб, уларнинг мурожаатларига сабаб бўлмоқда.

Ташриф буюрган жами туристлар оқимида узоқ мамлакатлардан келган туристлар улуши паст, 2025 йилда уларнинг улуши бор-йўғи 9,3 фоизни ташкил этган. Хорижий туристларнинг асосий қисми қўшни давлатлардан қариндошларни кўриш мақсадида ташриф буюрган.

Тиббий ва соғломлаштириш туризми имкониятлари тўлиқ ишга солинмаган. Кейинги йилларда хусусий клиникалар сони бир неча бараварга ошган бўлишига қарамай, республикамизда фақатгина 1 та хусусий тиббиёт муассасаси халқаро сертификатга (ЖСИ) эга.

Ўзбекистон Республикаси Президентининг 2024 йил 23 сентябрдаги ПҚ-335-сонли қарори билан тасдиқланган 2024 — 2027 йилларда тиббиёт ва соғломлаштириш туризмини янада ривожлантириш бўйича мақсадли кўрсаткичлар ижроси тўлиқ бажарилмаган.

Жумладан, даволаниш мақсадида 2025 йилда ташриф буюрган хорижий туристлар сони 86,2 мингни (режага нисбатан 37,4 фоиз) ташкил қилиб, 2024 йилга (104,8 минг) нисбатан қарийб 19 фоизга камайган.

Туризмнинг экотуризм, гастрономик ва тиббий туризм, шунингдек, МИСЕ турларининг етарли даражада ривожланмагани сайёҳларнинг мамлакатимизда бўлиш муддатлари давомийлигига таъсирини кўрсатмоқда. Хусусан, Андижон ва Фарғона вилоятларида гастрономик туризм йўналишида махсус туристик объектлар деярли шаклланмаган. Саноат туризмини ривожлантириш бўйича етарлича имкониятлар бўлишига қарамай, Жиззах ва Қашқадарё вилоятларида индустриал туризм объектлари ташкил қилинмаган.

2025 йилда туристик агентликлар ва туроператорлар томонидан республика бўйича кўрсатилган туристик хизматлар умумий ҳажмида Қашқадарё, Сурхондарё ва Сирдарё вилоятларининг улуши 1 фоизга ҳам етмаган.

Лоукостер авиакомпаниялар етишмаслиги, халқаро парвозлар нархи бошқа давлатларнинг туристик йўналишлардаги нархларига нисбатан юқорилиги сабабли сайёҳлар республикамизга асосан қуруқлик орқали кириб келмоқда, бу эса соҳанинг даромад салоҳиятини чекламоқда.

Инглиз тилидан ташқари бошқа хорижий тилларни, шу жумладан, Европа ва Осиё мамлакатлари тилларини биладиган малакали гид-экскурсоводларга бўлган эҳтиёж ошмоқда. Айниқса, Хитой ва араб давлатларидан ташриф буюраётган инвесторлар ҳамда сайёҳлар сонининг охирги йилларда 3-4 баробарга кўпайгани мазкур тилларда хизмат кўрсата оладиган гидларни тайёрлаш масаласининг долзарблигини кўрсатмоқда.

Соҳада кўрсатилаётган хизматлар сифати билан боғлиқ бир қатор тизимли муаммолар мавжуд. Хусусан, айрим жойлаштириш воситалари халқаро стандартларга тўлиқ жавоб бермайди, хизматлар нархи ва сифати ўртасида мутаносиблик таъминланмаган. 2025 йилда 164 та жойлаштириш воситаси сертификатсиз фаолият юритган, 201 таси асоссиз равишда тоифасини (юлдузини) ошириб кўрсатган, 32 таси турини (мотель, меҳмонхона ва бошқалар) нотўғри акс эттирган ҳолда хизмат кўрсатиб келган. Туристик фаолият билан лицензиясиз ва тегишли рухсатномасиз шуғулланиш бўйича 52 та (шу жумладан, Наманган шаҳрида 10 та, Бухоро шаҳрида 25 та ва Хива шаҳрида 27 та) ҳолат аниқланган.

Шунингдек, 2025 йилда «Умра» тадбирларини ноқонуний ташкил этиш билан боғлиқ 178 та жиноят иши қўзғатилган бўлса, жорий йилнинг биринчи чорагида ушбу кўрсаткич 16 тани ташкил этади.

Соҳада норасмий иқтисодиётнинг улуши юқори, тадбиркорлик субъектларига шарт-шароит яратиш борасида амалга оширилаётган ишлар етарлича эмас.

Солиқ ҳисоботлари таҳлилига кўра 2024 йилда 79 та меҳмонхонанинг умумий товар айланмаси (1 млрд сўм) ресурс солиқлари бўйича фойдаланилган имтиёзлардан (12 млрд сўм) 11 баробарга кам бўлган, шундан 54 та меҳмонхона товар айланмасини умуман кўрсатмасдан 6,6 млрд сўмлик имтиёзлардан фойдаланган.

Шунингдек, 2024 йилда ресурс солиқлари бўйича имтиёзлардан фойдаланган 24 та меҳмонхонанинг 21 тасида ходимлар сони 1 нафар этиб кўрсатилган бўлса, 3 тасида ходим умуман қайд этилмаган. Ваҳоланки, мазкур меҳмонхоналар томонидан 2024 йилда фойдаланилган имтиёз 2 млрд сўмни ташкил этган.

2025 йилда туризм соҳасида фаолият юритган 800 дан зиёд (2024 йилга нисбатан 6 баробарга кўп) корхона фаолияти тугатилган бўлса, жорий йилнинг 1 январь ҳолатига 1 мингга яқини фаолият кўрсатмайди.

Туристик объектларга кириш чипталари нархларини белгилашда прогноз қилинадиган механизмнинг йўқлиги туроператорлар фаолиятига салбий таъсир кўрсатиб, туристик пакетларни шакллантириш ҳамда хорижий ҳамкорлар олдидаги шартномавий мажбуриятларни ўз вақтида бажаришда қийинчиликларни юзага келтирмоқда.

Маҳаллий ва хорижий сайёҳлар учун ҳунармандлар, уларнинг фаолияти ва маҳсулотлари тўғрисидаги маълумотларни ўз ичига олган «Электрон каталог» тизими («срафтфорум.уз» доменида) ишга туширилган бўлса-да, у фойдаланувчиларни ўзига жалб этмайди, маълумотлар тизимли янгиланиб борилмаган, контентлар фақат ўзбек тилида тақдим этилган.

Туризм соҳасини жадал ривожлантириш орқали унинг иқтисодиётдаги ўрни ва аҳамиятини оширишга қаратилган чора-тадбирлар ижросини ўрганиш натижалари юзасидан «Ўзбекистон Республикаси Олий Мажлисининг Сенати тўғрисида»ги Ўзбекистон Республикаси Конституциявий Қонунининг 16-моддасига асосан Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Туризм қўмитаси раиси А. Аққуловнинг туризм соҳасини жадал ривожлантириш бўйича амалга оширилган ишлар тўғрисидаги ҳамда Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси А. Агзамходжаевнинг туризм соҳасини жадал ривожлантириш орқали унинг иқтисодиётдаги ўрни ва аҳамиятини оширишга қаратилган чора-тадбирлар ижросини ўрганиш натижалари тўғрисидаги ахборотлари маълумот учун қабул қилинсин.

2. Туризм қўмитаси, Рақамли технологиялар вазирлиги, Соғлиқни сақлаш вазирлиги, Ташқи ишлар вазирлиги, Транспорт вазирлиги, Солиқ қўмитаси, Маданий мерос агентлиги, Савдо-саноат палатаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига туризм соҳасини жадал ривожлантириш орқали унинг иқтисодиётдаги ўрни ва аҳамиятини оширишга қаратилган айрим вазифаларнинг ижросини таъминлашда йўл қўйилган камчиликлар кўрсатиб ўтилсин.

3. Туризм қўмитаси:

манфаатдор вазирлик ва идоралар билан биргаликда бир ой муддатда ўрганиш ва таҳлиллар натижасида аниқланган камчилик ва муаммоларни бартараф этишга қаратилган «йўл харитаси»ни ишлаб чиқсин ва тасдиқлаш учун Ҳукуматга киритсин;

йил якунига қадар мамлакатимизнинг туризм салоҳиятини Америка қитъаси, Форс кўрфази давлатлари, Ҳиндистон ва Скандинавия каби устувор бозорларда кенг тарғиб қилишга қаратилган замонавий маркетинг воситалари ва механизмларини жорий этсин;

2026-2027 йилларда гастротуризм, геотуризм, тиббий, спорт ва экологик туризм, МИСЕ каби туризм турлари бўйича объектлар рўйхатини шакллантириб, туркомпанияларга тақдим этсин ҳамда ОАВ вакиллари ва тадбиркорлар иштирокида инфо-турлар ташкил этсин;

Ўзбекистоннинг халқаро туристик платформалардаги иштирокини кенгайтириш ва рақамли контентни ривожлантириш, шунингдек, йирик медиа ресурслар ҳамда таъсир доираси кенг бўлган блогер ва инфлюэнсерларни жалб қилиш ишларини жадаллаштирсин;

Адлия вазирлиги ҳамда манфаатдор вазирлик ва идоралар билан биргаликда олти ой муддатда агротуризм, геотуризм, ижтимоий, экологик ва спорт туризмини ҳуқуқий тартибга солиш бўйича илғор хорижий тажрибани ўргансин, уларни Ўзбекистон Республикаси қонунчилигига имплементация қилишнинг мақсадга мувофиқлиги юзасидан, зарур бўлганда норматив-ҳуқуқий ҳужжатларга ўзгартириш ва қўшимчалар киритишни назарда тутувчи таклифларни Вазирлар Маҳкамасига киритсин;

Спорт ва Маданият вазирликлари билан биргаликда чанғи, сноуборд каби қишки спорт турларини, маданий фестиваллар, бизнес-туризм, соғломлаштириш марказлари инфратузилмасини ривожлантириш, ушбу йўналишларда замонавий хизматларни жорий этиш ҳамда уларни ички ва ташқи бозорларда тарғиб этиш чораларини кўрсин;

йил якунига қадар соҳадаги қонунбузилиш ҳолатлари, шу жумладан, лицензиясиз туристик хизматлар кўрсатиш ҳолатларининг олдини олиш мақсадида профилактика тадбирларини кучайтирсин;

Олий таълим, фан ва инновациялар вазирлиги билан биргаликда икки ҳафта муддатда Бухоро, Самарқанд ва Хоразм вилоятларига ташриф буюраётган инвестор ва сайёҳларнинг инглиз тилидан ташқари бошқа хорижий тилларни, шу жумладан, Европа ва Осиё мамлакатлари тилларини биладиган малакали гид-экскурсоводларга бўлган эҳтиёжини таҳлил қилиб, ушбу тилларда гид-экскурсоводлик қиладиган мутахассисларни тайёрлаш ва қайта тайёрлаш (малакасини ошириш) чораларини кўрсин;

уч ой муддатда «Чимён» халқаро умуммавсумий курорти ҳудудида муддатидан кечиктирилаётган туризм лойиҳаларнинг муаммоларини ўрганиб, уларни молиялаштириш, қурилиш ишларини жадаллаштириш ва ўз вақтида фойдаланишга топшириш бўйича тегишли чора-тадбирларни амалга оширсин;

уч ой муддатда жойлаштириш воситалари учун туристик йиғимни қисмларга бўлиб-бўлиб тўлаш механизмини ҳамда тўлов ойи якунида қарздорликка йўл қўйган жойлаштириш воситаларига нисбатан қарздорликни ундириш бўйича талабнома киритиш тизимини жорий этиш имкониятларини ўргансин ҳамда натижалари бўйича таклифларни Вазирлар Маҳкамасига киритсин;

маҳаллий ижро ҳокимияти органлари билан биргаликда икки ой муддатда Андижон ва Фарғона вилоятларида гастрономик туризм йўналишида махсус туристик объектларни ҳамда Жиззах ва Қашқадарё вилоятларида индустриал туризм объектларини ташкил қилиш юзасидан таклифлар ишлаб чиқиб, белгиланган тартибда Вазирлар Маҳкамасига киритсин.

4. Иқтисодиёт ва молия вазирлиги Марказий банк ҳамда Туризм қўмитаси билан биргаликда туризм салоҳияти юқори бўлган, шунингдек, чегара ва анклав ҳудудлардаги маҳаллаларда «Греэн Ҳоусе» типидаги оилавий меҳмон уйларини кенгайтириш мақсадида оилавий тадбиркорликни ривожлантириш дастурларининг имкониятлари, шу жумладан, меҳмон уйларини қуриш, таъмирлаш, уларни энергия тежамкор технологиялар ва бошқа техникалар билан жиҳозлаш учун назарда тутилган имтиёзлар тўғрисида туризм ва хизмат кўрсатиш соҳаларида фаолият юритаётган тадбиркорлик субъектлари ўртасида кенг кўламли тарғибот-тушунтириш ишларини олиб борсин ҳамда ушбу йўналишдаги лойиҳаларни имтиёзли кредит линиялари орқали молиялаштириш чораларини кўрсин.

5. Марказий банк тижорат банклари билан биргаликда барча туристик ҳудудларда НФС-белги, ҚР-код орқали мобил тўловларни кенг жорий этиш ҳамда туристик карталарни чиқариш бўйича тегишли ишларни амалга оширсин.

6. Ташқи ишлар вазирлиги Туризм қўмитаси билан биргаликда:

дипломатик ваколатхоналар фаолияти самарадорлигини баҳоловчи аниқ КПИ тизими (жалб қилинган туристлар сони, ўтказилган тарғибот тадбирлари, тузилган туроператорлик келишувлари ва бошқалар) асосидаги кўрсаткичларнинг бажарилишини мониторинг қилиб борсин;

ҳар чорак якуни билан комплекс таҳлилларни ўтказсин ва паст кўрсаткичларга эга ваколатхоналар фаолияти самарадорлигини ошириш бўйича таъсирчан механизмларни жорий этсин;

амалга оширилган ишлар ва эришилган натижалар тўғрисида жорий йил якуни билан 2027 йилнинг 1 февралига қадар Олий Мажлис Сенатига ахборот киритсин.

7. Транспорт вазирлиги Ички ишлар вазирлиги билан биргаликда бир ой муддатда лоукостер авиакомпанияларни жалб этиш орқали халқаро парвозлар нархини пасайтириш, аэропорт ва бошқа транспорт тугунларида ноқонуний такси хизматларини бартараф этиш ҳамда хорижий туристлар учун хавфсиз ва қулай транспорт муҳитини яратиш юзасидан таклифларни ишлаб чиқсин ва Вазирлар Маҳкамасига киритсин.

8. Савдо-саноат палатаси Рақамли технологиялар вазирлиги ва Туризм қўмитаси билан биргаликда бир ой муддатда маҳаллий ва хорижий сайёҳлар учун ҳунармандлар, уларнинг фаолияти ва маҳсулотлари тўғрисидаги маълумотларни ўз ичига олган «Электрон каталог» тизимини («срафтфорум.уз») такомиллаштириш, шу жумладан, электрон савдо платформалари билан интеграция қилиш имкониятларини кўриб чиқсин.

9. Соғлиқни сақлаш вазирлиги Туризм қўмитаси ҳамда мутасадди вазирлик ва идоралар билан биргаликда уч ой муддатда тиббий ва соғломлаштириш туризми имкониятларидан тўлиқ ҳамда самарали фойдаланиш юзасидан қуйидагилар назарда тутилган чора-тадбирлар режасини ишлаб чиқсин:

ҳудудлар кесимида мавжуд салоҳиятни тўлиқ хатловдан ўтказиб, ихтисослашган тиббий хизмат турларини кенгайтириш ҳамда етакчи хорижий клиникаларнинг илғор тажрибасини жорий этиш;

хусусий тиббиёт муассасаларини халқаро аккредитациядан ўтказиш жараёнларини қўллаб-қувватлаш;

тиббий ва соғломлаштириш туризмини изчил ривожлантириш, ушбу соҳадаги хизматларнинг халқаро стандартлар асосида сифатини ошириш орқали рақобатбардошлигини таъминлаш;

тиббий хизматларни хорижий бозорларда фаол тарғиб қилиш ва халқаро ҳамкорликни кенгайтириш.

10. Маданий мерос агентлиги Иқтисодиёт ва молия вазирлиги, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ва Туризм қўмиталари билан биргаликда икки ой муддатда туристик объектларга кириш чипталари нархларини белгилаш бўйича шаффоф, ягона ва прогноз қилинадиган механизмни жорий этиш юзасидан аниқ таклифлар ишлаб чиқсин ва Вазирлар Маҳкамасига киритсин.

11. Ички ишлар вазирлиги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ва Туризм қўмитаси билан биргаликда меҳмонхона фаолияти билан шуғулланувчи тадбиркорлик субъектларининг мижозларни «э-меҳмон» платформаси орқали рўйхатдан ўтказиш ҳолатини текширишга оид қонунчиликни таҳлил қилиб, ҳуқуқий бўшлиқлар ва коллизияларни бартараф этиш чораларини кўрсин.

12. Дин ишлари бўйича қўмита Ички ишлар вазирлиги ҳамда бошқа манфаатдор идоралар билан биргаликда:

«Умра» тадбирларини ташкил этиш бўйича тадбиркорлар фаолиятини рейтинг асосида баҳолаш тизимини жорий этсин ва хизмат кўрсатиш сифати тўғрисида жамоатчиликни мунтазам хабардор қилсин;

аҳоли ўртасида «Умра» тадбирларини лицензияга эга бўлмаган юридик шахслар орқали ташкил этиш ва ўтказиш билан боғлиқ хавфлар юзасидан кенг кўламли профилактика ва тушунтириш ишларини кучайтирсин;

ижтимоий тармоқлар, Интернет сайтлари ва мессенжерлар орқали тарқалаётган «Умра» зиёрати хизматларига оид ноқонуний реклама ва сохта таклифлар ўз вақтида аниқланишини ҳамда уларга нисбатан тезкор чоралар кўрилишини таъминласин.

13. Солиқ қўмитаси:

Туризм қўмитаси ва Рақамли технологиялар вазирлиги билан биргаликда икки ой муддатда жойлаштириш воситалари томонидан кўрсатилган хизматлар солиқ ҳисоботларида акс эттирилмаслик ҳолатларининг олдини олиш мақсадида «э-меҳмон» платформасининг Солиқ қўмитаси ахборот тизими билан тўлиқ интеграция қилинишини таъминласин;

туризм соҳасидаги солиқ имтиёзларининг самарадорлигини ҳар чорак якуни билан баҳолаб бориш тизимини йўлга қўйсин;

соҳада норасмий иқтисодиёт улушини қисқартириш мақсадида жойлаштириш воситалари томонидан имтиёзлардан тўғри фойдаланиш, солиқ ҳисоботларини тўғри шакллантириш бўйича профилактика тадбирлари ҳамда тарғибот-тушунтириш ишларини кучайтирсин.

14. Наманган вилояти ҳокимлиги Автомобиль йўллари қўмитаси, Туризм қўмитаси, «Ўзсувтаъминот» АЖ билан биргаликда Чортоқ туманини 2025-2026 йилларда жадал комплекс ривожлантириш дастури доирасида «Чортоқ сой» қирғоқ бўйи ҳудудидаги туризм йўналишидаги инвестиция объектларини ичимлик суви билан таъминлаш, кўча чироқларини ўрнатиш ишларини жадаллаштириб, жорий йилнинг 1 октябрига қадар фойдаланишга топширилишини таъминласин.

15. Хоразм вилояти ҳокимлиги икки ой муддатда Ҳазорасп, Боғот ва Янгиариқ туманларининг туристик салоҳиятини ривожлантириш бўйича алоҳида чора-тадбирлар дастурини ишлаб чиқсин.

16. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

туристик йўналишларни диверсификация қилиш, ҳудудларда транспорт логистикаси, муҳандислик-коммуникация инфратузилмаси ҳамда замонавий туризм навигацияси тизимини ривожлантириш чораларини кўрсин;

икки ой муддатда инвесторларни жалб қилган ҳолда ҳудудларда капсула ва ўтов уйлари, апарт-отель ҳамда модулли меҳмонхоналарни барпо этиш бўйича манзилли инвестиция лойиҳаларини шакллантирсин ва амалга оширсин;

халқаро ва миллий туризм ярмаркалари, кўргазмалар, тақдимотлар ҳамда бизнес-форумларда туризм соҳаси вакиллари ва тадбиркорлик субъектларининг фаол иштирокини таъминлашга кўмаклашсин.

17. Ўзбекистон Республикаси Вазирлар Маҳкамаси:

мазкур Қарор билан Ҳукуматга киритилиши назарда тутилган таклифларни ўрганиб чиқсин, уларни таҳлил қилиш ва умумлаштириш асосида туризм соҳасини ривожлантириш бўйича зарур чораларни белгиласин;

мазкур Қарор ижроси юзасидан амалга оширилган ишлар тўғрисидаги ахборотни 2027 йилнинг 10 февралига қадар Ўзбекистон Республикаси Олий Мажлиси Сенатига киритсин.

18. Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси тегишли вазирлик ва идоралар билан биргаликда режа-график асосида ҳудудларнинг туристик салоҳияти, мавжуд захиралари ҳамда фойдаланилмаётган имкониятларини мунтазам ўрганиб борсин, туризм соҳасини ривожлантиришга тўсқинлик қилаётган тизимли муаммоларни аниқласин, уларни бартараф этиш бўйича амалий таклифлар ишлаб чиқсин ҳамда мазкур таклифларнинг амалиётга жорий этилишида масъул вазирлик ва идораларга кўмаклашсин.

19. Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашларига:

ҳудуд иқтисодиётида туризмнинг ўрни ва аҳамиятини оширишга қаратилган чора-тадбирлар ижроси ҳамда мақсадли кўрсаткичларнинг бажарилишини мониторинг қилиб бориш;

мутасадди идора ва ташкилотлар раҳбарларининг мазкур йўналишдаги фаолияти тўғрисидаги ахборотларини эшитиш тавсия этилсин.

20. Мазкур Қарорнинг ижросини назорат қилиш Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси А. Агзамходжаев зиммасига юклансин.