“Taʼlim toʻgʻrisida”gi Oʻzbekiston Respublikasi Qonuni va Kadrlar tayyorlash milliy dasturi talablari asosida taʼlim sifatini ijtimoiy-iqtisodiy sohalarda olib borilayotgan islohotlar talablariga muvofiq yuksak darajaga koʻtarish, kadrlar bilimi va ular tayyorgarligi sifatini nazorat qilish hamda xolisona baholash tizimini tashkil etish maqsadida Vazirlar Mahkamasi qaror qiladi:

1. Davlat test markazi tarkibida Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasi (keyingi oʻrinlarda — Boshqarma) tashkil etilsin.

Quyidagilar Boshqarmaning asosiy vazifalari etib belgilansin:

kadrlar tayyorlash sifatini nazorat qilish va oʻquv jarayoni samaradorligini xolisona baholash tizimini joriy etish borasida izchil davlat siyosatini amalga oshirish;

hozirgi zamon talablarini hisobga olgan holda uzluksiz taʼlim tizimi pedagog, professor oʻqituvchilari va rahbar kadrlar attestatsiyasini tashkil etish va oʻtkazish;

idoraviy boʻysunishi va mulkchilik shaklidan qatʼi nazar, barcha turdagi taʼlim muassasalarini attestatsiyadan oʻtkazish va shu asosda ularni akkreditatsiya qilish uchun tegishli hujjatlar tayyorlash va Vazirlar Mahkamasiga taqdim etish, taʼlim muassasalari reytingini belgilash;

taʼlim tizimini boshqarish organlari hamda mahalliy ijro etuvchi hokimiyatning pedagog kadrlar va taʼlim muassasalari attestatsiyasini tashkil qilish va oʻtkazish borasidagi faoliyatini muvofiqlashtirish va nazorat etish;

kadrlar tayyorlash sifati monitoringi tizimini ishlab chiqish va amaliyotga joriy etish.

2. Boshqarma Oliy va oʻrta maxsus taʼlim vazirligining Oliy va oʻrta maxsus oʻquv yurtlarini davlat attestatsiyasi va akkreditatsiyasidan oʻtkazish hamda nazorat qilish bosh boshqarmasi va Xalq taʼlimi vazirligining Davlat taʼlim standartlari boʻyicha respublika inspeksiyasiga ajratilgan mablagʻ va shtatlar soni doirasida tashkil etilsin.

Oliy va oʻrta maxsus taʼlim vazirligi va Xalq taʼlimi vazirligi ikki hafta muddatda mazkur tugatiladigan boʻlinmalarini moddiy-texnika resurslarini Davlat test markazi balansiga oʻtkazsinlar.

3. Boshqarmaning Nizomi va tuzilmasi 1 va 2-ilovalarga muvofiq tasdiqlansin.

4. Davlat test markazi;

bir oy muddatda uzluksiz taʼlim tizimi pedagog, professor oʻqituvchilari va rahbar kadrlarini hamda taʼlim muassasalarini davlat attestatsiyasidan oʻtkazish nizomlarini, shuningdek, taʼlim muassasalari davlat attestatsiyasi jadvalini ishlab chiqsin va Vazirlar Mahkamasiga tasdiqlash uchun kiritsin;

Xalq taʼlimi vazirligi bilan birgalikda ikki oy muddat, umumiy oʻrta taʼlim maktab oʻquvchilarining yakuniy attestatsiyasini test sinovlari asosida amalga oshirish tartibini ishlab chiqsin va tasdiqlasin;

Oliy va oʻrta maxsus taʼlim vazirligi bilan birgalikda 1998-1999 oʻquv yili davomida akademik litseylar, kasb-hunar kollejlari va oliy taʼlim muassasalari talabalari bilimi darajasini baholashning takomillashtirilgan reyting tizimi, hamda ular tayyorgarligining bosqichli va yakuniy nazoratiga test usuli qoʻllanilishi vositalarini ishlab chiqsin va amaliyotga joriy etsin.

5. Oliy va oʻrta maxsus taʼlim vazirligi va Davlat test markazi yangidan tashkil etilayotgan akademik litseylar va kasb-hunar kollejlariga oʻqituvchi-pedagoglar attestatsiya natijalari asosida ishga qabul qilinishini taʼminlasinlar.

6. Davlat test markazi direktorining oʻrinbosari — Boshqarma boshligʻi lavozimi joriy etilsin va u maqomi, moddiy va maishiy taʼminot sharoitlari boʻyicha vazir oʻrinbosariga tenglashtirilsin.

7. Moliya vazirligi Oliy va oʻrta maxsus taʼlim vazirligi, Xalq taʼlimi vazirligi va Davlat test markazining budjet xarajatlari miqdoriga tegishli oʻzgartirishlar kiritsin.

8. Toshkent shahar hokimligi bir oy muddatda Boshqarmani tegishli bino bilan taʼminlash masalasini hal qilsin.

9. Oʻzbekiston Respublikasi Vazirlar Mahkamasining 1994-yil 10-fevraldagi 64-son qarori oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Azizxoʻjayev zimmasiga yuklansin.

1.1. Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasi (keyingi oʻrinlarda Boshqarma) “Taʼlim toʻgʻrisida” Oʻzbekiston Respublikasi Qonuni va Kadrlar tayyorlash milliy dasturi asosida taʼlim sifatini ijtimoiy-iqtisodiy sohalarda olib borilayotgan islohotlar talablariga muvofiq yuksak darajaga koʻtarish, kadrlar tayyorgarligi sifatini nazorat qilish hamda xolisona baholash tizimini tashkil etish maqsadida tashkil etilgan.

1.2. Boshqarma Davlat test markazi tarkibida boʻlib oʻz faoliyatini Oʻzbekiston Respublikasi qonunlari, Oʻzbekiston Respublikasi Prezidentining farmonlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari hamda ushbu Nizom asosida amalga oshiradi.

1.3. Boshqarmaning oʻz vakolati doirasida chiqargan qarorlari vazirliklar, idoralar, mahalliy boshqaruv organlari, idoraviy boʻysunishi va mulkchilik shakllaridan qatʼi nazar, barcha taʼlim muassasalari ijro etishi uchun majburiydir.

“Taʼlim toʻgʻrisida”gi Qonun va Kadrlar tayyorlash milliy dasturi talablaridan kelib chiqqan holda taʼlim sifatini nazorat qilish va oʻquv jarayoni samaradorligini xolisona baholash tizimini joriy etish borasida izchil davlat siyosatini amalga oshirish;

hozirgi zamon talablari va davlat taʼlim standartlari asosida uzluksiz taʼlim tizimi pedagog, professor-oʻqituvchilari va rahbar kadrlari attestatsiyasini tashkil etish va oʻtkazish;

idoraviy boʻysunishi va mulkchilik shakllaridan qatʼi nazar, barcha turdagi taʼlim muassasalarini attestatsiya qilish, shu asosda ularning reytingini belgilash va akkreditatsiya qilish uchun tegishli hujjatlarni tayyorlash hamda Vazirlar Mahkamasiga taqdim etish;

taʼlim tizimini boshqarish organlari hamda mahalliy ijro etuvchi hokimiyatning pedagog kadrlar va taʼlim muassasalari attestatsiyasini tashkil qilish va oʻtkazish borasidagi faoliyatini muvofiqlashtirish va nazorat etish;

akademik litseylar va kasb-hunar kollejlariga taʼlim faoliyati bilan shugʻullanishlari uchun ruxsatnomani rasmiylashtirish;

professor-oʻqituvchilar va taʼlim muassasalarini attestatsiyadan oʻtkazish talablari va mezonlarini ishlab chiqish hamda ularni amaliyotga kiritish;

xorijiy davlatlarning taʼlim toʻgʻrisidagi hujjatlarini tan olish va bu hujjatlarning ekvivalent ekanligini qayd etishning Vazirlar Mahkamasi tomonidan tasdiqlangan tartibini amalga oshirishni taʼminlash;

davlat taʼlim standartlari, umumtaʼlim va taʼlim turlari uchun kasb-hunar dasturlarini Vazirlar Mahkamasi tomonidan tasdiqlanishi uchun ekspertizadan oʻtkazish;

kadrlar tayyorlash sifati monitoringi tizimini ishlab chiqish va amaliyotga joriy etish;

chet davlatlar taʼlim muassasalarining respublika hududida faoliyat koʻrsatishlari uchun akkreditatsiya olish maqsadidagi murojaatnomalarini ekspertiza qilish;

rivojlangan xorijiy demokratik davlatlar bilan kadrlar sifatini nazorat qilish va taʼlim muassasalari attestatsiyasi borasida hamkorlik oʻrnatish.

3.1. Boshqarma ishiga umumiy rahbarlikni Davlat test markazi direktori amalga oshiradi.

3.2. Boshqarma ishiga doimiy rahbarlik qilish uning boshligʻi — Davlat test markazi direktori oʻrinbosari tomonidan amalga oshiriladi.

Boshqarma boshligʻi Oʻzbekiston Respublikasi Vazirlar Mahkamasi tomonidan tayinlanadi. U maqomi, moddiy va maishiy taʼminot sharoitlari boʻyicha respublika vazirining oʻrinbosariga tenglashtiriladi.

Boshqarma boshligʻi Boshqarma oldiga qoʻyilgan vazifalar va majburiyatlarning bajarilishi uchun shaxsan javobgardir.

Boshqarma faoliyati hamda ushbu Nizomdan kelib chiqadigan vazifalarni hal etishga Boshqarma boshligʻi vakolatlidir. U ishlab chiqilgan uslubiy yoʻriqnomalarni tasdiqlaydi, tashkilotlar va fuqarolar bilan Boshqarma faoliyatiga tegishli aloqani olib boradi.

3.3. Boshqarma shtatlari besh yildan kam boʻlmagan ilmiy-pedagogik stajga va uslubiy tajribaga ega boʻlgan, asosan ilmiy darajali shaxslar hisobiga toʻldiriladi.

3.4. Boshqarma xodimlari oʻz zimmalariga yuklangan vazifalarni sifatli bajarish, huquqlaridan toʻgʻri foydalanish, oʻz faoliyatlarida qonunchilik va davlat manfaatlariga toʻla amal qilish uchun javobgardirlar.

3.5. Boshqarma oʻz faoliyatini Oliy va oʻrta maxsus taʼlim vazirligi, Xalq taʼlimi vazirligi va joylardagi taʼlimni boshqarish organlari faoliyati bilan muvofiqlashtirgan holda olib boradi.

3.6. Ushbu Nizomga oʻzgartirish kiritish Oʻzbekiston Respublikasi Vazirlar Mahkamasi tomonidan amalga oshiriladi.

4.1. Boshqarma oʻziga yuklangan vazifalarga muvofiq quyidagi huquqlarga egadir:

oʻz vakolati doirasida tegishli qarorlar qabul qilish;

vazirliklar, idoralar, taʼlim muassasalari, korxonalar va tashkilotlardan tegishli maʼlumotlar va hujjatlar olish;

taʼlim muassasalari rahbarlari tomonidan amaldagi qonunchilikka zid holda chiqarilgan buyruqlar, farmoyishlar va yoʻriqnomalar harakatini toʻxtatish;

belgilangan tartibda iqtisodiy faoliyat hamda xalqaro hamkorlik bilan shugʻullanish;

Boshqarma faoliyati bilan bogʻliq hujjatlarni ekspertiza va taqrizdan oʻtkazish hamda huquqiy, iqtisodiy, ilmiy-uslubiy va axborot konsaltingini tashkil etish;

taʼlim va kadrlar tayyorlash sifatini oʻrganish, attestatsiyadan oʻtkazish jarayoniga olimlar, yetuk pedagog-mutaxassislarni hamda chet el ekspertlarini jalb qilish, maqsadli va muvaqqat ilmiy-tadqiqot guruhlarini tashkil etish;

oʻz vakolati doirasida mustaqil ravishda vazirlik va idoralar hamda xalqaro va chet el tashkilotlari bilan aloqalar oʻrnatish;

taʼlim va kadrlar tayyorlash sifati sohasidagi xalqaro konferensiyalar, kongresslar, simpoziumlar va majlislar ishida ishtirok etish hamda davlatlararo va hukumatlararo hamkorlik masalalari boʻyicha muzokaralarda qatnashish;

amaldagi qonunchilik doirasida Boshqarma faoliyati yoʻnalishlari boʻyicha muvaqqat ijodiy jamoalar, markazlar tashkil etish.

4.2. Boshqarma oldiga qoʻyilgan vazifalarga muvofiq quyidagi yoʻnalishlarda faoliyat koʻrsatadi:

“Taʼlim toʻgʻrisida”gi Qonun, Kadrlar tayyorlash milliy dasturi va boshqa huquqiy-meʼyoriy hujjatlarning kadrlar tayyorlash sifatiga taalluqli talablari bajarilishini izchil nazorat qilish;

Vazirlar Mahkamasiga professor-oʻqituvchilar va taʼlim muassasalari davlat attestatsiyasi hamda tayyorlanayotgan kadrlarning sifati toʻgʻrisida muntazam axborot berib borish;

kadrlar tayyorlash sifati nazoratiga taalluqli huquqiy-meʼyoriy va tashkiliy asoslarni hamda taʼlim muassasalari maqomini qayta koʻrib chiqish uchun Vazirlar Mahkamasiga taqdim etilayotgan takliflar ekspertizasini tashkil qilish;

professor-oʻqituvchilar va taʼlim muassasalarini davlat attestatsiyasidan oʻtkazish jadvallarini ishlab chiqish va Vazirlar Mahkamasiga tasdiqlash uchun kiritish;

attestatsiya jarayonida aniqlangan kamchilik va nuqsonlar oʻz vaqtida bartaraf etilishini nazorat qilish;

taʼlim muassasalari, ularning boʻlimlarining maqomi va yoʻnalishlarini oʻzgartirish, faoliyatida kamchiliklarga yoʻl qoʻygan shaxslarni javobgarlikka tortish yuzasidan tegishli takliflar kiritish;

idoraviy boʻysunishi yoki mulkchilik shakllaridan qatʼi nazar, taʼlim muassasalarini ochish (qayta tashkil etish, tugatish) boʻyicha materiallarni ekspertizadan oʻtkazish va tegishli xulosalar tayyorlash;

mahalliy boshqaruv organlarining pedagog xodimlar va taʼlim muassasalarini attestatsiyadan oʻtkazish borasidagi faoliyatlarini muvofiqlashtirish;

kadrlar tayyorlash sifatini nazorat qilish va akkreditatsiyalash borasida xorijiy tuzilmalar bilan hamkorlik qilish.

4.3. Boshqarma oʻz faoliyatini Davlat test markazi ishini tashkil qilish uchun ajratiladigan mablagʻ hisobiga amalga oshiradi.

4.4. Boshqarma faoliyati Oʻzbekiston Respublikasi Vazirlar Mahkamasi qaroriga asosan toʻxtatiladi.

Jami: 59 kishi