Ўзбекистон Республикаси Вазирлар Маҳкамасининг 2025 йил 8 апрелдаги «2025 йилда энергия тежовчи технологияларни жорий этишни жадаллаштириш тўғрисида»ги 205 сонли қарори ижроси юзасидан Тошкент вилояти ҳокимининг 2025 йил 26 апрелдаги 286-10-0-Қ/25 сонли қарорининг ижросини таминлашда «Маҳаллий ҳокимият тўғрисида»ги Қонуннинг 6-моддасига мувофиқ, қарор қиламан:

1. Тошкент вилояти ҳокимининг 2025 йил 26 апрелдаги 286-10-0-Қ/25 сонли қарори ижро учун қабул қилинсин.

2. 2025 йилда Тошкент тумани ҳудудида кичик қувватли қайта тикланувчи энергия манбалари қурилмаларини ўрнатиш бўйича мақсадли кўрсаткичлар 1-иловага мувофиқ;

туман бўйича электр энергиясининг 2025 йил прогнозига нисбатан иқтисод қилишнинг мақсадли кўрсаткичлари 2-иловага мувофиқ;

туман бўйича 2025 йил прогнозига нисбатан табиий газни иқтисод қилишнинг мақсадли кўрсаткичлари 3-иловага мувофиқ;

ёқилғи-энергетика ресурсларини иқтисод қилиш бўйича ташкилий-техник тадбирлар режаси 4-иловага мувофиқ тасдиқлансин.

3. «Туман Электр таъминоти корхонаси» (Э.Усмонхўжаев) ва «Тошкенттумангаз» газ таъминоти бўлими (И.Мирхамид) электр энергиясини ҳисобга олиш ва назорат қилишнинг автоматлаштирилган тизими ҳамда табиий газ назорати ва ҳисобининг автоматлаштирилган тизими орқали ойига 500 кВт электр энергияси ва 1000 куб метр дан ортиқ табиий газ истеъмол қилган абонентларни таҳлил қилиб борсин, шуниндек, электр энергияси ва табиий газ бир ойлик истеъмолининг базавий меъёрларидан ортиқча сарфланган истеъмолчиларга муқобил энергия манбалари ва тежамкор ускуналарни ўрнатиш афзалликларини маълум қилиш бўйича ҳар ойда қўшимча СМС-хабарнома юборилишини таъминласин.

4. Қарор билан қуйидагилар белгиланганлиги:

ҳудудларда ёқилғи-энергетика ресурслари йўқотишларини камайтириш бўйича ишчи гуруҳлар, туман (шаҳар) ишчи гуруҳлари ҳамда бу борадаги ишларни «маҳаллабай» ташкил этиш бўйича ишчи гуруҳлар ташкил этилиши;

Энергетика вазирлиги, Ўзенергоинспекция, «Иссиқлик электр станциялари» АЖ, «Ўзбекистон миллий электр тармоқлари» АЖ, «Ҳудудий электр тармоқлари» АЖ, «Узтрансгаз» АЖ, «Ҳудудгазтаъминот» АЖ ҳар ойда ёқилғи-энергетика ресурслари йўқотишлари таҳлил асосида, улар энг кўп бўлган маҳаллаларда, ҳудудларда ёқилғи-энергетика ресурслари йўқотишларини камайтириш ишларини «маҳаллабай» ташкил этиш бўйича ишчи гуруҳлари фаолиятини йўлга қўйиб борилиши;

ҳудудларда ёқилғи-энергетика ресурслари йўқотишларини камайтириш бўйича ишчи гуруҳлар раҳбарларининг рўйхати 8-иловага мувофиқ тасдиқланганлиги;

ҳудудларда ёқилғи-энергетика ресурслари йўқотишларини камайтириш бўйича туман (шаҳар) ишчи гуруҳларининг намунавий таркиби ва уларнинг вазифалари 10-иловага мувофиқ;

ҳудудларда ёқилғи-энергетика ресурслари йўқотишларини камайтириш бўйича ишчи гуруҳлар ишларини маҳаллабай ташкил этиш бўйича ишчи гуруҳларнинг намунавий таркиби ва уларнинг вазифалари 11-иловага мувофиқ тасдиқланганлиги;

Ўзбекистон Республикаси Президентининг 2025 йил 1 апрелдаги 133 сонли қарорига мувофиқ тузилган ҳар бир туман (шаҳар) кесимида энергия балансини ишлаб чиқиш, уларнинг кўрсаткичларини бажариш, энергияни тежаш дастурлари ижросини таъминлаш, энергия самарадорлигини ошириш бўйича туман (шаҳар) идоралараро ишчи гуруҳларининг аъзолари асосий иш жойидан ажралган ҳамда лавозим маоши сақлаб қолинган ҳолда устувор вазифаларини 2025 йил давомида амалга оширилиши белгиланганлиги;

2025 йил 1 июлдан бошлаб:

кўп хонадонли уйлар, жамоат биноларини таом тайёрлаш, иссиқ сув, иситиш ва совутиш тизими электрлаштирилган ёки муқобил манбалар орқали таъминланган ҳамда биноларнинг энергия самарадорлик тоифаси «А» тоифа бўлган ҳолда лойиҳалаштириш жорий этилади;

янги қуриладиган барча (шу жумладан, давлат ва хусусий) жамоат бино-иншоотлари (таълим муассасалари, соғлиқни сақлаш, маданият ва туризм, умумий овқатланиш, хизмат кўрсатиш объектлари, спорт комплекслари ва бошқалар), кўп квартирали уй-жойлар, шу жумладан, «Янги Ўзбекистон» массивлари (марказлашган иссиқлик таъминотига уланиши мўлжалланган уй-жойлардан ташқари), шунингдек, умумий майдони минг квадрат метрдан катта бўлган барча савдо-кўнгилочар марказларнинг бино-иншоотларини лойиҳалаштириш ва ишга туширишда совитиш ва иссиқлик таъминоти тизимларини электр энергияси ва муқобил энергия манбаларида ишлайдиган энергияни тежайдиган ва энергия жиҳатидан самарадор технологиялар жорий этилади;

уч йил муддатда ҳудудларда АГТШКни лойиҳалаштириш ва қуриш, бошқа турдаги ёқилғи қуйиш шоҳобчалари фаолиятини сиқилган газ тўлдиришга ўзгартириш ҳамда юқори қўшилган қийматли маҳсулотлар ишлаб чиқаришни кўзда тутмайдиган, технологик жараёнларида табиий газга муқобил ёқилғи туридан фойдаланиш имкони мавжуд бўлган юридик шахсларга табиий газ тармоқларига уланиш учун техник шартлар беришга мораторий эълон қилинади;

табиий газ етиб бориши қийин бўлган ҳудудлар муқобил бўлган энергия манбаларга ўтказилиши;

бюджет ташкилотларига ўрнатиладиган қуёш панелларининг молиялаштириш манбаи этиб қуйидагилар белгиланганлиги;

халқаро молия инстутутлари ва донор ташкилотларнинг грантлари, имтиёзли кредитлари ва бошқа мақсадли маблағлари;

бюджет ташкилотларининг бюджетдан ташқари маблағлари;

маҳаллий бюджет маблағлари;

жисмоний ва юридик шахсларнинг ҳомийлик хайриялари;

давлат-хусусий шериклик битимлари доирасидаги маблағлар, қонунчилик ҳужжатлари билан таъқиқланмаган бошқа манбалар;

2025 йил 1 майдан янги қурилаётган кўп квартирали уйлар ва ижтимоий соҳа объектларига табиий газ тармоғига уланиши учун техник шарт берилиши тўхтатилиши инобатга олинсин.

5. Туман ҳокими матбуот котиби (Д.Исмаилова), Тошкент тумани Адлия бўлими (Ш.Таджибаев), «Маҳалла еттилиги» ва таъминот корхоналари билан биргаликда энергетика тизимидаги ўзгаришлар ҳамда энергияни тежаш ва энергия самарадорлигини ошириш бўйича амалга оширилаётган тадбирларни оммавий ахборот воситаларида, интернет тармоғи ва ижтимоий тармоқларда кенг ёритиб бориш бўйича медиа-режа ишлаб чиқсин.

Бунда қуйидагиларга алоҳида эътибор қаратилсин:

аҳоли ва кенг жамоатчилик орасида электр энергияси ва табиий газ арзонлаштирилган нархларда етказиб берилаётганлиги бўйича тушунтириш ишлари олиб бориш;

аҳоли ва ужгуржи истеъмолчилар орасида муқобил энергия манбалари ва тежамкор ускуналарни ўрнатиш орқали энергия ресурсларининг тежалиши ҳақида тарғибот тадбирларини амалга ошириш;

буклет ва флаерларни тарқатиш ҳамда ижтимоий роликларни намойиш этиб бориш орқали аҳоли хабардорлигини ошириб бориш;

аҳоли гавжум жойларда, йирик савдо мажмуаларида ҳамда реклама таблоларида энергия ресурсларидан оқилона фойдаланиш маданиятини оширишга қаратилган тарғибот ишларини олиб бориш;

оммавий ахборот воситалари орқали энергия ресурсларининг тарифларида кўзда тутилган ўзгаришлар ҳамда нархларини хорижий мамлакатлардаги нархлар билан таққослаш орқали тайёрланган инфографика ва таҳлилий маълумотларни кенг оммага етказиб борсин.

6. Туман ҳокимининг барча ўринбосарлари ўз мажмуалари таркибига кирувчи бўлим ва ташкилотларга соҳалар бўйича белгиланган режа-кўрсаткичлар ижроси юзасидан доимий назорат ўрнатиб, ҳар ой ҳисоботларини танқидий муҳокама қилиб борсин.

Бунда дастур ижросининг ўз вақтида ва тўлиқ бажарилишига шахсан жавобгар эканлиги белгилаб қўйилсин.

7. Ушбу қарорнинг бажарилишини назорат қилиш туман ҳокимининг ўринбосари С.Мирсагатов зиммасига юклатилсин.