Kadrlar tayyorlash milliy dasturini amalga oshirish, respublikada tashqi iqtisodiy aloqalar, xalqaro munosabatlar va diplomatiya sohasida malakali mutaxassislar tayyorlashni takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 1998-yil 27-apreldagi F-840-son Farmoyishiga muvofiq Jahon iqtisodiyoti va diplomatiya universiteti faoliyatini oʻrganib chiqqan Komissiyaning xulosa va takliflari eʼtiborga olinsin.

2. Belgilab qoʻyilsinki, 1998/99 oʻquv yilidan boshlab Jahon iqtisodiyoti va diplomatiya universitetiga:

talabalar qabul qilish respublikada oliy oʻquv yurtlari uchun belgilangan tartibda, test sinovlarining reyting natijalari asosida amalga oshiriladi;

taʼlim yoʻnalishlari boʻyicha qabul rejasi Oʻzbekiston Respublikasi Tashqi ishlar vazirligi va Tashqi iqtisodiy aloqalar vazirligi, boshqa manfaatdor vazirliklar va idoralarning kadrlarga boʻlgan real ehtiyojlarini, universitetda oʻquv jarayonining sifatli tashkil etilishi uchun shart-sharoitlarni hisobga olgan holda belgilanadi. Belgilangan umumiy qabul rejasining 50 foizi davlat grantiga, 50 foizi shartnoma asosida qabul qilinayotgan talablarga ajratiladi;

boshlangʻich kursga talabalar qabul qilish va oʻqitish tugatiladi;

Oʻzbekiston Respublikasi fuqarolarini talabalikka shartnoma asosida qabul qilishda toʻlovlarni boshqa davlatlar valyutasida amalga oshirish man etiladi.

3. Jahon iqtisodiyoti va diplomatiya universiteti Oʻzbekiston Respublikasi Tashqi ishlar vazirligi tasarrufiga oʻtkazilsin.

Universitet rektori vazifasi Tashqi ishlar vaziri zimmasiga yuklansin.

Universitetning oʻziga xos xususiyatlarini inobatga olgan holda, 1998/99 oʻquv yilidan boshlab bakalavriatda oʻqish muddati — 5 yil, magistraturada — 2 yil etib belgilansin.

Universitetga 1998/99 oʻquv yiligacha qabul qilingan talabalar mavjud boʻlgan shartnomalar asosida 4 yillik bakalavriat oʻquv dasturlari boʻyicha tayanch oliy taʼlim oladilar.

4. Tashqi ishlar vazirligi bir oy muddatda:

Oliy va oʻrta maxsus taʼlim vazirligi hamda boshqa manfaatdor vazirliklar va idoralar bilan birgalikda universitetning taʼlim yoʻnalishlarini, mutaxassisliklari boʻyicha malaka tavsifnomalarini, oʻquv rejasi va dasturlarini qayta ishlab chiqsin va tasdiqlash uchun Vazirlar Mahkamasiga taqdim etsin;

yangi oʻquv rejasi va dasturlarini ishlab chiqishda har tomonlama chuqur bilimga ega boʻlgan malakali, zamonaviy talablarga javob beradigan, boy milliy va umuminsoniy qadriyatlarni oʻzlashtirgan, oʻz Vatani va xalqiga sodiq mutaxassislarni tayyorlash eng muhim vazifa deb hisoblansin;

Davlat test markazi bilan birgalikda boʻlajak test sinovlarini yuksak saviyada oʻtkazish uchun zarur tashkiliy chora-tadbirlarni amalga oshirsin;

Oliy va oʻrta maxsus taʼlim vazirligi va Adliya vazirligi bilan birgalikda universitetning Ustavini qayta ishlab chiqsin va tasdiqlasin.

5. Tashqi ishlar vazirligi universitetning professor-oʻqituvchilari tarkibini muntazam mustahkamlab borish, pedagoglarni qayta tayyorlash va ularning malakasini oshirish ishlarini taʼminlasin.

Davlat test markazi (Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasi) bilan birgalikda 1998-yil 1-iyulga qadar universitetning professor-oʻqituvchilarini attestatsiyadan oʻtkazsin.

6. 1998/99 oʻquv yilidan boshlab kadrlarga buyurtma beruvchi asosiy tashkilotlar — Oʻzbekiston Respublikasi Tashqi ishlar vazirligi va Tashqi iqtisodiy aloqalar vazirligi tizimidagi yuqori malakali mutaxassislarni universitetning oʻqitish jarayoniga jalb etish amaliyoti joriy qilinsin va rivojlantirilsin.

7. Universitetda taʼlim yoʻnalishlari boʻyicha chet tillarda keng mavzuda maʼruzalar oʻqitish va maxsus kurslarni oʻqitish uchun Oʻzbekiston Respublikasida faoliyat koʻrsatayotgan nufuzli xalqaro tashkilotlar, xorijiy davlatlar elchixonalari va vakolatxonalarining malakali mutaxassislarini taklif etish nazarda tutilsin va qoʻllab-quvvatlansin.

8. Oʻzbekiston Respublikasi Tashqi ishlar vazirligi va Tashqi iqtisodiy aloqalar vazirligi muntazam ravishda Jahon iqtisodiyoti va diplomatiya universitetining moddiy-texnika bazasini zamonaviy dasrliklar va oʻquv adabiyotlari, kompyuterlashtirilgan oʻquv dasturlari va boshqa texnik vositalar bilan mustahkamlashni budjetdan tashqari jamgʻarma mablagʻlari hisobidan taʼminlasinlar.

9. Vazirlar Mahkamasining 1992-yil 24-oktabrdagi 491-son qarorining 10-bandi va 7-bandining universitet rahbariyatiga talablar qabulini tashkil etish, oʻquv rejasi va dasturlarini, shtat jadvalini mustaqil ravishda tasdiqlash huquqini berishga oid qismi hamda Vazirlar Mahkamasining 1992-yil 12-noyabrdagi 526-son, 1994-yil 2-martdagi 111-son, 1995-yil 31-maydagi 195-son, 1995-yil 20-iyundagi 231-son qarorlari oʻz kuchini yoʻqotgan deb hisoblansin.

10. Oʻzbekiston Respublikasi Moliya vazirligi Tashqi ishlar vazirligi bilan birgalikda Jahon iqtisodiyoti va diplomatiya universitetining moliyaviy taʼminotiga tegishli oʻzgartirishlar kiritsin.

11. Ushbu qarorning bajarilishini nazorat qilish Bosh vazir oʻrinbosari A. Azizxoʻjayev zimmasiga yuklansin.