Keyingi yillarda mamlakatimizda aholi va tadbirkorlik subyektlarini energiya resurslari bilan barqaror taʼminlash, qayta tiklanuvchi energiya manbalarining hamda energiyani tejovchi texnologiyalarning joriy etilishini jadallashtirish boʻyicha izchil islohotlar amalga oshirilmoqda.

Shu bilan birga qayta tiklanuvchi energiya manbalaridan keng foydalanishni yanada qoʻllab-quvvatlash, uning huquqiy asoslarini mustahkamlash zarurati yuzaga kelmoqda.

Mazkur Qonun bilan “Qayta tiklanuvchi energiya manbalaridan foydalanish toʻgʻrisida”gi Oʻzbekiston Respublikasi Qonuniga “yashil energiya” sertifikatlarini berish va muomalaga kiritishga, qayta tiklanuvchi energiya manbalaridan foydalanilishini davlat tomonidan qoʻllab-quvvatlashga taalluqli qoʻshimcha va oʻzgartirishlar kiritilmoqda.

Oʻzbekiston Respublikasining Soliq kodeksiga “yashil energiya” sertifikatlari savdosidan tushgan daromadlar foyda soligʻini solishda hisobga olinmaydigan daromadlar ekanligini belgilovchi qoʻshimcha kiritilmoqda.

Ushbu Qonun ijtimoiy va uy-joy kommunal sohalarda hamda iqtisodiyot tarmoqlarida qayta tiklanuvchi energiya manbalarini keng joriy etishga, energiya samaradorligini oshirish orqali respublika hududlaridagi energiya taqchilligini bartaraf etishga hamda investorlar uchun qulay shart-sharoitlarni va ragʻbatlantirish mexanizmlarini belgilashga xizmat qiladi.

1-modda. Oʻzbekiston Respublikasining 2019-yil 21-mayda qabul qilingan “Qayta tiklanuvchi energiya manbalaridan foydalanish toʻgʻrisida”gi OʻRQ-539-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2019-yil, № 5, 264-modda; 2020-yil, № 11, 652-modda; 2021-yil, 4-songa ilova; 2022-yil, № 6, 570-modda) quyidagi qoʻshimcha va oʻzgartirishlar kiritilsin:

1) 3-modda:

quyidagi mazmundagi toʻrtinchi xatboshi bilan toʻldirilsin:

“yashil energiya” sertifikati — qayta tiklanuvchi energiya manbalaridan foydalangan holda elektr energiyasi ishlab chiqarilganligini tasdiqlovchi elektron hujjat”;

toʻrtinchi — sakkizinchi xatboshilari tegishincha beshinchi — toʻqqizinchi xatboshilar deb hisoblansin;

2) 4-modda:

quyidagi mazmundagi sakkizinchi xatboshi bilan toʻldirilsin:

“yashil energiya” sertifikatlari tizimini rivojlantirish”;

sakkizinchi xatboshisi toʻqqizinchi xatboshi deb hisoblansin;

3) 6-modda ikkinchi qismining beshinchi xatboshisi quyidagi mazmundagi beshinchi va oltinchi xatboshilar bilan almashtirilsin:

“qayta tiklanuvchi energiya manbalari resurslarining davlat hisobini yuritish tartibini;

“yashil energiya” sertifikatlarini berish va muomalaga kiritish tartibini belgilab beruvchi normativ-huquqiy hujjatlarni qabul qiladi”;

4) 15-modda quyidagi mazmundagi yettinchi qism bilan toʻldirilsin:

“Quvvati 300 kVt va undan yuqori boʻlgan qayta tiklanuvchi energiya manbalaridan foydalangan holda ishlab chiqariladigan elektr energiyasini yagona elektr energetikasi tizimiga ulash faqat ushbu manbalar maxsus vakolatli davlat organida roʻyxatdan oʻtkazilganidan keyin amalga oshiriladi”.

2-modda. Oʻzbekiston Respublikasining 2019-yil 30-dekabrda qabul qilingan OʻRQ-599-sonli Qonuni bilan yangi tahrirda tasdiqlangan Oʻzbekiston Respublikasining Soliq kodeksi (Oʻzbekiston Respublikasi Oliy Majlisi palatalarining Axborotnomasi, 2019-yil, 12-songa 1-ilova; 2020-yil, № 3, 198-modda, № 10, 593-modda, № 11, 652-modda, № 12, 690, 691-moddalar; 2021-yil, № 1, 6-modda, № 4, 294-modda, 4-songa ilova, № 8, 800-modda, № 9, 901-modda, № 10, 968, 969, 972, 973-moddalar, № 12, 1199-modda; 2022-yil, № 2, 79-modda, № 3, 215, 216-moddalar, № 5, 461, 464, 467-moddalar, № 6, 570-modda, № 7, 664, 666-moddalar, № 12, 1190-modda; 2023-yil, № 6, 444, 446-moddalar, № 7, 540-modda) 304-moddasi quyidagi mazmundagi 21-band bilan toʻldirilsin:

“21) qayta tiklanuvchi energiya manbalaridan foydalanishga asoslangan generatsiya obyektlarining “yashil energiya” sertifikatlari savdosidan tushgan daromadlari”.

3-modda. Oʻzbekiston Respublikasi Energetika vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

4-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

5-modda. Ushbu Qonun rasmiy eʼlon qilingan kundan eʼtiboran kuchga kiradi.