“Litsenziyalash, ruxsat berish va xabardor etish tartib-taomillari toʻgʻrisida”gi Oʻzbekiston Respublikasining Qonuni ijrosini taʼminlash, pirotexnika vositalarining muomalasi sohasida davlat nazoratini oʻrnatish, ularning noqonuniy aylanishining oldini olish, fuqarolarning hayoti va sogʻligʻini, jismoniy va yuridik shaxslarning mol-mulkini saqlash, shuningdek, jamoat tartibi va xavfsizligini taʼminlash boʻyicha chora-tadbirlarni kuchaytirish maqsadida Vazirlar Mahkamasi qaror qiladi:

1. “Litsenziyalash, ruxsat berish va xabardor etish tartib-taomillari toʻgʻrisida”gi Oʻzbekiston Respublikasining Qonuniga muvofiq texnik va maxsus maqsaddagi pirotexnika buyumlarini (sanoat maqsadida foydalaniladigan pirotexnika buyumlaridan tashqari) Oʻzbekiston Respublikasiga olib kirish va ulardan foydalanish Amalga oshirilishi uchun ruxsat etish xususiyatiga ega hujjatlarni olish talab etiladigan faoliyat (harakatlar) turlari roʻyxatiga kiritilganligi maʼlumot uchun qabul qilinsin.

2. Shunday tartib oʻrnatilsinki, unga muvofiq:

xavflilikning II klassiga tegishli maishiy pirotexnika buyumlarining jismoniy va yuridik shaxslar tomonidan yaratilishi, ishlab chiqarilishi, Oʻzbekiston Respublikasi hududiga olib kirilishi, tashilishi, realizatsiya qilinishi, sotib olinishi, saqlanishi va foydalanilishi taqiqlanadi;

texnik va maxsus maqsaddagi pirotexnika buyumlari (xavflilikning III — V klasslari) Oʻzbekiston Respublikasi Prezidenti yoki Vazirlar Mahkamasining qarorlariga muvofiq mushakbozlik tashkil etilishi koʻrsatilgan ommaviy tadbirlarni oʻtkazish jarayonida tegishli litsenziyaga ega boʻlgan yuridik shaxslar tomonidan Vazirlar Mahkamasining ruxsatnomasi asosida belgilangan miqdorlarda Oʻzbekiston Respublikasiga olib kirilishiga va ulardan foydalanilishiga ruxsat beriladi, sanoat maqsadida foydalaniladigan pirotexnika buyumlari bundan mustasno;

texnik va maxsus maqsaddagi pirotexnika buyumlarining (xavflilikning III — V klasslari) Oʻzbekiston Respublikasi Mudofaa vazirligi tomonidan olib kirilishi va foydalanilishi uchun litsenziya va ruxsatnoma talab etilmaydi.

3. Oʻzbekiston Respublikasi Ichki ishlar vazirligi:

Davlat bojxona qoʻmitasi, Davlat soliq qoʻmitasi manfaatdor vazirlik va idoralar bilan birgalikda pirotexnika buyumlarini noqonuniy olib kirish, ishlab chiqarish, tashish, saqlash, sotish va ulardan foydalanish holatlarini aniqlash va ularga barham berish, shuningdek, aybdor shaxslarni qonunda belgilangan javobgarlikka tortish boʻyicha chora-tadbirlar kompleksini amalga oshirsin;

bir oy muddatda texnik va maxsus maqsaddagi pirotexnika buyumlarini (xavflilikning III — V klasslari) Oʻzbekiston Respublikasi Prezidenti yoki Vazirlar Mahkamasining qarorlariga muvofiq tashkil etiladigan ommaviy tadbirlarni oʻtkazish jarayonida Oʻzbekiston Respublikasiga olib kirish va ulardan foydalanishga ruxsatnoma berish tartibini ishlab chiqsin hamda Vazirlar Mahkamasiga kiritsin.

4. Vazirlar Mahkamasining “Oʻzbekiston Respublikasi hududida pirotexnika buyumlari muomalasini davlat tomonidan tartibga solish va nazorat qilishga doir qoʻshimcha chora-tadbirlar toʻgʻrisida” 2010-yil 25-oktabrdagi 234-son qaroriga (Oʻzbekiston Respublikasi QT, 2010-y., 10-son, 52-modda) ilovaga muvofiq oʻzgartirishlar va qoʻshimcha kiritilsin.

5. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov, Oʻzbekiston Respublikasi Davlat bojxona qoʻmitasi raisi A.Y. Mavlonov hamda Oʻzbekiston Respublikasi Davlat soliq qoʻmitasi raisi Sh.D. Kudbiyev zimmasiga yuklansin.

1. 1-ilovada:

a) 2 va 3-bandlar quyidagi tahrirda bayon etilsin:

“2. Quyidagilar boʻyicha faoliyat litsenziyalanadi:

xavflilikning I, III — V klasslariga tegishli pirotexnika buyumlarini (keyingi oʻrinlarda — pirotexnika buyumlari) yaratish, ishlab chiqarish, tashish, saqlash, realizatsiya qilish, ularni yoʻq qilish va utilizatsiya qilish;

texnik va maxsus maqsaddagi pirotexnika buyumlaridan (xavflilikning III — V klasslari) foydalanish.

3. Maishiy maqsaddagi pirotexnika buyumlari (xavflilikning I klassi) tayyorlovchining yoʻriqnomasi talablariga rioya qilish sharti bilan yakka tartibda foydalanish maqsadida jismoniy va yuridik shaxslar tomonidan erkin sotib olinishi, tashilishi, saqlanishi va foydalanilishi mumkin.”;

b) 11-bandda:

“d” kichik bandning ikkinchi xatboshisi quyidagi tahrirda bayon etilsin:

“jismoniy shaxslarga pirotexnika buyumlari sotilishiga yoʻl qoʻymaslik, maishiy maqsaddagi pirotexnika buyumlari (xavflilikning I klassi) bundan mustasno”;

“e” kichik bandda:

quyidagi mazmundagi uchinchi xatboshi bilan toʻldirilsin:

“texnik va maxsus maqsaddagi pirotexnika buyumlaridan (xavflilikning III — V klasslari) faqat Oʻzbekiston Respublikasi Prezidenti yoki Vazirlar Mahkamasining qarorlariga muvofiq mushakbozlik tashkil etilishi koʻrsatilgan ommaviy tadbirlarni oʻtkazish jarayonida Vazirlar Mahkamasining ruxsatnomasi asosida belgilangan miqdorlarda foydalanish, sanoat maqsadida foydalaniladigan pirotexnika buyumlari bundan mustasno”;

uchinchi xatboshi tegishlicha toʻrtinchi xatboshi deb hisoblansin.

2. 3-ilovada:

a) 2-band quyidagi tahrirda bayon etilsin:

“2. Ushbu Nizom qoidalari harbiy, shuningdek, maishiy maqsaddagi pirotexnika buyumlaridan (xavflilikning I klassi) foydalanishga nisbatan tatbiq etilmaydi.”;

b) 3-bandning ikkinchi xatboshisi quyidagi tahrirda bayon etilsin:

“Ommaviy tadbirlarni oʻtkazish jarayonida texnik va maxsus maqsaddagi pirotexnika buyumlaridan (xavflilikning III — V klasslari) foydalanish Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalariga muvofiq beriladigan ommaviy tadbirni oʻtkazishga doir ruxsatnoma boʻyicha ommaviy tadbir dasturi asosida amalga oshiriladi”.