Oʻzbekiston Respublikasi tomonidan qabul qilingan majburiyatlariga muvofiq va Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiyani roʻyobga chiqarish boʻyicha vazirliklar va idoralarning faoliyatini muvofiqlashtirish maqsadida Vazirlar Mahkamasi qaror qiladi:

1. Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiyani roʻyobga chiqarish boʻyicha Oʻzbekiston Respublikasi Vazirlar Mahkamasining 1-ilovaga* muvofiq tarkibda komissiyasi tashkil etilsin.

2. Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiyani roʻyobga chiqarish boʻyicha Oʻzbekiston Respublikasi Vazirlar Mahkamasining Komissiyasi toʻgʻrisida Nizom 2-ilovaga muvofiq tasdiqlansin.

3. Quyidagilarga:

Sanoatda va konchilikda ishlarning bexatar olib borilishini nazorat qilish agentligiga Komissiyaning kotibiyati funksiyasini bajarish;

Oʻzbekiston Respublikasining Belgiya Qirolligidagi Elchixonasiga Kimyoviy qurollarni taqiqlash boʻyicha tashkilot (Gaaga) bilan ishchi aloqalari va oʻzaro hamkorlikni amalga oshirish hamda Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiyani roʻyobga chiqarish boʻyicha Oʻzbekiston Respublikasi Vazirlar Mahkamasining Komissiyasi kotibiyati uchun zarur materiallarni taqdim etish yuklansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.

Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiyani roʻyobga chiqarish boʻyicha Oʻzbekiston Respublikasi Vazirlar Mahkamasining Komissiyasi (keyingi oʻrinlarda Komissiya deb ataladi), Kimyoviy qurollarni yaratish, ishlab chiqarish, toʻplash va qoʻllashni taqiqlash hamda uni yoʻq qilib tashlash toʻgʻrisidagi Konvensiya (keyingi oʻrinlarda Konvensiya deb ataladi) yuzasidan Oʻzbekiston Respublikasi tomonidan qabul qilingan majburiyatlarni amalga oshirish uchun vazirliklar, idoralar, korporatsiyalar, konsernlar va birlashmalarning (keyingi oʻrinlarda vazirliklar va idoralar deb yuritiladi) faoliyatini muvofiqlashtirish masalalari boʻyicha idoralararo kollegial organ hisoblanadi.

Konvensiyaning ish prinsiplari ommaviy qirgʻin qurollari — kimyoviy, bakteriologik (biologik), zaharlovchi moddalar omborlarini va ularni ishlab chiqarish uchun qoʻllaniladigan asbob-uskunalarni kechiktirmasdan yoʻq qilib tashlash zarurligiga asoslanadi.

Komissiya oʻz faoliyatida xalqaro shartnomalar va bitimlarga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga, mazkur Nizomga amal qiladi hamda Oʻzbekiston Respublikasi Prezidentiga hisob beradi.

Komissiyaning asosiy vazifalari quyidagilardan iborat:

Oʻzbekiston Respublikasi Oliy Majlisining koʻrib chiqishi uchun milliy qonunchilikni Konvensiyani imzolash paytida qabul qilingan xalqaro majburiyatlarga muvofiq holga keltirish uchun uni oʻzgartirish (qoʻshimchalar kiritish) toʻgʻrisida takliflar kiritish;

eʼlon qilinishi va tekshirilishi kerak boʻlgan sanoat korxonalari roʻyxatini aniqlash masalalari boʻyicha vazirliklar va idoralarning faoliyatini muvofiqlashtirish;

Konvensiya aʼzolari boʻlgan davlatlarning ana shunday milliy organlari bilan mustahkam oʻzaro aloqa qilish;

axborot toʻplash, umumlashtirish, tahlil qilish va belgilangan tartibda Konvensiya aʼzolari boʻlgan davlatlar tashkilotining texnik kotibiyatiga berish;

Konvensiya doirasida amalga oshiriladigan tekshirishlarni oʻtkazishda qatnashish yoxud unga har tomonlama koʻmaklashish;

Konvensiya qatnashchilari boʻlgan davlatlarga nisbatan kimyoviy qurol qoʻllanilgan yoki qoʻllash xavfi tugʻilgan taqdirda Konvensiya aʼzolari boʻlgan davlatlarni yoki davlatlar guruhiga yordam koʻrsatish, zarurat boʻlganda ularni himoya qilish.

Komissiya:

oʻz vakolatlari doirasida Konvensiya qatnashchilari boʻlgan boshqa davlatlarning kimyoviy qurollar ustidan nazorat qilish boʻyicha ana shunday milliy organlari bilan hamkorlik oʻrnatadi va uni saqlab turadi, belgilangan tartibda axborot ayirboshlanishini tashkil etadi;

konvensiya qatnashchilari boʻlgan davlatlar tashkiloti ijroiya kengashi va texnik kotibiyatiga hisobotlar va axborotlarni tayyorlaydi va oʻz vaqtida taqdim etadi;

kimyoviy qurollarni yoʻq qilib tashlash boʻyicha xalqaro va respublika tajribasini oʻrganadi, umumlashtiradi va yoyadi;

oʻz vakolati doirasida vazirliklar, davlat qoʻmitalari, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga kimyoviy qurollarni taqiqlash va ularni yoʻq qilib tashlash masalalari bilan bevosita shugʻullanuvchi, ularga boʻysunuvchi muassasalar faoliyatini tashkil etishda tegishli uslubiy va amaliy yordam koʻrsatadi;

vazirliklar, idoralar va boshqa tegishli tashkilotlarga, shu jumladan xalqaro tashkilotlarga belgilangan tartibda tegishli axborot taqdim etilishini taʼminlaydi;

kimyoviy qurollarni taqiqlash va yoʻq qilib tashlashga qaratilgan tadbirlarni oʻtkazishga moʻljallangan moliyaviy mablagʻlar va moddiy resurslarni taqsimlaydi;

Vazirlar Mahkamasiga Konvensiya masalalariga tegishli Oʻzbekiston Respublikasi qonunlari loyihalari va boshqa normativ hujjatlar boʻyicha xulosalar taqdim etadi;

Konvensiya masalalari boʻyicha Mustaqil Davlatlar Hamdoʻstligiga kiruvchi davlatlar bilan tuziladigan bitimlar loyihalariga, shuningdek boshqa xorijiy mamlakatlar bilan tuziladigan bitimlar loyihalariga takliflar tayyorlanishini taʼminlaydi;

vazirliklar va idoralar tomonidan Konvensiyada nazarda tutilgan Oʻzbekiston Respublikasi majburiyatlarining bajarilishi ustidan nazoratni taʼminlaydi;

kimyoviy qurollarni taqiqlashga qaratilgan har qanday tashabbuslarni qoʻllab-quvvatlaydi, shuningdek kimyoviy qurollardan tinch maqsadlarda foydalanish faktlari toʻgʻrisida Konvensiya qatnashchilari boʻlgan davlatlarning xuddi shunday tuzilmalari bilan asbob-uskunalar, materiallar, ilmiy va texnik axborot ayirboshlanishiga koʻmaklashadi;

yakka tartibda yoki boshqa davlatlar, xalqaro tashkilotlar bilan birgalikda kimyo sohasidagi ilmiy kashfiyotlarni ishlab chiqish va qoʻllashda qatnashadi.

Komissiya oʻz oldida turgan vazifalar va funksiyalarni bajarish uchun quyidagi huquqlarga egadir:

oʻz vakolati doirasida belgilangan tartibda vazirliklar, idoralar, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, mulkchilik shakllaridan qatʼi nazar, korxonalar, muassasalar va tashkilotlar tomonidan bajarilishi majburiy boʻlgan kimyoviy materiallarni yaratish, ishlab chiqarish yoki ularni respublika hududida saqlashga ruxsat berishga (taqiqlashga) qaratilgan qarorlar qabul qilish;

vazirliklar, idoralar, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, mulkchilik shakllaridan qatʼi nazar, korxonalar, muassasalar va tashkilotlardan oʻziga yuklatilgan vazifalarni bajarish uchun zarur boʻlgan axborot va maʼlumotlarni soʻrash va olish;

oʻz vakolatiga tegishli boʻlgan masalalar boʻyicha vazirliklar, idoralar, mulkchilik shakllaridan qatʼi nazar, korxonalar va tashkilotlarni belgilangan tartibda tekshirish;

ekspert tekshirishlarini oʻtkazishda qatnashish uchun vatanimiz va chet el mutaxassislarini jalb etish;

kimyoviy qurollarni taqiqlash ustidan nazorat qilish masalalari boʻyicha oʻtkaziladigan xalqaro tashkilotlar, eksport komissiyalari ishida, kengashlarda, seminarlarda qatnashish;

Konvensiya qoidalari bajarilishi ustidan nazoratni tashkil etish masalalari boʻyicha Oʻzbekiston Respublikasi Hukumatiga takliflar kiritish.

Komissiya Oʻzbekiston Respublikasi Vazirlar Mahkamasi tomonidan tashkil etiladi, qayta tashkil etiladi va tugatiladi.

Komissiyaga Oʻzbekiston Respublikasi Bosh vazirining birinchi oʻrinbosari boshchilik qiladi.

Komissiyaning shaxsiy tarkibi Vazirlar Mahkamasi tomonidan tasdiqlanadi.

Komissiya ishi joriy va istiqbolli rejalar asosida amalga oshiriladi. Komissiya majlislari zaruratga koʻra, biroq yilning har choragida kamida bir marta oʻtkaziladi. Komissiya majlislari unda komissiya aʼzolarining kamida yarmi qatnashganda qaror qabul qilishga haqli boʻladi.

Komissiya qarorlari ochiq ovoz berish yoʻli bilan qabul qilinadi. Majlisda hozir boʻlgan komissiya aʼzolarining koʻpchiligi uning uchun ovoz bersa qaror qabul qilingan hisoblanadi.

Komissiya qarorlari qarorlar sifatida rasmiylashtiriladi va zarurat boʻlganda jamoatchilikka ommaviy axborot vositalari orqali maʼlum qilinadi. Komissiya qarorlari barcha davlat boshqaruvchi organlari, mulkchilik shakllaridan qatʼi nazar, korxonalar va muassasalar tomonidan bajarilishi majburiy hisoblanadi.

Ishchi organ — Komissiya kotibiyati funksiyasi Sanoatda va konchilikda ishlarning bexatar olib borilishini nazorat qilish agentligiga yuklanadi.