Vazirlar Mahkamasi qaror qiladi:

1. Ilova qilinayotgan O‘zbekiston Respublikasi Qishloq xo‘jaligi vazirligining Mahsulot tayyorlash va uning sifati bo‘yicha bosh davlat inspeksiyasi to‘g‘risidagi Nizom tasdiqlansin.

2. O‘zbekiston SSR Ministrlar Sovetining “O‘zSSR Davlat agrosanoat komitetining Mahsulot tayyorlash va uning sifati bo‘yicha bosh davlat inspeksiyasi (Boshqarmasi) to‘g‘risidagi Nizomni tasdiqlash haqida” 1987-yil 19-oktabrdagi 423-son qarori (O‘zSSR QT, 1987-y., 10-son, 55-modda) o‘z kuchini yo‘qotgan deb hisoblansin.

1. Mahsulot tayyorlash va uning sifati bo‘yicha bosh davlat inspeksiyasi (keyingi o‘rinlarda “Boshdavinspeksiya” deb ataladi) tayyorlovchilar va mahsulot yetkazib beruvchilar o‘rtasida mahsulot sifatini baholash bo‘yicha nizoli masalalarni hal etish, kontraktatsiya shartnomalari tuzishni va ularning bajarilishini nazorat qilishni tashkil etish, shuningdek, kontraktatsiya shartnomalari bo‘yicha majburiyatlar bajarilmaganligi uchun xo‘jaliklarni javobgarlikdan ozod qilish uchun xulosalar berish bo‘yicha respublika dehqonchilik sanoati majmuining idoralararo mustaqil nazorat qiluvchi organi hisoblanadi.

2. “Boshdavinspeksiya” o‘z faoliyatida O‘zbekiston Respublikasi qonunlariga, Oliy Majlisining boshqa qarorlariga, Prezidentning farmonlari va farmoyishlariga, respublika Vazirlar Mahkamasining qarorlari va farmoyishlariga, shuningdek, mazkur Nizomga va boshqa normativ hujjatlarga amal qiladi.

3. Quyidagilar “Boshdavinspeksiya” ning asosiy vazifalari hisoblanadi:

qishloq xo‘jaligi mahsulotlari tayyorlash, saqlash va sotish chog‘ida dehqonchilik sanoati majmui korxonalarida, qaysi idoraga qarashligidan qat’i nazar, tayyorlov tashkilotlarida mahsulot sifatini nazorat qilish ustidan davlat nazoratini tashkil etish;

mahsulotning sifati va miqdorini baholash, uning uchun o‘z vaqtida va to‘g‘ri haq to‘lanishi bo‘yicha nizoli masalalarni hal etish, kontraktatsiya shartnomalari tuzishni va ularning bajarilishini nazorat qilishni tashkil etish;

Qoraqalpog‘iston Respublikasi Vazirlar Kengashi va viloyatlar hokimliklarining mahsulot sifati, kontraktatsiya shartnomalarini tashkil etish va tuzishning to‘g‘riligi va o‘z vaqtida bajarilishini nazorat qilish bo‘yicha tegishli inspeksiya xizmatlari ishiga rahbarlik qilish, vazirliklar, idoralar, uyushmalar, konsernlar, xo‘jalik jamiyatlari yoki shirkatlarining tarkibiy bo‘linmalari bilan mustahkam aloqada ishlash hamda o‘z vakolati doirasida respublikaning boshqa nazorat qiluvchi organlari bilan ishlarni muvofiqlashtirish;

tegishli vazirliklar, idoralar, uyushmalar, konsernlar, xo‘jalik jamiyatlari yoki shirkatlari bilan birgalikda mahsulot sifatini yaxshilash yuzasidan takliflar ishlab chiqishda, belgilangan tartibda amaldagi qonunchilikni takomillashtirish bo‘yicha takliflar kiritishda qatnashish, yo‘riqnomalar, qoidalar, shuningdek, boshqa normativ hujjatlarni ishlab chiqishda ishtirok etish;

mulkchilik shakllaridan qat’i nazar, mahsulot yetkazib beruvchilar va oluvchilar tomonidan qishloq xo‘jaligi mahsulotlarining sifat ko‘rsatkichlari to‘g‘ri aniqlanganligi ustidan nazorat qilish;

mulkchilik shakllaridan qat’i nazar, korxonalar, muassasalar va tashkilotlar tomonidan standartlar, texnik shartlar talablariga rioya qilinishi, respublika ko‘rsatma beruvchi organlarining qishloq xo‘jaligi mahsulotlarining sifatini yaxshilash masalalariga, kontraktatsiya shartnomalari bajarilishiga doir qarorlari, buyruqlari, yo‘riqnomalari va ko‘rsatmalari bajarilishini nazorat qilish;

fuqarolarning davlat inspeksiyasi vakolatiga tegishli bo‘lgan masalalar bo‘yicha takliflari, shikoyatlari va arizalarini ko‘rib chiqish.

4. “Boshdavinspeksiya” quyidagi huquqlarga egadir:

dehqonchilik sanoati majmuiga kiruvchi vazirliklar va idoralardan qishloq xo‘jaligi mahsulotlari kontraktatsiya shartnomalari bajarilishini ta’minlash, nazorat qiluvchi organlar tomonidan qayd etilgan kamchiliklarni bartaraf etish, shuningdek, mahsulot xillarini kengaytirish, xomashyo va tayyor mahsulot sifatini yaxshilash bo‘yicha ko‘rilgan chora-tadbirlar to‘g‘risidagi ma’lumotlarni belgilangan tartibda olish;

Qoraqalpog‘iston Respublikasi va viloyatlar hokimliklarining mahsulot tayyorlash va uning sifati bo‘yicha davlat inspeksiyalari hisobotlarini eshitish;

qishloq xo‘jaligi mahsulotlarini saqlash va sotish chog‘ida standartlar, normativ-texnik hujjatlar talablari bajarilishini ta’minlanmagan ishlab chiqarishlar va sexlar ishini to‘xtatib qo‘yish, shuningdek, mahsulotni qayta ishlash yoki boshqa maqsadlarda foydalanish imkoniyatini aniqlagan holda standartlar talablariga javob bermaydigan mahsulotlarni sotishni taqiqlash;

standartlash va texnik shartlar talablaridan chekingan holda mahsulot ishlab chiqargan va sotgan korxonalar, muassasalar va tashkilotlarga nisbatan iqtisodiy jazolar qo‘llash:

standartlar va texnik shartlar talablaridan chekingan holda ishlab chiqarilgan mahsulotlarni ular sotilgan davrda natura va qiymat ifodasida prognozlar yoki buyurtma-naryadlar hisobotlaridan chiqarib tashlash to‘g‘risida ko‘rsatma berish.

Korxonalar va tashkilotlar, mulkchilik shakllari va qaysi idoraga qarashliligidan qat’i nazar, ko‘rsatmaga muvofiq normativ-texnik hujjatlar talablaridan chekingan holda tayyorlangan mahsulotni sotishdan olingan haqiqiy foydaning butun summasini respublika budjeti daromadiga to‘lashga majburdirlar;

mahsulot tayyorlash, qayta ishlash, saqlash, transportda tashish ishida standartlar talablari buzilishida, past sifatli mahsulot yetkazib berilishi va sotilishida, o‘zaro hisob-kitoblar qoidalari va kontraktatsiya shartnomalari buzilishida aybdor bo‘lganlarga nisbatan ogohlantirish yoki eng kam oylik ish haqining uch baravarigacha miqdorda jarima solish ko‘rinishida chora ko‘rish. Solingan jarima miqdorining butun summasi respublika budjeti daromadiga o‘tkaziladi;

vazirliklar, idoralar, uyushmalar, konsernlar, mulkchilik shakllaridan qat’i nazar, xo‘jalik jamiyatlari yoki shirkatlari, korxonalar, tashkilotlar va muassasalar rahbarlari oldiga mahsulot tayyorlash, saqlash, yetkazib berish va sotishni tashkil etish ishida davlat intizomi buzilishida aybdor bo‘lgan rahbarlarni va boshqa mansabdor shaxslarni amaldagi qonunchilikka muvofiq javobgarlikka tortish masalalarini qo‘yish;

mazkur Nizom bilan berilgan vakolatlar doirasida boshqa masalalarni hal etish.

5. “Boshdavinspeksiya” ga yuklangan vazifalarni bajarish uchun uning mutaxassislari (davlat inspektorlari) quyidagi huquqlarga egadirlar:

qishloq xo‘jaligi mahsulotlari sifatini, qabul qilish, transportda tashish, joylashtirish, saqlash va sotish qoidalarini tekshirish uchun o‘z xizmat guvohnomalari va tegishli hujjatlarni ko‘rsatgan holda, qaysi idoraga qarashliligidan qat’i nazar, korxonalar, muassasalar va tashkilotlarga kirish;

birgalikda tekshirishlar o‘tkazish va tahlillar qilish uchun korxonalar, muassasalar, ilmiy-tadqiqot tashkilotlarining mutaxassislarini jalb etish;

zarur tahlillar o‘tkazish, mahsulot sifatini aniqlash uchun namunalar (sinab ko‘rishlar) ni tanlash, belgilangan tartibda tegishli xulosalar berish. Laboratoriya tahlillari va takror tekshirishlar o‘tkazish xarajatlari mahsulot tayyorlovchi korxonalar hisobidan qoplanadi;

qishloq xo‘jaligi mahsulotining sifatini aniqlash masalasi bo‘yicha qishloq xo‘jaligi, tayyorlov, ulgurji, sanoat korxonalari va boshqa tashkilotlar o‘rtasidagi kelishmovchiliklarni hal etish;

qishloq xo‘jaligi mahsuloti sifatini baholash bo‘yicha komissiyalar ishida qatnashish;

qishloq xo‘jaligi korxonalari va muassasalariga, tayyorlov tashkilotlari va boshqa tashkilotlarga aniqlangan standartlar va texnik shartlarning buzilishini, qishloq xo‘jaligi mahsuloti tayyorlash, sotish shartlari, transportda tashish va saqlash qoidalari buzilishini bartaraf etish to‘g‘risida belgilangan muddatda bajarish majburiy bo‘lgan ko‘rsatmalar berish.

6. Mahsulot tayyorlash va uning sifati bo‘yicha davlat inspektorining o‘z vakolati doirasidagi ko‘rsatmalari, mulkchilik shakllaridan qat’i nazar, barcha korxonalar, muassasalar va tashkilotlar uchun majburiy hisoblanadi.

7. “Boshdavinspeksiya” boshlig‘i O‘zbekiston Respublikasi Qishloq xo‘jaligi vazirligining buyrug‘i bilan ishga tayinlanadi va ishdan ozod etiladi.

8. Qoraqalpog‘iston respublika va viloyat davlat inspeksiyalari boshliqlari “Boshdavinspeksiya” ning roziligiga ko‘ra Qoraqalpog‘iston Respublikasi Vazirlar Kengashi va viloyatlar hokimliklarining qarorlari bilan lavozimga tayinlanadilar va lavozimdan ozod qilinadilar.

9. “Boshdavinspeksiya” boshlig‘i:

davlat inspeksiya ishiga yakka boshchilik prinsipi asosida rahbarlik qiladi, respublika mehnat qonunchiligiga muvofiq xodimlarni ishga qabul qilish va ishdan bo‘shatishni amalga oshiradi, “Boshdavinspeksiya” ga yuklangan vazifalar bajarilishi uchun shaxsan javob beradi;

barcha muassasalar va tashkilotlarda Davlat inspeksiyasi vakolatiga tegishli bo‘lgan masalalar bo‘yicha ishonchnomasiz vakillik qiladi;

“Boshdavinspeksiya” ixtiyoriga ajratilgan mablag‘larni belgilangan tartibda boshqaradi;

boshliq o‘rinbosarining, “Boshdavinspeksiya” boshqarmalari va boshqa tarkibiy bo‘linmalar boshliqlarining vazifalarini belgilaydi, xodimlar uchun lavozim yo‘riqnomalarini tasdiqlaydi.

10. “Boshdavinspeksiya” boshlig‘i va uning o‘rinbosari vazirliklar, idoralar va boshqa tashkilotlar tomonidan “Boshdavinspeksiya” ning vakolatiga tegishli bo‘lgan masalalar bo‘yicha o‘tkaziladigan hay’atlar majlislarida, kengashlarda belgilangan tartibda qatnashadilar.

11. “Boshdavinspeksiya” apparati xarajatlari respublika budjetidan ajratiladigan mablag‘lar hisobiga qoplanadi.

12. “Boshdavinspeksiya” O‘zbekiston Respublikasi Davlat gerbi tasviri tushirilgan, o‘z nomi davlat tilida yozilgan muhrga ega bo‘ladi.

13. “Boshdavinspeksiya” bankda o‘z hisob-kitob schyotiga ega bo‘ladi.