Vazirlar Mahkamasi qayd etadiki, qishloq xoʻjaligini mineral oʻgʻitlar va oʻsimliklarni kimyoviy himoya qilish vositalari bilan taʼminlash sohasida intizomni mustahkamlash yuzasidan koʻrilgan chora-tadbirlarga qaramasdan ahvol qoniqarsizligicha qolmoqda. Oʻtkazilgan tekshirishlar vaqtida “Oʻzkimyosanoat” davlat-aksiyadorlik kompaniyasi hamda “Oʻzqishloqxoʻjalikkimyo” davlat-aksiyadorlik kompaniyasi va uning hududiy korxonalari tomonidan shartnoma va moliya intizomining jiddiy buzilishi, mineral oʻgʻitlar va oʻsimliklarni himoya qilish kimyoviy vositalari ishlab chiqaruvchi korxonalar bilan hisob-kitoblarning oʻz vaqtida amalga oshirilmasligi hollari aniqlandi.

Mineral oʻgʻitlar va oʻsimliklarni himoya qilish kimyoviy vositalarini ishlab chiqarish va sotishning yaxlit tuzilmasini yaratish, ularning qishloq xoʻjaligiga yetkazib berilganligi uchun hisob-kitoblarning oʻz vaqtida va toʻliq amalga oshirilishini taʼminlash, hududiy agrokimyo xizmatlarining masʼuliyatini oshirish, ular va ishlab chiqaruvchi korxonalar oʻrtasidagi oʻzaro munosabatlarni yaxshilash maqsadida Vazirlar Mahkamasi qaror qiladi:

1. Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish yuzasidan takliflar tayyorlash boʻyicha Respublika komissiyasi, Qishloq va suv xoʻjaligi vazirligi, “Oʻzkimyosanoat” davlat-aksiyadorlik kompaniyasi, “Oʻzqishloqxoʻjalikkimyo” davlat-aksiyadorlik kompaniyasi aksiyadorlari, “Qishloqxoʻjalikkimyo” hududiy aksiyadorlik birlashmalari va “Oʻsimliklarni himoya qilish kimyoviy vositalari respublika bazasi” aksiyadorlik jamiyatining:

“Oʻzqishloqxoʻjalikkimyo” davlat-aksiyadorlik kompaniyasini tugatish;

“Qishloqxoʻjalikkimyo” hududiy aksiyadorlik birlashmalarini, ularni “Oʻzkimyosanoat” davlat-aksiyadorlik kompaniyasi tarkibiga bergan holda, “Qishloqxoʻjalikkimyo” hududiy aksiyadorlik jamiyatlariga aylantirish;

“Oʻsimliklarni himoya qilish kimyoviy vositalari respublika bazasi” aksiyadorlik jamiyatini, Qoraqalpogʻiston Respublikasi, Qashqadaryo, Surxondaryo, Toshkent, Jizzax va Buxoro viloyatlari chigirtkaga qarshi kurashish ekspeditsiyalarini, Respublika agrokimyo stansiyasini, Respublika oʻquv-ishlab chiqarish biolaboratoriyasini, Zararkunandalar, kasalliklar va begona oʻtlardan himoya qilish boʻyicha diagnostika, prognoz va biometod Respublika va hududiy laboratoriyalarini Qishloq va suv xoʻjaligi vazirligi tasarrufiga berish toʻgʻrisidagi takliflari qabul qilinsin.

2. Quyidagilar “Oʻzkimyosanoat” davlat-aksiyadorlik kompaniyasining asosiy vazifalari etib belgilansin:

kimyo sanoatini zamonaviylashtirish, rekonstruksiya qilish va texnika bilan qayta jihozlashga yoʻnaltirilgan yagona texnika siyosati oʻtkazish, resurslarni tejaydigan samarali texnologiyalarni joriy etish, ishlab chiqarishni va butlovchi mahsulotlar ishlab chiqarishni mahalliylashtirishni rivojlantirish;

qishloq xoʻjaligining mineral oʻgʻitlarga, oʻsimliklarni himoya qilishning kimyoviy vositalariga, shuningdek iqtisodiyot boshqa tarmoqlarining raqobatbardoshli kimyoviy mahsulotlarga boʻlgan joriy va istiqboldagi ehtiyojlarining marketing tadqiqotlarini olib borish hamda ularga boʻlgan ehtiyojni aniqlash;

tarmoqni rivojlantirishning kimyo sanoatini barqaror rivojlantirishga, raqobatbardoshli kimyo mahsulotlari ishlab chiqarishni koʻpaytirishga, eksport salohiyatini kengaytirishga qaratilgan oʻrtacha muddatli va uzoq muddatli dasturlarini ishlab chiqish va amalga oshirish;

Oʻzbekiston Respublikasi Iqtisodiyot vazirligi hamda boshqa manfaatdor vazirliklar va idoralar bilan birgalikda mineral oʻgʻitlar, oʻsimliklarni himoya qilishning kimyoviy vositalarini ishlab chiqarish va taqsimlashning har yilgi balanslari ishlab chiqilishida qatnashish;

mineral oʻgʻitlar va defoliantlarni sotish boʻyicha har yilgi yarmarka savdolari oʻtkazilishini tashkil etish;

xorijiy va Vatanimiz investorlarini jalb etgan holda kimyo sanoati korxonalarini chuqur isloh qilish va xususiylashtirish;

menejmentning zamonaviy usullarini egallagan va bozor sharoitlarida samarali ishlashga qodir boʻlgan muhandis-texnik kadrlar va boshqaruv kadrlari malakasini oshirish va ularni qayta tayyorlash.

3. “Oʻzkimyosanoat” davlat-aksiyadorlik kompaniyasining tashkiliy tuzilmasi va xodimlarining umumiy cheklangan soni 85 nafar, shu jumladan boshqaruv xodimlari soni 56 nafar boʻlgan ijro etuvchi apparati tuzilmasi 1 va 2-ilovalarga muvofiq;

“Qishloqxoʻjalikkimyo” hududiy aksiyadorlik jamiyatlarining, ularning tumanlararo va tuman filiallarining namunaviy tuzilmalari 3, 4, 5-ilovalarga muvofiq tasdiqlansin.

Belgilansinki, Vazirlar Mahkamasining qarori bilan tasdiqlanadigan 6-ilovaga muvofiq 13 kishidan iborat tarkibdagi Kompaniya kengashi “Oʻzkimyosanoat” davlat-aksiyadorlik kompaniyasini boshqarishning yuqori organi hisoblanadi.

“Oʻzkimyosanoat” davlat-aksiyadorlik kompaniyasi boshqaruvi raisiga zaruriyat boʻlganda va Kompaniya kengashi bilan kelishgan holda xodimlarning shtatda belgilangan soni doirasida Kompaniyani boshqarish ijro etuvchi apparati tuzilmasiga oʻzgartirishlar kiritishga ruxsat etilsin.

Belgilab qoʻyilsinki, “Oʻzkimyosanoat” davlat-aksiyadorlik kompaniyasi boshqaruvi 4 kishidan, shu jumladan rais va uning 3 nafar oʻrinbosaridan iborat boʻladi. Rais va uning oʻrinbosarlari yuqori boshqaruv organi tomonidan saylanadi, keyinchalik Oʻzbekiston Respublikasi Vazirlar Mahkamasi tomonidan tasdiqlanadi hamda maishiy taʼminot, tibbiy va transport xizmati koʻrsatish shart-sharoitlariga koʻra rais vazirga, birinchi oʻrinbosar — vazirning birinchi oʻrinbosariga, rais oʻrinbosarlari esa — vazir oʻrinbosarlariga tenglashtiriladi.

4. Belgilansinki, “Qishloqxoʻjalikkimyo” Qoraqalpogʻiston respublika va viloyat aksiyadorlik jamiyatlari boshqaruvi raislari Qoraqalpogʻiston Respublikasi Vazirlar Kengashi Raisi va viloyat hokimlarining taqdimnomasiga koʻra “Oʻzkimyosanoat” davlat-aksiyadorlik kompaniyasi boshqaruvi raisi tomonidan lavozimga tasdiqlanadilar.

5. Belgilab qoʻyilsinki, “Qishloqxoʻjalikkimyo” hududiy aksiyadorlik jamiyatlari:

yuridik shaxs sifatida tashkil etiladi va “Oʻzkimyosanoat” davlat-aksiyadorlik kompaniyasi tarkibiga kiradi;

oʻz tumanlararo va tuman filiallari orqali tegishli hudud boʻyicha haqiqiy talabni oʻrganadilar, buyurtmanomalarni umumlashtiradilar hamda pirovard isteʼmolchilar — qishloq xoʻjaligi ishlab chiqaruvchilari bilan mineral oʻgʻitlar va oʻsimliklarni kimyoviy himoya qilish vositalarining aniq turlarini yetkazib berish yuzasidan shartnomalar tuzadilar;

har yili 1-oktabrdan kechikmay, qishloq xoʻjaligi ishlab chiqaruvchilarining buyurtmanomalarini umumlashtirish asosida respublika viloyatlari boʻyicha mineral oʻgʻitlar va oʻsimliklarni kimyoviy himoya qilish vositalariga boʻlgan ehtiyoj prognozini shakllantiradilar hamda mineral oʻgʻitlar va oʻsimliklarni kimyoviy himoya qilish vositalarini vatanimiz ishlab chiqaruvchi korxonalarida ishlab chiqarish boʻyicha kelgusi yil dasturini oʻz vaqtida tayyorlash uchun “Oʻzkimyosanoat” davlat-aksiyadorlik kompaniyasiga taqdim etadilar.

6. Quyidagi tartib belgilansin, unga koʻra:

2004-yildan boshlab ishlab chiqaruvchi korxonalar tomonidan mineral oʻgʻitlarning asosiy turlarini va defoliantlarni ulgurji sotish yuzasidan shartnomalar (kontraktlar) tuzish har yili oʻz mahsulotlarining koʻrgazma-sotuvini tashkil etgan holda yarmarka savdolarida amalga oshiriladi;

mineral oʻgʻitlar va defoliantlarni ishlab chiqaruvchi korxonalar va import qiluvchilar — bir tomondan, ulgurji xaridorlar “Qishloqxoʻjalikkimyo” hududiy aksiyadorlik jamiyatlari va mahsulotning boshqa ulgurji isteʼmolchilari — ikkinchi tomondan yarmarka savdolari qatnashchilari hisoblanadilar;

shartnomalar tuzish hamda mineral oʻgʻitlar va defoliantlarni sotish boʻyicha yarmarka savdolari har yili, prognoz yilidan oldingi yilning oktyabr—noyabr oylarida oʻtkaziladi.

Koʻrsatib oʻtilgan vazifani amalga oshirish uchun:

“Oʻzkimyosanoat” davlat-aksiyadorlik kompaniyasi ijro etuvchi apparati tuzilmasida mineral oʻgʻitlar va defoliantlar yarmarka savdolarini tashkil etish boʻlimi hamda doimiy faoliyat koʻrsatuvchi yarmarka qoʻmitasi tashkil etilsin;

Oʻzbekiston Respublikasi Moliya vazirligi, Iqtisodiyot vazirligi “Oʻzkimyosanoat” davlat-aksiyadorlik kompaniyasi hamda Qishloq va suv xoʻjaligi vazirligi, boshqa manfaatdor idoralar bilan birgalikda Buyurtmalarni shakllantirish, yarmarka savdolarini oʻtkazish, qishloq xoʻjaligi ishlab chiqaruvchilariga yetkazib beriladigan mineral oʻgʻitlar va boshqa kimyoviy mahsulotlarni sotish hamda ular uchun hisob-kitob qilish toʻgʻrisidagi nizomni bir oy muddatda ishlab chiqsinlar va belgilangan tartibda tasdiqlasinlar.

7. “Oʻzkimyosanoat” davlat-aksiyadorlik kompaniyasining mineral oʻgʻitlar ishlab chiqaruvchi korxonalari tomonidan vositachilik shartnomalari boʻyicha va “Qishloqxoʻjalikkimyo” hududiy aksiyadorlik jamiyatlarining omborlarida javobgarlik ostida saqlash uchun mineral oʻgʻitlar joʻnatish taqiqlansin.

“Oʻzkimyosanoat” davlat-aksiyadorlik kompaniyasi kengashi mineral oʻgʻitlar ishlab chiqaruvchi korxonalarga maxsus jihozlangan omborxonalar ajratish va berish masalasini, ishlab chiqarilgan mahsulotni saqlash xavfsizligi rejimi qatʼiy ravishda taʼminlanishini nazarda tutgan holda, bir oy muddatda koʻrib chiqsin.

8. Belgilansinki, “Qishloqxoʻjalikkimyo” hududiy aksiyadorlik jamiyatlarining chakana savdo tarmogʻi orqali dehqon va fermer xoʻjaliklariga sotiladigan mineral oʻgʻitlar va kimyoviy preparatlarga qoʻshilgan qiymat soligʻi solinmaydi.

9. “Oʻzkimyosanoat” davlat-aksiyadorlik kompaniyasi kengashi bir oy muddatda:

“Qishloqxoʻjalikkimyo” hududiy aksiyadorlik birlashmalari, tumanlararo va tuman filiallarining faoliyatini mukammal oʻrganib chiqsin hamda ularni “Qishloqxoʻjalikkimyo” hududiy aksiyadorlik jamiyatlariga aylantirishga doir tashkiliy chora-tadbirlarni amalga oshirsin, shuningdek ularning rahbarlari attestatsiyadan oʻtkazilishini taʼminlasin;

“Oʻzkimyosanoat” davlat-aksiyadorlik kompaniyasi ijro etuvchi apparatining shtatdagi xodimlari sonini qayta koʻrib chiqsin, uni yuqori malakali kadrlar bilan butlasin, mazkur qarorni hisobga olgan holda Kompaniyaning yangi ustavini tasdiqlasin;

Oʻzbekiston Respublikasi Davlat mulki qoʻmitasi, Moliya vazirligi bilan birgalikda “Oʻzkimyosanoat” davlat-aksiyadorlik kompaniyasi hamda “Qishloqxoʻjalikkimyo” hududiy aksiyadorlik jamiyatlarining ustav fondlarini mazkur qarorga muvofiqlashtirsin.

10. Oʻzbekiston Respublikasi Prezidentining 2004-yil 16-yanvardagi F-1893-son farmoyishi bilan tashkil etilgan Maxsus ishchi guruh bir oy muddatda tugatish komissiyasini tuzsin hamda “Oʻzqishloqxoʻjalikkimyo” davlat-aksiyadorlik kompaniyasini tugatishga doir tadbirlarni belgilangan tartibda amalga oshirsin.

11. Quyidagilar:

kaliyli oʻgʻitlar yetkazib berish boʻyicha — “Oʻzkimyosanoat” davlat-aksiyadorlik kompaniyasi;

tegishli huquq va majburiyatlar, shu jumladan 7-ilovaga muvofiq ilgari tuzilgan import kontraktlari boʻyicha “Qishloqxoʻjalikkimyo” hududiy aksiyadorlik jamiyatlari tugatilayotgan “Oʻzqishloqxoʻjalikkimyo” davlat-aksiyadorlik kompaniyasining huquqiy vorislari etib belgilansin.

13. Oʻzbekiston Respublikasi Hukumatining 9-ilovaga muvofiq ayrim qarorlari oʻz kuchini yoʻqotgan deb hisoblansin.

14. Oʻzbekiston Respublikasi Adliya vazirligi, Moliya vazirligi, “Oʻzkimyosanoat” davlat-aksiyadorlik kompaniyasi manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida bir oy muddatda Oʻzbekiston Respublikasi Vazirlar Mahkamasiga takliflar kiritsinlar.

15. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

1. Vazirlar Mahkamasining “Qishloq xoʻjaligiga agrokimyo xizmati koʻrsatishni takomillashtirish chora-tadbirlari toʻgʻrisida” 2001-yil 1-fevraldagi 63-son qarorining 1—9, 12—17-bandlari (Oʻzbekiston Respublikasi QT, 2001-y., 2-son, 8-modda).

2. Vazirlar Mahkamasining “Kimyo sanoatini boshqarish tuzilmasini takomillashtirish chora-tadbirlari toʻgʻrisida” 2001-yil 13-martdagi 124-son qarorining 3, 4, 11 va 16-bandlari.

3. Vazirlar Mahkamasining “Oʻzkimyosanoat” davlat-aksiyadorlik kompaniyasining Kengashi aʼzolari tarkibi toʻgʻrisida” 2001-yil 15-martdagi 129-son qarori.

4. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qaroriga 3-ilovaning 373—385-bandlari.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2003-yil 25-sentabrdagi 412-son qarorining 3-bandi (Oʻzbekiston Respublikasi QT, 2003-y., 9-son, 89-modda).

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2003-yil 20-oktabrdagi 451-son qaroriga ilovaning 1-bandi (Oʻzbekiston Respublikasi QT, 2003-y., 10-son, 100-modda).

7. Vazirlar Mahkamasining “Davlat va xoʻjalik boshqaruvi respublika organlarining boshqaruv xodimlari sonini maqbullashtirish va qisqartirish toʻgʻrisida” 2004-yil 5-yanvardagi 1-son qaroriga 3-ilovaning 6 va 47-bandlari.