Moliya va sanoat kapitalini birlashtirish, iqtisodiy jihatdan samarali bo‘lgan xo‘jalik aloqalarini rivojlantirish va iqtisodiyotning turli sektorlarida ishlab chiqarishni integratsiyalash, shuningdek, korxonalarni boshqarishning zamonaviy shakllarini yaratish maqsadida Vazirlar Mahkamasi qaror qiladi:

1. Moliya-sanoat guruhlari to‘g‘risidagi Nizom tasdiqlansin.

2. O‘zbekiston Respublikasi Adliya vazirligi moliya-sanoat guruhlarini qonunchilikda belgilangan tartibda davlat ro‘yxatidan o‘tkazsin.

3. O‘zbekiston Respublikasi Moliya vazirligi ikki oy muddatda, monopoliyaga qarshi talablarni hisobga olgan holda, takliflar (loyihalar) ni ko‘rib chiqish va moliya-sanoat guruhlarini tashkil etish tartibi to‘g‘risidagi metodik tavsiyalarni ishlab chiqsin va tasdiqlasin.

4. Mazkur qarorning bajarilishini nazorat qilish bosh vazir o‘rinbosari B.S. Hamidov zimmasiga yuklansin.

1. Moliya-sanoat guruhi o‘z qatnashchilarining moddiy va moliya resurslarini qo‘shish yo‘li bilan kapitallarni birlashtirish asosida foyda (daromad) olish, ishlab chiqarishning raqobat qilish qobiliyatini va samaradorligini oshirish, maqbul texnologiya va kooperatsiya aloqalarini tashkil etish, eksport imkoniyatlarini ko‘paytirish, ilmiy-texnikaviy taraqqiyotini rivojlantirish hamda investitsiyalarni jalb qilish maqsadida faoliyat yurituvchi kredit-moliya muassasalari, investitsiya muassasalari, korxonalar, boshqa muassasalar va tashkilotlarning xo‘jalik uyushmasidir.

2. Moliya-sanoat guruhlarini tashkil etish, ularning faoliyati, qayta tashkil etilishi va tugatilishi “O‘zbekiston Respublikasidagi korxonalar to‘g‘risida”, “Xo‘jalik jamiyatlari va shirkatlari to‘g‘risida” gi O‘zbekiston Respublikasi qonunlari, mazkur Nizom va O‘zbekiston Respublikasining boshqa qonunchilik hujjatlari bilan tartibga solinadi.

3. Mulkchilik shakllaridan qat’i nazar, har qanday tashkiliy-huquqiy shakldagi korxonalar, shuningdek, kredit-moliya va boshqa muassasalar, investitsiya muassasalari, tashkilotlari, shu jumladan, xorijiy muassasalar, investitsiya muassasalari va tashkilotlari moliya-sanoat guruhi qatnashchilari bo‘lishlari mumkin.

Tijorat banklari moliya-sanoat guruhlari qatnashchilari bo‘lishlari mumkin. Bunda moliya-sanoat guruhi ustav fondidagi tijorat banklarining mol-mulki ulushi shu fondning 10 foizidan ortiq bo‘lishi mumkin emas. Moliya-sanoat guruhi qatnashchilari bo‘lgan banklar soni cheklanmaydi.

Davlat hokimiyati va boshqaruv organlari moliya-sanoat guruhi qatnashchilari bo‘lishlari mumkin emas.

4. Moliya-sanoat guruhi qatnashchilari yuridik shaxs maqomini saqlab qoladilar.

5. Moliya-sanoat guruhlari:

uning qatnashchilari tomonidan ixtiyoriylik tartibida yoki guruhning bir qatnashchisi tomonidan o‘zi sotib oladigan boshqa qatnashchilar aksiyalari paketlarini birlashtirish yo‘li bilan;

Vazirlar Mahkamasining qaroriga ko‘ra;

hukumatlararo bitimlar asosida tashkil etiladi.

6. Moliya-sanoat guruhlarini ixtiyoriylik tartibida yoki aksiyalar paketlarini birlashtirish asosida tashkil etish quyidagi yo‘sinda amalga oshiriladi:

guruh qatnashchilari tomonidan O‘zbekiston Respublikasi qonunchiligida nazarda tutilgan tartibda ochiq yoki yopiq turdagi aksionerlik jamiyatini, shuningdek, xoldingni ta’sis etish;

guruh qatnashchilari tomonidan guruh tarkibiga kiruvchi korxonalar va moliya-kredit muassasalarining o‘zlariga tegishli bo‘lgan aksiyalar paketlarini guruh qatnashchilaridan biriga vakolatli boshqarishga berish;

guruh qatnashchilaridan biri tomonidan boshqa korxonalar, shuningdek, guruh qatnashchisi bo‘layotgan muassasa va tashkilotlar aksiyalari paketlarini sotib olish.

Davlatga tegishli bo‘lgan aksiyalar paketlari, davlatga tegishli bo‘lgan aksiyalar paketlarini vakolatli boshqarishga berilishi yoki ularning sotib olinishi mazkur bandga muvofiq moliya-sanoat guruhlarini tashkil etishga olib kelganda ularning miqdori Vazirlar Mahkamasi tomonidan monopoliyaga qarshi qonunchilik talablarini hisobga olgan holda belgilanadi.

7. Guruh qatnashchilarining tarkibi faqat davlat korxonalari, shuningdek, budjetdan mablag‘ bilan ta’minlanadigan muassasalar va tashkilotlardan shakllantirilayotgan hollarda moliya-sanoat guruhlari Vazirlar Mahkamasining qaroriga ko‘ra tashkil etiladi.

8. Hukumatlararo bitimlar asosida tashkil etilayotgan moliya-sanoat guruhlarining O‘zbekiston Respublikasi tomonidan bo‘lgan qatnashchilari Vazirlar Mahkamasi tomonidan belgilanadi.

9. Moliya-sanoat guruhlarini tashkil etishda:

ustav kapitalida davlat mulki ulushi, shuningdek, jamoatchilik birlashmalari, xayriya yoki boshqa jamoatchilik fondlari va ular korxonalarining mulki 25 foizdan ortiq bo‘lgan korxonaga aksiyalarning sotib olinishiga;

moliya-sanoat guruhi qatnashchilari tomonidan davlat mulki ulushi 25 foizdan ortiq bo‘lgan kapitalning ixtiyoriy tartibda birlashtirilishiga;

kapital tarkibidagi moddiy aktivlari 50 foizdan kam bo‘lgan xo‘jalik uyushmalari, shuningdek, xoldinglarning moliya-sanoat guruhida qatnashishlariga;

moliya-sanoat guruhi qatnashchilari tomonidan aksiyalarga ikki yoqlama egalik qilishga;

guruhga kiruvchi kredit-moliya muassasasiga yoki investitsiya muassasasiga moliya-sanoat guruhining har qanday qatnashchisi bo‘lgan korxonaning 10 foizdan ortiq aksiyalariga egalik qilishiga, shuningdek, shu guruhga kiruvchi korxonalar aksiyalariga ko‘rsatib o‘tilgan muassasalar aktivlarining 10 foizidan ortig‘i qo‘shilishiga yo‘l qo‘yilmaydi.

10. Moliya-sanoat guruhlarini tashkil etishda monopoliyaga qarshi kurash organi bilan oldindan kelishmasdan:

moliya-sanoat guruhi qatnashchilari tarkibiga monopol korxonalar ro‘yxatiga kiritilgan korxonalarning kirishlariga;

moliya-sanoat guruhi tomonidan boshqa moliya-sanoat guruhi qatnashchilari bo‘lgan korxonalar aksiyalarining sotib olinishiga yo‘l qo‘yilmaydi.

11. Davlat bilan tuzilgan shartnomaga ko‘ra ishlab chiqarilayotgan yoki markazlashtirilgan tartibda eksport qilinayotgan mahsulot ulushi korxona tomonidan oldingi yilda ishlab chiqarilgan barcha mahsulotning 30 foizidan ortiq bo‘lganda korxona moliya-sanoat guruhi qatnashchisi bo‘lishi uchun “O‘zistiqbolstat” davlat qo‘mitasining roziligi talab etiladi.

12. Davlat mulki ulushi 25 foizdan ortiq bo‘lgan davlat korxonalari, shirkat (jamoa) korxonalari, shuningdek, davlat budjetidan mablag‘ bilan ta’minlanadigan tashkilot va muassasalar moliya-sanoat guruhlari qatnashchilari uchun davlat mulkini tasarruf etish vakolati berilgan organ roziligi talab qilinadi.

13. Moliya-sanoat guruhi qatnashchilari yoki ularning vakili ularni moliya-sanoat guruhi sifatida ro‘yxatga olish uchun Adliya vazirligiga buyurtmanoma beradilar.

Buyurtmanomalar Adliya vazirligi tomonidan bir oydan ortiq bo‘lmagan muddatda ko‘rib chiqiladi.

Moliya-sanoat guruhining maqomi O‘zbekiston Respublikasi Moliya-sanoat guruhlari reyestriga tegishli yozuv yozish bilan Adliya vazirligi tomonidan tasdiqlanadi.

Korxona, muassasa, tashkilot nomida “moliya-sanoat guruhi” so‘z birikmasidan foydalanishga shu guruh maqomi O‘zbekiston Respublikasi Moliya-sanoat guruhlari reyestrida tegishli yozuv bilan tasdiqlangan hollardagina yo‘l qo‘yiladi.