2017-yil hosilini qisqa muddatlarda o‘z vaqtida va sifatli yig‘ib-terib olish hamda fermer xo‘jaliklari tomonidan davlat resurslariga g‘alla sotish bo‘yicha tuzilgan shartnomalarning so‘zsiz bajarilishini ta’minlash maqsadida:

1. Qayd etilsinki, 2016-yilda Jizzax, Namangan, Sirdaryo va Farg‘ona viloyatlarining 16 ta tumanida yakka tartibdagi fermer xo‘jaliklari tomonidan davlat resurslariga g‘alla sotish bo‘yicha kontraktatsiya shartnomalarini bajarishda jiddiy qoidabuzarliklarga yo‘l qo‘yilgan. Yuqorida qayd etilgan kamchiliklar uchun 15 nafar mansabdor shaxsga nisbatan ma’muriy jazo qo‘llanilgan, 700 dan ortiq fermer xo‘jaligi shartnoma majburiyatlarini bajarmaganligi uchun sud tartibida javobgarlikka tortilganligi ma’lumot uchun qabul qilinsin.

2017-yil hosilini o‘z vaqtida va sifatli yig‘ib-terib olish ishlarini tashkil etish va o‘tkazish, g‘alla o‘rim-yig‘im mashinalaridan samarali foydalanish, shuningdek, tuzilgan kontraktatsiya shartnomalarini so‘zsiz bajarish uchun Qoraqalpog‘iston Respublikasi Vazirlar Kengashi, viloyatlar hokimlari, O‘zbekiston Respublikasi qishloq va suv xo‘jaligi vazirligi “O‘zdonmahsulot” aksiyadorlik kompaniyasi va don mahsulotlari korxonalari, “O‘zagroservis” aksiyadorlik jamiyati va uning hududiy filiallari rahbarlari zimmasiga yuklatilsin.

2. Quyidagilar Qoraqalpog‘iston Respublikasi Vazirlar Kengashi, viloyatlar hokimlari, O‘zbekiston Respublikasi Qishloq va suv xo‘jaligi vazirligi, O‘zbekiston fermer xo‘jaliklari kengashi, “O‘zagroservis” aksiyadorlik jamiyati va uning hududiy bo‘linmalari, O‘zbekiston avtomobil va daryo transporti agentligi, “O‘zdonmahsulot” aksiyadorlik jamiyati va don mahsulotlari korxonalarining eng muhim vazifalari deb hisoblansin:

fermer xo‘jaliklari tomonidan davlat resurslariga g‘alla sotish bo‘yicha tuzilgan kontraktatsiya shartnomalarning so‘zsiz bajarilishini ta’minlash;

g‘alla o‘rim-yig‘im mashinalarini, g‘alla tashishda foydalaniladigan barcha turdagi avtotransport vositalarini, shuningdek, g‘alla xirmonlari va platformalarini, g‘alla tozalash mashinalarini va donni birlamchi qayta ishlash uchun boshqa moddiy-texnik bazalarni tayyorlashni joriy yilning 22-mayiga qadar yakunlash bo‘yicha tashkiliy-iqtisodiy chora-tadbirlar kompleksini amalga oshirish;

tayyorlov korxonalari va fermer xo‘jaliklaridan donni faqat majburiy dastlabki tozalashdan so‘ng, ifloslanishi va namligi normativ-huquqiy hujjatlarda va standartlashtirish bo‘yicha normativ hujjatlarda belgilangan talablardan oshmaydigan og‘ishlar bilan qabul qilishni tashkil etish;

O‘zbekiston Respublikasi Vazirlar Mahkamasi huzuridagi davlat ehtiyojlari uchun xarid qilinadigan qishloq xo‘jaligi mahsulotlari uchun hisob-kitoblar jamg‘armasi bilan birgalikda davlat ehtiyojlari uchun xarid qilinadigan don uchun fermer xo‘jaliklari, qishloq xo‘jaligi ishlab chiqaruvchilaridan don mahsulotlari korxonalariga don tashish bo‘yicha ko‘rsatilgan xizmatlar uchun transport tashkilotlari, mashina-traktor parklari va operatorlari, g‘alla terish kombaynlari ko‘rsatilgan mexanizatsiyalashgan xizmatlar uchun mehnatiga haq to‘lash bo‘yicha o‘z vaqtida hisob-kitoblar o‘tkazish.

Belgilansinki, donni don qabul qilish korxonalariga yetkazib berish uchun transport xarajatlari transport tashkilotlari, qishloq xo‘jaligi ishlab chiqaruvchilari va don mahsulotlari ishlab chiqaruvchi korxonalar o‘rtasida tuzilgan shartnomalarga muvofiq “O‘zdonmahsulot” aksiyadorlik jamiyati tomonidan to‘lanadi.

3. Shunday tartib o‘rnatilsinki, unga ko‘ra g‘alla yetishtiruvchi fermer xo‘jaliklari birinchi navbatda davlat ehtiyojlari uchun g‘alla sotish kontraktatsiya shartnomalari bo‘yicha o‘z majburiyatlarini bajarishlari shart.

Fermer xo‘jaliklari tuzilgan kontraktatsiya shartnomalari bo‘yicha o‘z majburiyatlarini bajarmagan taqdirda, ularga qonunchilik hujjatlarida nazarda tutilgan javobgarlik choralari, shu jumladan fermer xo‘jaliklarining yer uchastkalarini qayta tashkil etish va ularning o‘lchamlarini optimallashtirish choralari qo‘llaniladi.

O‘zbekiston Respublikasi Bosh prokuraturasi va uning hududiy bo‘linmalari fermer xo‘jaliklari tomonidan davlat ehtiyojlari uchun g‘alla yetishtirish va sotish kontraktatsiya shartnomalari bo‘yicha o‘z majburiyatlarini so‘zsiz bajarishi ustidan qat’iy nazorat o‘rnatsin.

4. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari, “O‘zdonmahsulot” aksiyadorlik kompaniyasi va uning joylardagi bo‘linmalari rahbarlari, “O‘zstandart” agentligi va “O‘zdavlatnoninspeksiya” 2018-yil hosili uchun boshoqli don ekinlari urug‘ fondini o‘z vaqtida va sifatli tashkil etishni ta’minlasin.

Davlat resurslariga bug‘doy donini sotishning umumiy hajmida urug‘lik don topshirish, shuningdek, bug‘doy donidan urug‘lik maqsadlarida foydalanish taqiqlansin.

5. “O‘zdonmahsulot” AK O‘zdavlatnoninspeksiya va O‘zdavzaxiraqo‘mitasi bilan birgalikda “O‘zdonmahsulot” AK tizimidagi elevatorlar va don qabul qiluvchi korxonalarda “nol” tozalash ishlarini amalga oshirilishini ta’minlasin va joriy yilning 15-iyuniga qadar oziq-ovqat bug‘doyini inventarizatsiyadan o‘tkazish natijalarini Vazirlar Mahkamasiga taqdim etsin.

6. O‘zbekiston Respublikasi Davlat statistika qo‘mitasi Qishloq va suv xo‘jaligi vazirligi, Iqtisodiyot vazirligi, “O‘zdonmahsulot” AJ bilan birgalikda g‘alla yetishtirish va davlat resurslariga sotish hajmlari bo‘yicha statistik hisobotlarning to‘g‘riligi ustidan qat’iy nazorat o‘rnatsin. Hisobot ma’lumotlarini buzib ko‘rsatish faktlari aniqlansa, aybdor shaxslarga nisbatan qonunchilik hujjatlariga muvofiq javobgarlik choralarini ko‘rsin.

7. O‘zbekiston Respublikasi Prezidentining 1997-yil 10-oktabrdagi “Tovarlar (ishlar, xizmatlar) eksportini rag‘batlantirishga doir qo‘shimcha chora-tadbirlar to‘g‘risida”gi PF-1871-son Farmoniga muvofiq, boshoqli don, un va non mahsulotlarini respublikadan olib chiqish taqiqlanganligi rahbarlik uchun qabul qilinsin.

Davlat bojxona qo‘mitasi O‘zbekiston Respublikasi Milliy xavfsizlik xizmati Davlat chegarasini himoya qilish qo‘mitasi va Ichki ishlar vazirligi bilan birgalikda don, un va non mahsulotlarini respublika chegarasi orqali noqonuniy olib o‘tish holatlarining oldini olish va ularga chek qo‘yish bo‘yicha qat’iy choralar ko‘rsin.

8. O‘zbekiston Respublikasi Ichki ishlar vazirligi joriy yilning 1-iyunidan boshlab O‘zbekiston Respublikasi Ichki ishlar vazirligi ta’lim muassasalarining 2017-yil hosilining boshoqli don ekinlarini yig‘ib-terib olishga jalb etilgan tinglovchilari va kursantlari kontingentini o‘z hududiy bo‘linmalari bo‘yicha taqsimotga muvofiq hududiy ichki ishlar boshqarmasiga yuborsin.

“O‘zbekiston temir yo‘llari” AJ va “Toshshahartransxizmat” AJ O‘zbekiston Respublikasi Ichki ishlar vazirligining talabiga binoan tinglovchilar va kursantlarni vaqtinchalik joylashtirish joylariga va yig‘im ishlari tugallangandan so‘ng orqaga qaytarish uchun zarur miqdorda avtotransport vositalari ajratilishini ta’minlasin.

Jizzax, Qashqadaryo, Sirdaryo va Toshkent viloyatlari hokimliklari:

fermer xo‘jaliklari tomonidan “O‘zbekiston temir yo‘llari” AJ va “Toshshahartransxizmat” AJ bilan O‘zbekiston Respublikasi Ichki ishlar vazirligining tinglovchilari va kursantlarini o‘rim-yig‘im-terim ishlari yakunlanganidan so‘ng ularni vaqtincha joylashtirish joylariga va qaytarib olib ketish xizmatlarini ko‘rsatish bo‘yicha tegishli shartnomalar tuzish;

tinglovchilar va kursantlarni vaqtincha turar joy, shuningdek, oziq-ovqat, transport va ularni tashish uchun yonilg‘i-moylash materiallarini fermer xo‘jaliklari hisobidan ta’minlasin.

9. Qoraqalpog‘iston Respublikasi Vazirlar Kengashi va viloyatlar hokimliklari O‘zbekiston Respublikasi Ichki ishlar vazirligi bilan birgalikda don va g‘alla o‘rim-yig‘im texnikasini tashishda yo‘l harakati xavfsizligini ta’minlash, yong‘inlar sodir bo‘lishining oldini olish, 2017-yil hosilida g‘allaning o‘g‘irlanishi va yo‘qolishining oldini olish bo‘yicha zarur chora-tadbirlarni ko‘rsin.

10. “O‘zbekneftgaz” milliy xolding kompaniyasi va “O‘zneftmahsulot” aksiyadorlik jamiyati qishloq xo‘jaligi ishlab chiqaruvchilari va transport tashkilotlarini, mashina-traktor parklarini hamda g‘alla yig‘im-terimi, tashish va tayyorlash bilan shug‘ullanuvchi boshqa tashkilotlarni zarur zaxiralarni yaratib, belgilangan tartibda yoqilg‘i-moylash materiallari bilan uzluksiz ta’minlashni tashkil etsin.

11. Mazkur qarorning bajarilishini nazorat qilish O‘zbekiston Respublikasining Bosh vaziri A.N. Aripov zimmasiga yuklatilsin.