“Oʻzbekiston Respublikasining davlat mustaqilligi asoslari toʻgʻrisida”gi Qonunga muvofiq hamda radiochastotalarni rejalashtirish, ulardan foydalanish va ularni belgilash masalalari boʻyicha Xalqaro elektr aloqasi uyushmasida respublika manfaatlarini ifodalash, huquqiy himoya qilish maqsadida Vazirlar Mahkamasi qaror qiladi:

1. Oʻzbekiston Respublikasi Aloqa vazirligi huzuridagi Oʻzbekiston Respublikasi radiochastotalar boʻyicha Davlat komissiyasi tuzilsin.

2. Oʻzbekiston Respublikasi radiochastotalar boʻyicha Davlat komissiyasining ilova qilinayotgan Nizomi tasdiqlansin.

3. Oʻzbekiston Respublikasi Aloqa vaziri Oʻzbekiston Respublikasi radiochastotalar boʻyicha Davlat komissiyasining raisi etib tayinlansin.

Ichki ishlar, mudofaa, qishloq xoʻjaligi, aloqa, energetika va elektrlashtirish vazirlarining oʻrinbosarlari; Milliy xavfsizlik xizmati, “Vatanparvar” mudofaaga koʻmaklashish tashkilotlari Markaziy Kengashi, Davlat geologiya va mineral resurslar qoʻmitasi, “Oʻzbekneftgaz” konserni raislarining oʻrinbosarlari; “Oʻzbekiston havo yoʻllari” milliy aviakompaniyasi bosh direktorining oʻrinbosari; Oʻrta Osiyo Temir yoʻl boshqarmasi, Hukumat aloqa xizmati boshliqlarining oʻrinbosarlari lavozimlariga koʻra va qayd etilgan boshqaruv organlari rahbarlarining tavsiyasiga binoan Oʻzbekiston Respublikasi radiochastotalar boʻyicha Davlat komissiyasining aʼzolari etib belgilansin.

4. Oʻzbekiston Respublikasi radiochastotalar boʻyicha Davlat komissiyasiga shoshilinch joriy ishlarni bajarish uchun komissiyasining 5 kishidan, shu jumladan, komissiya raisining bir nafar oʻrinbosarlaridan iborat ishchi organini tuzishga ruxsat etilsin. Ishchi organ manfaatdor vazirliklar va idoralar tomonidan ajratiladigan mablagʻlar hisobiga saqlansin.

1. Oʻzbekiston Respublikasi radiochastotalar boʻyicha Davlat komissiyasi radiochastotalarni taqsimlash va belgilash milliy jadvalini hamda milliy reglamentni rejalashtirish, shakllantirishning uzoq muddatli siyosatini, Xalqaro elektr aloqasi uyushmasida vakillikni, radiochastotalarni rejalashtirish va ulardan foydalanish masalalarida respublika huquqlarini xalqaro himoya qilishni, radioelektron vositalarning elektromagnit mosligini taʼminlovchi radiochastotalarni boshqarish milliy organi hisoblanadi.

2. Oʻzbekiston Respublikasi radiochastotalar boʻyicha Davlat komissiyasi oʻz faoliyatida Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga, Xalqaro elektr aloqasi uyushmasining meʼyoriy hujjatlariga, mazkur Nizomga amal qiladi hamda Oʻzbekiston Respublikasi Prezidenti huzuridagi Vazirlar Mahkamasiga hisob beradi.

3. Oʻzbekiston Respublikasi radiochastotalar boʻyicha Davlat komissiyasi respublikada radiochastotalarni taqsimlash boʻyicha vakolatli davlat organi boʻlib, uning qarorlari barcha vazirliklar, idoralar, konsernlar, uyushmalar va boshqalar uchun majburiydir.

4. Oʻzbekiston Respublikasi radiochastotalar boʻyicha Davlat komissiyasi Oʻzbekiston Respublikasi Davlat gerbi tasvirlangan va nomi oʻzbek hamda rus tillarida yozilgan oʻz muhriga ega boʻladi.

5. Chastotalarni belgilashni muvofiqlashtirish va roʻyxatga olish yuzasidan shoshilinch joriy ishlarni olib borish va Oʻzbekiston Respublikasi Aloqa vazirligi huzuridagi komissiyaning ishlashi uchun materiallarni ishlab chiqish va tayyorlash maqsadida Oʻzbekiston Respublikasi radiochastotalar boʻyicha Davlat komissiyasining ishchi organi tuziladi.

6. Oʻzbekiston Respublikasi radiochastotalar boʻyicha Davlat komissiyasi ishchi organning tuzilmasini, shtatlar jadvalini va ishchi organni saqlash xarajatlari smetasini tasdiqlaydi.

7. Oʻzbekiston Respublikasi radiochastotalar boʻyicha Davlat komissiyasi tarkibi Vazirlar Mahkamasi tomonidan belgilanadi. Komissiya aʼzolari oʻz burchlarini jamoatchilik asosida bajaradilar. Xodimlari komissiya tarkibiga kiritilgan vazirliklar, idoralar va boshqa davlat boshqaruv organlari rahbarlari ularning komissiya tarkibida ishlashlari uchun sharoit yaratib beradilar.

Oʻzbekiston Respublikasi radiochastotalar boʻyicha Davlat komissiyasining asosiy vazifalari quyidagilar hisoblanadi:

radiochastotalar spektrini boshqarish va istiqbolli rejalashtirish sohasida uzoq muddatli siyosatni amalga oshirish;

radiochastotalarni taqsimlash milliy jadvalini va milliy reglamentni tashkil etish;

radiochastotalarni rejalashtirish, ulardan foydalanish va ularni belgilash masalalarida Xalqaro elektr aloqasi uyushmasida vakillik qilish va Oʻzbekiston Respublikasining manfaatlarini xalqaro huquqiy himoya qilish;

radioelektron vositalarning barcha turlarini tayyorlash, ishlab chiqarish va chet eldan sotib olish uchun chastotalar polosasini ajratish;

aholiga moʻljallangan radioelektron vositalarda qoʻllaniladigan radiochastotalardan foydalanishning texnikaviy siyosatini ishlab chiqish va uni yuritish hamda elektromagnit mosligini taʼminlash;

radioelektron vositalarning barcha turlariga tayinlangan chastotalarning hisobini olib borishni tashkil etish.

Belgilangan vazifalarni bajarish maqsadida Oʻzbekiston Respublikasi radiochastotalar boʻyicha Davlat komissiyasi:

xorijiy davlatlar aloqa maʼmuriyatlari bilan birgalikda belgilangan tartibda chastotalarni tayinlashni muvofiqlashtirishni va Xalqaro elektr aloqasi uyushmasida Oʻzbekiston Respublikasining radioelektron vositalariga tayinlangan chastotalarni Roʻyxatga olishni amalga oshiradi;

Oʻzbekiston Respublikasi Aloqa vazirligi bilan qoʻshni davlatlar aloqa maʼmuriyatlari oʻrtasida ayrim radioxizmatlar tomonidan chastotalardan foydalanishni muvofiqlashtirish boʻyicha bitimlarni ishlab chiqishda va texnikaviy tayyorlashda qatnashadi;

xorijiy davlatlar, aloqa maʼmuriyatlari bilan olib boriladigan muzokaralarda qatnashadi, kelishilgan bitimlar boʻyicha respublika aloqa maʼmuriyati majburiyatlarining bajarilishini taʼminlashni tashkil etadi;

manfaatdor tashkilotlar bilan birgalikda respublika radioelektron vositalarining chastota tayinlovlarini xalqaro huquqiy himoya qilish yillik rejalari loyihalarini ishlab chiqadi, ularning bajarilishini tashkil etadi va nazorat qiladi;

radiochastotalardan foydalanishni muvofiqlashtirish, nurlanishni nazorat qilish va oʻz huquq doirasiga kiruvchi boshqa masalalar yuzasidan delegatsiyalarning texnikaviy topshiriqlari, koʻrsatmalari va ishchi materiallarini, shuningdek, delegatsiyalarning tarkibi boʻyicha takliflarni belgilangan tartibda tayyorlaydi, delegatsiyalar ishida qatnashadi, delegatsiyalarning hisobotlarini tahlil qiladi va erishilgan bitimlarni amalga oshirishni tashkil etadi;

Xalqaro elektr aloqasi uyushmasining polosalarni taqsimlash va radiochastotalarni rejalashtirish va radio aloqasi reglamentini qayta qurish boʻyicha jahon va mintaqa maʼmuriy konferensiyalariga tayyorgarlik komissiyasining ishida ishtirok etadi;

diplomatik vakolatxonalarning va xorijiy davlatlar boshqa organlarining, shuningdek, respublika hududida joylashgan xalqaro tashkilotlarning radioelektron vositalari chastota tayinlovlarini muvofiqlashtirish va Xalqaro elektr aloqasi uyushmasida roʻyxatga olish ishlarini belgilangan tartibda olib boradi;

xalqaro-huquqiy xarakterga ega boʻlgan va xalqaro elektr aloqasi konvensiyani va boshqa xalqaro hujjatlar boʻyicha respublika majburiyatlariga daxldor boʻlgan masalalarni Oʻzbekiston Respublikasi Tashqi ishlar vazirligi bilan kelishib oladi;

radioelektron vositalarning elektromagnit mosligini taʼminlovchi chastota va hududiy ayirish normalarini tasdiqlaydi va ishga tushiradi;

radioelektron vositalarning elektromagnit mosligini belgilovchi radiochastotalardan, tanib olish signallaridan foydalanish talablari boʻyicha standartlarning loyihalarini va texnik shartlarini, radioelektron vositalarni yetkazib berish tartibini kelishib oladi;

vazirliklar, idoralar bilan birgalikda radioelektron vositalarning elektromagnit mosligini taʼminlovchi tashkiliy-texnikaviy tadbirlarni ishlab chiqadi va ularning bajarilishini nazorat qilishni tashkil etadi;

ilmiy-tadqiqot va loyiha-konstruktorlik ishlari, davlat andozalarini ishlab chiqish, ilmiy-texnika axborotini tashkil etish, ixtirochilik va ratsionalizatorlikni rivojlantirish yuzasidan takliflar tayyorlaydi va xulosalar beradi;

chastotalarni taqsimlash milliy jadvalini va respublika radio aloqasi reglamentini ishlab chiqadi va nashr etadi;

belgilangan tartibda xorijiy mamlakatlar bilan ilmiy-texnikaviy aloqalar yuzasidan takliflar tayyorlaydi va taqdim etadi;

vazirliklar, idoralar, korxonalar, tashkilotlar va fuqarolarning radiochastotalar polosalari ajratish haqidagi buyurtmalarini texnikaviy ekspertizadan oʻtkazadi va ulardan foydalanish yuzasidan texnikaviy takliflarni ishlab chiqadi;

yuqori chastotali moslamalar, elektr moslamalar, mashinalar, apparatlar, priborlarning elektromagnit mosligini belgilovchi texnikaviy tavsiflarining andazalari, texnikaviy shartlarini, shuningdek industrial shovqinlarning andazalari va umumdavlat normalari loyihalarini koʻrib chiqadi va kelishib oladi.

Oʻzbekiston Respublikasi radiochastotalar boʻyicha Davlat komissiyasi quyidagi huquqlarga egadir:

barcha turdagi radioelektron vositalarning chastota tayinlovlarini Xalqaro elektr aloqasi uyushmasida roʻyxatga olish ishlarini olib borish;

radiochastotalar boʻyicha Xalqaro komissiyaning faoliyatida qatnashish va chastotalar spektridan foydalanish masalalari boʻyicha respublika manfaatlarini himoya qilish;

radioelektron vositalarning chastota tayinlovini xalqaro miqyosda muvofiqlashtirish ishlarini olib borish va shu maqsadda xorijiy davlatlarning aloqa maʼmuriyatlari bilan olib boriladigan muzokaralar uchun materiallar tayyorlash;

radiochastotalar boʻyicha Xalqaro komissiyaning va xorijiy davlatlar maʼmuriyatlarining radioelektron vositalari chastota tayinlovlarini muvofiqlashtirish va roʻyxatga olish bilan bogʻliq boʻlgan texnik materiallarni tahlil qilish va ular yuzasidan tegishli xulosalar tayyorlash;

radioelektron vositalarning barcha turlarini respublikada tayyorlash va ishlab chiqish hamda chet eldan sotib olish uchun chastotalar polosasini belgilash;

radioelektron vositalarga davlat andazalari, texnikaviy shartlar, normalar va ulardan foydalanish qoidalarini va boshqa meʼyoriy-texnikaviy hujjatlarni ishlab chiqishda qatnashish.