Jahon standartlariga mos quyuv mahsulotlari ishlab chiqarish quvvatlarini yanada kengaytirish, neftgazkimyo uskunalari eksporti hajmlarini oshirish hamda respublikaning neft va gazni qayta ishlash sanoati infratuzilmasini rivojlantirishning maqsadli dasturlarini amalga oshirishni jadallashtirish maqsadida:

1. Ma’lumot uchun qabul qilinsinki:

“O‘zbekneftgaz” AJ tomonidan ““O‘zbekximmash zavodi” AJ negizida yangi quyuv sexi qurish bilan quyuv ishlab chiqarishini modernizatsiyalash” investitsiya loyihasi (keyingi o‘rinlarda — loyiha)ni amalga oshirish hisobiga neftgazkimyo uskunalari uchun yiliga 4 000 tonna quyma chiqarish quvvatiga ega bo‘lgan quyuv mahsulotlarini o‘zlashtirish masalasi puxta ishlab chiqildi;

“O‘zbekximmash zavodi” AJning o‘z mablag‘lari va “O‘zsanoatqurilishbank” ATB kreditlari loyihani moliyalashtirish manbalari bo‘lib, ularning summasi “tayyor holda topshirish” sharti bilan yangi quyuv sexi qurilishiga pudratchini tayinlash hamda investitsiya loyihasining texnik-iqtisodiy asoslanishini ishlab chiqish bo‘yicha tanlov asosida belgilanadi.

2. Quyidagilar:

“O‘zsanoatqurilishbank” ATBning krediti bo‘yicha “O‘zbekximmash zavodi” AJ qarz oluvchi, “O‘zbekneftgaz” AJ esa birgalikda qarz oluvchi hisoblanadi;

loyihani amalga oshirish doirasida jalb etiladigan kreditni so‘ndirish va unga xizmat ko‘rsatish bilan bog‘liq sarf-xarajatlar “O‘zbekximmash zavodi” AJ va “O‘zbekneftgaz” AJning shaxsiy mablag‘lari hisobidan amalga oshiriladi.

3. Loyihani amalga oshirish doirasida “O‘zbekximmash zavodi” AJga, istisno tariqasida:

“tayyor holda topshirish” shartlarida yangi quyuv sexi qurilishi pudratchisi hamda O‘zbekiston Respublikasining “Davlat xaridlari to‘g‘risida”gi Qonuniga muvofiq tanlov asosida loyihaning texnik-iqtisodiy asoslanishini ishlab chiquvchisi bilan shartnomalar tuzishga;

2019-yilning 1-iyuliga qadar muddatda ish hujjatlarini ishlab chiqish bilan bir vaqtda qurilish-montaj ishlarini amalga oshirishga;

“O‘zbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan o‘tkazish markazi” DUKda ekspertizani o‘tkazmasdan loyihaning texnik-iqtisodiy asoslanishini ishlab chiqishga va tasdiqlash uchun O‘zbekiston Respublikasi Vazirlar Mahkamasiga taqdim etishga ruxsat berilsin.

4. “O‘zbekneftgaz” AJ 2018-yilning 30-noyabriga qadar muddatda yangi quyuv sexining 2019-yil 1-dekabrgacha qurib bitkazilishini va foydalanishga topshirilishini nazarda tutgan holda loyihaning texnik-iqtisodiy asoslanishi ishlab chiqilishini va tasdiqlash uchun O‘zbekiston Respublikasi Vazirlar Mahkamasiga kiritilishini ta’minlasin.

5. “O‘zbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan o‘tkazish markazi” DUK “tayyor holda topshirish” sharti bilan yangi quyuv sexi qurilishiga pudratchini belgilash bo‘yicha tanlov o‘tkazishning texnik topshirig‘ini ekspertizadan o‘tkazishni, shuningdek, tuzilgan shartnoma ekspertizadan o‘tkazilishi va qayd etilishini belgilangan tartibda ta’minlasin.

6. O‘zbekiston Respublikasi Qurilish vazirligi loyiha-smeta hujjatlari kelishish uchun taqdim etilgan sanadan boshlab ikki hafta muddatda uning davlat ekspertizasini, shuningdek, loyihani amalga oshirish doirasida qurilish-montaj ishlarining sifatli bajarilishi ustidan tegishli davlat arxitektura-qurilish nazoratini ta’minlasin.

7. Loyihani amalga oshirish doirasida:

a) “O‘zbekximmash zavodi” AJ:

O‘zbekiston Respublikasida ishlab chiqarilmaydigan, belgilangan tartibda shakllantiriladigan ro‘yxatlar bo‘yicha chetdan olib kelinadigan qurilish materiallari, uskunalar, texnologik jihozlar va ularning ehtiyot qismlari, shuningdek, butlovchi buyumlar 2019-yilning 1-dekabriga qadar muddatda bojxona to‘lovlari (bojxona rasmiylashtiruvi uchun yig‘imlardan tashqari) to‘lashdan;

O‘zbekiston Respublikasining norezidentlari tomonidan bajariladigan ishlar (xizmatlar) bo‘yicha qo‘shilgan qiymat solig‘i to‘lashdan;

b) yuridik shaxslar — O‘zbekiston Respublikasining norezidentlari — O‘zbekiston Respublikasida doimiy muassasa orqali ham, to‘lov manbaidan ham olingan daromadlar bo‘yicha foyda solig‘i to‘lashdan;

v) xorijiy jismoniy shaxslar — O‘zbekiston Respublikasining norezidentlari — loyihani amalga oshirish doirasida olingan jismoniy shaxslarning daromad solig‘i to‘lashdan ozod qilinsin.

8. O‘zbekiston Respublikasi Iqtisodiyot vazirligi qora metallar chiqindilari, temir-tersaklarni tayyorlash va foydalanish balansini ishlab chiqishda “O‘zneftgazmash” AJ korxonalarining ishlab chiqarish va xo‘jalik faoliyati jarayonida hosil bo‘ladigan qora metall chiqindilari va temir-tersaklardan “O‘zbekximmash zavodi” AJning o‘z ehtiyojlari uchun to‘la hajmda foydalanishini nazarda tutsin.

9. O‘zbekiston Respublikasi Tashqi ishlar vazirligi “O‘zbekneftgaz” AJning buyurtmanomalariga binoan, loyihani amalga oshirishda ishtirok etayotgan xorijiy mutaxassislarga kirish vizalari konsullik va boshqa yig‘imlar undirilmagan holda rasmiylashtirilishini belgilangan tartibda ta’minlasin.

10. O‘zbekiston Respublikasi Ichki ishlar vazirligi “O‘zbekneftgaz” AJning buyurtmanomalariga binoan, loyihani amalga oshirishda qatnashayotgan xorijiy mutaxassislarga ko‘p martalik vizalar berilishi va muddati uzaytirilishini, shuningdek, ularning vaqtinchalik yashash joyida vaqtincha ro‘yxatga olinishi va uning muddati uzaytirilishini belgilangan tartibda davlat boji undirmasdan ta’minlasin.

11. O‘zbekiston Respublikasi Bandlik va mehnat munosabatlari vazirligi “O‘zbekneftgaz” AJning buyurtmanomalariga binoan, loyihani amalga oshirishda qatnashuvchi yuqori malakali xorijiy mutaxassislarni O‘zbekiston Respublikasiga jalb etishga ruxsatnomalar berilishi (muddati uzaytirilishi)ni, shuningdek, mazkur xorijiy fuqarolarga O‘zbekiston Respublikasi hududida mehnat faoliyati bilan shug‘ullanish huquqiga tasdiqnomalar berilishini (muddati uzaytirilishini) belgilangan tartibda ta’minlasin.

12. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A.S. Sultonov va “O‘zbekneftgaz” AJ boshqaruvi raisi vazifasini bajaruvchisi B.B. Ashrafxonov zimmasiga yuklansin.