Yaqin istiqbolga moʻljallangan ustuvor vazifalardan kelib chiqib, Oʻzbekiston Respublikasi Hukumatining mamlakatni ijtimoiy-iqtisodiy yuksaltirishda, ijtimoiy sohalarni, jumladan, taʼlim, sogʻliqni saqlash va madaniyat sohalarini izchil rivojlantirish, mahalla va oilani qoʻllab-quvvatlash, maʼnaviy barkamol yosh avlodni tarbiyalash masalalarida mutasaddi idoralar faoliyatini samarali muvofiqlashtirish, shuningdek, IT-texnologiyalar va telekommunikatsiyalarni rivojlantirish, innovatsiyalarni joriy etish, sanoatning bazaviy tarmoqlarini, birinchi navbatda, geologiya, togʻ-kon, metallurgiya sohalarini, neft-gaz va yoqilgʻi-energetika sanoatini rivojlantirishdagi rolini oshirish hamda Oʻzbekiston Respublikasi Vazirlar Mahkamasining ijro etuvchi tuzilmasini yanada takomillashtirish maqsadida:

1. Vazirlar Mahkamasining ijro etuvchi tuzilmasida:

a) quyidagilar:

Oʻzbekiston Respublikasi Bosh vazirining taʼlim va sogʻliqni saqlash masalalari boʻyicha oʻrinbosari lavozimi;

Oʻzbekiston Respublikasi Bosh vazirining sanoatni va kooperatsiya aloqalarini rivojlantirish masalalari boʻyicha maslahatchisi lavozimi;

Mahalla, oila va yoshlarni qoʻllab-quvvatlash, madaniyat, maʼnaviyat va jamoat tashkilotlari masalalari kotibiyati;

Taʼlim va sogʻliqni saqlash masalalari kotibiyati tugatilsin;

b) quyidagilar:

Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari;

Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi;

Oʻzbekiston Respublikasi Bosh vazirining maslahatchisi — Sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti boshligʻi lavozimlari kiritilsin;

v) quyidagilar:

Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini taʼminlash masalalari kotibiyati IT-texnologiyalar, telekommunikatsiyalar va innovatsion faoliyatni rivojlantirish masalalari departamenti etib qayta tashkil etilsin;

Sanoatni va kooperatsiya aloqalarini rivojlantirish masalalari kotibiyati Sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti etib qayta tashkil etilsin;

d) quyidagilar:

Respublika boʻysunuvidagi shaharlarni ijtimoiy-iqtisodiy rivojlantirish boʻlimini muvofiqlashtirish Oʻzbekiston Respublikasi Bosh vazirining birinchi oʻrinbosariga yuklansin hamda ushbu boʻlim Hududlarni kompleks rivojlantirish, kommunikatsiyalar, qurilish va uy-joy kommunal xoʻjaligi masalalari kotibiyati tarkibiga kiritilsin;

2. Oʻzbekiston Respublikasining Bosh vaziriga oʻrta va uzoq muddatga moʻljallangan ustuvor vazifalarni hal qilishning muhimligi va natijadorligini hisobga olgan holda, zarurat boʻlganda, Vazirlar Mahkamasi xodimlarining umumiy shtatlari soni doirasida uning ijro etuvchi tuzilmasiga oʻzgartirishlar kiritish huquqi berilsin.

3. Oʻzbekiston Respublikasining Bosh vaziriga “Oʻzbekiston Respublikasi Vazirlar Mahkamasi toʻgʻrisida”gi Oʻzbekiston Respublikasi Qonunining 21-moddasida belgilangan asosiy ustuvor vazifalar bilan birga:

a) Vazirlar Mahkamasining quyidagi yoʻnalishlar boʻyicha faoliyatiga bevosita rahbarlik qilish:

IT-texnologiyalar, “elektron hukumat”ni joriy etish, axborot xavfsizligini taʼminlash, shuningdek, telekommunikatsiyalar, ilm-fan, ilmiy tadqiqotlar va innovatsiyalarni rivojlantirishni taʼminlash;

sanoatning bazaviy tarmoqlarini, shu jumladan geologiya, togʻ-kon va metallurgiya sohalarini, shuningdek, neft-gaz, yoqilgʻi va atom energetikasi sanoatini jadal va barqaror rivojlantirish;

mashinasozlik, avtomobil, elektrotexnika, toʻqimachilik, zargarlik, kimyo, koʻmir, mudofaa sanoati va qishloq xoʻjaligi mashinasozligi yoʻnalishlarini kompleks rivojlantirishni taʼminlash;

sanoatda kooperatsiya aloqalarini, sanoat xavfsizligi, mahsulotlarni standartlashtirish sohalarini rivojlantirish, shuningdek, tegishli davlat inspeksiyalari faoliyatini muvofiqlashtirish hamda davlat moddiy zaxiralarini mustahkamlash;

b) mazkur yoʻnalishlarda jadal rivojlanish va natijalarga erishish boʻyicha quyidagi chora-tadbirlarni amalga oshirish:

yangi “oʻsish nuqta”larini aniqlash va shu asosda qoʻshimcha resurs va zaxiralarni ishga solish hamda mavjudlarini oʻzlashtirish, iqtisodiyot va aholining energiya manbalari va xomashyo resurslariga boʻlgan ehtiyojlarini yetarlicha taʼminlashga moʻljallangan rivojlantirishning strategiya va tarmoq dasturlarini ishlab chiqish va ularning amalga oshirilishini taʼminlash;

yangi investitsiya loyihalarini amalga oshirish uchun xususiy investitsiyalarni, birinchi navbatda, xorijiy investitsiyalarni jalb etish yuzasidan takliflar ishlab chiqish, ularning har tomonlama baholanishi va ekspertiza qilinishini tashkil etish;

belgilangan loyihalarni amalga oshirishning maqbul shartlarini topish maqsadida xorijiy investorlar bilan muzokaralar oʻtkazish, shuningdek, ular boʻyicha tegishli takliflar kiritish va qarorlar qabul qilish;

Vazirlar Mahkamasi apparatining tegishli tarkibiy boʻlinmalari, shuningdek, vazirliklar, idoralar va ularning rahbarlari faoliyati natijalarini baholash uchun asosiy koʻrsatkichlarni belgilash vazifalari yuklansin.

4. Oʻzbekiston Respublikasi Vazirlar Mahkamasi:

a) quyidagilarni:

bir hafta muddatda — Vazirlar Mahkamasi apparati tarkibiy boʻlinmalarining tuzilmalarini va yangilangan shtat jadvalini;

oʻn besh kun muddatda — Oʻzbekiston Respublikasi Bosh vazirining oʻrinbosarlari va maslahatchilarining funksional vazifalarini;

bir oy muddatda — Vazirlar Mahkamasi apparatining tarkibiy boʻlinmalari toʻgʻrisidagi nizomlarni tasdiqlash haqida Hukumat qarorlarini qabul qilsin;

b) bir oy muddatda Vazirlar Mahkamasi apparatining yangidan tashkil etilgan tarkibiy boʻlinmalarini zamonaviy talablarni hisobga olgan holda, qoʻyilgan vazifalar samarali bajarilishini yuksak professional darajada taʼminlashga qodir boʻlgan malakali mutaxassislar bilan toʻldirsin.

5. Oʻzbekiston Respublikasi Prezidentining 2020-yil 24-fevraldagi “Oʻzbekiston Respublikasi Vazirlar Mahkamasi faoliyatini takomillashtirishga oid qoʻshimcha chora-tadbirlar toʻgʻrisida”gi PQ-4612-son qarorining 4-bandi, shuningdek, qarorga ilova oʻz kuchini yoʻqotgan deb hisoblansin.

6. Oʻzbekiston Respublikasi Adliya vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.