Oʻzbekiston Respublikasi Prezidentining “Oʻzbekiston Respublikasi Prezidenti huzurida Davlat va jamiyat qurilishi akademiyasini tashkil etish toʻgʻrisida” 1995-yil 19-apreldagi Farmonini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Prezidenti huzuridagi Davlat va jamiyat qurilishi akademiyasining tuzilmasi va Ustavi 1 va 2-ilovalarga muvofiq tasdiqlansin.

2. Akademiyaga rektor va uch nafar prorektordan iborat rahbariyat boshchilik qilishi, shuningdek, oʻqituvchi-professorlar tarkibining tinglovchilarga 1:4 nisbatan boʻlishi belgilab qoʻyilsin.

3. Quyidagilar:

Akademiya professor-oʻqituvchilar tarkibi uchun tarif stavkalari miqdorlari 3-ilovaga muvofiq;

boshqa xodimlarga — davlat hokimiyati va boshqaruvi organlari xodimlari mehnatiga haq toʻlashning amaldagi shartlariga muvofiq tarif stavkalari belgilansin.

4. Akademiya rahbariyati bir oy muddatda Oʻzbekiston Respublikasi Prezidentining tashkiliy-kadrlar siyosati boʻyicha Davlat maslahatchisi bilan kelishgan holda Akademiyada tayyorlanadigan mansabdor shaxslar roʻyxatini, ularni qabul qilish hamda oʻqishni tamomlagandan keyin taqsimlash (ishga yuborish) tartibini ishlab chiqsin.

5. Belgilab qoʻyilsinki, Akademiya tinglovchilari uchun oʻqish muddati mobaynida asosiy ish joylaridagi oʻrtacha ish haqi saqlab qolinadi. Boshqa shaharlik tinglovchilarga amaldagi qonunchilikka muvofiq oʻqish davrida asosiy ish joyidan sutkalik xarajatlar hamda oʻqish joyiga kelish va qaytib ketish yoʻl haqi toʻlanadi. Boshqa shaharlik tinglovchilar oʻqish davrida yotoqxona bilan taʼminlanadilar

6. Akademiya rektori maqomiga, mehnatga haq toʻlash, ijtimoiy-maishiy taʼminot, tibbiy xizmat va transport xizmati koʻrsatish shart-sharoitlariga koʻra Oʻzbekiston Respublikasi Prezidentining Davlat maslahatchisiga, Akademiya prorektorlari esa — Oʻzbekiston Respublikasi Prezidenti Apparatining bosh konsultantiga tenglashtirilsin.

7. Akademiyada xodimlarni moddiy ragʻbatlantirish uchun professor-oʻqituvchilar ish haqi fondining 50 foizi doirasida maxsus jamgʻarma tashkil etilishi nazarda tutilsin.

Akademiya rektoriga professor-oʻqituvchilar tarkibiga koʻrsatib oʻtilgan jamgʻarma hisobidan tarif stavkasining 50 foizigacha oylik ustama belgilash huquqi berilsin.

8. Akademiya rektoriga quyidagi huquqlar berilsin:

Akademiyaning shtat jadvalini tasdiqlash, shuningdek, zarurat boʻlganda Akademiya tuzilmasiga xodimlarning umumiy soni va mehnatga haq toʻlash fondi doirasida oʻzgartirishlar kiritish;

mehnatga soatbay haq toʻlash stavkalarini amaldagi eng kam ish haqining 30 foizi doirasida belgilash;

jahon tajribasini nazarda tutgan holda Akademiyada ishlash uchun mutaxassislarni, shu jumladan, xorijiy mutaxassislarni jalb qilishning turli iqtisodiy shakllaridan foydalanish.

9. Akademiyada Prezident Apparati, Vazirlar Mahkamasi, vazirliklar va idoralar rahbarlari va masʼul xodimlarining davlat va jamiyat qurilishi, Oʻzbekistonni ijtimoiy-iqtisodiy, siyosiy va maʼnaviy rivojlantirishning dolzarb muammolari boʻyicha maʼruza bilan muntazam chiqishlari amaliyotga joriy etilsin.

10. Oʻzbekiston Respublikasi Moliya vazirligi:

yirik mutaxassislarni ishga taklif etish, oʻqituvchilar va eng yaxshi tinglovchilarning xorijiy davlatlarda tajriba orttirishlari, Akademiya professor-oʻqituvchilar tarkibining xalqaro ilmiy konferensiyalarda qatnashishi, shuningdek, xorijiy mamlakatlarda nashr qilinadigan davriy nashrlarga obuna boʻlish, darslik va oʻquv qoʻllanmalarini xarid qilish uchun 1995-yildan boshlab har yili Akademiya buyurtmanomalari boʻyicha erkin almashtiriladigan valyutada zarur mablagʻlar ajratishni nazarda tutsin;

Akademiya buyurtmanomalariga muvofiq 1995-yilda auditoriyalarni xalqaro standartlarga muvofiq jihozlashga, asbob-uskunalar, ofis mebeli, maxsus kompyuter texnikasi, xalqaro axborot tarmogʻiga integratsiyalashish uchun zamonaviy telekommunikatsiya aloqa vositalarini xarid qilishga mablagʻlar ajratsin;

Akademiyani mablagʻ bilan taʼminlash, shu jumladan, mazkur qaror shartlariga muvofiq ish haqi uchun, uning balansidagi binolar va inshootlarni jihozlash va mukammal tuzatish, oʻquv-uslubiy qoʻllanmalar hamda asarlarni nashr qilish uchun taqdim etiladigan hisob-kitoblarga muvofiq zarur mablagʻlar ajratsin;

Akademiyaga 4 ta yengil avtomashina xarajatlari uchun limit va 2 ta mikroavtobus sotib olish uchun zarur mablagʻ ajratsin.

11. Oʻzbekiston Respublikasi Davlat matbuot qoʻmitasi:

Akademiyani kutubxonani toʻldirish uchun maxfiy boʻlmagan bosma asarlar va kitob mahsulotining (ijtimoiy-siyosiy, iqtisodiy, huquqiy, tarixiy) nazorat nusxalarini (2 nusxada) tekin oluvchi tashkilotlar roʻyxatiga kiritsin;

Akademiya buyurtmalari boʻyicha oʻquv-uslubiy va ilmiy mahsulotlar tezkorlik bilan nashr etilishini tashkil qilsin.

12. Vazirliklar va idoralar, Qoraqalpogʻiston Respublikasi Vazirlar Kengashi, hokimliklar oʻz tarkibiy boʻlinmalarida Akademiya tinglovchilarining tajriba orttirishlari uchun zarur shart-sharoitlar yaratsinlar va bunga koʻmaklashsinlar.

13. Oʻzbekiston Respublikasi Prezidenti huzuridagi Davlat va jamiyat qurilishi akademiyasi Toshkent shahar, Oʻzbekiston shoh koʻchasi, 45-uydagi binolar majmuiga joylashtirilsin.

Toshkent shahar hokimligi 1995-yil 1-avgustga qadar Akademiya binosi xonalarini oʻqish jarayoni xususiyatlarini hisobga olgan holda qayta oʻzgartirish, rekonstruksiya qilish va mukammal tuzatish ishlarini amalga oshirsin va binoni Akademiya balansiga oʻtkazsin.

Moliya vazirligi amalda bajarilgan ishlar boʻyicha mablagʻ ajratsin.

“Oʻzulgurjibirjasavdo” uyushmasi va “Oʻzqurilishmateriallari” davlat konserni “Toshkentuyjoyinvestqurilish” korporatsiyasiga zarur moddiy-texnika resurslari sotsin.

14. Oʻzbekiston Respublikasi Aloqa vazirligi belgilangan tartibda Akademiyani zamonaviy aloqa vositalari, shu jumladan, hukumat aloqasi va boshqa aloqa turlari bilan taʼminlasin.

15. Oʻzbekiston Respublikasi Prezidenti Apparati Ishlar Boshqarmasi oʻqituvchilik va tadqiqot ishlarini olib borish uchun taklif etiladigan chet ellik mutaxassislar uchun Akademiya buyurtmanomalariga koʻra oʻz tasarrufidagi mehmonxona fondidan joy ajratsin.

16. Akademiyaga oʻqituvchilik va tadqiqot ishlarini olib borish uchun taklif qilinadigan xorijiy olimlar va mutaxassislarning yashash va transport xarajatlarini Oʻzbekiston fuqarolari uchun nazarda tutilgan tariflar boʻyicha soʻmlarda toʻlashga ruxsat etilsin.

17. Mazkur qarorning bajarilishini nazorat qilish Bosh vazirning birinchi oʻrinbosari I.H. Joʻrabekov zimmasiga yuklansin.

Rektor

Ilmiy kengash

Kafedralar

Kadrlar tayyorlash dekanati

Kadrlarni qayta tayyorlash va ularning malakasini oshirish dekanati

Kadrlarni shartnoma (kontrakt) asosida oʻqitish dekanati

Oʻquv boʻlimi

Tajriba orttirish boʻlimi

Amaliy va koʻchma mashgʻulotlar boʻlimi

Respublika muvofiqlashtirish-uslubiyot markazi

Ilmiy-tadqiqot ishlari boʻlimi

Davlat, ilmiy va jamoat tashkilotlari bilan aloqalar boʻlimi

Oʻquv-kompyuter markazi

Tijorat-tadqiqot ishlari (shartnomalar, grantlar boʻyicha)

Jurnal, nashriyot boʻlimi

Kutubxona

Rejalashtirish boʻlimi

Xalqaro aloqalar boʻlimi

Buxgalteriya

Xoʻjalik boʻlimi

Umumiy boʻlim

Sport majmui

Bosmaxona

Mehmonxona majmui

Kadrlar boʻlimi

Tanlov guruhi

1. Oʻzbekiston Respublikasi Prezidenti huzuridagi Davlat va jamiyat qurilishi akademiyasi (keyingi oʻrinlarda “Akademiya” deb ataladi) Oʻzbekiston Respublikasi Prezidentining “Oʻzbekiston Respublikasi Prezidenti huzurida Davlat va jamiyat qurilishi akademiyasini tashkil etish toʻgʻrisida” 1995-yil 19-apreldagi Farmoni asosida tashkil etilgan hamda Oʻzbekiston Respublikasi hokimiyat va boshqaruv organlari rahbar xodimlarini, jamoat tashkilotlari va birlashmalari, xoʻjalik tuzilmalari rahbarlarini tayyorlash, qayta tayyorlash hamda ularning malakasini oshirish, shuningdek kadrlar siyosati sohasida ilmiy tadqiqotlar olib borish boʻyicha bosh taʼlim muassasi hisoblanadi.

Akademiya qoʻshimcha taʼlim sohasida Oʻzbekiston Respublikasidagi yetakchi oʻquv-uslubiy va ilmiy markaz hisoblanadi hamda kadrlarni tayyorlash, qayta tayyorlash va ularning malakasini oshirishda taʼlim muassasalariga zarur ilmiy-uslubiy va axborot-tahliliy yordam koʻrsatadi.

2. Akademiyaning asosiy vazifalari va faoliyati yoʻnalishlari quyidagilar hisoblanadi:

davlat, jamoat va xoʻjalik tuzilmalari xodimlari hamda rahbarlari orasida isteʼdodli, aql-zakovatli tinglovchilarni puxta tanlab olish, ularning siyosiy, maʼnaviy-axloqiy va professional saviyasini oshirish, ularni respublikada milliy va umuminsoniy qadriyatlar uygʻunligi asosida qurilgan huquqiy demokratik davlat va fuqarolar jamiyatini barpo etishning eʼtiqodli tarafdorlari qilib tarbiyalash;

oliy maʼlumotli va oliy oʻquv yurtini tamomlagandan keyin kamida ikki yil ishlagan mutaxassislar orasidan yosh istiqbolli menejerlar va boshqaruvchilarni ularning har tomonlama aql-zakovatli boʻlishlari, maʼnaviy va professional oʻsishlari uchun qabul qilish va tayyorlash;

rahbar xodimlar va mutaxassislarni attestatsiyadan oʻtkazishning Yangi tizimini ishlab chiqish va joriy qilishda ishtirok etish;

zamonaviy usullar yordamida rahbarning professional kartasini tuzish hamda jamiyat va davlat qurilishining barcha boʻgʻinlari uchun rahbarlar zaxirasi umumdavlat bankini shakllantirish;

doktorantura va aspirantura orqali ixtisos mutaxassisliklari boʻyicha yuqori malakali kadrlar tayyorlash;

davlat va jamiyat qurilishini, iqtisodiy taraqqiyotni, psixologiya va sotsiologiyani takomillashtirish sohasida ilmiy tadqiqotlar oʻtkazish, shuningdek, kadrlar siyosatini takomillashtirish yuzasidan tavsiyanomalar ishlab chiqish;

oʻz ixtisosligi boʻyicha xodimlarni qayta tayyorlash va ularning malakasini oshirish muassasalari faoliyatiga oid konsepsiyalar, dasturlar, loyihalar, tavsiyanomalar va boshqa hujjatlarni ilmiy ekspertiza qilish;

rahbar xodimlarning malakasini oshirish va ularni tayyorlash sohasida xalqaro hamkorlik qilish, chet mamlakatlar akademiyalari, universitetlari, institutlari va boshqa tashkilotlari bilan ijodiy aloqalar oʻrnatish.

3. Akademiya faoliyati davlat xizmatchilarini tayyorlash, qayta tayyorlash va ularning malakasini oshirishga va ilmiy-tadqiqot ishlarini olib borishga davlat buyurtmasi berish, barcha boʻgʻinlardagi rahbarlarni oʻqitishga davlat hokimiyati va boshqaruvi organlari, jamoat tashkilotlari va birlashmalari, xoʻjalik tuzilmalari bilan shartnomalar tuzish, ilmiy tadqiqotlar va axborot-tahliliy ishlarga shartnomalar tuzish asosida amalga oshiriladi.

4. Akademiya oʻz faoliyatida Oʻzbekiston Respublikasi Konstitutsiyasiga, qonunlariga va Oʻzbekiston Respublikasi Oliy Majlisining boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga hamda mazkur Ustavga amal qiladi.

5. Akademiya yuridik shaxs hisoblanadi, mustaqil balansga, bank muassasalarida hisob-kitob, valyuta va boshqa schyotlarga, oʻz nomi davlat tilida yozilgan gerbli muhrga, dumaloq muhrlar va shtamplarga hamda uning faoliyati uchun zarur boʻlgan boshqa belgilar va rekvizitlarga ega boʻladi.

6. Akademiya taʼlim faoliyatini Oʻzbekiston Respublikasi ijtimoiy, iqtisodiy va ijtimoiy-siyosiy hayotining zamonaviy talablari, uni rivojlantirish, oʻzgartirish va yangilash, shuningdek, jahon fani va madaniyati, milliy fan va madaniyat yutuqlari hisobga olingan holda ishlab chiqilgan va davlat taʼlim standartlari talablariga javob beradigan oʻquv rejalari va dasturlari asosida amalga oshiradi.

Oʻqitish bir necha dasturlar boʻyicha olib boriladi, ularning xususiyati tinglovchilar tarkibiga va taʼlim maqsadiga bogʻliq boʻladi.

Oʻqitish muddatlari va darajasi turlicha boʻlgan aniq yoʻnalishlari boʻyicha maxsus kurslar (kadrlar bilan ishlash, buxgalteriya hisobi, moliya va shu kabilar boʻyicha foydalanuvchining kompyuter dasturlari) tashkil etilishi mumkin.

Taʼlim va professional dasturlar buyurtmachining ehtiyojlarini, shuningdek, tegishli mutaxassislik boʻyicha tayyorlash darajasiga davlat talablari oʻzgarishini hisobga olgan holda Akademiya tomonidan mustaqil ishlab chiqiladi, tasdiqlanadi va amalga oshiriladi. Dasturning boʻlishi majburiy hisoblanadi.

7. Rahbar xodimlarni tayyorlash, qayta tayyorlash va ularning malakasini oshirish kunduzgi oʻqish shaklida olib boriladi. Oʻqitish muddati va shakli Akademiya tomonidan oʻqitish maqsadlariga bogʻliq ravishda belgilanadi.

8. Oʻrta boʻgʻin va kichik korxonalar boshqaruvchilarini, tadbirkorlarni ikkinchi mutaxassislik boʻyicha tayyorlash, qayta tayyorlash va ularning malakasini oshirish manfaatdor korxonalar, muassasalar, tashkilotlar hamda alohida shaxslar bilan tuziladigan shartnoma asosida amalga oshiriladi.

9. Oʻqituvchilikka respublika ilmiy-tadqiqot institutlari, oliy oʻquv yurtlari, vazirliklari va idoralarining yetakchi mutaxassislari, shuningdek, chet mamlakatlarning olimlari oʻrindoshlik tarzida ishlash tartibida va soatbay haq toʻlash shartlari bilan jalb qilinadilar.

Chet mamlakatlar olimlari va mutaxassislari Akademiyada ishlashga kontrakt asosida jalb qilinadilar.

10. Ilmiy-tadqiqot ishlari shartnoma asosida olib boriladi va olingan daromad Akademiyaning moddiy bazasini rivojlantirishga, xodimlarni ragʻbatlantirishga va jamoani ijtimoiy rivojlantirish masalalarini hal qilishga yoʻnaltiriladi.

11. Akademiya tinglovchilarni oʻqitish vositalari (oʻquv va boshqa adabiyot, audiovizual va texnika vositalari) bilan taʼminlaydi. Boshqa davlatdan kelgan tinglovchilar shartnoma (kontrakt) boʻyicha oʻqitiladi.

12. Akademiya tinglovchilari sifatida birinchi navbatda hokimiyat va boshqaruv organlari, vazirliklar, idoralar va hokimliklarning rahbarlari qabul qilinadilar. Akademiyaga boshqaruv oʻrta boʻgʻini, shuningdek, jamoat tashkilotlarining oliy maʼlumotga ega boʻlgan rahbarlari va mutaxassislari va tadbirkorlik tuzilmalari vakillari ham qabul qilinishlari mumkin. Qabul qilish Akademiya rektorining buyrugʻi bilan amalga oshiriladi.

13. Akademiyaga qabul qilinadigan tinglovchilar soni har yili Vazirlar Mahkamasining qarori bilan belgilanadi.

14. Akademiyaga oʻqishga qabul qilish tartibi Oʻzbekiston Respublikasi Prezidentining tashkiliy-kadrlar siyosati boʻyicha Davlat maslahatchisi bilan kelishib Akademiya rektori tomonidan tasdiqlangan qabul qilish qoidalariga muvofiq belgilanadi. Doktorantura, aspiranturaga qabul qilish va tadqiqotchilarni biriktirish qoidalari Akademiya Ilmiy kengashi tomonidan belgilanadi.

15. Akademiyada mutaxassislarni tayyorlash, qayta tayyorlash va ularning malakasini oshirish akademiya ilmiy kengashi belgilaydigan muddatlarda oʻquv rejasiga muvofiq amalga oshiriladi.

16. Oʻqish muddati mobaynida tinglovchilarga asosiy ish joylaridagi oʻrtacha ish haqi saqlab qolinadi. Boshqa shaharlardan kelgan tinglovchilarga asosiy ish joyi boʻyicha oʻqish joyigacha borish va qaytib kelish yoʻl haqlari, oʻqish muddati mobaynidagi sutkalik xarajatlar toʻlanadi. Boshqa shaharlardan kelgan tinglovchilar oʻqish davrida yotoqxona bilan taʼminlanadilar, bu bilan bogʻliq xarajatlarni oʻqitishga yoʻllagan tomon toʻlaydi.

17. Akademiya tinglovchilarning oʻqishga kirish va uni tamomlash vaqtidagi bilimlarini tekshirishni, oʻqish natijalarini kompleks baholashni eng avvalo test sinovlari asosida, shuningdek, diplom ishlari, referatlarni himoya qilish, maxsus tashkil etilgan komissiyalar orqali suhbatlar oʻtkazish asosida amalga oshiradi. Akademiyada taʼlim dasturlarini oʻzlashtirish majburiy davlat yakuniy attestatsiya oʻtkazish va diplom loyihalarini tayyorlash bilan nihoyasiga yetkaziladi.

18. Oʻquv kursini yakunlagan tinglovchilarga belgilangan namunadagi hujjatlar beriladi.

19. Akademiyada professor-oʻqituvchilar va ilmiy tarkib, muhandis-texnik, maʼmuriy, ishlab chiqarish, yordamchi va boshqa xodimlar lavozimlari nazarda tutiladi. Barcha lavozimlar “Taʼlim toʻgʻrisida”gi Oʻzbekiston Respublikasi Qonuniga va Oʻzbekiston Respublikasining mehnat toʻgʻrisidagi qonunlariga muvofiq mehnat shartnomasi (kontrakt) boʻyicha egallanadi.

Akademiya professor-oʻqituvchilar tarkibi soni bir oʻqituvchiga toʻrt nafar tinglovchi nisbatidan kelib chiqib belgilanadi.

20. Professor-oʻqituvchilar va ilmiy tarkib quyidagi huquqlarga ega boʻladi:

Akademiya Ilmiy kengashida oʻquv, ilmiy, ijodiy va ishlab chiqarish faoliyatining muhim masalalarini muhokama qilishda qatnashish;

Akademiya kabinetlari, auditoriyalari, oʻquv zallari va kutubxonalaridan, shuningdek, hisoblash markazlari, oʻquv va ilmiy laboratoriyalaridan foydalanish;

oʻzining shaxsiy xususiyatlariga toʻliqroq javob beradigan va oʻquv hamda ilmiy jarayonning yuqori sifatli boʻlishini taʼminlaydigan taʼlim dasturlari mazmunini, oʻqitish usullari va vositalarini tanlash.

21. Akademiyaning professor-oʻqituvchilar va ilmiy tarkibi quyidagilarga majburdir:

pedagogik jarayonning yuqori samarali boʻlishini taʼminlash, tinglovchilarda tashabbuskorlikni va ijodiy qobiliyatni, ilmiy izlanishga intilishni rivojlantirish;

taʼlim mazmunining yuqori saviyada boʻlishini taʼminlaydigan ilmiy-tadqiqot ishlarini olib borish;

ichki tartib qoidalariga rioya qilish;

22. Akademiyada siyosiy partiyalar, ijtimoiy-siyosiy va diniy harakatlar tashkil etilishiga va ularning faoliyat koʻrsatishiga yoʻl qoʻyilmaydi.

23. Oʻquv-yordamchi va maʼmuriy-xoʻjalik xodimlarining huquq va majburiyatlari ichki tartib qoidalari hamda lavozim yoʻriqnomalari bilan belgilanadi.

24. Akademiyani boshqarish Oʻzbekiston Respublikasi qonunchiligiga hamda Akademiyaning Ustaviga muvofiq amalga oshiriladi.

25. Akademiya Ustavi Oʻzbekiston Respublikasi Vazirlar Mahkamasi tomonidan tasdiqlanadi.

26. Akademiya faoliyatiga umumiy rahbarlikni rektor, u boʻlmagan hollarda – oʻquv ishlari boʻyicha prorektor amalga oshiradi.

27. Akademiya rektori Oʻzbekiston Respublikasi Prezidenti tomonidan lavozimga tayinlanadi va ozod etiladi. Akademiya rektori maqomi, mehnatga haq toʻlash, ijtimoiy-maishiy taʼminot, tibbiy va transport xizmati koʻrsatish shart-sharoitlari boʻyicha Oʻzbekiston Respublikasi Prezidentining Davlat maslahatchisiga tenglashtiriladi.

Akademiya prorektorlari belgilangan tartibda rektor tomonidan tayinlanadilar va maqomi boʻyicha Oʻzbekiston Respublikasi Prezidenti Apparatining bosh konsultantiga tenglashtiriladilar.

28. Akademiya faoliyatining asosiy masalalarini koʻrib chiqish uchun rektor boshchilik qiladigan Akademiya Ilmiy kengashi tashkil etiladi.

Akademiya Ilmiy kengashi tarkibiga Akademiyaning prorektorlari, ilmiy kotib, kafedra mudirlari, oʻquv-diniy, ilmiy-tadqiqot va axborot-tahliliy boʻlinmalarning rahbarlari, Akademiyaning yetakchi olimlari va xodimlari, shuningdek, boshqa oʻquv va ilmiy muassasalarning yetakchi olimlari kiradilar.

Akademiyaning Ilmiy kengashi:

oʻquv, ilmiy-tadqiqot va axborot-tahliliy ishlar, kadrlar tayyorlash, xalqaro aloqalarni amalga oshirish masalalarini, shuningdek, Akademiyaga qarashli filiallar, institutlar va boshqa tashkilotlarning faoliyati masalalarini hal qiladi;

oʻquv dasturlarini, oʻquv rejalarini va manfaatdor tashkilotlar ishtirokida ishlab chiqilgan alohida kurslar dasturlarini tasdiqlaydi;

Akademiya, uning boʻlinmalari rahbarlarining hisobotlarini tinglaydi;

oʻqituvchilar tarkibidan boʻlgan Akademiya xodimlariga dotsent va professor ilmiy unvonlari berish masalalarini belgilangan tartibda hal qiladi;

Akademiyaning faxriy doktori darajasini beradi.

Ilmiy kengash qarori akademiya rektori tomonidan tasdiqlangandan keyin kuchga kiradi.

29. Akademiya rektori:

davlat hokimiyati va boshqaruvi barcha organlarida, muassasalar va tashkilotlarda Akademiya nomidan vakillik qiladi;

Akademiya Ilmiy kengashi tarkibini (Oʻzbekiston Respublikasi Prezidentining davlat maslahatchilari bilan kelishgan holda), uning toʻgʻrisidagi Nizomni, Akademiyaning boʻlinmalari, filiallari, Akademiyaga qarashli muassasalar va tashkilotlar toʻgʻrisidagi ustavlarni va nizomlarni tasdiqlaydi;

oʻquv-ilmiy, ilmiy-tadqiqot, axborot-tahliliy boʻlinmalar va filiallar rahbarlarini, fakultetlarning dekanlarini va kafedra mudirlarini tasdiqlayda;

Akademiyaning kafedralari, oʻquv-ilmiy, ilmiy-tadqiqot, axborot-tahliliy va boshqa boʻlinmalarini, shuningdek, filiallarini tashkil etish, qayta tashkil etish va tugatish haqida qarorlar qabul qiladi;

tinglovchilar, aspirantlar, doktorantlarni qabul qilish qoidalarini va tadqiqotchilar bilan ishlash tartibini belgilaydi;

Akademiyaning moliyaviy faoliyati masalalarini hal qiladi;

Akademiyaning mulki va mablagʻlarini belgilangan tartibda tasarruf etadi;

barcha xodimlar va Akademiyada oʻqitayotganlar bajarishlari majburiy boʻlgan buyruqlar, yoʻriqnomalar va farmoyishlar chiqaradi;

Akademiya va uning boʻlinmalari xodimlarini ishga qabul qiladi va ishdan boʻshatadi, Akademiyada yollanib ishlash boʻyicha kontraktlar tuzadi;

Akademiyani mablagʻ bilan taʼminlash xarajatlari smetasini tasdiqlaydi;

boʻlinmalar uchun lavozimlar roʻyxatini belgilaydi, lavozim maoshlari sxemalarini, oylik tarif stavkalari va mehnatga soatbay haq toʻlash miqdorlarini mavjud mablagʻlar doirasida tasdiqlaydi;

professor-oʻqituvchilar tarkibining oʻquv ish normalarini, oʻqitish, ilmiy, dasturiy yoki boshqa ishlar uchun haq toʻlash miqdorini tasdiqlaydi;

Akademiya xodimlari mehnatiga haq toʻlash va ularni mukofotlashni tashkil etish shakllarini hamda tizimlarini belgilaydi;

Oʻzbekiston Respublikasining qonunchiligiga va mazkur Ustavga muvofiq boshqa faoliyatni amalga oshiradi.

30. Akademiya rektori oʻzining ayrim vakolatlarini Akademiyaning prorektoriga va boshqa mansabdor shaxslariga berish huquqiga egadir.

31. Budjetdan ajratilgan mablagʻlar va davlat boshqaruvi turli organlari, tijorat tuzilmalari, korxonalar, tashkilotlar va muassasalar, shu jumladan xorijiy firmalar bilan tuzilgan shartnomalar Akademiya moliya-xoʻjalik faoliyatining asosi hisoblanadi.

32.Akademiyaga quyidagi huquqlar beriladi:

belgilangan tartibda noshirlik faoliyatini amalga oshirish, davlat va jamiyat qurilishi muammolariga oid yiliga 4-marta chiqadigan jurnal chiqarish;

Akademiyaga ajratilgan mablagʻlar yoki oʻz fondlari hisobiga davlat yoki tijorat korxonalaridan zarur asbob-uskunalarni va boshqa moddiy resurslarni sotib olish, ijaraga olish, ularga buyurtma berish;

oʻziga tegishli mol-mulkka, intellektual va boshqa mulkka, xoʻjalik yoki boshqa xil faoliyatdan olingan mahsulotga, daromadlarga, shuningdek, amaldagi qonunchilik yoʻl qoʻyadigan boshqa asoslar boʻyicha sotib olingan mol-mulkka egalik qilish, undan foydalanish va uni tasarruf etish;

ilmiy, ilmiy-texnika mahsulotlari, xalq isteʼmol tovarlarini ishlab chiqarish va sotish;

Akademiya tomonidan ishlab chiqariladigan mahsulotlarga va tovarlarga, koʻrsatiladigan xizmatlarga tariflar, narxlar va baholarni mustaqil ravishda belgilash;

moddiy-texnika bazani rivojlantirish, Akademiya xodimlariga va taklif etilgan mutaxassislarga mehnat haqi toʻlash, ularni moddiy ragʻbatlantirish, ularning uy-joy-turmush sharoitlarini yaxshilash, shuningdek, mazkur Ustavda nazarda tutilgan ijtimoiy va boshqa vazifalarni hal qilish uchun budjetdan ajratiladigan mablagʻlar bilan bir qatorda ishlab topilgan va boshqa shaxslar hamda tashkilotlardan olingan mablagʻlarni oʻz ixtiyoriga koʻra sarflash;

Oʻzbekiston Respublikasi qonunchiligi bilan taqiqlanmagan va mazkur Ustavga zid boʻlmagan boshqa faoliyatni amalga oshirish.

33. Akademiya bank kreditidan foydalanadi va kredit shartnomalarining bajarilishi va hisob-kitob intizomiga rioya qilinishi uchun javob beradi. Pul mablagʻlarini saqlash va hisob-kitob, kredit hamda kassa operatsiyalarining barcha turlarini amalga oshirish uchun bank va boshqa kredit muassasalarida oʻzining schyotlari (shu jumladan, valyuta schyotlari) ga ega boʻladi.

34. Davlat va jamiyat qurilishi akademiyasida oʻz mablagʻlari va oʻziga qarashli muassasalarning xoʻjalik faoliyatidan olingan daromadlar, shuningdek, jalb qilingan boshqa mablagʻlar hisobiga Akademiyani rivojlantirish jamgʻarmasi tashkil etiladi. Jamgʻarma mablagʻlarini shakllantirish va sarflash tartibi Oʻzbekiston Respublikasi Moliya vazirligi bilan kelishgan holda Akademiya tomonidan ishlab chiqilgan maxsus nizomga muvofiq amalga oshiriladi.

35. Akademiya rahbarlar, mutaxassislar tayyorlash, qayta tayyorlash, ularning malakasini oshirish va ularni attestatsiyadan oʻtkazish sohasida xalqaro hamkorlik qilish, kadrlar tayyorlash sohasida xorijiy tashkilotlar bilan kontraktlar tuzish, shuningdek, Oʻzbekiston Respublikasi qonunchiligiga muvofiq tashqi iqtisodiy faoliyatni amalga oshirish huquqiga egadir.

Akademiya tinglovchilar uchun oʻquv jarayonining zarur qismini va xodimlarning tajriba orttirishini yetakchi xorijiy ilmiy va oʻquv markazlarida, firmalarda, xalqaro tashkilotlarda va shu kabilarda mustaqil ravishda tashkil etadi.

36. Akademiyada xorijiy davlatlar fuqarolari malakasini oshirish va professional qayta tayyorlash, Akademiya professor-oʻqituvchilar tarkibi va tinglovchilarning chet ellardagi pedagogik, ilmiy-tadqiqot ishlari va tajriba orttirishi davlatlararo bitimlar, respublika ijro etuvchi hokimiyat davlat organlari bilan xorijiy mamlakatlarning tegishli davlat organlari oʻrtasida tuzilgan shartnomalar, Akademiyaning xorijiy sheriklar bilan tuzgan bitimlari va yakka tartibdagi shartnomalari (kontraktlari) asosida amalga oshiriladi. Akademiya alohida hollarda xorijiy davlatlarning kadrlarini oʻqitish, tayyorlash va qayta tayyorlashni shartnoma asosida amalga oshirishi mumkin.

37. Akademiyani qayta tashkil etish va tugatish Oʻzbekiston Respublikasi Prezidentining qaroriga muvofiq amalga oshiriladi.