Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni, Oʻzbekiston Respublikasi Prezidentining 2019-yil 18-noyabrdagi PF-5877-son “Inflatsion targetlash rejimiga bosqichma-bosqich oʻtish orqali pul-kredit siyosatini takomillashtirish toʻgʻrisida”gi Farmoni hamda Oʻzbekiston Respublikasi Vazirlar Mahkamasining 2019-yil 13-maydagi 396-son “Xususiy uy-joy mulkdorlari shirkatlari tomonidan jalb etiladigan bank kreditlari boʻyicha tumanlar (shaharlar) hokimliklari tomonidan kafolatlar berilishi va muddati oʻtkazib yuborilgan qarzdorlikni qoplash tartibi toʻgʻrisidagi nizomni tasdiqlash haqida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2002-yil 16-martdagi 6/1-son qarori (roʻyxat raqami 1126, 2002-yil 18-aprel) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2002-yil, 8-son) bilan tasdiqlangan Tijorat banklari tomonidan xususiy uy-joy mulkdorlari shirkatlarini milliy valyutada kreditlash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 5 va 6-bandlar quyidagi tahrirda bayon etilsin:

“5. Tijorat banklari tomonidan ajratiladigan kreditlarning muddatlari resurslarning mavjudligi va ularning qaytarilishi imkoniyatlaridan kelib chiqqan holda mustaqil ravishda belgilanadi.

6. Tijorat banklari tomonidan ajratiladigan kreditlar Oʻzbekiston Respublikasi Markaziy bankning qayta moliyalashtirish stavkasida, 2021-yil 1-yanvardan boshlab bozor tamoyillari asosida mustaqil ravishda oʻrnatiladigan stavkalarda foiz xarajatlarning bir qismini kompensatsiya qilish mexanizmini qoʻllash imkoniyati bilan beriladi.”.

2. 9-band quyidagi mazmundagi xatboshi bilan toʻldirilsin:

“tumanlar (shaharlar) hokimliklari kafolatini.”.

3. 12-banddan “va aylana muhr bilan tasdiqlangan” degan soʻzlar chiqarib tashlansin.

4. Rus tili matnidagi 3-bob nomidagi “ssudi” degan soʻz “kredita” degan soʻz bilan almashtirilsin.

5. 15-band quyidagi tahrirda bayon etilsin:

“15. Kreditlar alohida kredit hisobvaragʻidan qarz oluvchining toʻlov topshiriqnomasi asosida amalga oshiriladi. Toʻlov topshiriqnomalariga ushbu kreditni olib boruvchi kredit boʻlimi xodimi tomonidan imzo qoʻyiladi. Bunda u kredit hisobvaragʻidan amalga oshiriladigan toʻlovlarning maqsadli yoʻnalishini qatʼiy nazorat qilib borishi lozim.”.

6. 16-banddagi “ssuda hisob raqamidan” degan soʻzlar “kredit hisobvaragʻidan” degan soʻzlar bilan almashtirilsin.

7. 17-band quyidagi tahrirda bayon etilsin:

“17. Qarz oluvchiga ajratiladigan kreditlar hisobi Oʻzbekiston Respublikasi tijorat banklarida buxgalteriya hisobining hisobvaraqlar rejasiga (roʻyxat raqami 773-17, 2004-yil 13-avgust) muvofiq tegishli balans hisobvaraqlarida yuritiladi.”.

8. 18-bandda:

birinchi xatboshi quyidagi tahrirda bayon etilsin:

“18. Kredit boʻlimining farmoyishiga koʻra ajratilgan kreditlar boʻyicha alohida kredit hisobvaraqlarida muddatli majburiyatnomalar rasmiylashtiriladi va kreditlar toʻliq qaytarilgunga qadar ularning hisobi yuritiladi.”;

uchinchi xatboshi quyidagi tahrirda bayon etilsin:

“Kreditni qaytarish muddati yetib kelganda va qarz oluvchining hisobvaraqlarida pul mablagʻlari mavjud boʻlmagan taqdirda, qarzdorlik Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnomada (roʻyxat raqami 2342, 2012-yil 15-mart) belgilangan tartibda undirib olinadi.”.

9. 20-bandning birinchi xatboshisidagi “muddati oʻtgan ssudalar hisob raqamiga” degan soʻzlar “muddati oʻtgan kreditlar hisobvaragʻiga” degan soʻzlar bilan almashtirilsin.

10. 22-band oʻz kuchini yoʻqotgan deb topilsin.

11. 23-band quyidagi mazmundagi xatboshi bilan toʻldirilsin:

“Bank tuman (shahar) hokimligining kafolati bilan shirkatlarga ajratilgan kreditlar boʻyicha yuzaga kelgan qarzdorlikni Oʻzbekiston Respublikasi Vazirlar Mahkamasining 2019-yil 13-maydagi 396-son qarori bilan tasdiqlangan Xususiy uy-joy mulkdorlari shirkatlari tomonidan jalb etiladigan bank kreditlari boʻyicha tumanlar (shaharlar) hokimliklari tomonidan kafolatlar berilishi va muddati oʻtkazib yuborilgan qarzdorlikni qoplash tartibi toʻgʻrisidagi nizomga asosan tuman (shahar) hokimligidan undirish huquqiga ega.”.