Aholining huquqiy ongi va huquqiy madaniyatini yuksaltirishga doir ishlar samaradorligini yanada oshirish, jamiyatda fuqarolarning huquqiy savodxonlik darajasini oshirish, aholiga bepul yuridik yordam ko‘rsatish tizimini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Adliya vazirligi tomonidan “Advice.uz” (e-maslahat.uz) huquqiy axborot portali ishga tushirilganligi, mazkur portal orqali O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslar (keyingi o‘rinlarda fuqarolar deb ataladi) onlayn rejimda bepul huquqiy maslahat olishlari uchun imkoniyat yaratilganligi ma’lumot uchun qabul qilinsin.

2. O‘zbekiston Respublikasi Adliya vazirligi va “Yuksalish” umummilliy harakatining quyidagi takliflariga rozilik berilsin:

a) “Madad” — muassasa shaklidagi nodavlat notijorat tashkiloti (keyingi o‘rinlarda Muassasa deb ataladi) hamda uning Qoraqalpog‘iston Respublikasi, viloyatlar va Toshkent shahar hududiy bo‘linmalarini (keyingi o‘rinlarda hududiy bo‘linmalar deb ataladi), shuningdek, tuman (shahar)larda ularning huquqiy maslahat byurolarini (keyingi o‘rinlarda huquqiy maslahat byurolari deb ataladi) tashkil etish;

b) Quyidagilarni Muassasaning asosiy vazifalari sifatida belgilash:

fuqarolarga huquqiy masalalar bo‘yicha shu jumladan, onlayn maslahatlar va tushuntirishlar berish yo‘li bilan birlamchi bepul yuridik yordam ko‘rsatish;

fuqarolarning huquqiy bilimlarini ijtimoiy-siyosiy o‘zgarishlar bilan uyg‘un ravishda oshirib borish ishlariga ko‘ngillilarni safarbar etish;

fuqarolar tomonidan huquqiy maslahat berishga oid so‘rovlarni tahlil qilib borish, tahlil natijasiga ko‘ra huquqni qo‘llash amaliyoti va amaldagi qonunchilikni takomillashtirish yuzasidan takliflar ishlab chiqish;

aholining huquqiy ongi va huquqiy madaniyatini yuksaltirishda innovatsion usullarni, xorijiy davlatlarning bu boradagi ijobiy tajribalarini tatbiq etish;

“Advice.uz” (e-maslahat.uz) huquqiy axborot portalining muntazam ravishda yuritilishi va yangilab borilishini ta’minlash.

3. Belgilansinki, Muassasa va uning hududiy bo‘linmalari faoliyatini moliyalashtirish:

davlat subsidiyasi, shuningdek davlat ijtimoiy buyurtmasi doirasida O‘zbekiston Respublikasi Adliya vazirligi, boshqa davlat organlari va tashkilotlarining shartnoma asosida Muassasaga to‘g‘ridan-to‘g‘ri ajratiladigan budjetdan tashqari mablag‘lari;

muassislar va tashabbuskorlar tomonidan ajratiladigan mablag‘lar;

yuridik va jismoniy shaxslarning homiylik xayriyalari;

xalqaro moliya institutlari va xorijiy hukumat moliya tashkilotlarining moliyaviy mablag‘lari;

qonunchilikda taqiqlanmagan boshqa manbalar hisobidan moliyalashtiriladi.

Adliya vazirligi Muassasaga har yili o‘zining budjetdan tashqari mablag‘laridan davlat ijtimoiy buyurtmasi uchun ajratiladigan mablag‘lar miqdorini va ulardan foydalanish tartibini mustaqil belgilaydi.

4. Muassasaning markaziy apparati Toshkent shahar, Sayilgoh ko‘chasi 5-uyda, hududiy bo‘linmalari va huquqiy maslahat byurolari zaruratga ko‘ra, tegishli hududiy adliya organlari yoki tuman (shahar) Davlat xizmatlari markazlari binolariga tekin foydalanish huquqi asosida joylashtirilsin.

5. Muassasaning markaziy apparati, hududiy bo‘linmalari va huquqiy maslahat byurolarini kompyuter texnikasi va boshqa zarur jihozlar bilan ta’minlash, ularni va ular joylashgan binolarni saqlash (kommunal xizmatlar, joriy ta’mirlash va boshqalar) bilan bog‘liq xarajatlar adliya organlarining budjetdan tashqari mablag‘lari va boshqa manbalar hisobidan moliyalashtiriladi.

6. O‘zbekiston Milliy teleradiokompaniyasiga Adliya vazirligi bilan birgalikda “Advice.uz” (e-maslahat.uz) huquqiy axborot portali hamda “Madad” — muassasa shaklidagi nodavlat notijorat tashkilotining bepul huquqiy maslahat berish faoliyatini ommaviy axborot vositalarida keng yoritish tavsiya etilsin.

7. O‘zbekiston Respublikasi Adliya vazirligining “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat unitar korxonalarini davlat muassasalari shaklida qayta tashkil etish to‘g‘risidagi taklifi ma’qullansin.

9. Quyidagilar:

b) “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasasining asosiy vazifalari etib belgilansin:

O‘zbekiston Respublikasi Qonunchilik ma’lumotlari milliy bazasi, “Notarius” avtomatlashtirilgan tizimi, “Advice.uz” (e-maslahat.uz) huquqiy axborot portali va vazirlik tomonidan yaratilgan boshqa axborot tizimlari faoliyatini kuzatib borish, serverlarga, telekommunikatsiya tarmoqlariga texnik xizmat ko‘rsatish hamda axborot xavfsizligini ta’minlash;

O‘zbekiston Respublikasi Adliya vazirligi tizimida “Elektron hukumat” axborot tizimlari doirasidagi loyihalarni amalga oshirish;

adliya organlari va muassasalarining barcha tuzilmalari faoliyatining samaradorligini oshirishga yo‘naltirilgan zamonaviy axborot-kommunikatsiya texnologiyalarini keng joriy etish;

adliya organlari va muassasalarida axborotlashtirish sohasida tahlillar o‘tkazish va takliflar ishlab chiqish.

10. Belgilansinki:

a) 2019-yil 10-sentabrdan boshlab “Adolat” huquqiy axborot markazi” davlat muassasasi tomonidan “O‘zbekiston Respublikasi qonunchilik to‘plami”, “O‘zbekiston Respublikasining xalqaro shartnomalar to‘plami” (keyingi o‘rinlarda rasmiy nashrlar deb ataladi) autsorsing asosida nashr etiladi;

b) “Adolat” milliy huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalariga O‘zbekiston Respublikasi adliya vaziri tomonidan lavozimga tayinlanadigan va lavozimdan ozod qilinadigan direktorlar rahbarlik qiladi;

v) “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalari xodimlariga O‘zbekiston Respublikasi Vazirlar Mahkamasining 1997-yil 3-iyuldagi 339-son qarorida belgilangan davlat xizmatchilari lavozim maoshlariga ustama haqi qo‘llaniladi, shuningdek, avvalgi ish joyida uzoq yillik xizmati uchun berilgan ustama va qo‘shimcha to‘lovlar, maxsus va darajali unvonlar saqlab qolinadi;

g) quyidagilar “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalari faoliyatini moliyalashtirish manbalari hisoblanadi:

Adliya organlari va muassasalarini rivojlantirish budjetdan tashqari jamg‘armasi, shuningdek adliya organlari va muassasalarining boshqa budjetdan tashqari mablag‘lari;

xalqaro institutlar va tashkilotlar, yuridik va jismoniy shaxslarning grantlari va homiylik xayriyalari;

qonunchilik hujjatlarida taqiqlanmagan boshqa manbalar.

11. O‘zbekiston Respublikasi Adliya vazirligi:

2020-yil 1-iyulga qadar O‘zbekiston Respublikasi Qonun hujjatlari ma’lumotlari milliy bazasini modernizatsiya qilsin, jumladan, bunda “aqlli” izlash funksiyasi nazarda tutilsin;

rasmiy nashrlarni chop etish va realizatsiya qilish jarayonida ularning tannarxini arzonlashtirish choralarini ko‘rsin;

ikki oy muddatda “Adolat” huquqiy axborot markazi” va “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasalarining ustavlarini tasdiqlasin.

12. O‘zbekiston Respublikasi Adliya vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

13. Mazkur qarorning bajarilishini nazorat qilish O‘zbekiston Respublikasi adliya vaziri R.K. Davletov zimmasiga yuklansin.