Respublika mintaqalarida eksportga moʻljallangan ishlab chiqarishlarni tashkil etishga xorijiy investitsiyalarning jalb qilinishini yanada ragʻbatlantirish maqsadida Vazirlar Mahkamasi qaror qiladi:

1. Oʻzbekiston Respublikasi Makroiqtisodiyot va statistika vazirligi, Vazirlar Mahkamasining Investitsiya dasturlari departamenti, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining 2001—2005-yillarda respublika mintaqalarida xorijiy investitsiyalar ishtirokidagi korxonalarni tashkil etish toʻgʻrisidagi takliflari 1-ilovaga* (1-1 — 1-14-son) muvofiq maʼqullansin.

2. Mintaqalarda xorijiy investitsiyalar ishtirokidagi korxonalarni tashkil etish va ularning faoliyatini muvofiqlashtirish boʻyicha 2-ilovaga* muvofiq tarkibda idoralararo ishchi guruhi tuzilsin.

Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari ikki hafta muddatda Makroiqtisodiyot va statistika vazirligi, Adliya vazirligi, Davlat mulki qoʻmitasi, Tashqi iqtisodiy aloqalar vazirligi, Tovar ishlab chiqaruvchilar va tadbirkorlar palatasi, Dehqon va fermer xoʻjaliklari uyushmasi, “Oʻzbekinvest” va “Oʻzinvestloyiha” kompaniyalarining hududiy boʻlinmalari ishtirokidagi doimiy ishlovchi ishchi guruhlarini tashkil etsinlar.

Idoralararo ishchi guruhi hududiy ishchi guruhlari bilan birgalikda respublika mintaqalarida xorijiy investitsiyalar ishtirokidagi korxonalarni tashkil etish boʻyicha 1-ilovada keltirilgan takliflarning doimiy monitoringini oʻrnatsin va ularning amalga oshirilishini har chorakda koʻrib borsin.

3. Qishloq joylarida yangidan tashkil etilayotgan xorijiy investitsiyalar ishtirokidagi ishlab chiqarish korxonalari ishlab chiqarishni boshlagan vaqtdan boshlab uch yil muddatga daromad (foyda) soligʻi toʻlashdan ozod qilinsin.

Belgilansinki, koʻrsatib oʻtilgan qoʻshma korxonalar uchun koʻrsatilgan muddat tugagandan keyingi ikki yil davomida daromad (foyda) soligʻi stavkasi amaldagi stavkaning 50 foizi miqdorida belgilanadi.

4. Oʻzbekiston Respublikasi Tashqi ishlar vazirligi, Ichki ishlar vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining buyurtmalari boʻyicha qoʻshma ishlab chiqarishlarni tashkil etishda qatnashayotgan xorijiy mutaxassislarga koʻp martalik vizalar berishni va ularni uzaytirib berishni, shuningdek, vaqtinchalik roʻyxatga olishni va vaqtinchalik roʻyxatda turishni uzaytirib berishni taʼminlasinlar.

5. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.