Oʻzbekiston Respublikasi Prezidentining “Soliq maʼmuriyatchiligini tubdan takomillashtirish, soliqlar va boshqa majburiy toʻlovlarning yigʻiluvchanligini oshirish chora-tadbirlari toʻgʻrisida” 2017-yil 18-iyuldagi PF-5116-sonli Farmoniga muvofiq:

1. Oʻzbekiston Respublikasi Prezidentining ayrim hujjatlariga ilovaga muvofiq oʻzgartishlar kiritilsin.

2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-sonli Farmonining 7-bandi quyidagi tahrirda bayon etilsin:

“7. 2007-yilning 1-oktabridan 2018-yilning 1-yanvarigacha aholiga pullik tibbiy xizmatlar koʻrsatuvchi (stomatologiya va kosmetologiya xizmatlari bundan mustasno) tibbiyot muassasalari tibbiy xizmatlar qismida barcha turdagi soliqlar toʻlashdan hamda Respublika yoʻl jamgʻarmasiga va Oʻzbekiston Respublikasi Moliya vazirligi huzuridagi budjetdan tashqari taʼlim va tibbiyot muassasalarining moddiy-texnika bazasini rivojlantirish jamgʻarmasiga majburiy ajratmalar toʻlashdan ozod qilinsin, boʻshaydigan mablagʻlar tibbiyot muassasasini zamonaviy tibbiy uskunalar bilan jihozlashga maqsadli yoʻnaltirilsin.

Ushbu bandning birinchi xatboshida koʻrsatilgan soliq imtiyozlarini qoʻllanish maqsadida, hisobot davri yakunlari boʻyicha tibbiy xizmatlar koʻrsatish (stomatologiya va kosmetologiya xizmatlari bundan mustasno) asosiy faoliyat turi boʻlmish yuridik shaxslar tibbiyot muassasalari jumlasiga kiradi. Bunda yuqorida aytib oʻtilgan imtiyozlar, agarda tibbiy xizmatlar koʻrsatish asosiy faoliyat turi boʻlsa, boshqa daromadlarga ham joriy etiladi”.

2. “Oʻzbekiston Respublikasi Prezidentining ayrim hujjatlariga oʻzgartish va qoʻshimchalar kiritish toʻgʻrisida” Oʻzbekiston Respublikasi Prezidentining 2017-yil 25-apreldagi PF-5027-sonli Farmoni ilovasining 10-bandi chiqarib tashlansin.

3. Oʻzbekiston Respublikasi Prezidentining “Sogʻliqni saqlash sohasida xususiy sektorni yanada rivojlantirish chora-tadbirlari toʻgʻrisida” 2017-yil 1-apreldagi PQ-2863-sonli qarorida:

a) 8-bandida:

birinchi xatboshidagi “xorijiy investorlar ishtirokidagi xususiy tibbiyot muassasalari” soʻzlari “xorijiy investorlar ishtirokidagi xususiy tibbiyot muassasalari tibbiy xizmatlar qismida” soʻzlari bilan almashtirilsin”;

mazmuni quyidagicha toʻrtinchi xatboshi bilan toʻldirilsin:

“Ushbu bandning birinchi xatboshida koʻrsatilgan soliq imtiyozlarini qoʻllanish maqsadida, hisobot davri yakunlari boʻyicha tibbiy xizmatlar koʻrsatish (stomatologiya va kosmetologiya xizmatlari bundan mustasno) asosiy faoliyat turi boʻlmish yuridik shaxslar tibbiyot muassasalari jumlasiga kiradi. Bunda yuqorida aytib oʻtilgan imtiyozlar, agarda tibbiy xizmatlar koʻrsatish asosiy faoliyat turi boʻlsa, boshqa daromadlarga ham joriy etiladi”;

toʻrtinchi xatboshi beshinchi xatboshi deb hisoblansin;

b) 9-bandi quyidagi tahrirda bayon etilsin:

“9. Qishloq joylarda tibbiy xizmatlar koʻrsatish sohasida yangidan tashkil etiladigan (stomatologiya va kosmetologiya xizmatlari bundan mustasno) mikrofirmalar va kichik korxonalar davlat roʻyxatiga olingan kundan boshlab 10 yil muddatga tibbiy xizmatlar qismida yagona soliq toʻlovidan ozod etilsin”.