Sogʻliqni saqlashni isloh qilish davlat dasturlari doirasida respublikada aholiga dermatovenerologik tibbiy yordam koʻrsatishning yagona vertikal birlashtirilgan tizimi tashkil etilgan. Dermatovenerologiya xizmati muassasalarini zamonaviy, yuqori texnologiyali tibbiy asbob-uskunalar bilan jihozlash boʻyicha ishlar amalga oshirilmoqda, dermatovenerologiya sohasida professional kadrlar tayyorlaydigan ilmiy maktab tashkil etilgan.

Dermatovenerologiya xizmati amaliyotiga doimiy asosda dermatovenerologik kasalliklarning oldini olish, ularni aniqlash va davolashning zamonaviy usullari tatbiq etilmoqda, bu tanosil va terining yuqumli kasalliklarini aniqlashni 15 foizga, surunkali dermatozlarni aniqlashni 37 foizga oshirishga imkon yaratdi. Aholi hayot tarzining oʻsishi fonida teri kasalliklari asoratlarining oldini olish va ularni davolash maqsadida tibbiy kosmetologiya yordamini rivojlantirish zaruriyati oshdi.

Shu bilan birga, Butunjahon sogʻliqni saqlash tashkilotining maʼlumotlariga koʻra butun dunyoda teri kasalliklari va jinsiy yoʻl orqali yuquvchi infeksiyalarga chalingan bemorlar sonining oʻsishi saqlanib qolmoqda.

Aholi oʻrtasida dermatovenerologik kasalliklarning oldini olish, ularni barvaqt aniqlash, ilgʻor diagnostika usullarini tatbiq etish va davolashning samarali tizimini tashkil qilish, tibbiy kosmetologiyani rivojlantirish hamda dermatovenerologiya xizmatining moddiy-texnika bazasini va kadrlar potensialini mustahkamlash maqsadida Vazirlar Mahkamasi qaror qiladi:

1. Quyidagilar dermatovenerologiya xizmatini yanada rivojlantirishning asosiy yoʻnalishlari etib belgilansin:

uning tarkibini takomillashtirish, dermatovenerologik kasalliklar va ular asoratlarining oldini olish, ularni aniqlash va davolashning zamonaviy usullarini ishlab chiqish va tatbiq qilish;

jahon standartlari talablarini hisobga olgan holda respublika dermatovenerologiya xizmatining meʼyoriy bazasini takomillashtirish;

dermatovenerologiya xizmatining tibbiy muassasalari moddiy-texnika bazasini mustahkamlash, qayta tiklash va mukammal taʼmirlashni amalga oshirish, ularni zamonaviy tibbiy asbob-uskunalar bilan taʼminlash orqali zamonaviylashtirish;

aholining zamonaviy yuqori texnologiyali diagnostika va davolash usullaridan foydalanishini yaxshilash, dermatovenerologik kasalliklarni davolashda yuqori samaraga erishish;

kadrlar potensialini mustahkamlash va dermatovenerologik kasalliklarning oldini olish, ularni aniqlash va davolash sohasida yurtimizda oʻtkaziladigan ilmiy tekshirishlar spektrini kengaytirish, jinsiy yoʻl orqali yuquvchi infeksiyalar, dermatologik kasalliklar va ularning asoratlari rivojlanishini oʻrganishga yoʻnaltirilgan fundamental, amaliy va innovatsion ilmiy tekshirishlar oʻtkazish, ularni sogʻliqni saqlash amaliyotiga tatbiq qilish;

yetakchi chet el tibbiy muassasalari va markazlari bilan dermatovenerologiya va kosmetologiya sohasida xalqaro hamkorlikni kengaytirish va mustahkamlash, toʻplangan tajriba, maʼlumot va mutaxassislar bilan keng miqyosda almashishni taʼminlash.

2. Oʻzbekiston Respublikasi Sogʻliqni saqlash vazirligi, Iqtisodiyot vazirligi va Moliya vazirligining 2018-yil 1-yanvardan boshlab quyidagilarni tashkil etish toʻgʻrisidagi taklifi qabul qilinsin:

viloyat markazlaridan uzoqda joylashgan aholini toʻliq qamrab olishni hisobga olgan holda Bekobod shahri, Denov, Toʻrtkoʻl va Yangiqoʻrgʻon tumanlarida tumanlararo teri-tanosil kasalliklari dispanseri;

Respublika ixtisoslashtirilgan dermatologiya va venerologiya ilmiy-amaliy tibbiyot markazi tarkibidagi yuridik shaxs shaklida boʻlmagan, xodimlar soni 12 shtat birligidan koʻp boʻlmagan, dermatovenerologiya va tibbiy kosmetologiya eksperimental ilmiy laboratoriyasi (keyingi oʻrinlarda eksperimental laboratoriya deb ataladi).

3. Belgilab qoʻyilsinki, eksperimental laboratoriya:

dermatovenerologiya va tibbiy kosmetologiya sohasida zamonaviy ilmiy yutuqlarni rivojlantirish va sogʻliqni saqlash amaliyotiga tatbiq qilish boʻyicha muvofiqlashtirish-uslubiy ishlarni, dermatovenerologik kasalliklar va ular asoratlarining oldini olish samarali dasturlarini ishlab chiqish orqali epidemiologik holat monitoringini taʼminlaydi;

laboratoriyaning ishlashi va uning moddiy-texnika bazasini rivojlantirishga budjetdan maqsadli ajratilgan pul mablagʻlari, Oʻzbekiston Respublikasi Fan va texnologiyalar agentligi tomonidan oʻtkaziladigan ilmiy loyihalar tanlovlari natijalari boʻyicha ajratiladigan grantlar, xalqaro moliya institutlari va donor tashkilotlar grantlari hamda qonunchilikda taqiqlanmagan boshqa manbalar hisobiga ish yuritadi.

4. 2017 — 2021-yillarda Oʻzbekiston Respublikasida dermatovenerologiya xizmatini rivojlantirish chora-tadbirlari Dasturi (keyingi oʻrinlarda Chora-tadbirlar dasturi deb ataladi) ilovaga* muvofiq maʼqullansin.

5. Oʻzbekiston Respublikasi Sogʻliqni saqlash vazirligi bir oy muddatda:

dermatovenerologiya va kosmetologiya sohasida tibbiy muassasalar faoliyatini yagona uslubiy vertikal boshqarishni tashkil etishni nazarda tutuvchi Oʻzbekiston Respublikasining dermatovenerologiya xizmati tashkiliy tuzilmasini;

Respublika ixtisoslashtirilgan dermatologiya va venerologiya ilmiy-amaliy tibbiyot markazi tuzilmasini;

hududiy va tumanlararo teri-tanosil kasalliklari dispanserlarining namunaviy tuzilmasini;

dermatovenerologiya va tibbiy kosmetologiya eksperimental ilmiy laboratoriyasi toʻgʻrisidagi nizomni va uning tuzilmasini tasdiqlasin.

6. Belgilab qoʻyilsinki, Chora-tadbirlar dasturini amalga oshirish bilan bogʻliq boʻlgan xarajatlar “Sogʻliqni saqlash” sohasi boʻyicha Oʻzbekiston Respublikasi Davlat budjetidan ajratilgan mablagʻlar doirasida amalga oshiriladi.

7. Belgilab qoʻyilsinki, Chora-tadbirlar dasturi ilovasida koʻrsatilgan Dermatovenerologiya xizmatining tibbiy muassasalarini qurish, qayta tiklash va mukammal taʼmirlash ishlarini moliyalashtirish Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasining mablagʻlari hisobiga amalga oshiriladi.

8. Oʻzbekiston Respublikasi Sogʻliqni saqlash vazirligi Tashqi ishlar vazirligi, Iqtisodiyot vazirligi va Investitsiyalar boʻyicha davlat qoʻmitasi bilan birgalikda — Chora-tadbirlar dasturini amalga oshirish uchun chet davlatlarning, xalqaro moliyaviy institutlarning imtiyozli kreditlari (qarzlari) va grantlarini hamda budjetdan tashqari boshqa mablagʻlarni jalb etish boʻyicha zarur choralar koʻrsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Oʻzbekiston Respublikasi sogʻliqni saqlash vaziri A.K. Shadmanov zimmasiga hamda Vazirlar Mahkamasining Sogʻliqni saqlash, ekologiya, atrof muhitni muhofaza qilish, jismoniy tarbiya va sport masalalari axborot-tahlil departamentiga yuklansin.