Naqd pulsiz hisob-kitob tizimini rivojlantirishni yanada ragʻbatlantirish, plastik kartochkalarga, terminallarga va tegishli uskunalarga boʻlgan talab-ehtiyojlarni qondirish, shuningdek, pul mablagʻlarining bankdan tashqari aylanmasini kamaytirish maqsadida:

1. Oʻzbekiston Respublikasi Prezidentining “Plastik kartochkalar asosida naqd pulsiz hisob-kitob tizimini yanada rivojlantirishga oid qoʻshimcha chora-tadbirlar toʻgʻrisida” 2006-yil 3-avgustdagi PQ-433-sonli qarori 1-bandining ikkinchi xatboshida nazarda tutilgan bojxona imtiyozlarining amal qilish muddati 2020-yilning 1-yanvariga qadar uzaytirilsin.

2. Oʻzbekiston Respublikasi Prezidentining “Tijorat banklarining moliyaviy barqarorligini yanada oshirish va ularning resurs bazasini rivojlantirish chora-tadbirlari toʻgʻrisida” 2015-yil 6-maydagi PQ-2344-sonli qarori 4-bandining uchinchi xatboshida nazarda tutilgan imtiyozlarning amal qilishi chakana toʻlov tizimlarining protsessing markazlariga joriy etilsin.

3. Bank mikroprotsessor plastik kartochkalari, toʻlov terminallari ishlab chiqaruvchilar, chakana toʻlov tizimlarining protsessing markazlari olib kirilayotgan xomashyo, sarflanuvchi va butlovchi materiallardan, dasturiy taʼminot vositalaridan hamda plastik kartochkalar, terminallar, bankomatlar, infokioskalar va boshqa uskunalar ishlab chiqarish uchun litsenziyalardan samarali va qatʼiyan maqsadli foydalanishni hamda ana shular vositasida hisob-kitoblar amalga oshirilishini taʼminlasin, kelgusida ularni ishlab chiqarish mahalliylashtirilsin.

4. Oʻzbekiston Respublikasi Davlat soliq qoʻmitasi Davlat bojxona qoʻmitasi bilan birgalikda olib kirilayotgan xom ashyo, sarflanuvchi va butlovchi materiallar, dasturiy taʼminot vositalari va litsenziyalardan maqsadli foydalanilishi ustidan qattiq nazorat oʻrnatsin.

Belgilab qoʻyilsinki, imtiyozlar qoʻllanilgan holda olib kirilayotgan xom ashyo, sarflanuvchi va butlovchi materiallar, dasturiy taʼminot vositalari va litsenziyalardan maqsadga xilof tarzda foydalanilgan taqdirda, bojxona imtiyozlari berilishi munosabati bilan bojxona toʻlovlarining toʻlanmay qolgan summasi qonun hujjatlarida nazarda tutilgan moliyaviy sanksiyalarni qoʻllangan holda Oʻzbekiston Respublikasining Davlat budjetiga undirib olinadi.

5. Oʻzbekiston Respublikasi Markaziy banki va tijorat banklari Oʻzbekiston Banklari uyushmasi bilan birgalikda:

isteʼmol ehtiyojlari uchun moʻljallangan tovarlar (ishlar, xizmatlar)ni xarid qilish uchun plastik kartochkalardan foydalanish asosida turli xil kredit mahsulotlari joriy etilishini;

plastik kartochkalardan foydalanuvchilarning ularni ishlatishdan manfaatdorligini oshirish va ragʻbatlantirishga yoʻnaltirilgan turli xil bonus, diskont va ragʻbatlantiruvchi dasturlarni savdo-servis tashkilotlari bilan birgalikda tatbiq etish amaliyoti kengaytirilishini;

samarali, zamonaviy va qulay toʻlov vositasi sifatida plastik kartochkalardan foydalanish afzalliklarini ommaviy axborot vositalarida keng yoritishga yoʻnaltirilgan tashkiliy tadbirlar tizimli asosda oʻtkazilishini taʼminlasinlar.

6. Oʻzbekiston Respublikasi Prezidentining baʼzi hujjatlariga ilovaga muvofiq oʻzgartish va qoʻshimcha kiritilsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

1. Oʻzbekiston Respublikasi Prezidentining “Plastik kartochkalar asosida naqd pulsiz hisob-kitob tizimini yanada rivojlantirishga oid qoʻshimcha chora-tadbirlar toʻgʻrisida” 2006-yil 3-avgustdagi PQ-433-sonli qarorining 1-bandi quyidagi tahrirda bayon etilsin:

“1. Belgilansinki, bank mikroprotsessor plastik kartochkalari va toʻlov terminallarini ishlab chiqaruvchi yuridik shaxslar 2020-yilning 1-yanvarigacha bank mikroprotsessor plastik kartochkalari, toʻlov terminallari, bankomatlar, infokioskalar va plastik kartochkalar yordamida hisob-kitob qilish uchun foydalaniladigan boshqa uskunalarni ishlab chiqarish uchun zarur boʻlgan xom ashyo, sarflanuvchi va butlovchi materiallar, dasturiy taʼminot va litsenziyalar import qilinganida bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod etiladi”.

2. Oʻzbekiston Respublikasi Prezidentining “Tijorat banklarining moliyaviy barqarorligini yanada oshirish va ularning resurs bazasini rivojlantirish chora-tadbirlari toʻgʻrisida” 2015-yil 6-maydagi PQ-2344-sonli qarori 4-bandidagi uchinchi xatboshida “banklari” soʻzidan keyin “va chakana toʻlov tizimlarining protsessing markazlari” soʻzlari bilan toʻldirilsin.