Kimyo sanoati korxonalari va tashkilotlarini boshqarish tizimini takomillashtirish hamda ular faoliyatining iqtisodiy samaradorligini oshirish, tarmoq korxonalarini aksiyalashtirish jarayonlarini chuqurlashtirish, kimyo ishlab chiqarishini rivojlantirish, texnika bilan qayta jihozlash va zamonaviylashtirish uchun xorijiy investitsiyalarni keng jalb etish maqsadida Vazirlar Mahkamasi qaror qiladi:

1. “O‘zkimyosanoat” uyushmasi rahbariyatining, shuningdek tarmoq korxonalari rahbarlarining, mamlakatda isloh qilish va xususiylashtirish bo‘yicha amalga oshirilayotgan umumiy strategiyaga qaramay, kimyo sanoatining yetakchi korxonalarini aksiyalashtirish, xususiylashtirishdan oldin reklama qilish hamda chet el va mamlakatimiz investorlarini jalb etish bo‘yicha zarur chora-tadbirlarni amalga oshirish borasida hanuzgacha amaliy qadam qo‘yishmaganligi mutlaqo yo‘l qo‘yib bo‘lmaydigan hol hisoblansin.

2. O‘zbekiston Respublikasi Prezidentining 2000-yil 27-dekabrdagi F-1313-son farmoyishi bilan tuzilgan kimyo tarmog‘ini boshqarish tizimini va qishloq xo‘jaligini kimyoviy preparatlar bilan ta’minlashni takomillashtirish bo‘yicha maxsus komissiyaning ochiq aksiyadorlik jamiyati shaklidagi “O‘zkimyosanoat” davlat-aksiyadorlik kompaniyasi “O‘zkimyosanoat” DAKni tashkil etish to‘g‘risidagi takliflariga rozilik berilsin.

O‘zbekiston kimyo sanoati korxonalari uyushmasi “O‘zkimyosanoat” uyushmasi qatnashchilari tomonidan uyushmani tugatish to‘g‘risida qaror qabul qilinganligi ma’lumot uchun qabul qilinsin.

5. Kimyo tarmog‘ini boshqarish tizimini va qishloq xo‘jaligini kimyoviy preparatlar bilan ta’minlashni takomillashtirish bo‘yicha maxsus komissiya, O‘zbekiston Respublikasi Davlat mulki qo‘mitasi “O‘zkimyosanoat” davlat-aksiyadorlik kompaniyasi bilan birgalikda belgilangan tartibda:

2001-yil 1-maygacha asosiy fondlarni 2001-yil 1-yanvargacha bo‘lgan holati bo‘yicha qayta baholashni hisobga olgan holda “O‘zkimyosanoat” davlat-aksiyadorlik kompaniyasining ustav fondini shakllantirsinlar, davlat mulki bo‘lgan aksiyalar paketini shakllangan ustav fondining 51 foizi miqdorida saqlab qolgan holda emissiya prospekti ro‘yxatdan o‘tkazilishini ta’minlasinlar;

3-ilovaga* muvofiq kompaniya korxonalarini xorijiy investorlarni jalb qilgan holda bosqichma-bosqich ochiq aksiyadorlik jamiyatlariga aylantirish tadbirlarini belgilangan tartibda amalga oshirsinlar.

2001-yilda birja va birjadan tashqari bozorlarda “Sharq taronasi” aksiyadorlik jamiyati aksiyalarining davlat ulushlari sotilishini ta’minlasinlar;

2001-2002-yillarda “O‘zkimyosanoat” davlat-aksiyadorlik kompaniyasining 4-ilovaga* muvofiq ijtimoiy infratuzilma obyektlarini sotsinlar, shu jumladan xususiy mulk sifatida sotsinlar.

6. O‘zbekiston Respublikasi Davlat aktivlarini boshqarish agentligi va “O‘zkimyosanoat” aksiyadorlik jamiyatiga kimyo sanoati korxonalarini xususiylashtirish uchun xorijiy konsalting va baholash kompaniyalarini, moliyaviy agentliklarni jalb etishga ruxsat berilsin, buning uchun zarur mablag‘lar ajratilsin.

8. “O‘zkimyosanoat” aksiyadorlik jamiyatiga maqsadli Kimyo sanoati tashkilotlarini rivojlantirish va qo‘llab-quvvatlash jamg‘armasini (keyingi o‘rinlarda “Jamg‘arma” deb ataladi) tashkil etish huquqi berilsin, Jamg‘arma mablag‘lari:

“O‘zkimyosanoat” aksiyadorlik jamiyatining soliqlar va majburiy to‘lovlar to‘langandan keyin qolgan sof foydasining bir qismi;

“O‘zkimyosanoat” aksiyadorlik jamiyati boshqaruvida bo‘lgan tashkilotlar aksiyalarini sotishdan, shuningdek kompaniyaning o‘z aksiyalarini sotishdan tushgan mablag‘lar, budjetga yo‘naltiriladigan operatsiya xarajatlari va ulushlar bundan mustasno;

qonunchilikka zid bo‘lmagan boshqa tushumlar hisobiga shakllantiriladi.

Belgilansinki, Jamg‘arma mablag‘laridan faqat:

investitsiya loyihalarini, kimyo sanoati korxonalarini zamonaviylashtirish, rekonstruksiya qilish va texnika bilan qayta jihozlashni shu jumladan, “O‘zkimyosanoat” AJning tijorat tashkilotlari ustav kapitalidagi ulushini shakllantirishda;

eksportga yo‘naltirilgan ishlab chiqarishlarni tashkil etish va rivojlantirishni;

mahsulotlarning yangi turlarini o‘zlashtirishni, shuningdek, O‘zbekiston Respublikasi Hukumati qarorlariga muvofiq, ilg‘or va innovatsion ishlanmalarni, ilmiy-tadqiqot va tajriba-konstruktorlik ishlarini mablag‘ bilan ta’minlashda maqsadli foydalaniladi.

Jamg‘armaning foydalanilgan mablag‘lari qo‘shimcha aksiyalarni chiqarish va davlatga joylashtirish orqali “O‘zkimyosanoat” AJning ustav kapitaliga kapitallashtirilishi belgilansin;

Moliya vazirligi “O‘zkimyosanoat” davlat-aksiyadorlik kompaniyasi bilan birgalikda Kimyo sanoati tashkilotlarini rivojlantirish va qo‘llab-quvvatlash jamg‘armasi mablag‘larini shakllantirish va ulardan maqsadli foydalanish tartibini bir oy muddatda ishlab chiqsin va tasdiqlasin.

9. O‘zbekiston Respublikasi Davlat mulki qo‘mitasi, istisno tariqasida, 4-ilovaga muvofiq obyektlarni xususiylashtirishdan tushgan mablag‘larni (qonunchilikka muvofiq korxonalar va Davlat mulki qo‘mitasi ixtiyorida qoldiriladigan mablag‘lardan tashqari), shuningdek “Sharq taronasi”, “Laktam” aksiyadorlik jamiyatlari va “Kimyosavdota’minot” yopiq aksiyadorlik jamiyatidagi davlatga tegishli aksiyalarni sotishdan tushgan mablag‘larni “O‘zkimyosanoat” davlat-aksiyadorlik kompaniyasi ixtiyoriga yo‘naltirsin, ko‘rsatib o‘tilgan mablag‘lardan Kimyo sanoati tashkilotlarini rivojlantirish va qo‘llab-quvvatlash jamg‘armasi orqali maqsadli foydalanilsin.

10. Belgilansinki:

“O‘zkimyosanoat” davlat-aksiyadorlik kompaniyasi “O‘zkimyosanoat” uyushmasi bilan tuzilgan shartnomalar va majburiyatlar bo‘yicha huquqiy voris hisoblanadi;

“O‘zkimyosanoat” aksiyadorlik jamiyati daromadlari (foydasi) kompaniya aksiyalarini sotish, mol-mulki kompaniyaning ustav fondiga to‘liq kirgan tashkilotlarning ajratmalari (ular sof foydasining 50 foizigacha miqdorda), shuningdek, amaldagi qonunchilikka muvofiq boshqa daromadlardan shakllantiriladi;

“O‘zkimyosanoat” davlat-aksiyadorlik kompaniyasi boshqaruvi ijro etuvchi apparatining xarajatlari 2002-yil 1-yanvargacha kompaniya tarkibiga kiruvchi korxonalar va tashkilotlarning ajratmalari hisobiga, keyinchalik — qonunchilikka muvofiq kompaniya daromadlari hisobiga mablag‘ bilan ta’minlanadi.

14. “O‘zkimyosanoat” davlat-aksiyadorlik kompaniyasi O‘zbekiston Respublikasi Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2002-yil 1-yanvargacha qabul qilish-topshirish dalolatnomalari asosida uy-joy fondi, poliklinikalar va kommunal sohaning muhandislik kommunikatsiyalari mahalliy hokimiyat va boshqaruv organlariga belgilangan tartibda berilishini ta’minlasin.

15. Toshkent shahridagi “O‘zKimyoloyihaITI” institutini va “O‘zKimyoloyihaITI” institutining Chirchiqdagi filialini birlashtirish va ularning negizida Chirchiq shahar, Toshkent ko‘chasi, 4-uyda joylashgan “O‘zKimyoloyihaITI” yagona loyiha-texnologiya institutini tashkil etish maqsadga muvofiq deb hisoblansin.

17. O‘zbekiston Respublikasi Hukumatining 8-ilovaga muvofiq qarorlari o‘z kuchini yo‘qotgan deb hisoblansin.

O‘zbekiston Respublikasi Adliya vazirligi Hukumat qarorlariga mazkur qarordan kelib chiqadigan o‘zgartirishlar va qo‘shimchalar kiritish to‘g‘risida ikki oy muddatda takliflar kiritsin.

18. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T.Sultonov zimmasiga yuklansin.

1. O‘zbekiston Respublikasi Vazirlar Mahkamasining “O‘zbekiston kimyo sanoati korxonalari (“O‘zkimyosanoat”) uyushmasini tashkil etish va uning faoliyati masalalari to‘g‘risida” 1994-yil 19-martdagi 149-son qarori.

2. Vazirlar Mahkamasining “1998—2002-yillarda O‘zbekiston kimyo sanoati korxonalarini kompleks rivojlantirish dasturi to‘g‘risida” 1998-yil 25-martdagi 129-son qarorining 3-bandi.