Chimyon—Chorvoq zonasi tabiiy boyliklarini va ekologik tozaligini toʻliq saqlash, hududni oʻzlashtirishga kompleks va izchillik bilan yondoshishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining 1999-yil 5-avgustdagi 366-f-son farmoyishi bilan tuzilgan Ishchi guruh, Toshkent viloyati hokimligi va Oʻzbekiston Respublikasi Sogʻliqni saqlash vazirligining Chimyon—Chorvoq mintaqasi hududini uning tabiiy-iqlim sharoitlariga koʻra kurort va dam olish maqsadlari uchun maxsus muhofaza qilinadigan tabiiy hudud sirasiga kiritish toʻgʻrisidagi taklifiga rozilik berilsin.

2. Chimyon—Chorvoq hududini kompleks va izchillik bilan oʻzlashtirishga doir birinchi navbatdagi chora-tadbirlar dasturi 1-ilovaga*muvofiq tasdiqlansin.

3. Oʻzbekiston Respublikasi Iqtisodiyot vazirligi:

2001—2003-yillar investitsiya dasturida 2-ilovaga* muvofiq Chirchiq shahridagi tozalash inshootlarni kengaytirishni, Chimyonsoy, Chorvoq—Baqachoʻl, Chorvoq—Gʻazalkent kanalizatsiya kollektorlarini rekonstruksiya qilishni, Baqachoʻl muhandislik inshootlari qurilishini, 2003—2005-yillar investitsiya dasturida esa — chiqarib yuboruvchi kanalizatsiya tarmoqlari qurilishini;

2001—2003-yillar investitsiya dasturida 3-ilovaga* muvofiq xoʻjalik-ichimlik suv bilan taʼminlash magistral suv oqizish tarmogʻi, suv tozalash uzellari, nasos stansiyalari, Yangiqoʻrgʻon daryosidan suv olish va suv oqizish inshootlari qurilishini hamda mahalliy buloq suvlari manbalaridan suv olish inshootini, 2003—2005-yillar investitsiya dasturida esa — suvni, isteʼmolchilarga yetkazib berish tarmoqlarini rekonstruksiya qilishni nazarda tutsin.

Toshkent viloyat hokimligi tozalash inshootlari, magistral kanalizatsiya kollektorlari va suv oqizish tarmogʻi, gazlashtirish tarmoqlari hamda gaz taqsimlash stansiyalari qurilishi boʻyicha buyurtmachi etib belgilansin. Bosh pudratchi tender asosida aniqlanadi.

4. Belgilansinki:

2001-yildan boshlab tozalash inshootlari, magistral kanalizatsiya kollektorlari budjet mablagʻlari hisobiga;

kanalizatsiyaning chiqarib yuboruvchi tarmoqlari, suv taʼminoti, gazlashtirish va energiya taʼminoti obyektlari qurilishni amalga oshiruvchilar va Chimyon—Chorvoq zonasidagi obyektlar egalarining ulushli mablagʻlari hisobiga;

magistral kanalizatsiya kollektoridan gidroquruvchilarning Chorvoq posyolkasigacha kanalizatsiya tizimlari Oʻzbekiston Respublikasi Energetika va elektrlashtirish vazirligining mablagʻlari hisobiga quriladi.

5. Belgilansinki, 4-ilovaga* muvofiq qurilishni amalga oshiruvchilarning va Chimyon—Chorvoq zonasidagi obyektlar egalarining ulushli mablagʻlari “Oʻzuyjoyjamgʻarmabank”ning maxsus hisob raqamida jamlanadi.

Toshkent viloyati va Toshkent shahar hokimliklari, Oʻzbekiston Respublikasi Iqtisodiyot vazirligi ulushli mablagʻlar toʻplanishi va jamlanishi uchun masʼul hisoblanadilar.

6. Toshkent viloyati va Toshkent shahar hokimliklari, Oʻzbekiston Respublikasi Davlat geologiya qoʻmitasi, “Oʻzgidromet” markazi, Favqulodda vaziyatlar vazirligi, sanatoriylar, pansionatlar, dam olish uylari va zonalari, bolalar sogʻlomlashtirish oromgohlari kempinglar va boshqa obyektlarni quruvchilar va ularning egalari bir oy muddatda barcha obyektlarni xatlovdan oʻtkazsinlar, Chimyon—Chorvoq zonasidagi obyektlar qurilishi yuzasidan mavjud loyiha-smeta hujjatlarini taftishdan oʻtkazsinlar va ularga tuzatishlar kiritsinlar hamda, 2000-yilning I choragida 5-ilovaga* muvofiq qurilishi tugallanmagan obyektlar qurilishini 2001—2005-yillarda tugallash yoki tiklash mumkin boʻlmagan taqdirda, ularni buzib tashlash toʻgʻrisida taklif kiritsinlar.

“Oʻzuyjoyjamgʻarmabank”, zaruriyat boʻlganda, qurilishni amalga oshiruvchilarga obyektlar qurilishini tugallash uchun belgilangan tartibda kredit resurslari ajratsin.

7. Toshkent viloyati hokimligi, “Davlatarxitektqurilish” qoʻmitasi, Oʻzbekiston Respublikasi Davlat tabiatni muhofaza qilish qoʻmitasi, “Oʻzgidromet” markazi, Sogʻliqni saqlash vazirligi:

Chimyon—Chorvoq hududida qurilish olib borish toʻgʻrisida ilgari qabul qilingan qarorlarni qaytadan koʻrib chiqsinlar. Zarur boʻlgan taqdirda tegishli obyektlar egalari bilan birgalikda ularni qayta joylashtirish masalasini ishlab chiqsinlar;

Chimyon—Chorvoq hududida va, ayniqsa, Chorvoq suv ombori sohillarida ekologik vaziyatga zarar yetkazuvchi va suvni ifloslantiruvchi, oʻzboshimchalik bilan qurilgan obyektlarni yoʻqotish masalasini qonunda belgilangan tartibda hal qilsinlar;

Chimyon—Chorvoq hududida ekologik vaziyatga zarar yetkazadigan har qanday sanoat, qishloq xoʻjaligi obyektlari va boshqa obyektlar qurilishini taqiqlasinlar.

8. Ushbu qarorning bajarilishini nazorat qilish va tashkil etish boʻyicha 6-ilovaga* muvofiq tarkibda Respublika shtabi tuzilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Isayev zimmasiga yuklansin.