Oʻzbekiston Respublikasining Konstitutsiyasiga, “Oʻzbekiston Respublikasining davlat mustaqilligining asoslari toʻgʻrisida”gi Qonunga, MDH davlatlarining boj siyosati prinsiplari toʻgʻrisida 1992-yil 13-martdagi Bitimga muvofiq hamda yagona davlat boj siyosatini oʻtkazish, respublikani iqtisodiy manfaatlari himoya qilinishini taʼminlash, narkotik moddalar, qurol-yarogʻ, oʻq-dori, portlovchi moddalar kontrabandasiga qarshi kurash samaradorligini oshirish, shuningdek taqiqlangan buyumlarning qonunga xilof ravishda olib kelinishi hamda moddiy va madaniy boyliklar olib chiqib ketilishini oldini olish maqsadida:

1. Oʻzbekiston Respublikasi Bojxona qoʻmitasi bilan Oʻzbekiston Respublikasi Ichki ishlar vazirligi huzuridagi tovar-moddiy boyliklar olib chiqib ketilishi ustidan nazorat qiluvchi Davlat inspeksiyasining Bosh boshqarmasi negizida Oʻzbekiston Respublikasining Davlat Bojxona qoʻmitasi tashkil etilib, u bevosita Oʻzbekiston Respublikasi Prezidenti huzuridagi Vazirlar Mahkamasiga boʻysundirilsin.

2. Qoraqalpogʻiston Respublikasida, viloyatlarda va Toshkent shahrida Davlat bojxona qoʻmitasining boshqarmalari tashkil etilsin va u bevosita Oʻzbekiston Respublikasining Davlat bojxona qoʻmitasiga boʻysundirilsin.

3. Belgilab qoʻyilsinki, Oʻzbekiston Respublikasining Davlat bojxona qoʻmitasi va uning joylardagi boʻlinmalari oʻzlarining amaliy faoliyati xalqaro huquq meʼyorlariga, Oʻzbekiston Respublikasining boshqa davlatlar bilan tuzgan bitimlariga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Oʻzbekiston Respublikasi Oliy Kengashi va Oʻzbekiston Respublikasi Prezidenti huzuridagi Vazirlar Mahkamasining qarorlariga amal qiladilar.

4. Oʻzbekiston Respublikasi Davlat bojxona qoʻmitasining asosiy vazifalari quyidagilardan iborat ekanligi belgilab qoʻyilsin:

berilgan huquqlar doirasida respublikaning iqtisodiy xavfsizligini puxta taʼminlash, boshqa davlatlar bilan savdo va valyuta-moliya munosabatlarining bojga oid ishlarini tartibga solish tizimini takomillashtirish, Oʻzbekiston Respublikasining tashqi iqtisodiy aloqalarini rivojlantirishga koʻmaklashish;

Oʻzbekiston Respublikasining Vazirlar Mahkamasi belgilaydigan tartib miqdorda boj yigʻimlari, poshlinalar, soliqlar va boshqa toʻlovlarni respublika budjetiga oʻz vaqtida oʻtkazish;

bojxona ishlari masalalari boʻyicha respublikaning xalqaro hamkorlikda qatnashuvini taʼminlash, bojxona xizmati tarmoqlarini rivojlantirish va uning moddiy-texnika bazasini mustahkamlash, Oʻzbekiston Respublikasining bojxona statistikasini shakllantirish va yuritish;

respublikaning ichki bozorini muhofaza qilish, xomashyo, materiallar, mahsulot, qimmatbaho buyumlar va tovarlar, shuningdek madaniy va tarixiy meros buyumlari, maʼnaviy mulk obyektlari gʻayriqonuniy ravishda olib chiqib ketilishiga yoʻl qoʻymaslik;

kontrabandaga va bojxona qoidalari buzilishiga qarshi kurash, narkotik moddalar, ruhiyatga salbiy taʼsir qiluvchi va portlovchi moddalar, qurollar qonunga xilof ravishda muomalada boʻlishiga chek qoʻyish;

Oʻzbekiston Respublikasining bojxonaga oid qonunida belgilanadigan boshqa vazifalar.

5. Oʻzbekiston Respublikasining Davlat bojxona qoʻmitasi quyidagi huquqlarga ega:

— Oʻzbekiston Respublikasining qonunlariga muvofiq tovar-moddiy boyliklarni olib kelish hamda ularni olib chiqib ketishga doir bojxona qoidalarini har qanday buzish hollariga chek qoʻyish, kontrabanda buyumlarini boshqa moddiy boyliklarni musodara qilish;

— respublika Moliya vazirligi bilan birgalikda savdoga daxldor boʻlmagan muomalada Oʻzbekiston Respublikasi hududidan olib chiqib ketiladigan va unga olib kelinadigan buyumlarga boj poshlinalari miqdorlariga oʻzgartishlar kiritish;

— Moliya vazirligi va Markaziy bank bilan birgalikda Oʻzbekiston Respublikasidan olib chiqib ketiladigan valyutaning cheklangan meʼyorini koʻrib chiqish;

— Oʻzbekiston Respublikasining bojxona hududiga buyumlarni olib kelish hamda shu hududga vaqtincha olib kelingan buyumlarni olib chiqib ketish yuzasidan belgilangan muddatni uzaytirish;

— Oʻzbekiston Respublikasi hududida joylashgan (mulkchilik shaklidan, qaysi idoraga qarashli boʻlishidan qatʼi nazar), vazirliklardan, idoralardan, tashkilotlardan, mahalliy hokimiyat organlaridan, tashqi iqtisodiy faoliyatni qatnashchilaridan tashqi iqtisodiy faoliyatni boj-tarif nuqtai nazaridan tartibga solish vazifalarini hal qilish, yuklar va mol-mulkni bir joydan ikkinchi joyga olib borishda qonuniylikni belgilash, shuningdek tegishli boj toʻlovlari va yigʻimlarini respublika budjetiga toʻlash uchun buxgalteriya maʼlumotlari, hisobotlar, maʼlumotnomalar hamda boshqa materiallarni olish;

— respublika hududida roʻyxatga olingan tashqi iqtisodiy aloqalarning qatnashchilarini ular Oʻzbekiston Respublikasining bojga oid qonunlariga qanday rioya etayotganliklarini tekshirib turish;

— bojxona ishi masalalari boʻyicha MDH mamlakatlari hamda ajnabiy davlatlarning bojxona xizmatlari bilan hamkorlik qilish, respublika Hukumatining topshirigʻiga binoan bojga oid bitimlar va shartnomalarni imzolash.

6. Belgilab qoʻyilsinki, Oʻzbekiston Respublikasi Davlat bojxona qoʻmitasining amaldagi qonunlarga muvofiq qabul qilgan qarorlarini barcha korxonalar, tashkilotlar, muassasalar, mansabdor shaxslar va fuqarolar bajarishga majburdirlar.

7. Oʻzbekiston Respublikasi Davlat bojxona qoʻmitasining xodimlari oʻq otish qurolini, maxsus vositalar hamda yakka himoya vositalarini saqlash va olib yurish huquqiga va zarur hollarda ichki ishlar organlarining xodimlari uchun belgilangan qoidalarga muvofiq ularni qoʻllanish huquqiga egadirlar.

Oʻzbekiston Respublikasi Davlat bojxona qoʻmitasi tizimining xodimlari uchun maxsus kiyim-bosh joriy etilsin.

8. Oʻzbekiston Respublikasi ichki ishlar organlari xodimlari uchun belgilangan barcha huquqlar va imtiyozlar, xizmatni oʻtash, jumladan maxsus va shaxsiy unvonlar berish, mansab maoshlariga va koʻp yillik xizmatiga ustama haq toʻlash tartibi va shartlari Davlat bojxona qoʻmitasining xodimlariga tadbiq etiladi.

9. Bojxona qoʻmitasining hamda tovar-moddiy boyliklar olib chiqib ketilishi ustidan nazorat qiluvchi Davlat inspeksiyasi Bosh boshqarmasining va ularga qarashli hududiy organlarning balansida boʻlgan binolar, inshootlar, texnika, qurollar, avtotransport, aloqa vositalari va boshqa mol-mulk Oʻzbekiston Respublikasi Davlat bojxona qoʻmitasining tasarrufiga bepul topshirilsin.

10. Moddiy-texnika bazasini rivojlantirish, ijtimoiy dasturlarni taʼminlash va bojxona xizmatlarining xodimlariga moddiy yordam berish uchun Oʻzbekiston Respublikasi Davlat bojxona qoʻmitasining maxsus jamgʻarmasi tashkil etilsin.

Belgilab qoʻyilsinki, ushbu jamgʻarmaga asosli va qonuniy ravishda musodara qilingan tovar-moddiy boyliklar toʻla sotilib, budjetga tegishli toʻlovlar oʻtkazilgan taqdirda shulardan tushgan mablagʻning 20 foizi, shuningdek savdoga daxldor boʻlmagan muomalada boj yigʻimlari, poshlinalar tarzida, kontrabanda buyumlarini sotishda xizmat koʻrsatishdan olinadigan rejadan tashqari daromadlar hisobiga tashkil qilinadi.

11. Oʻzbekiston Respublikasining bojga oid qonuni qabul qilingunga qadar “Oʻzbekiston Respublikasida tashqi iqtisodiy faoliyatni ragʻbatlantirish, chet el investitsiyalarini jalb etish va himoya qilish choralari toʻgʻrisida” Oʻzbekiston Respublikasi Prezidentining 1992-yil 24-iyundagi Farmoni, shuningdek SSSR Bojxona kodeksining va “Boj tarifi toʻgʻrisida” SSSR qonunining ushbu Farmonga va Oʻzbekiston Respublikasi qonunlariga zid boʻlmagan qoidalariga amal qilinsin.

12. Oʻzbekiston Respublikasi Prezidentining “Oʻzbekiston Respublikasi Bojxona komitetini tashkil etish toʻgʻrisida” 1991-yil 25-oktabrda chiqargan Farmoni oʻz kuchini yoʻqotgan deb hisoblansin.

13. Oʻzbekiston Respublikasi Prezidenti huzuridagi Vazirlar Mahkamasi 15 kun muddat ichida Oʻzbekiston Respublikasi Davlat bojxona qoʻmitasining faoliyatini tashkil etish yuzasidan qaror qabul qilsin.