“Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 5-moddasiga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasida va uning tashqarisida gastrol-konsert faoliyatini, shuningdek toʻy, yubiley va boshqa tantanalarda konsert xizmati koʻrsatishni litsenziyalash toʻgʻrisidagi Nizom 1-ilovaga muvofiq;

Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini litsenziyalash toʻgʻrisidagi Nizom 2-ilovaga muvofiq tasdiqlansin.

2. Belgilab qoʻyilsinki, gastrol-konsert faoliyatini, shuningdek toʻy, yubiley va boshqa tantanalarga konsert xizmati koʻrsatishni hamda gramplastinkalar, audio-videokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini amalga oshirish huquqi uchun ushbu qarorning 1-bandida koʻrsatilgan nizomlar kuchga kirgungacha berilgan litsenziyalar ularning amal qilish muddati oʻtgungacha haqiqiy hisoblanadi.

3. Oʻzbekiston Respublikasi Vazirlar Mahkamasining “Estrada-qoʻshiqchilik sanʼatini yanada rivojlantirish toʻgʻrisida” 2001-yil 26-iyundagi 272-son va “Gastrol-konsert faoliyati sohasida soliq solishni va audio-videokassetalarni tarqatishni takomillashtirish chora-tadbirlari toʻgʻrisida” 2001-yil 29-iyundagi 285-son qaroriga, 3-ilovaga muvofiq oʻzgartirishlar kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Azizxoʻjayev zimmasiga yuklansin.

1. Ushbu Nizom Oʻzbekiston Respublikasida va uning tashqarisida gastrol-konsert faoliyatini, shuningdek toʻy, yubiley va boshqa tantanalarda konsert xizmati koʻrsatishni (keyingi oʻrinlarda konsert-tomosha faoliyati turlari deb yuritiladi) litsenziyalash tartibini belgilaydi.

2. Konsert-tomosha faoliyati turlarini litsenziyalash “Oʻzbeknavo” estrada birlashmasi (keyingi oʻrinlarda litsenziyalovchi organ deb yuritiladi) tomonidan amalga oshiriladi.

3. Konsert-tomosha faoliyati turlari yuridik va jismoniy shaxslar tomonidan amalga oshirilishi mumkin.

4. Konsert-tomosha faoliyati turlarini amalga oshirish huquqiga litsenziya 5 yil muddatga beriladi.

5. Konsert-tomosha faoliyati turlarini amalga oshirish huquqi uchun namunaviy (oddiy) litsenziyalar beriladi.

6. Litsenziya konsert-tomosha faoliyatining quyidagi turlariga beriladi:

a) Oʻzbekiston Respublikasida va uning tashqarisida gastrol-konsert faoliyatini amalga oshirish:

yakka ijrochi konserti (bitta ijrochining konsert dasturi);

bitta janrning ikki yoki undan koʻp ijrochisi ishtirokidagi konsert dasturi;

turli janr yoʻnalishlarining bir nechta ijrochilari ishtirokidagi konsert dasturi;

b) toʻylar, yubileylar va boshqa tantanalarda konsert xizmati koʻrsatish (restoranlar, xususiy uylar, qahvaxonalar va barlarda toʻy, yubiley va boshqa tantanalarga konsert xizmati koʻrsatish), shu jumladan koʻngilochar muassasalarda (klublar, diskotekalar, restoranlar, barlar va qahvaxonalarda) konsert xizmati koʻrsatish.

Oʻzbekiston Respublikasida va uning tashqarisidagi gastrol-konsert faoliyatini amalga oshirish huquqi uchun litsenziya, shuningdek toʻy, yubiley va boshqa tantanalarda konsert xizmati koʻrsatish huquqini ham beradi.

Litsenziya talabgorining arizasiga koʻra litsenziya umuman faoliyat turiga yoki uning bir qismiga berilishi mumkin.

7. Quyidagilar konsert-tomosha faoliyati turlarini amalga oshirishdagi litsenziya talablari va shartlari hisoblanadi:

konsert-tomosha faoliyatini amalga oshirish sohasidagi qonun hujjatlariga majburiy rioya qilish;

reyting guruhlaridan biri ijrochilarining litsenziyalovchi organ tomonidan tasdiqlanadigan mezonlarga va malaka talablariga muvofiqligi;

litsenziyalovchi organga oʻtkazilgan konsert-tomosha tadbirlari soni toʻgʻrisida litsenziyalovchi organ tomonidan belgilanadigan shakl boʻyicha har choraklik hisobotlar taqdim etish.

8. Litsenziya olish uchun litsenziya talabgori — yuridik shaxs litsenziyalovchi organga quyidagi hujjatlarni taqdim etadi:

a) litsenziya berish toʻgʻrisidagi ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami;

litsenziya talabgori amalga oshirishni moʻljallayotgan litsenziyalanadigan faoliyat turi.

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) litsenziyalovchi organ tomonidan litsenziya talabgori arizasi koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat;

g) ijrochida musiqa maʼlumoti mavjudligini, uning davlat mukofotlari, mukofotlar, sovrinlar va shu kabilarni olganligini tasdiqlovchi hujjatlar (guvohnomalar, attestatlar, diplomlar)ning tasdiqlangan nusxalari. Istisno hollarda (alohida iqtidor, talant yaqqol mavjud boʻlganda) Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi qaroriga koʻra litsenziya olishga hujjatlar musiqa maʼlumoti mavjudligi toʻgʻrisidagi hujjatlar nusxalarini taqdim qilmasdan qabul qilinishi mumkin.

d) litsenziya talabgori tomonidan tuzilgan ijrochilar repertuari toʻgʻrisidagi maʼlumotnoma;

e) litsenziya talabgorining malakasi toʻgʻrisida yanada yaqqolroq tasavvurni shakllantirish maqsadida litsenziya talabgori qoʻshimcha ravishda mustaqil taqdim etishni xohlaydigan boshqa hujjatlar.

9. Litsenziya talabgori — jismoniy shaxs litsenziya olish uchun litsenziyalovchi organga quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

familiyasi, ismi, otasining ismi, fuqaroning shaxsini tasdiqlovchi hujjatga doir maʼlumotlar;

litsenziya talabgori amalga oshirishni moʻljallayotgan litsenziyalanadigan faoliyat turi va mazkur faoliyat turi amalga oshiriladigan muddat;

b) litsenziyalovchi organ tomonidan litsenziya talabgori arizasi koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat;

v) 4x6 kattalikdagi 2 dona fotosurat;

g) ijrochida musiqa maʼlumoti mavjudligini, uning davlat mukofotlari, mukofotlar, sovrinlar va shu kabilarni olganligini tasdiqlovchi hujjatlar (guvohnomalar, attestatlar, diplomlar)ning notarial tasdiqlangan nusxalari. Istisno hollarda Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi qaroriga koʻra litsenziya olishga hujjatlar musiqa maʼlumoti mavjudligi toʻgʻrisidagi hujjatlar nusxalarini taqdim qilmasdan qabul qilinishi mumkin.

d) litsenziya talabgori tomonidan tuzilgan ijrochilar repertuari toʻgʻrisidagi maʼlumotnoma;

e) litsenziya talabgorining malakasi toʻgʻrisida yanada yaqqolroq tasavvurni shakllantirish maqsadida litsenziya talabgori qoʻshimcha ravishda mustaqil taqdim etishni xohlaydigan boshqa hujjatlar.

10. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

11. Hujjatlar litsenziya talabgori tomonidan litsenziyalovchi organga bevosita yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

Hujjatlar litsenziyalovchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda arizachiga yuboriladi (topshiriladi).

12. Ishonchsiz yoki notoʻgʻri maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

13. Litsenziya talabgorining litsenziya berish toʻgʻrisidagi arizasi koʻrib chiqilganligi uchun eng kam oylik ish haqining ikki baravari miqdorida yigʻim undiriladi.

Arizani koʻrib chiqqanlik uchun yigʻim summasi Milliy estrada sanʼatini rivojlantirish va muvofiqlashtirish kengashi huzurida tashkil etilgan Estrada sanʼatini rivojlantirish jamgʻarmasining depozit hisob raqamiga oʻtkaziladi. Litsenziya talabgori berilgan arizadan voz kechgan taqdirda toʻlangan yigʻim summasi qaytarib berilmaydi.

14. Konsert-tomosha faoliyati turlarini litsenziyalash ushbu Nizomga ilova qilinayotgan sxemaga muvofiq amalga oshiriladi.

15. Litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi barcha zarur hujjatlar bilan birga olingan kundan boshlab oʻn besh kundan oshmaydigan muddatda qabul qilinadi.

16. Litsenziyalar berish (muddatini uzaytirish) toʻgʻrisidagi hujjatlarni koʻrib chiqish, ular boʻyicha xulosalar tayyorlash Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi tomonidan amalga oshiriladi. Milliy estrada sanʼatini rivojlantirish va muvofiqlashtirish kengashi huzuridagi ijodiy koʻmaklashish vakillari guruhi majlislari oʻn besh kunda kamida bir marta oʻtkaziladi.

Litsenziya talabgorining barcha zarur hujjatlar bilan birgalikdagi arizasi ular qabul qilib olingan kunda Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhiga koʻrib chiqish uchun kiritiladi.

Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi taqdim etilgan hujjatlarni oʻn kundan oshmaydigan muddatda koʻrib chiqadi va ular boʻyicha litsenziya berish yoki berishni rad etish toʻgʻrisidagi xulosani tayyorlaydi. Xulosa Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi majlisi protokoli bilan tasdiqlanadi.

17. Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi litsenziya talabgorlari tomonidan taqdim etilgan hujjatlarni koʻrib chiqish jarayonida ijrochilarning malaka (kasb) sifatlarini baholaydi va ularni litsenziyalovchi organ tomonidan tasdiqlangan mezonlarga va malaka talablariga muvofiq muayyan (birinchidan toʻrtinchigacha) reyting guruhlariga kiritadi.

Reytingning toʻrtinchi guruhi berilgan taqdirda ijrochi faoliyatining birinchi yilida boshlangʻich stavka boʻyicha davlat boji toʻlanadi.

Litsenziyaning amal qilish muddatini uzaytirish yuzasidan ariza berilgan taqdirda ilgari reytingning toʻrtinchi guruhini olgan ijrochiga Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi tomonidan belgilangan tartibda yo reytingning uchinchi guruhi berilishi, yoxud tegishli davlat boji toʻlatilgan holda reytingning toʻrtinchi guruhi tasdiqlanishi, yoxud u malaka talablariga muvofiq boʻlmaganda uning bundan buyon konsert-tomosha faoliyati turlari bilan shugʻullanish huquqi rad etilishi mumkin.

18. Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi tomonidan vokalchi-solistga va uning ansambli aʼzolariga har birining malakasi va kasb mahorati darajasiga qarab reytingning turli guruhlari berilishi mumkin.

Akademik va xalq badiiy jamoalari tomonidan konsert-tomosha faoliyati turlari amalga oshirilganda Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi tomonidan umuman jamoa va solist uchun reyting guruhi berilishi, shuningdek litsenziya berish uchun davlat boji stavkalari alohida koʻrib chiqilishi mumkin.

19. Litsenziyalovchi organ besh kun muddatda Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Litsenziyalovchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berish yuzasidan qaror qabul qilingani toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddatlari koʻrsatilgan holda yozma shaklda joʻnatiladi (taqdim etiladi).

20. Litsenziyalovchi organ bilan litsenziatning oʻzaro huquqlari va majburiyatlarini belgilovchi litsenziya bitimida quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan konsert-tomosha faoliyati turi (turlari)ning nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini litsenziyalovchi organ tomonidan nazorat qilish tartibi.

Litsenziya bitimi ikki nusxada — litsenziat va litsenziyalovchi organ uchun bir nusxadan tuziladi.

21. Litsenziyalar maxsus blankalarda rasmiylashtiriladi. Litsenziya blankasi namunasi litsenziyalovchi organ tomonidan Oʻzbekiston Respublikasi Vazirlar Mahkamasining 2000-yil 20-dekabrdagi 488-son qaroriga muvofiq tasdiqlanadi.

Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari litsenziyalovchi organ buyurtmasi boʻyicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Litsenziyalovchi organ rahbari litsenziya blankalari hisobga olinishi, saqlanishi va ulardan maqsadli foydalanilishi uchun belgilangan tartibda shaxsan javob beradi.

Litsenziyalar litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda rasmiylashtiriladi va beriladi.

22. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziyani bekor qilish toʻgʻrisida qaror qabul qilishga haqlidir.

23. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

24. Litsenziya berish rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

25. Litsenziya talabgori tomonidan litsenziya berish rad etilishiga asos boʻlgan sabablar bartaraf etilgan taqdirda, hujjatlar litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda takroran koʻrib chiqiladi.

Bunda takroran taqdim etilgan hujjatlar Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhiga koʻrib chiqish uchun ular qabul qilib olingan kunda taqdim etiladi.

Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi taqdim etilgan hujjatlarni olti kundan oshmaydigan muddatda qayta koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert xulosasi tayyorlaydi.

Litsenziyalovchi organ toʻrt kun muddatda Milliy estrada sanʼatini rivojlantirish va muvofiqlashtirish kengashi huzuridagi Ijodiy koʻmaklashish vakillari guruhi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

26. Litsenziya talabgorining arizasi takroran koʻrib chiqilganligi uchun yigʻim undirilmaydi. Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

27. Litsenziat — yuridik shaxs qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir hafta muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Litsenziat — jismoniy shaxsning familiyasi, ismi, otasining ismi yoki turar joyi oʻzgargan taqdirda litsenziat qayta roʻyxatdan oʻtkazilgandan keyin bir hafta muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlarni ilova qilgan holda litsenziyani qayta rasmiylashtirish toʻgʻrisidagi ariza berishi shart.

28. Litsenziat litsenziya qayta rasmiylashtirilgunga qadar unda koʻrsatilgan faoliyat ilgari berilgan litsenziya asosida amalga oshiradi.

29. Litsenziyalovchi organ litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi Milliy estrada sanʼatini rivojlantirish va muvofiqlashtirish kengashi huzuridagi Estrada sanʼatini rivojlantirish jamgʻarmasining depozit hisob raqamiga oʻtkaziladi.

30. Litsenziyaning amal qilish muddatini uzaytirish litsenziatning arizasiga koʻra amalga oshiriladi. Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati oʻtgunga qadar ikki oydan kechikmay berilishi kerak. Litsenziyaning amal qilish muddatini uzaytirish litsenziya berish uchun nazarda tutilgan tartibda amalga oshiriladi.

31. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikati berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi Milliy estrada sanʼatini rivojlantirish va muvofiqlashtirish kengashi huzuridagi Estrada sanʼatini rivojlantirish jamgʻarmasining depozit hisob raqamiga oʻtkaziladi.

32. Litsenziat tomonidan litsenziya shartlari va talablariga rioya etilishini nazorat qilish litsenziyalovchi organ tomonidan qonun hujjatlarida belgilangan tartibda amalga oshiriladi.

33. Litsenziya talablari va shartlariga rioya etilishini nazorat qilishni amalga oshirishda litsenziyalovchi organ oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi holatlar mavjud boʻlgan taqdirda litsenziat tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziya talablari va shartlarining litsenziat tomonidan aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan qonun buzilishlarini bartaraf etish majburiyatini yuklovchi qarorlar chiqarish, bunday qonun buzilishlarini bartaraf etish muddatlarini belgilash;

litsenziyaning amal qilishini toʻxtatib turish, toʻxtatish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoki sudga murojaat qilish.

34. Litsenziya talablari va shartlariga rioya etilishini tekshirishda litsenziyalovchi organning tekshiruvchi xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi litsenziyalovchi organda qoladi.

35. Litsenziyalovchi organ tomonidan litsenziyaning amal qilishini toʻxtatib turish va toʻxtatish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-24-moddalarida nazarda tutilgan hollarda va tartibda amalga oshiriladi.

Litsenziyalovchi organning litsenziyaning amal qilishini toʻxtatib turish yoki toʻxtatish toʻgʻrisidagi qarori yuzasidan sudga shikoyat qilish mumkin. Sud tomonidan litsenziyalovchi organning qarori asossiz deb eʼtirof etilgan taqdirda, litsenziyalovchi organ litsenziat oldida uning koʻrgan zarari miqdorida javob beradi.

36. Litsenziyalovchi organ konsert-tomosha faoliyatining har bir turiga alohida litsenziyalar reyestri yuritadi.

Litsenziyalar reyestrida litsenziatlar toʻgʻrisida quyidagi asosiy maʼlumotlar koʻrsatilishi kerak:

yuridik shaxslar uchun — yuridik shaxsning nomi, uning tashkiliy-huquqiy shakli, pochta manzili, telefoni;

jismoniy shaxslar uchun — litsenziatning familiyasi, ismi, otasining ismi, uning pasportiga oid maʼlumotlar, uy manzili, telefoni;

litsenziyalarning berilgan sanasi va tartib raqami;

litsenziyalarning amal qilish muddati;

litsenziyalarni qayta rasmiylashtirish, ularning amal qilish muddatini toʻxtatib turish va tiklashning asoslari va sanasi;

litsenziyalarning amal qilishini toʻxtatish asoslari va sanasi;

litsenziyalarni bekor qilishning asoslari va sanasi;

dublikat berishning asoslari va sanasi.

37. Litsenziyalar reyestridagi mavjud maʼlumotlar yuridik va jismoniy shaxslarning ular bilan tanishishi uchun ochiq hisoblanadi, ular haq toʻlagan holda muayyan litsenziatlar toʻgʻrisidagi maʼlumotlarni litsenziyalovchi organda litsenziyalar reyestridan koʻchirma tarzida olish huquqiga egadirlar.

Litsenziyalar reyestridan maʼlumot berilganligi uchun eng kam oylik ish haqi miqdoridagi toʻlov Milliy estrada sanʼatini rivojlantirish va muvofiqlashtirish kengashi huzurida tashkil etilgan Estrada sanʼatini rivojlantirish jamgʻarmasining depozit hisob raqamiga oʻtkaziladi.

Litsenziyalar reyestridan maʼlumotlar davlat hokimiyati va boshqaruv organlariga tekin beriladi.

38. Litsenziya berish yoki uning amal qilish muddatini uzaytirish uchun davlat boji undiriladi.

Litsenziya berish va uning amal qilish muddatini uzaytirish uchun davlat boji miqdori har qaysi litsenziya talabgori uchun u amalga oshiradigan konsert-tomosha faoliyati turiga va unga berilgan reyting guruhiga qarab belgilanadi.

39. Davlat boji litsenziya talabgori tomonidan Estrada sanʼatini rivojlantirish jamgʻarmasining depozit hisob raqamiga toʻlanadi.

Davlat boji litsenziya berilgan muddat mobaynida bir yoʻla va choraklar boʻyicha toʻlanishi mumkin.

40. Litsenziya talabgorlari va litsenziatlar arizalarini koʻrib chiqishdan tushgan mablagʻlar litsenziyalovchi organ tomonidan litsenziyalashni amalga oshirish bilan bogʻliq xarajatlarni qoplash uchun foydalaniladi.

41. Estrada sanʼatini rivojlantirish jamgʻarmasi mablagʻlaridan:

estrada faoliyatini rivojlantirishda;

yosh ijrochilarni ragʻbatlantirish va qoʻllab-quvvatlashda;

musiqa tanlovlari, festivallar oʻtkazishda va ularning gʻoliblariga mukofotlar berishda;

umumdavlat tadbirlari va boshqa bayram tadbirlarini oʻtkazishda;

“Oʻzbeknavo” estrada birlashmasining moddiy-texnika bazasini mustahkamlashda foydalaniladi.

1. Ushbu Nizom gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini litsenziyalash tartibini belgilaydi.

2. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini litsenziyalash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining komissiyalari (keyingi oʻrinlarda “Komissiya” deb yuritiladi) tomonidan amalga oshiriladi.

Komissiyalarga Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining tegishli oʻrinbosarlari boshchilik qiladi. Komissiyalar tarkiblari Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari tomonidan tasdiqlanadi.

Komissiyalarning ishchi organi funksiyasini Qoraqalpogʻiston Respublikasi Madaniyat va sport ishlari vazirligi, viloyatlar va Toshkent shahar madaniyat va sport ishlari boshqarmalari (keyingi oʻrinlarda ishchi organlar deb yuritiladi) bajaradilar.

3. Ishchi organ litsenziyalar berish (ularning amal qilish muddatini uzaytirish) toʻgʻrisidagi arizani tegishli hujjatlar bilan birga qabul qiladi, ular yuzasidan ekspert xulosasi tayyorlaydi, litsenziyalarni rasmiylashtirish va qayta rasmiylashtirishni amalga oshiradi, litsenziya bitimlari tuzadi, litsenziyalar reyestrini yuritadi, litsenziat tomonidan litsenziya talablari va shartlariga rioya etilishini nazorat qiladi, litsenziyalarning amal qilishini toʻxtatib turadi va tiklaydi.

4. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyati faqat yuridik shaxslar tomonidan amalga oshirilishi mumkin.

5. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini amalga oshirish huquqi uchun namunaviy (oddiy) litsenziyalar beriladi.

Litsenziya talabgorining arizasiga koʻra litsenziya umuman faoliyat turiga yoki uning bir qismiga berilishi mumkin.

6. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini amalga oshirish huquqiga litsenziya kamida 5 yil muddatga beriladi.

7. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyati turlarini amalga oshirishda litsenziya talablari va shartlariga quyidagilar kiradi:

a) gramplastinkalar, audiokassetalar va lazerli disklarni ishlab chiqish, ishlab chiqarish va yozish boʻyicha:

qonun hujjatlariga, gramplastinkalar, audiokassetalar va lazerli disklarining texnik sifatiga qoʻyiladigan normativ-texnik talablarga majburiy rioya qilish;

gramplastinkalar, audiokassetalar va lazerli disklarni ishlab chiqish va yozish uchun zarur boʻlgan tegishli moddiy-texnik bazaning, asbob-uskunalarning va boshqa texnik vositalarning mavjudligi;

b) gramplastinkalar, audiokassetalar va lazerli disklarni koʻpaytirish boʻyicha:

qonun hujjatlariga, gramplastinkalar, audiokassetalar va lazerli disklarning texnik sifatiga qoʻyiladigan normativ-texnik talablarga, shuningdek ularni bezash talablariga majburiy rioya qilish;

litsenziatning yoxud buyurtmachining gramplastinkalar, audiokassetalar va lazerli disklarni koʻpaytirishga boʻlgan huquqlarini tasdiqlovchi hujjatlarning, import audiomahsulotlarni koʻpaytirishda esa, shuningdek ularni import qilish uchun belgilangan tartibda olingan ruxsatnomalarning mavjudligi;

litsenziat tomonidan mahsulotlar nomi, mazkur mahsulot tarkibiga kirgan asarlar nomini, tayyorlangan nusxalar sonini koʻrsatgan holda gramplastinkalar, audiokassetalar va lazerli disklarning tayyorlangan nusxalari hisobi, shuningdek litsenziat yoxud koʻpaytirish buyurtmachisining koʻpaytirishga boʻlgan huquqini tasdiqlovchi hujjatlar hisobi yuritilishi;

litsenziat tomonidan yongʻin xavfsizligi va sanitariya-gigiyena talablariga javob beradigan, ular toʻgʻrisida litsenziyalovchi organga axborot taqdim etgan holda, binolar va xonalarda gramplastinkalar, audiokassetalar va lazerli disklarni koʻpaytirish boʻyicha ishlab chiqarish faoliyati amalga oshirilishi;

litsenziat tomonidan standartlar talablariga muvofiq boʻlgan asbob-uskunalar va boshqa texnik vositalardan foydalangan holda gramplastinkalar, audiokassetalar va lazerli disklarni koʻpaytirish boʻyicha ishlab chiqarish faoliyati amalga oshirilishi;

v) gramplastinkalar, audiokassetalar va lazerli disklarni sotish boʻyicha:

qonun hujjatlariga, gramplastinkalar, audiokassetalar va lazerli disklarning texnik sifatiga qoʻyiladigan normativ-texnik talablarga majburiy rioya qilish;

litsenziat tomonidan yongʻin xavfsizligi va sanitariya-gigiyena talablariga javob beradigan binolar va xonalarda gramplastinkalar, audiokassetalar va lazerli disklarni sotish faoliyati amalga oshirilishi;

gramplastinkalar, audiokassetalar va lazerli disklarni nazorat-kassa mashinalarini majburiy qoʻllangan holda turgʻun savdo shoxobchalari orqali chakana sotish;

import audiomahsulotlarni, ularni import qilishga belgilangan tartibda olingan ruxsatnomalar mavjud boʻlganda sotish.

8. Litsenziya bitimida ushbu Nizomning 7-bandida qayd etilganlardan aniq litsenziya talablari va shartlari nazarda tutilishi mumkin.

9. Litsenziya olish uchun litsenziya talabgori litsenziyalovchi organga quyidagi hujjatlarni taqdim etadi:

a) litsenziya berish toʻgʻrisidagi ariza, unda quyidagilar koʻrsatiladi:

yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami — yuridik shaxs uchun;

faoliyatning litsenziyalanadigan turi (yoxud uning bir qismi) va mazkur faoliyat turi amalga oshiriladigan muddat;

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) ariza koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat.

10. Litsenziya talabgori tomonidan ushbu Nizomning 9-bandida koʻrsatilgan hujjatlarga qoʻshimcha ravishda quyidagilar taqdim etiladi:

a) gramplastinkalar, audiokassetalar va lazerli disklarni ishlab chiqish va yozish faoliyatini amalga oshirish uchun mavjud moddiy-texnik baza, asbob-uskunalar va litsenziyalanayotgan faoliyatni amalga oshirish uchun zarur boʻlgan boshqa texnik vositalar toʻgʻrisidagi maʼlumotlar;

b) gramplastinkalar, audiokassetalar va lazerli disklarni koʻpaytirish faoliyatini amalga oshirish uchun:

litsenziyalanadigan faoliyat amalga oshiriladigan bino va xonalarga mulk huquqini yoki boshqa ashyoviy huquqlarni tasdiqlovchi hujjat;

yongʻin va sanitariya-epidemiologiya nazorati organlarining mavjud bino va xonalarning yongʻin xavfsizligi hamda sanitariya va gigiyena talablariga muvofiqligi toʻgʻrisidagi xulosasi;

litsenziyalanayotgan faoliyatni amalga oshirish uchun zarur boʻlgan mavjud asbob-uskunalar va boshqa texnik vositalar toʻgʻrisidagi maʼlumotlar;

v) gramplastinkalar, audiokassetalar va lazerli disklarni sotish faoliyatini amalga oshirish uchun:

litsenziyalanadigan faoliyat amalga oshiriladigan bino va xonalarga mulk huquqini yoki boshqa ashyoviy huquqlarni tasdiqlovchi hujjat;

yongʻin va sanitariya-epidemiologiya nazorati organlarining mavjud bino va xonalarning yongʻin xavfsizligi hamda sanitariya va gigiyena talablariga muvofiqligi toʻgʻrisidagi xulosasi;

kassa apparatining mavjudligini tasdiqlovchi hujjat — gramplastinkalar, audiokassetalar va lazerli disklarni naqd pulga chakana sotishni moʻljallayotgan litsenziya talabgorlari uchun.

11. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

12. Hujjatlar litsenziya talabgori tomonidan litsenziyalovchi organga bevosita yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

Hujjatlar ishchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda ariza beruvchiga yuboriladi (topshiriladi).

Ishonchsiz yoki notoʻgʻri maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

13. Litsenziya talabgorining arizasi koʻrib chiqilganligi uchun Oʻzbekiston Respublikasida belgilangan eng kam oylik ish haqining ikki baravari miqdorida yigʻim undiriladi.

Arizani koʻrib chiqqanlik uchun yigʻim summasi ishchi organning bankdagi hisob raqamiga oʻtkaziladi. Litsenziya talabgori berilgan arizadan voz kechgan taqdirda toʻlangan yigʻim summasi qaytarib berilmaydi.

14. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya talabgoriga litsenziyani berish yoki litsenziya berishni rad etish toʻgʻrisidagi qaror litsenziya talabgorining arizasi olingan kundan boshlab oʻn besh kundan oshmaydigan muddatda qabul qilinadi.

Ishchi organ ariza olingan kundan boshlab besh kundan oshmaydigan muddatda hujjatlarni koʻrib chiqadi, ular yuzasidan ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga Komissiyaga tasdiqlash uchun taqdim etadi.

Komissiya ishchi organ taklifi olingandan keyin oʻn kundan oshmaydigan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya qabul qilingan qaror protokolini komissiya (uning oʻrinbosari) tasdiqlaydi. Zarur hollarda Komissiya qarori soʻrov yoʻli bilan qabul qilinishi mumkin.

15. Ishchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berish yuzasidan qaror qabul qilingani toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddatlari koʻrsatilgan holda yozma shaklda joʻnatiladi (taqdim etiladi).

Litsenziyalovchi organ bilan litsenziat oʻrtasidagi oʻzaro huquqlar va majburiyatlarni belgilovchi litsenziya bitimi ishchi organ va litsenziat oʻrtasida tuziladi va unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi,

tomonlarning rekvizitlari;

amalga oshirilishiga litsenziya berilayotgan faoliyat aniq turining nomi;

litsenziyaning amal qilish muddati;

litsenziatga qoʻyiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishining ishchi organ tomonidan nazorat qilinishi tartibi.

Litsenziya bitimi ikki nusxada — litsenziat va ishchi organ uchun bir nusxadan tuziladi.

16. Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziya blankasi namunasi Oʻzbekiston Respublikasi Madaniyat va sport ishlari vazirligi tomonidan tasdiqlanadi va ishchi organ buyurtmasi boʻyicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Ishchi organ rahbari litsenziya blankalari hisobga olinishi, saqlanishi va ulardan maqsadli foydalanilishi uchun shaxsan javob beradi.

Litsenziyalar ishchi organ tomonidan rasmiylashtiriladi va Komissiya raisi (uning oʻrinbosari) tomonidan imzolanadi.

17. Litsenziya litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.

18. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida ishchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, Komissiya litsenziyani bekor qilish toʻgʻrisida qaror qabul qilishga haqlidir.

19. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek ishchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

20. Litsenziya berish rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

21. Litsenziya talabgori tomonidan litsenziya berish rad etilishiga asos boʻlgan sabablar bartaraf etilgan taqdirda, hujjatlar litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda takroran koʻrib chiqiladi.

Bunda ishchi organ hujjatlar takroran taqdim etilgandan keyin toʻrt kun mobaynida ular boʻyicha ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga Komissiyaga tasdiqlash uchun taqdim etadi.

Komissiya ishchi organ taklifi olingandan keyin olti kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya qabul qilgan qaror protokoli Komissiya raisi (uning oʻrinbosari) tomonidan imzolanadi.

Litsenziya talabgorining arizalari takroran koʻrib chiqilganligi uchun yigʻim undirilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

22. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir hafta muddatda ishchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

23. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

24. Ishchi organ litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish ishchi organ tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organning bankdagi hisob raqamiga oʻtkaziladi.

25. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza ishchi organga litsenziyaning amal qilish muddati oʻtgunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

26. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikati berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organning bankdagi hisob raqamiga oʻtkaziladi.

27. Litsenziat tomonidan litsenziya shartlari va talablariga rioya etilishini nazorat qilish ishchi organ tomonidan qonun hujjatlarida belgilangan tartibda amalga oshiriladi.

28. Litsenziya talablari va shartlariga rioya etilishini nazorat qilishni amalga oshirishda ishchi organ oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi holatlar mavjud boʻlgan taqdirda litsenziat tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziya talablari va shartlarining litsenziat tomonidan aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan qonun buzilishlarini bartaraf etish majburiyatini yuklovchi qarorlar chiqarish, bunday qonun buzilishlarini bartaraf etish muddatlarini belgilash;

litsenziyaning amal qilishini toʻxtatib turish, toʻxtatish yoxud litsenziyalarni bekor qilish toʻgʻrisidagi takliflarni koʻrib chiqish uchun Komissiyaga kiritish;

xoʻjalik yurituvchi subyektlar tomonidan faoliyat litsenziyasiz amalga oshirilishining aniqlangan holatlari toʻgʻrisidagi materiallarni qonun hujjatlarida nazarda tutilgan choralarni koʻrish uchun soliq organlariga belgilangan tartibda yuborish.

29. Litsenziya talablari va shartlariga rioya etilishini tekshirishda ishchi organning tekshiruvchi xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi ishchi organda qoladi.

30. Litsenziyalovchi organ tomonidan litsenziyaning amal qilishini toʻxtatib turish va toʻxtatish, litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-24-moddalarida nazarda tutilgan hollarda va tartibda amalga oshiriladi.

Komissiyaning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziya amal qilishining toʻxtatib turilishi sud tomonidan asossiz deb eʼtirof etilgan taqdirda, Komissiya litsenziat oldida uning koʻrgan zarari miqdorida javob beradi.

31. Litsenziat tomonidan litsenziya talablari va shartlarining buzilishlari aniqlangan hollarda Maʼnaviy-maʼrifiy ishlarni muvofiqlashtirish kengashi litsenziyalovchi organlarga litsenziyalarning amal qilishini toʻxtatib turish toʻgʻrisida takliflar kiritishga haqlidir.

32. Ishchi organ litsenziyalar reyestrini yuritadi.

Litsenziyalar reyestrida quyidagilar koʻrsatilishi kerak:

yuridik shaxsning nomi, uning tashkiliy-huquqiy shakli, pochta manzili, telefoni;

litsenziyalarning berilgan sanasi va tartib raqami;

litsenziyalarning amal qilish muddati;

umuman faoliyat yoki uning bir qismiga litsenziya berish toʻgʻrisidagi maʼlumotlar;

litsenziyalarni qayta rasmiylashtirish, ularning amal qilish muddatini uzaytirish, toʻxtatib turish va tiklashning asoslari va sanasi;

litsenziyalarning amal qilishini toʻxtatish asoslari va sanasi;

litsenziyalarni bekor qilishning asoslari va sanasi;

dublikat berishning asoslari va sanasi.

33. Litsenziyalar reyestridagi mavjud maʼlumotlar yuridik va jismoniy shaxslarning ular bilan tanishishi uchun ochiq hisoblanadi, ular haq toʻlagan holda muayyan litsenziatlar toʻgʻrisidagi maʼlumotlarni ishchi organda litsenziyalar reyestridan koʻchirma tarzida olish huquqiga egadirlar.

Litsenziyalar reyestridan maʼlumot berilganligi uchun eng kam oylik ish haqining yarmi miqdoridagi toʻlov ishchi organning hisob-kitob raqamiga oʻtkaziladi.

Litsenziyalar reyestridan maʼlumotlar davlat hokimiyati va boshqaruv organlariga tekin beriladi.

34. Gramplastinkalar, audiokassetalar va lazerli disklarni ishlab chiqish, ishlab chiqarish, yozish, koʻpaytirish va sotish faoliyatini amalga oshirishga litsenziyalar berish va ularning amal qilish muddati uzaytirilganligi uchun toʻlov kunida qonunchilikda belgilangan eng kam oylik ish haqining oʻn baravari miqdorida davlat boji undiriladi.

Litsenziyalar berish uchun davlat boji mablagʻlari respublika budjeti daromadiga oʻtkaziladi.

Ishchi organ Oʻzbekiston Respublikasi Davlat soliq qoʻmitasiga litsenziatlar reyestrini hamda yigʻimlar va davlat boji undirishdan mablagʻlar tushishi va ulardan maqsadli foydalanilishi toʻgʻrisidagi hisobotni har chorakda, hisobot oyidan keyingi oyning 15-kunidan kechikmay taqdim etadi.

1. 4-bandda:

birinchi xatboshi quyidagi tahrirda bayon qilinsin:

“Oʻzbeknavo” estrada birlashmasi Oʻzbekiston Respublikasida va undan tashqarida gastrol-konsert faoliyatini, shuningdek toʻy, yubiley va boshqa tantanalarda konsert xizmati koʻrsatish faoliyatini litsenziyalovchi organ hisoblanadi”;

ikkinchi xatboshidagi ikkinchi jumla chiqarib tashlansin.

2. 6-bandning ikkinchi xat boshidagi ikkinchi gap quyidagi tahrirda bayon qilinsin:

“Mazkur guruh xulosasi “Oʻzbeknavo” estrada birlashmasi tomonidan litsenziyalar berilishi uchun asos hisoblanadi”.

3. Milliy estrada sanʼatini rivojlantirish va muvofiqlashtirish Kengashi toʻgʻrisida Nizomning (qarorga 2-ilova) 5.6-bandidagi “toʻylar, yubileylar va boshqa tantanalarda badiiy xizmat koʻrsatish (konsert qoʻyish)” soʻzlari “toʻy, yubiley va boshqa tantanalarda konsert xizmati koʻrsatish” soʻzlari bilan almashtirilsin.

4. Milliy estrada sanʼatini rivojlantirish va muvofiqlashtirish Kengashining “Oʻzbeknavo” estrada birlashmasi toʻgʻrisidagi Nizomda (qarorga 4-ilova):

2.2-bandning yettinchi xatboshi quyidagi tahrirda bayon qilinsin:

“Oʻzbekiston Respublikasida va uning tashqarisida gastrol-konsert faoliyatini amalga oshirish, toʻylar, yubileylar va boshqa tantanalarga konsert xizmati koʻrsatish huquqi uchun Ijodiy koʻmaklashish vakillari guruhi xulosalari asosida litsenziyalar berish”;

3.1-bandning uchinchi xatboshi quyidagi tahrirda bayon qilinsin:

“Oʻzbekiston Respublikasida va uning tashqarisida gastrol-konsert faoliyatini, shuningdek toʻy, yubiley va boshqa tantanalarda konsert xizmati koʻrsatish faoliyatini litsenziyalashni amalga oshiradi”.

1. 2-bandda:

ikkinchi xatboshi chiqarib tashlansin;

uchinchi xatboshidagi “gastrol-konsert” soʻzlari “konsert-tomosha” soʻzlari bilan almashtirilsin.

2. 3 va 4-bandlar, shuningdek 1 va 4-ilovalar oʻz kuchini yoʻqotgan deb hisoblansin.

3. 2-ilova quyidagi tahrirda bayon qilinsin: