Neft bazalarining yuridik shaxs sifatida qayta tashkil etilganligini, xususiylashtirilgan va avtomobillarga yonilgʻi qoʻyish xususiy shoxobchalari mavjudligini hisobga olgan holda neft mahsulotlari sotish mexanizmini takomillashtirish, ularning raqobat qilishi uchun shart-sharoitlar yaratish maqsadida Vazirlar Mahkamasi qaror qiladi:

1. Belgilab qoʻyilsinki, 2003-yil 1-iyuldan boshlab neft mahsulotlarining narxlarini va ularga ustamalarni shakllantirish tartibi joriy etilsin, unga koʻra respublikaning har bir mintaqasida neft mahsulotlari sotuvchi korxonalar (neft bazalari va AYQSH)ning cheklangan ustamalari Oʻzbekiston Respublikasi Moliya vazirligi belgilagan parametrlar doirasida mintaqaviy moliya organlari tomonidan belgilanadi.

Neft mahsulotlari sotuvchi korxonalarning cheklangan ustamalarini shakllantirish toʻgʻrisidagi Nizom ilovaga muvofiq tasdiqlansin.

3. Belgilab qoʻyilsinki, ulgurji isteʼmolchilar va xususiylashtirilgan AYQSHlarga neft mahsulotlari xarid qilish yuzasidan bir vaqtning oʻzida turli neft bazalari bilan shartnomalar tuzishga ruxsat beriladi. Bunda:

har bir ulgurji isteʼmolchi yoki chakana isteʼmolchilarga neft mahsulotlari sotuvchi AYQSH neft mahsulotlarining asosiy hajmini oladigan neft bazasini mustaqil ravishda tanlaydi. Boshqa neft bazasiga asosiy sifatida biriktirib qoʻyishga faqat oldingi asosiy neft bazasidan qarz mavjud boʻlmaganda yoʻl qoʻyiladi;

barcha neft mahsulotlarini boshqa neft bazalaridan olishga faqat haqini 100 foiz oldindan toʻlash shartida yoʻl qoʻyiladi.

4. Oʻzbekiston Respublikasi Vazirlar Mahkamasining “Toshkent shahrini neft mahsulotlari bilan taʼminlashni yaxshilash chora-tadbirlari toʻgʻrisida” 1998-yil 7-sentabrdagi 382-son qarori (OʻR QT, 1998-y., 9-son, 33-modda) bilan tasdiqlangan Toshkent shahrini neft mahsulotlari bilan taʼminlash toʻgʻrisidagi Nizomning 8-bandidagi “Toshshaharneftmahsulot” korxonasi” soʻzlari “Oʻzneftmahsulot” aksiyadorlik kompaniyasi” soʻzlari bilan almashtirilsin.

5. Oʻzbekiston Respublikasi Moliya vazirligi Davlat soliq qoʻmitasi, Monopoliyadan chiqarish va raqobatni rivojlantirish davlat qoʻmitasi hamda Adliya vazirligi bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirishlar kiritish yuzasidan takliflar tayyorlasin va taqdim etsin, shuningdek idoraviy normativ-huquqiy hujjatlarga tegishli oʻzgartirishlar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.

1. Ushbu Nizom “Oʻzbekneftgaz” milliy-xolding kompaniyasi korxonalari va qonun hujjatlarida belgilangan tartibda neft mahsulotlari sotish huquqiga litsenziyaga ega boʻlgan boshqa korxonalar tomonidan sotiladigan neft mahsulotlariga cheklangan ustamalarni shakllantirish tartibini belgilaydi.

2. Ushbu Nizomda quyidagi atamalar qoʻllanadi:

“mintaqalar” — Qoraqalpogʻiston Respublikasi, viloyatlar va Toshkent shahri;

“mintaqaviy moliya organlari” — Qoraqalpogʻiston Respublikasi Moliya vazirligi, Toshkent shahar hokimligi moliya bosh boshqarmasi, viloyatlar hokimliklari moliya boshqarmalari.

3. Buxoro neftni qayta ishlash zavodi va Fargʻona neftni qayta ishlash zavodi oʻz mahsulotini ichki bozorda Oʻzbekiston Respublikasi Moliya vazirligida deklaratsiya qilinadigan narxlar boʻyicha sotadi.

4. Neft mahsulotlarini “Oʻzneftmahsulot” aksiyadorlik kompaniyasi korxonalariga sotishda Buxoro neftni qayta ishlash zavodi va Fargʻona neftni qayta ishlash zavodi temir yoʻl orqali neft bazalarigacha tashish haqi miqdorini shunday tartibda belgilaydiki, bunda aynan bir turdagi bir tonna neft mahsulotining istalgan neft bazasigacha yoki neft bazasi filialigacha tashish summasi bir xil boʻlishi kerak. Bunda Fargʻona neftni qayta ishlash zavodining neft mahsulotlarini temir yoʻl orqali tashish boʻyicha mumkin boʻlgan salbiy moliyaviy natijasi belgilangan tartibda hisoblangan aksiz soligʻining bir qismini uning tasarrufida qoldirish hisobiga qoplanadi, salbiy moliyaviy natijaning oʻzi esa qaytadan soliqqa tortish bazasiga kiritilmaydi.

5. Respublikaning har bir mintaqasi doirasidagi neft bazalari uchun tegishli mintaqaviy moliya organi tomonidan ular tomonidan sotiladigan neft mahsulotlarining bir tonnasiga cheklangan ustamalar soʻmlarda deklaratsiya qilinadi.

6. Bitta mintaqa doirasida neft mahsulotlarining har xil turlari uchun turlicha cheklangan ustamalarning deklaratsiya qilinishiga yoʻl qoʻyiladi. Bunga:

neft mahsulotlarining har xil turlari uchun qabul qilib olish, saqlash, sigʻimlardan chiqarib olish va tashish boʻyicha texnik shartlarda jiddiy tafovutlar mavjud boʻlganda;

neft mahsulotlarining har xil turlari boʻyicha qabul qilib olish, saqlash va sotishga ishlab chiqarish xarajatlari oʻrtasida jiddiy tafovutlarning paydo boʻlishiga olib keladigan boshqa obyektiv omillar mavjud boʻlganda yoʻl qoʻyiladi.

7. Neft mahsulotlarini yetkazib berish quyidagi tartibda amalga oshiriladi:

neft mahsulotlarini isteʼmolchilarga bevosita neft bazalaridan avtotsisternalarda berish;

neft mahsulotlarini isteʼmolchilarga bevosita neftni qayta ishlash korxonalaridan temir yoʻl sisternalarida yetkazib berish.

Bunda neft mahsulotlarining aynan bir turi boʻyicha deklaratsiyalash yetkazib berish turiga qarab turli cheklangan ustamalar bilan amalga oshiriladi.

8. Neft bazalari ustamalarni deklaratsiyalangan cheklangan ustamalardan past darajada belgilash huquqiga ega. Aynan bitta neft bazasidan va neft mahsulotlarining aynan bir turini turli isteʼmolchilarga aynan bitta sanada turli ustamalar bilan sotishga yoʻl qoʻyilmaydi.

9. Butun respublika boʻyicha markazlashtirilgan tartibda yagona chakana narxlar belgilanadigan neft mahsulotlarini AYQSH orqali va neft bazasi tarkibiga kiruvchi boshqa boʻlinmalar orqali sotishda sotish narxi va xarid narxi oʻrtasidagi ijobiy tafovut (neft bazasining cheklangan ustamasini hisobga olgan holda), qoʻshilgan qiymat soligʻini chegirib Oʻzbekiston Respublikasining respublika budjetiga oʻtkaziladi. Bunda Oʻzbekiston Respublikasining respublika budjetiga oʻtkazilishi kerak boʻlgan summa fuqarolarning alohida toifalariga avtobenzin sotib olish xarajatlarining bir qismi uchun oylik pul kompensatsiyasi toʻlaydigan organlarga oʻtkazilgan pul mablagʻlari summasiga kamaytiriladi.

Oʻzbekiston Respublikasining respublika budjetiga oʻtkaziladigan mablagʻlardan budjetdan tashqari Pensiya jamgʻarmasiga, Respublika yoʻl jamgʻarmasiga va Taʼlim va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasiga majburiy ajratmalar ajratilmaydi.

10. Neft bazalarining cheklangan ustamalarini deklaratsiyalash Oʻzbekiston Respublikasi Vazirlar Mahkamasining 1997-yil 31-martdagi 165-son qarori hamda boshqa qonun hujjatlari bilan cheklangan narxlar va ustamalarni deklaratsiyalash uchun belgilangan tartibda amalga oshiriladi. Bunda ustamalarni isteʼmolchilar bilan kelishish protokollari talab qilinmaydi.

11. Har bir mintaqada xususiylashtirilgan va avtomobillarga yonilgʻi quyish xususiy shoxobchalari uchun ular ixtiyorida qoladigan, ular tomonidan chakana isteʼmolchilarga sotiladigan bir tonna neft mahsulotlariga soʻmlardagi ustamalarning cheklangan miqdori belgilanadi. Bunda bir mintaqa doirasida neft mahsulotlarining har xil turlari uchun har xil cheklangan ustamalar belgilanishiga yoʻl qoʻyiladi.

12. Cheklangan ustamalar mintaqaviy moliyaviy organlar tomonidan belgilanadi hamda xususiylashtirilgan va avtomobillarga yonilgʻi quyish xususiy shoxobchalariga tegishli cheklangan ustama kuchga kiradigan sanadan kamida 5 kun oldin yetkaziladi.

13. Xususiylashtirilgan va avtomobillarga yonilgʻi quyish xususiy shoxobchalari ustamalarni belgilangan cheklangan ustamalardan past darajada belgilash huquqiga egadir, biroq bu butun respublika boʻyicha yagona chakana narxlar markazlashtirilgan tartibda belgilanadigan neft mahsulotlariga joriy etilmaydi. Shu bilan birga aynan bir avtomobillarga yonilgʻi quyish shoxobchasidan aynan bir sanada har xil isteʼmolchilarga bir xil turdagi neft mahsulotlarini har xil ustamalar bilan sotishga yoʻl qoʻyilmaydi.

14. Butun respublika boʻyicha yagona chakana narxlar markazlashtirilgan tartibda belgilanadigan neft mahsulotlari boʻyicha, agar chakana narx bilan sotib olish narxi oʻrtasidagi tafovut avtomobillarga yonilgʻi quyish shoxobchasining belgilangan cheklangan ustamasidan ortiq boʻlgan taqdirda, ortiq summa uch bank kuni mobaynida mahalliy budjetga oʻtkazilishi kerak. Koʻrsatib oʻtilgan muddat buzilgan taqdirda muddati oʻtkazib yuborilgan qarz summasiga muddati oʻtkazib yuborilgan har bir kun uchun mahalliy budjetga olib qoʻyiladigan 0,07 foizli stavka boʻyicha penya hisoblanadi. Avtomobillarga yonilgʻi quyish shoxobchasining belgilangan cheklangan ustamasidan ortiq boʻlgan, mahalliy budjetga oʻtkazilishi kerak boʻlgan chakana narx bilan sotib olish narxi oʻrtasidagi tafovut yalpi daromadga soliqni hisoblab chiqishda soliq solish obyektiga kiritilmaydi.

15. Neft bazalari choraklik moliyaviy hisobotlar topshirish bilan bir vaqtda mintaqaviy moliya organlariga cheklangan ustamalarga deklaratsiya toʻldirish uchun taqdim etiladigan formatda tamom boʻlgan chorak uchun daromadlar va xarajatlarni moddalar boʻyicha koʻrsatgan holda koʻrsatib oʻtilgan hisobotlarning nusxalarini taqdim etadilar.

16. “Oʻzneftmahsulot” aksiyadorlik kompaniyasi har bir oy tamom boʻlishidan oldin oʻn besh kundan kechikmay Oʻzbekiston Respublikasi Moliya vazirligiga neft bazalari va ularning filiallari tomonidan oldingi oyda neft mahsulotlari turlari boʻyicha sotilgan neft mahsulotlari tonnasi toʻgʻrisidagi axborotni taqdim etadi.

17. Har bir mintaqada neft mahsulotlarining bozor fondini (tonnada) oʻzlariga tegishli xususiylashtirilgan va avtomobillarga yonilgʻi quyish xususiy shoxobchalari orqali mintaqa hududida sotish hajmida eng yuqori salmoqqa ega boʻlgan kamida 5 korxona moliyaviy natijalarining monitoringi olib boriladi. Koʻrsatib oʻtilgan korxonalar har chorakda mintaqaviy moliya organlariga tamom boʻlgan chorak uchun quyidagi maʼlumotlarni taqdim etadilar:

choraklik moliyaviy hisobotlar nusxalari;

avtomobillarga yonilgʻi quyish shoxobchalari va neft mahsulotlari turlari boʻyicha neft mahsulotlari sotishning fizik hajmlari toʻgʻrisida maʼlumot.

18. Mintaqaviy moliya organlari har oyda Oʻzbekiston Respublikasi Moliya vazirligiga neft bazalarining, xususiylashtirilgan va avtomobillarga yonilgʻi quyish xususiy shoxobchalarining cheklangan va amaldagi ustamalari oʻzgarishi dinamikasi toʻgʻrisidagi hisobotni taqdim etadilar.

19. Oʻzbekiston Respublikasi Moliya vazirligi monitoring jarayonida olingan maʼlumotlardan kelib chiqib miqdorni aniqlaydilar, ushbu miqdor doirasida respublika boʻyicha neft bazalari va avtomobillarga yonilgʻi quyish shoxobchalarining cheklangan ustamalarini deklaratsiyalashga yoʻl qoʻyiladi. Ushbu miqdor navbatdagi kalendar chorak uchun aniqlanadi va chorak boshlanishidan oldin bir haftadan kechikmay mintaqaviy moliya organlariga va “Oʻzneftmahsulot” aksiyadorlik kompaniyasiga yetkaziladi. Ushbu cheklangan miqdorlar shuningdek neftni qayta ishlash zavodlarining sotish narxlari yoxud butun respublika boʻyicha markazlashtirilgan tartibda belgilanadigan yagona daraja boʻyicha neft mahsulotlariga chakana narxlar qayta koʻrib chiqilgan hollarda qayta koʻrib chiqilishi mumkin.

20. Mazkur Nizomga rioya etilishini nazorat qilish Oʻzbekiston Respublikasi Moliya vazirligi, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi, Davlat soliq qoʻmitasi hamda ularning hududiy organlari tomonidan amalga oshiriladi.

21. Ustamalarning belgilangan cheklangan darajalari korxonalar tomonidan oshirilgan taqdirda noqonuniy olingan daromad summasi belgilangan tartibda jarima solingan holda olib qoʻyiladi.