Respublika darajasida va joylarda neft mahsulotlarini sotish boʻyicha faoliyatni litsenziyalashni tashkil etish ishlarining tahlili ishlarni tashkil etish tizimida kamchiliklar mavjudligidan hamda amaldagi qonun hujjatlari normalari va talablari buzilayotganligidan dalolat bermoqda.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy ishchi guruhlari qoniqarsiz ishlayotganligi, shuningdek vakolatli organlar tomonidan ular faoliyati ustidan zarur nazorat oʻrnatilmaganligi bunday holatning sabablaridan biridir.

Shu munosabat bilan faoliyatning ayrim turlarini litsenziyalash toʻgʻrisidagi qonun hujjatlariga muvofiq litsenziyalovchi organlar tomonidan oʻz vazifalarining bajarilishiga hamda respublika va hududiy komissiyalar faoliyatining aniq ish tartibini belgilashga katta ahamiyat beriladi.

“Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 5-moddasiga muvofiq Oʻzbekiston Respublikasi Vazirlar Mahkamasi qaror qiladi:

1. Quyidagilar:

Neft mahsulotlarini sotish boʻyicha (neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotishdan tashqari) faoliyatni litsenziyalash toʻgʻrisidagi nizom 1-ilovaga muvofiq;

Neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni litsenziyalash toʻgʻrisidagi nizom 2-ilovaga muvofiq;

Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasi tarkibi 3-ilovaga* muvofiq;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining neft mahsulotlarini avtomobillarga yoqilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash komissiyalarining Namunaviy tarkibi 4-ilovaga muvofiq tasdiqlansin.

2. Belgilab qoʻyilsinki:

neft mahsulotlarini sotish boʻyicha (neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotishdan tashqari) faoliyatni amalga oshirish uchun litsenziyalarni berish va bekor qilish, ularning amal qilishini toʻxtatish yoki uzaytirish toʻgʻrisidagi qarorlar Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasi tomonidan qabul qilinadi;

neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni amalga oshirish uchun litsenziyalarni berish va bekor qilish, ularning amal qilishini toʻxtatib qoʻyish, toʻxtatish yoki uzaytirish toʻgʻrisidagi qarorlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining tegishli hududiy komissiyalari tomonidan qabul qilinadi.

3. Quyidagilar:

Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari axborot-tahlil departamentiga Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasining hujjatlarni qabul qilish, litsenziyalar berish, litsenziya bitimini tuzish va uning bajarilishini nazorat qilishni amalga oshiruvchi ishchi organi funksiyalari;

“Oʻzdavneftgazinspeksiya”ning hududiy boʻlimlariga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni litsenziyalash komissiyalarining hujjatlarni qabul qilish, litsenziyalar berish, litsenziya bitimini tuzish va uning bajarilishini nazorat qilishni amalga oshiruvchi ishchi organi funksiyalari yuklansin.

4. Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasi ikki hafta muddatda:

Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasi toʻgʻrisidagi nizomni;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining neft mahsulotlarini avtomobillarga yonilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash komissiyalari toʻgʻrisidagi Namunaviy nizomni ishlab chiqsin va tasdiqlasin.

5. Oʻzbekiston Respublikasi Vazirlar Mahkamasining Yoqilgʻi-energetika kompleksini rivojlantirish departamenti bir oy muddatda ushbu qaror kuchga kirgunga qadar berilgan litsenziyalarni xatlovdan oʻtkazsin, ularning amal qilish muddatlarini Neft mahsulotlarini (neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotishdan tashqari) sotish faoliyatini litsenziyalash toʻgʻrisidagi nizomga muvofiqlashtirsin va litsenziatlar bilan litsenziya bitimlari tuzsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

oʻn kun muddatda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari yigʻilishlarida mazkur qaror bilan tasdiqlangan Nizomga va namunaviy tarkibga muvofiq neft mahsulotlarini avtomobillarga yonilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash boʻyicha hududiy komissiyalar tarkibini tasdiqlasinlar, komissiyalar masʼuliyatini oshirish chora-tadbirlarini koʻrsinlar;

bir oy muddatda “Oʻzdavneftgazinspeksiya” bilan birgalikda ushbu qaror kuchga kirgunga qadar neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish huquqiga litsenziya olgan litsenziatlar bilan “Oʻzdavneftgazinspeksiya”ning hududiy boʻlimlari orqali litsenziya bitimlari tuzilishini taʼminlasinlar.

Oʻzbekiston Respublikasi Vazirlar Mahkamasining Neft mahsulotlarini sotish boʻyicha faoliyatni litsenziyalash komissiyasi ushbu bandning bajarilishini muvofiqlashtirishni va nazorat qilishni taʼminlasin.

7. Oʻzbekiston Respublikasi Hukumatining 5-ilovaga muvofiq ayrim qarorlariga oʻzgartirishlar kiritilsin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Mazkur Nizom neft mahsulotlarini sotish boʻyicha (neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotishdan tashqari) faoliyatni litsenziyalash tartibini belgilaydi.

2. Avtobenzin, aviabenzin, ekstrabenzin, dizel yoqilgʻisi, aviakerosin, mazut, pech yoqilgʻisi, neft bitumi, shuningdek texnik moylar va moylash materiallarini sotish boʻyicha faoliyat litsenziyalanishi kerak, ularning zavodda idishga qadoqlanganlari bundan mustasno.

3. Neft mahsulotlarini sotish boʻyicha faoliyat faqat yuridik shaxslar tomonidan amalga oshiriladi.

4. Neft mahsulotlarini sotish boʻyicha faoliyatni amalga oshirish huquqiga namunaviy (oddiy) litsenziyalar beriladi.

5. Litsenziyalarni berish, litsenziyaning amal qilishini toʻxtatib turish yoki tugatish, shuningdek uni bekor qilish va qayta rasmiylashtirish toʻgʻrisidagi qarorlar Oʻzbekiston Respublikasi Vazirlar Mahkamasining neft mahsulotlarini sotish boʻyicha faoliyatni litsenziyalash Komissiyasi (keyingi oʻrinlarda Komissiya deb ataladi) tomonidan qabul qilinadi.

Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari axborot-tahlil departamenti (keyingi oʻrinlarda matnda “Departament” deb yuritiladi) Oʻzbekiston Respublikasi Vazirlar Mahkamasining neft mahsulotlarini sotish boʻyicha faoliyatni litsenziyalash Komissiyasining hujjatlarni qabul qilish, ular boʻyicha ekspert xulosasi tayyorlash, litsenziyalarni rasmiylashtirish va qayta rasmiylashtirish, litsenziyalar reyestrini yuritish, litsenziyalarning amal qilishini toʻxtatib qoʻyish va tiklash, litsenziya bitimlari tuzish va ularning bajarilishini nazorat qilishni amalga oshiruvchi ishchi organi hisoblanadi.

Komissiya faoliyati Komissiya tomonidan tasdiqlanadigan nizomga muvofiq tashkil etiladi.

6. Neft mahsulotlarini sotish boʻyicha faoliyatni amalga oshirishga litsenziya 5 yil muddatga beriladi

7. Quyidagilar neft mahsulotlarini sotish boʻyicha faoliyatni amalga oshirishning litsenziya talablari va shartlari hisoblanadi:

a) litsenziat tomonidan neft mahsulotlarini qabul qilish, saqlash, hisobga olish va sotish sohasidagi Oʻzbekiston Respublikasi qonun hujjatlariga, ekologiya, sanitariya, metrologiya, yongʻindan saqlash va texnik normalar, normativlar va qoidalarga rioya etish;

b) shtatda litsenziyada koʻrsatilgan faoliyat turi boʻyicha tegishli maʼlumotga va kamida uch yil ish stajiga ega boʻlgan kamida bir nafar xodimning, shuningdek xizmat koʻrsatuvchi texnik xodimlarda maxsus tayyorgarlikning mavjud boʻlishi;

v) sotiladigan neft mahsulotlariga sifat sertifikatining mavjudligi va ularning sifat sertifikatiga haqiqatda muvofiqligi;

g) faoliyatning litsenziyalanayotgan aniq turini amalga oshirish, shu jumladan mavjud moddiy-texnika bazasidan, neft omboridan va yonilgʻi quyish asbob-uskunalaridan, boshqa texnika vositalaridan foydalanish uchun sharoitlarning yaratilganligi;

d) litsenziat tomonidan davlat siri hisoblanadigan maʼlumotlardan foydalanish bilan bogʻliq ishlar bajarilgan taqdirda rejim organining mavjudligi.

8. Litsenziya bitimida mazkur Nizomning 7-bandida sanab oʻtilganlardan aniq litsenziya talablari va shartlari nazarda tutilishi mumkin.

9. Neft mahsulotlarini sotish boʻyicha faoliyatning tegishli turini amalga oshirish uchun zarur boʻlgan moddiy-texnik bazaga, asbob-uskunalarga va boshqa texnika vositalariga minimal talablarni Departament belgilaydi va ular Komissiya tomonidan tasdiqlanadi.

10. Litsenziya olish uchun litsenziya talabgori Departamentga quyidagi hujjatlarni taqdim etadi:

a) yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bankdagi hisob raqami, faoliyatning (yoxud uning bir qismining) litsenziyalanadigan turi koʻrsatilgan holda litsenziya berish toʻgʻrisidagi ariza;

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning nusxasi;

v) litsenziya berish toʻgʻrisidagi arizaning litsenziyalovchi organ tomonidan koʻrib chiqilganligi uchun yigʻim toʻlanganligini tasdiqlovchi hujjat;

g) faoliyatning litsenziyalanadigan turini amalga oshirish uchun foydalaniladigan binolar, inshootlar, muhandislik kommuniksiyalari va texnologik asbob-uskunalarga egalik huquqining yoki boshqa ashyoviy huquqning mavjudligini tasdiqlovchi hujjat;

d) “Oʻzdavneftgazinspeksiya” hududiy boʻlimining neft mahsulotlarini qabul qilish, saqlash, hisobga olish va sotish uchun neft ombori xoʻjaligining asbob-uskunalar bilan taʼminlanganligi holati, xizmat koʻrsatuvchi xodimlarning maxsus maʼlumotga egaligi toʻgʻrisidagi xulosasi;

e) Oʻzbekiston Respublikasi “Sanoatgeokontexnazorat” davlat inspeksiyasi boʻlinmasining neft ombori xoʻjaligining bosim ostida ishlaydigan idishlarning tuzilishi va xavfsiz foydalanish qoidalari, texnik foydalanish qoidalari talablariga muvofiqligi toʻgʻrisidagi xulosasi;

j) yongʻin nazorati hududiy organlarining yongʻindan saqlash talablariga muvofiqlik toʻgʻrisidagi xulosasi;

z) “Oʻzstandart” agentligining hududiy standartlashtirish va metrologiya boshqarmalari tomonidan beriladigan metrologik taʼminot toʻgʻrisidagi xulosa;

i) Oʻzbekiston Respublikasi Davlat tabiatni muhofaza qilish qoʻmitasi boʻlinmasining neft ombori xoʻjaligining tabiatni muhofaza qilish va ekologiya talablariga muvofiqligi toʻgʻrisidagi xulosasi.

11. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

12. Hujjatlar litsenziya talabgori tomonidan Oʻzbekiston Respublikasi Vazirlar Mahkamasiga bevosita yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

13. Litsenziya olish uchun taqdim etilgan hujjatlar Departamentning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda litsenziya talabgoriga yuboriladi (topshiriladi).

14. Litsenziya berish toʻgʻrisidagi arizaning koʻrib chiqilganligi uchun qonun hujjatlarida belgilangan eng kam oylik ish haqining ikki baravari miqdorida yigʻim undiriladi.

15. Litsenziya berish yuzasidan hujjatlarning koʻrib chiqilganligi uchun yigʻim summasi litsenziyalovchi organning hisob raqamiga oʻtkaziladi.

16. Litsenziya talabgori berilgan arizadan voz kechgan taqdirda toʻlangan yigʻim qaytarilmaydi.

17. Neft mahsulotlarini sotish boʻyicha faoliyatni litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya berish yoki litsenziya berishni rad etish toʻgʻrisida qaror qabul qilish uchun hujjatlarni koʻrib chiqish muddati litsenziya olishga ariza va barcha zarur hujjatlar tushgan kundan boshlab oʻttiz kunni tashkil qiladi.

18. Departament ariza olingan kundan boshlab oʻn besh kundan oshmaydigan muddatda hujjatlarni koʻrib chiqadi, ular yuzasidan ekspert xulosa tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni qaror protokolining tegishli loyihasi bilan birga Komissiyaga tasdiqlash uchun taqdim etadi.

Departament ekspert xulosasini tayyorlash uchun “Oʻzdavneftgazinspeksiya”ning hamda davlat va xoʻjalik boshqaruvi boshqa organlarining mutaxassislarini jalb etish huquqiga ega.

Komissiya Departament taklifi olingandan keyin 15 kundan ortiq boʻlmagan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

Komissiya qarori soʻrov yoʻli bilan qabul qilinishi mumkin.

19. Departament litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

20. Litsenziya bitimi Departament hamda litsenziat oʻrtasida tuziladi va unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, egallab turgan lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini litsenziyalovchi organ tomonidan nazorat qilish tartibi;

neft mahsulotlarini sotish boʻyicha faoliyat xususiyatlariga taalluqli boshqa shartlar.

Litsenziya bitimi ikki nusxada — litsenziat va Departament uchun bir nusxadan tuziladi.

21. Litsenziya belgilangan shakldagi blankalarda Departament tomonidan rasmiylashtiriladi va Komissiya raisi (uning oʻrinbosari) tomonidan imzolanadi.

Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi.

Litsenziyalar blankalarini tayyorlash, ularni hisobga olish, saqlash va rasmiylashtirish Oʻzbekiston Respublikasi Vazirlar Mahkamasining 2001-yil 2-maydagi 200-son qaroriga muvofiq amalga oshiriladi.

22. Litsenziya litsenziya talabgori tomonidan qonun hujjatlarida belgilangan eng kam oylik ish haqining oʻn baravari miqdorida davlat boji toʻlanganligini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.

Davlat boji summasi davlat budjetiga oʻtkaziladi.

23. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida Departamentga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, Komissiya litsenziyani bekor qilish toʻgʻrisida qaror qabul qilishga haqlidir.

24. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek Departament mansabdor shaxsining xatti-harakatlari (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

25. Litsenziya berish rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda tegishli qaror qabul qilingandan keyin uch kun mobaynida yozma shaklda yuboriladi (topshiriladi). Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

26. Litsenziya talabgori tomonidan litsenziya berish rad etilishiga asos boʻlgan sabablar bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Bunda Departament hujjatlar takroran taqdim etilgandan keyin olti kun mobaynida ular yuzasidan ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni qarorning tegishli protokoli loyihasi bilan birgalikda Komissiyaga tasdiqlash uchun taqdim etadi.

Komissiya Departament taklifi olingandan keyin toʻrt kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

27. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda Departamentga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

28. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

29. Departament litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish Departament tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda qonun hujjatlarida belgilangan eng kam oylik ish haqining bir baravari miqdorida yigʻim undiriladi.

30. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza Departamentga litsenziyaning amal qilish muddati tugagunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uni uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

31. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikatini berishda qonun hujjatlarida belgilangan eng kam oylik ish haqining bir baravari miqdorida yigʻim undiriladi.

32. Litsenziya talablari va shartlariga rioya etilishi ustidan nazoratni amalga oshirishda Departament:

litsenziya talablari va litsenziya bitimlari shartlariga litsenziatlar tomonidan rioya etilishini qonun hujjatlarida belgilangan tartibda rejali tekshiradi;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziatlar tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshiradi;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻraydi va oladi;

tekshirishlar natijalari asosida, litsenziya talablari va shartlarining aniq buzilishlarini koʻrsatgan holda dalolatnomalar tuzadi;

litsenziatga aniqlangan litsenziya talablari va shartlari buzilishlarini bartaraf etish majburiyatini yuklovchi qarorlar chiqaradi, bunday buzilishlarni bartaraf etish muddatlarini belgilaydi;

Komissiyaga litsenziyaning toʻxtatish yoki uni bekor qilish toʻgʻrisidagi qarorni koʻrib chiqish uchun kiritadi.

Davlat nazorat organlari, shuningdek davlatning boshqa organlari, oʻz vakolatlari doirasida, litsenziya talablari va shartlari buzilishlari aniqlanganda litsenziyalovchi organga aniqlangan buzilishlar va koʻrilgan chora-tadbirlar toʻgʻrisida xabar qilishi shart.

33. Departament litsenziya talablari va shartlariga rioya etilishini tekshirishda davlatning tegishli boshqaruv va nazorat organlari mutaxassislarini jalb qilish huquqiga ega. Tekshirishlar natijalari boʻyicha ikki nusxada dalolatnoma tuziladi, ularning bittasi litsenziatga beriladi, ikkinchi nusxasi Departamentda qoladi.

34. Litsenziyaning amal qilishini toʻxtatib turish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-moddasida nazarda tutilgan hollarda va tartibda Departament tomonidan amalga oshiriladi.

Departamentning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziyaning amal qilishini toʻxtatib turish asossiz ekanligi sud tomonidan eʼtirof etilgan taqdirda, Departament litsenziat oldida litsenziat koʻrgan zarar miqdorida javob beradi.

35. Litsenziyaning amal qilishini toʻxtatish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 23-moddasida nazarda tutilgan hollarda va tartibda Komissiya qaroriga koʻra amalga oshiriladi.

Komissiyaning litsenziyaning amal qilishini toʻxtatish toʻgʻrisidagi qarori yuzasidan sudga shikoyat qilish mumkin. Litsenziyaning amal qilishini toʻxtatish asossiz ekanligi sud tomonidan eʼtirof etilgan taqdirda, Komissiya litsenziat oldida litsenziat koʻrgan zarar miqdorida javob beradi.

36. Litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 24-moddasida nazarda tutilgan hollarda va tartibda Komissiya qaroriga koʻra amalga oshiriladi.

Komissiyaning litsenziyani bekor qilish toʻgʻrisidagi qarori yuzasidan sudga shikoyat qilish mumkin. Litsenziyani bekor qilish asossiz ekanligi sud tomonidan eʼtirof etilgan taqdirda, Komissiya litsenziat oldida litsenziat koʻrgan zarar miqdorida javob beradi.

37. Litsenziyalovchi organ belgilangan tartibda litsenziyalar reyestrini yuritadi.

38. Litsenziyalar reyestrida quyidagilar koʻrsatilishi kerak:

a) litsenziatlar toʻgʻrisidagi asosiy maʼlumotlar: yuridik shaxsning toʻliq va qisqartirilgan nomi, uning davlat roʻyxatidan oʻtkazilganligi toʻgʻrisidagi maʼlumotlar (roʻyxatdan oʻtkazish sanasi, davlat roʻyxatidan oʻtkazilganligi toʻgʻrisidagi guvohnomaning berilgan sanasi va tartib raqami), pochta manzili, telefoni va faksi raqami, elektron pochtasi manzili;

b) litsenziyalanayotgan faoliyat turi;

v) litsenziyalarning berilgan sanasi va tartib raqami;

g) litsenziyalarning amal qilish muddati;

d) litsenziyalarni qayta rasmiylashtirish, ularning amal qilish muddatini toʻxtatib turish va tiklashning asoslari va sanasi;

e) litsenziyalarning amal qilishini toʻxtatish asoslari va sanasi;

j) litsenziyalarni bekor qilishning asoslari va sanasi;

39. Litsenziyalarning reyestrlarida mavjud boʻlgan maʼlumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi.

1. Mazkur Nizom neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni litsenziyalash tartibini belgilaydi.

2. Avtomobillarga yonilgʻi quyish shoxobchalari va moy almashtirish punktlarining avtobenzin, dizel yoqilgʻisi, pech yoqilgʻisi, neft bitumi, shuningdek texnik moylar va moylash materiallari sotish boʻyicha faoliyati litsenziyalanishi kerak, ularning zavodda idishga qadoqlanganlari bundan mustasno.

3. Neft mahsulotlarini sotish boʻyicha faoliyat faqat yuridik shaxslar tomonidan amalga oshiriladi.

4. Neft mahsulotlarini sotish boʻyicha faoliyatni amalga oshirish huquqiga belgilangan shakldagi litsenziyalar beriladi.

5. Neft mahsulotlarini sotish boʻyicha faoliyatni litsenziyalash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni litsenziyalash hududiy komissiyalari (keyingi oʻrinlarda matnda “Komissiya” deb yuritiladi) tomonidan amalga oshiriladi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining neft mahsulotlarini avtomobillarga yonilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash komissiyalari toʻgʻrisidagi namunaviy nizom Oʻzbekiston Respublikasi Vazirlar Mahkamasining neft mahsulotlarini sotish boʻyicha faoliyatni litsenziyalash Komissiyasi tomonidan tasdiqlanadi.

Neft mahsulotlarini avtomobillarga yonilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash masalalarini koʻrib chiqish hududiy komissiyasi tarkibiga Oʻzbekiston Respublikasi Ichki ishlar vazirligi, Moliya vazirligi, Davlat soliq qoʻmitasi, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi, Davlat mulki qoʻmitasi, “Oʻzstandart” agentligi tegishli hududiy boʻlimlarining vakillari kiradi.

Hududiy komissiyalarga Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining tegishli masalalarga mutasaddi oʻrinbosarlari rahbarlik qiladi.

Komissiyalarning shaxsiy tarkibi tegishli ravishda Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari tomonidan tasdiqlanadi.

“Oʻzdavneftgazinspeksiya”ning hududiy boʻlimlari komissiyalarning hujjatlarni qabul qilish, ular boʻyicha ekspert xulosasi tayyorlash, litsenziyalarni rasmiylashtirish va qayta rasmiylashtirish, litsenziyalar reyestrini yuritish, litsenziyalarni berish, litsenziya bitimlari tuzish va ularning bajarilishini nazorat qilishni amalga oshiruvchi ishchi organi hisoblanadi.

6. Neft mahsulotlarini avtomobillarga yonilgʻi quyish shoxobchalari va moy almashtirish punktlari orqali sotish boʻyicha faoliyatni amalga oshirishga litsenziya 5 yil muddatga beriladi.

7. Quyidagilar neft mahsulotlarini sotish boʻyicha faoliyatni amalga oshirishning litsenziya talablari va shartlari hisoblanadi:

a) litsenziat tomonidan neft mahsulotlarini qabul qilish, saqlash, hisobga olish va sotish sohasida Oʻzbekiston Respublikasi qonun hujjatlariga, ekologiya, sanitariya, metrologiya, yongʻindan saqlash va texnik normalar, normativlar va qoidalarga rioya etish (mazkur Nizomga 1 va 2-ilova);

b) shtatda litsenziyada koʻrsatilgan faoliyat turi boʻyicha tegishli maʼlumotga va kamida uch yil ish stajiga ega boʻlgan kamida bir nafar xodimning, shuningdek xizmat koʻrsatuvchi texnik xodimlarda maxsus tayyorgarlikning mavjud boʻlishi;

v) sotiladigan neft mahsulotlariga sifat sertifikatining mavjudligi va ularning sifat sertifikatiga haqiqatda muvofiqligi;

g) faoliyatning litsenziyalanayotgan aniq turini amalga oshirish, shu jumladan mavjud moddiy-texnika bazasidan, neft omboridan va yonilgʻi quyish asbob-uskunalaridan, boshqa texnika vositalaridan foydalanish uchun sharoitlarning yaratilganligi;

d) litsenziat tomonidan davlat siri hisoblanadigan maʼlumotlardan foydalanish bilan bogʻliq ishlar bajarilgan taqdirda rejim organining mavjudligi.

8. Litsenziya bitimida mazkur Nizomning 7-bandida sanab oʻtilganlardan aniq litsenziya talablari va shartlari nazarda tutilishi mumkin.

9. Neft mahsulotlarini sotish boʻyicha faoliyatning tegishli turini amalga oshirish uchun zarur boʻlgan moddiy-texnik bazaga, asbob-uskunalarga va boshqa texnika vositalariga minimal talablar “Oʻzdavneftgazinspeksiya” tomonidan belgilanadi.

10. Litsenziya olish uchun litsenziya talabgori “Oʻzdavneftgazinspeksiya” hududiy boʻlimiga quyidagi hujjatlarni taqdim etadi:

a) yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bankdagi hisob raqami, faoliyatning (yoxud uning bir qismining) litsenziyalanadigan turi koʻrsatilgan holda litsenziya berish toʻgʻrisidagi ariza;

b) yuridik shaxsning davlat roʻyxatidan oʻtkazilganligi toʻgʻrisidagi guvohnomaning nusxasi;

v) litsenziya berish toʻgʻrisidagi arizaning litsenziyalovchi organ tomonidan koʻrib chiqilganligi uchun yigʻim toʻlanganligini tasdiqlovchi hujjat;

g) faoliyatning litsenziyalanadigan turini amalga oshirish uchun foydalaniladigan standartlar, normalar va qoidalarga muvofiq keluvchi binolar, inshootlar, muhandislik kommuniksiyalari va texnologik asbob-uskunalarga egalik huquqining yoki boshqa ashyoviy huquqning mavjudligini tasdiqlovchi hujjat;

d) “Oʻzdavneftgazinspeksiya” hududiy boʻlimining avtomobillarga yonilgʻi quyish shoxobchalari va moy almashtirish punktlarining neft mahsulotlarini qabul qilish, saqlash, hisobga olish va sotish uchun asbob-uskunalar bilan taʼminlanganligi holati, xizmat koʻrsatuvchi xodimlarning maxsus maʼlumotga egaligi toʻgʻrisidagi xulosasi;

e) Oʻzbekiston Respublikasi “Sanoatgeokontexnazorat” davlat inspeksiyasi boʻlinmasining avtomobillarga yonilgʻi quyish shoxobchasi va moy almashtirish punktining neft mahsulotlarini qabul qilish, saqlash va sotishda mehnatni muhofaza qilish va texnika xavfsizligiga oid qonun hujjatlari talablariga muvofiqligi toʻgʻrisidagi xulosasi;

j) yongʻin nazorati hududiy organlarining avtomobillarga yonilgʻi quyish shoxobchasi va moy almashtirish punktining yongʻindan saqlash talablariga muvofiqlik toʻgʻrisidagi xulosasi;

z) “Oʻzstandart” agentligining hududiy standartlashtirish va metrologiya boshqarmalari tomonidan beriladigan metrologik taʼminot toʻgʻrisidagi xulosa;

i) Oʻzbekiston Respublikasi Davlat tabiatni muhofaza qilish qoʻmitasi boʻlinmasining avtomobillarga yonilgʻi quyish shoxobchasi va moy almashtirish punktining tabiatni muhofaza qilish va ekologiya talablariga muvofiqligi toʻgʻrisidagi xulosasi.

11. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

12. Hujjatlar litsenziya talabgori tomonidan “Oʻzdavneftgazinspeksiya” hududiy boʻlimiga bevosita yoxud olinganligi toʻgʻrisidagi bildirishnoma bilan pochta aloqasi vositasi orqali yetkazib beriladi.

13. Litsenziya olish uchun taqdim etilgan hujjatlar “Oʻzdavneftgazinspeksiya” hududiy boʻlimining masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda litsenziya talabgoriga yuboriladi (topshiriladi).

14. Litsenziya berish toʻgʻrisidagi arizaning koʻrib chiqilganligi uchun qonun hujjatlarida belgilangan eng kam oylik ish haqining ikki baravari miqdorida yigʻim undiriladi.

15. Litsenziya berish yuzasidan hujjatlarning koʻrib chiqilganligi uchun yigʻim summasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hisob raqamiga oʻtkaziladi.

16. Litsenziya talabgori berilgan arizadan voz kechgan taqdirda toʻlangan yigʻim qaytarilmaydi.

17. Neft mahsulotlarini avtomobillarga yoqilgʻi qoʻyish shoxobchalari va moy almashtirish punktlari orqali sotish boʻyicha faoliyatni litsenziyalash ushbu Nizomga 3-ilovaga muvofiq sxemaga binoan amalga oshiriladi.

Litsenziya berish yoki litsenziya berishni rad etish toʻgʻrisida qaror qabul qilish uchun hujjatlarni koʻrib chiqish muddati litsenziya olishga ariza va barcha zarur hujjatlar tushgan kundan boshlab oʻttiz kunni tashkil qiladi.

18. “Oʻzdavneftgazinspeksiya” hududiy boʻlimi ariza olingan kundan boshlab oʻn besh kundan oshmaydigan muddatda hujjatlarni koʻrib chiqadi, ular yuzasidan ekspert xulosa tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni qaror protokolining tegishli loyihasi bilan birga Komissiyaga tasdiqlash uchun taqdim etadi.

Komissiya “Oʻzdavneftgazinspeksiya” hududiy boʻlimining taklifi olingandan keyin 15 kundan ortiq boʻlmagan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

19. “Oʻzdavneftgazinspeksiya”ning hududiy boʻlimi litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

20. Litsenziyalovchi organ va litsenziatning oʻzaro huquq va majburiyatlarini belgilovchi litsenziya bitimi “Oʻzdavneftgazinspeksiya”ning hududiy boʻlimi hamda litsenziat oʻrtasida tuziladi va unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, egallab turgan lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziya bitimi talablari va shartlari litsenziat tomonidan bajarilishini litsenziyalovchi organ tomonidan nazorat qilish tartibi;

neft mahsulotlarini sotish boʻyicha faoliyat xususiyatlariga taalluqli boshqa shartlar.

Litsenziya bitimi ikki nusxada — litsenziat va “Oʻzdavneftgazinspeksiya”ning hududiy boʻlimi uchun bir nusxadan tuziladi.

21. Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining buyurtmanomalariga koʻra mazkur Nizomga 4-ilovaga namunada “Davlat belgisi” Davlat-ishlab chiqarish birlashmasida bosma usulda tayyorlanadi. Litsenziyalar blankalari hisobga olinishi, saqlanishi va maqsadli foydalanilishi uchun masʼuliyat “Oʻzdavneftgazinspeksiya”ning hududiy boʻlimi rahbarlari zimmasiga yuklanadi.

Litsenziyalar “Oʻzdavneftgazinspeksiya”ning hududiy boʻlimi tomonidan rasmiylashtiriladi va Komissiya raisi (uning oʻrinbosari) tomonidan imzolanadi.

22. Litsenziya litsenziya talabgori tomonidan qonun hujjatlarida belgilangan eng kam oylik ish haqining oʻn baravari miqdorida davlat boji toʻlanganligini tasdiqlovchi hujjat taqdim etilgandan va u litsenziya bitimini imzolagandan keyin uch kundan kechikmay beriladi.

Davlat boji summasi davlat budjetiga oʻtkaziladi.

23. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida “Oʻzdavneftgazinspeksiya”ning hududiy boʻlimiga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, Komissiya litsenziyani bekor qilish toʻgʻrisida qaror qabul qilishga haqlidir.

24. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek “Oʻzdavneftgazinspeksiya”ning hududiy boʻlimi mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

25. Litsenziya berish rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda tegishli qaror qabul qilingandan keyin uch kun mobaynida yozma shaklda yuboriladi (topshiriladi). Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

26. Litsenziya talabgori tomonidan litsenziya berish rad etilishiga asos boʻlgan sabablar bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Bunda “Oʻzdavneftgazinspeksiya”ning hududiy boʻlimi hujjatlar takroran taqdim etilgandan keyin olti kun mobaynida ular yuzasidan ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni qarorning tegishli protokoli loyihasi bilan birgalikda Komissiyaga tasdiqlash uchun taqdim etadi.

Komissiya “Oʻzdavneftgazinspeksiya” hududiy boʻlimining taklifi olingandan keyin toʻrt kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

27. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda “Oʻzdavneftgazinspeksiya”ning hududiy boʻlimiga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

28. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

29. “Oʻzdavneftgazinspeksiya”ning hududiy boʻlimi litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish Departament tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda qonun hujjatlarida belgilangan eng kam oylik ish haqining bir baravari miqdorida yigʻim undiriladi.

30. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza “Oʻzdavneftgazinspeksiya”ning hududiy boʻlimiga litsenziyaning amal qilish muddati tugagunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uni uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

31. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikatini berishda qonun hujjatlarida belgilangan eng kam oylik ish haqining bir baravari miqdorida yigʻim undiriladi.

32. Litsenziya talablari va shartlariga rioya etilishi ustidan nazoratni amalga oshirishda “Oʻzdavneftgazinspeksiya”ning hududiy boʻlimi:

litsenziatlar tomonidan litsenziya talablari va litsenziya bitimlari shartlariga rioya etilishini qonun hujjatlarida belgilangan tartibda rejali tekshiradi;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziatlar tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshiradi;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻraydi va oladi;

tekshirishlar natijalari asosida, litsenziya talablari va shartlarining aniq buzilishlarini koʻrsatgan holda dalolatnomalar tuzadi;

litsenziatga litsenziya talablari va shartlarining aniqlangan buzilishlarini bartaraf etish majburiyatini yuklovchi qarorlar chiqaradi, bunday buzilishlarni bartaraf etish muddatlarini belgilaydi;

Komissiyaga litsenziyaning toʻxtatish yoki uni bekor qilish toʻgʻrisidagi taklifni koʻrib chiqish uchun kiritadi.

Davlat nazorat va tekshirish organlari, shuningdek davlatning boshqa organlari oʻz vakolatlari doirasida, litsenziya talablari va shartlari buzilishlari aniqlanganda litsenziyalovchi organga aniqlangan buzilishlar va koʻrilgan chora-tadbirlar toʻgʻrisida xabar qilishi shart.

33. Litsenziya talablari va shartlariga rioya etilishini tekshirishda “Oʻzdavneftgazinspeksiya” hududiy boʻlimining xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi “Oʻzdavneftgazinspeksiya”ning hududiy boʻlimida qoladi.

34. Litsenziyaning amal qilishini toʻxtatib turish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-moddasida nazarda tutilgan hollarda va tartibda amalga oshiriladi.

Komissiyaning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziyaning amal qilishini toʻxtatib turish asossiz ekanligi sud tomonidan eʼtirof etilgan taqdirda, Komissiya litsenziat oldida litsenziat koʻrgan zarar miqdorida javob beradi.

35. Litsenziyaning amal qilishini toʻxtatish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 23-moddasida nazarda tutilgan hollarda va tartibda amalga oshiriladi.

36. Litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 24-moddasida nazarda tutilgan hollarda va tartibda amalga oshiriladi.

37. “Oʻzdavneftgazinspeksiya”ning hududiy boʻlimi belgilangan tartibda litsenziyalar reyestrini yuritadi.

38. Litsenziyalar reyestrida quyidagilar koʻrsatilishi kerak:

a) litsenziatlar toʻgʻrisidagi asosiy maʼlumotlar: yuridik shaxsning toʻliq va qisqartirilgan nomi, uning davlat roʻyxatidan oʻtkazilganligi toʻgʻrisidagi maʼlumotlar (roʻyxatdan oʻtkazish sanasi, davlat roʻyxatidan oʻtkazilganligi toʻgʻrisidagi guvohnomaning berilgan sanasi va tartib raqami), pochta manzili, telefoni va faksi raqami, elektron pochtasi manzili;

b) litsenziyalanayotgan faoliyat turi;

v) litsenziyalarning berilgan sanasi va tartib raqami;

g) litsenziyalarning amal qilish muddati;

d) litsenziyalarni qayta rasmiylashtirish, ularning amal qilish muddatini toʻxtatib turish va tiklashning asoslari va sanasi;

e) litsenziyalarning amal qilishini toʻxtatish asoslari va sanasi;

j) litsenziyalarni bekor qilishning asoslari va sanasi;

39. Litsenziyalarning reyestrlarida mavjud boʻlgan maʼlumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi.

1. Avtomobillarga yonilgʻi quyish shoxobchasi (AYQSh) AYQShdan foydalanishning amaldagi texnik qoidalariga javob berishi kerak.

2. AYQSh binolari, inshootlari, maydoni, shuningdek unga tutash hududlar sanitariya-maishiy va yongʻinga qarshi talablarga javob berishi kerak.

3. AYQSh joylashgan joy tegishli yoʻl belgilari bilan belgilangan boʻlishi kerak.

4. AYQSh badiiy jihozlangan vitrinalar, reklama taxtalari, koʻrgazmali targʻibot vositalari bilan jihozlangan boʻlishi, u yerda AYQSh jihozlari, ish tartibi, neft mahsulotlarining chakana narxlari preyskuranti, yaqin atrofda joylashgan AYQSh sxemasi boʻlishi kerak.

5. AYQSh telefon aloqasi, ovoz kuchaytirgich va signalizatsiya vositasi (yuqori ovozli qoʻngʻiroq) bilan jihozlangan yoki idoradan tashqari qoʻriqlash pultiga ulangan boʻlishi kerak.

6. AYQShda pul mablagʻlarining oʻgʻirlanishini va AYQSh binosiga chet shaxslarning ruxsatsiz kirishini istisno qiluvchi (ikki qavatli eshiklar – ulardan birining ikki tomoniga tunuka qoplangan, polga yoki devorga mahkamlangan yonmaydigan seyf boʻlishi kerak, panjarali derazalar va shu kabilar) chora-tadbirlar amalga oshirilgan boʻlishi kerak.

7. Har qaysi rezervuar loyihada nazarda tutilgan jihozlarning toʻliq toʻplami bilan jihozlangan boʻlishi va rezervuarning tartib raqami, (baland joyga oʻrnatiladigan trafaretning) bazaviy balandligi, saqlanayotgan neft mahsulotining markasi koʻrsatilgan yozuvlarga ega boʻlishi kerak.

8. Neft mahsulotlari sotish uchun moʻljallangan har qaysi yonilgʻi va moy tarqatish kolonkasida uning tartib raqami va sotiladigan neft mahsulotining markasi boʻlishi kerak.

9. Har qaysi kolonka “Oʻzstandart” agentligi organlari tomonidan soʻrgʻichlangan boʻlishi kerak.

10. Aholiga neft mahsulotlarini naqd pulga sotish nazorat-kassa mashinalari majburiy qoʻllangan holda amalga oshirilishi kerak.

1. AYQSh yongʻin xavfsizligi qoidalariga muvofiq yongʻinni oʻchirishning dastlabki vositalari bilan taʼminlangan boʻlishi kerak. AYQSh binolari va hududidagi barcha yongʻinni oʻchirish vositalari zudlik bilan qoʻllanishga har doim toʻliq soz va tayyor holatda boʻlishi kerak.

2. AYQSh hududi qorongʻi (tungi) vaqtlarda mavjud normalarga muvofiq portlash va yongʻin xavfsizligi nazarda tutilgan holda tayyorlangan yoritgichlar bilan yoritilgan boʻlishi kerak.

3. AYQSh operatorlari maxsus kiyim-bosh, maxsus poyabzal va yakka tartibda himoyalanish vositalari bilan taʼminlangan boʻlishi kerak.

4. Momoqaldiroq vaqtida neft mahsulotlarini rezervuarlarga quyish va AYQShda transportga yonilgʻi quyish taqiqlanadi.

5. Portlash xavfi boʻlgan joylardagi ishlar uchqun paydo boʻlishiga yoʻl qoʻymaydigan asboblar bilan bajarilishi kerak.

1. Neft mahsulotlarining bugʻlanishi, neft mahsulotlarining toʻkilishi, shuningdek avtotransportning ishlangan gazlari AYQShning atrof muhitini ifloslantiruvchi manbalar hisoblanadi.

2. AYQShda neft mahsulotlarining bugʻlanishini kamaytirish uchun rezervuarlar va texnologiya jihozlarini texnik jihatdan toʻliq soz holatda saqlash hamda ularning germetikligini, shuningdek quyish va oʻlchash qurilmalarining, kuzatish va quyish quduqlari qopqoqlarining zich yopilganligini taʼminlash lozim.

AYQSh ishlab chiqarish va yomgʻir suvlarini toʻplash uchun ishlab chiqarish-jala kanalizatsiyasi bilan jihozlangan boʻlishi kerak.

AYQSh Oʻzbekiston Respublikasi Vazirlar Mahkamasining 1994-yil 6-maydagi 240-son qarori bilan tasdiqlangan Avtoyonilgʻi quyish shoxobchalarining ishlash qoidalari 10-bandiga muvofiq hujjatlar bilan taʼminlangan boʻlishi kerak.

1. AYQShda neft mahsulotlarini qabul qilib olish, saqlash, sotish va hisobga olish davlat standartlariga hamda neft bazalarida va AYQShda neft mahsulotlarining keltirilishini, ularni saqlash, sotish va hisobga olish tartibini tartibga soluvchi normativ hujjatlar talablariga qatʼiy muvofiq holda amalga oshiriladi.

2. Neft mahsulotlarini yetkazib berishga shartnomalar va belgilangan tartibda rasmiylashtirilgan joʻnatish hujjatlari keltiriladigan neft mahsulotlarini qabul qilib olish uchun asos hisoblanadi.

3. Neft mahsulotlari avtomobillarga yonilgʻi quyish shoxobchalari tomonidan (import boʻyicha) respublika tashqarisidan mustaqil ravishda keltirilgan taqdirda neft mahsulotlarini sotishning toʻgʻri hisobga olinishini taʼminlash maqsadida “Oʻzneftmahsulot” aksiyadorlik kompaniyasi tizimi neft bazalaridan koʻrsatib oʻtilgan AYQShga neft mahsulotlari berish import boʻyicha keltirilgan hajmlar toʻliq sotilgunga qadar toʻxtatib qoʻyiladi.

4. Neft mahsulotlarini qabul qilish:

avtomobil sisternasining quyish qurilmasi soz holatda boʻlmaganda;

joʻnatish hujjatlari notoʻgʻri rasmiylashtirilganda;

sifat pasporti mavjud boʻlmaganda;

neft mahsulotlarida suv va mexanik aralashmalar mavjud boʻlganda;

neft mahsulotlari kamomadi aniqlanganda taqiqlanadi.

5. Neft mahsulotlari kamomadi aniqlangan taqdirda belgilangan shakl boʻyicha, haydovchi (ekspeditor) va AYQSh operatori ishtirokida majburiy tartibda dalolatnoma tuziladi, uning bir nusxasi koʻrib chiqish va chora-tadbirlar koʻrish uchun neft bazasi rahbariyatiga taqdim etiladi.

6. AYQShda neft mahsulotlarining keltirilishini va kirim qilinishini nazorat qilish tartib raqami qoʻyilgan, ip oʻtkazib tikilgan, neft bazasining muhri qoʻyilgan belgilangan shakldagi hisobga olish daftarini yuritish yoʻli bilan taʼminlanadi.

7. Yonilgʻi quyish kolonkalarining ishlashini nazorat qilish smena qabul qilish va topshirish chogʻida smena operatorlari tomonidan, AYQSh boshligʻi ishtirokida, neft mahsulotlari sotilishining toʻgʻriligini namunaviy oʻlchagich vositasida tekshirish yoʻli bilan amalga oshiriladi. Tafovutlar miqdori natijasi smena hisobotida qayd qilinishi kerak.

1. Qoraqalpogʻiston Respublikasi Vazirlar Kengashi raisining oʻrinbosari, viloyatlar va Toshkent shahar hokimining oʻrinbosari – Komissiya raisi

2. Viloyat ichki ishlar boshqarmasi boshligʻi

3. Viloyat moliya boshqarmasi boshligʻi

4. Viloyat soliq boshqarmasi boshligʻi

5. Monopoliyadan chiqarish va raqobatni rivojlantirish hududiy organi rahbari.

6. Viloyat standartlashtirish va metrologiya boshqarmasi boshligʻi

7. Oʻzbekiston Respublikasi Davlat mulki qoʻmitasi viloyat boshqarmasi boshligʻi

1. Vazirlar Mahkamasining “Toshkent shahrini neft mahsulotlari bilan taʼminlashni yaxshilash chora-tadbirlari toʻgʻrisida” 1998-yil 7-sentabrdagi 382-son qarorining (Oʻzbekiston Respublikasi QT, 1998-y., 9-son, 33-modda) 1-bandi oʻz kuchini yoʻqotgan deb hisoblansin.

2. Vazirlar Mahkamasining “Avtomobil yonilgʻisi quyish shoxobchalarining ishini takomillashtirish va respublika isteʼmolchilarini neft mahsulotlari bilan taʼminlashni yaxshilash chora-tadbirlari toʻgʻrisida” 1998-yil 18-sentabrdagi 397-son qarorida (Oʻzbekiston Respublikasi QT, 1998-y., 9-son, 35-modda):

a) 1-bandda:

ikkinchi va uchinchi xatboshi oʻz kuchini yoʻqotgan deb hisoblansin;

toʻrtinchi xatboshidagi “xususiylashtirilgan” soʻzi chiqarib tashlansin;

b) 3-band oʻz kuchini yoʻqotgan deb hisoblansin;

v) 4-bandda:

ikkinchi xatboshi oʻz kuchini yoʻqotgan deb hisoblansin;

toʻrtinchi xatboshidagi “xususiylashtirilgan” soʻzi chiqarib tashlansin;

beshinchi xatboshidagi “Oʻzdavneftmahsulot” birlashmasi” soʻzlari “Oʻzneftmahsulot” aksiyadorlik kompaniyasi” soʻzlari bilan almashtirilsin;

g) qarorga 1 va 2-ilovalar oʻz kuchini yoʻqotgan deb hisoblansin;

d) qarorga 3-ilova nomidagi, 1.3, 3.4 va 3.5-bandlardagi “xususiylashtirilgan” soʻzi chiqarib tashlansin.