Oʻzbekiston Respublikasining valyutani tartibga solish borasidagi qonunchiligini tashqi iqtisodiy faoliyatni hamda valyuta siyosatini erkinlashtirish va birjadan tashqari valyuta bozorini rivojlantirish yuzasidan qabul qilingan qarorlarga muvofiqlashtirish maqsadida Oʻzbekiston Respublikasi Prezidentining farmonlariga ilovaga muvofiq oʻzgartirish va qoʻshimchalar kiritilsin.

1. Oʻzbekiston Respublikasi Prezidentining “Eksport-import operatsiyalari boʻyicha valyuta nazoratini taʼminlash chora-tadbirlari toʻgʻrisida” 1994-yil 20-apreldagi PF-837-son Farmonining ilovasi bilan tasdiqlangan “Eksport-import operatsiyalari boʻyicha valyuta nazorati toʻgʻrisida Nizom”ning:

a) 1-bandida ikkinchi, uchinchi va toʻrtinchi xatboshilar chiqarib tashlansin;

b) 8-bandi quyidagi tahrirda bayon etilsin:

“Nomarkazlashtirilgan eksportdan valyuta tushumini majburiy sotish korxonaning tranzit valyuta hisobvaragʻiga kelib tushgan kundan boshlab 5 bank kunidan kechiktirmay, markazlashtirilgan eksport boʻyicha esa 3 bank kunidan kechiktirmay amalga oshiriladi.”;

v) 10-bandida:

birinchi xatboshidagi “Tashqi iqtisodiy aloqalar vazirligi” soʻzlari olib tashlansin;

ikkinchi xatboshi olib tashlansin;

ushbu band mazmuni quyidagicha xatboshilar bilan toʻldirilsin:

“Valyutani sotib olish, sotish va undan foydalanish tartiblarini buzganlik uchun vakil qilingan banklarga va xoʻjalik yurituvchi subyektlarga nisbatan qonunchilikda belgilangan jazo choralari, shu jumladan ularning ichki valyuta bozorida xorijiy valyutani sotib olish huquqidan vaqtincha, 6 oy muddatga qadar mahrum etishgacha boʻlgan jazo qoʻllaniladi.

Belgilangan muddatlardan 30 bank kunidan koʻproq vaqt oʻtgandan keyin chet eldan valyuta tushumi kelib tushishining kechikishiga yoʻl qoʻygan yuridik shaxs rezidentlar kelib tushmagan valyuta mablagʻlarining 100 foiziga teng miqdordagi summani jarima tariqasida respublika budjeti daromadiga toʻlaydilar”;

g) 13-bandi quyidagi tahrirda bayon etilsin:

“eksport-import operatsiyalari boʻyicha toʻlovlarning asosiy shakllari hujjatli akkreditivlar, bank joʻnatmasi va inkasso hisoblanadi.

Import kontraktlari boʻyicha avans toʻlovlari kontraktda nazarda tutilgan qiymatning 15 foizidan oshmaydigan, ammo 100000 AQSh dollaridan koʻp boʻlmagan summa doirasida, faqat import qiluvchi korxonaga xizmat koʻrsatadigan Oʻzbekiston Respublikasi vakolatli bankining aloqador bankning muqobil bank kafolati mavjud boʻlgan taqdirdagina yoʻl qoʻyiladi. Mazkur summadan oshadigan avans toʻlovlarini oʻtkazish faqat Oʻzbekiston Respublikasi Tashqi iqtisodiy aloqalar vazirligining xulosasi boʻyicha Oʻzbekiston Respublikasi Vazirlar Mahkamasining ruxsati bilan amalga oshiriladi.”

2. Oʻzbekiston Respublikasi Prezidentining “Oʻzbekiston Respublikasi milliy valyutasining ichki erkin almashtirilishini yanada kengaytirish chora-tadbirlari toʻgʻrisida” 1995-yil 27-iyundagi PF-1193-son Farmonida:

a) 2-bandning birinchi satridagi “Oʻzbekiston respublika valyuta birjasida” soʻzlari “ichki valyuta bozorida” degan soʻzlar bilan almashtirilsin;

b) 4-bandidagi “Oʻzbekiston respublika valyuta birjasida” soʻzlari “ichki valyuta bozorida” degan soʻzlar bilan almashtirilsin, “ularda” soʻzi oʻrniga “birja savdolarida” soʻzlari yozilsin;

v) 3-bandiga mazmuni quyidagicha xatboshi qoʻshilsin:

“roʻyxatga olingan paytdan boshlab kamida 6 oy mobaynida faoliyatni amalga oshirish”;

g) 8-bandi quyidagi tahrirda bayon etilsin:

“Belgilab qoʻyilsinki:

mijozlarning talabnomalari boʻyicha vakolatli banklar tomonidan sotib olingan va 7 ish kuni mobaynida foydalanilmagan xorijiy valyuta soʻzsiz qayta sotilishi kerak;

import kontraktlari boʻyicha avans toʻlovlari kontraktda nazarda tutilgan qiymatning 15 foizidan oshmaydigan, ammo 100000 AQSh dollaridan koʻp boʻlmagan summa doirasida, faqat import qiluvchi korxonaga xizmat koʻrsatadigan Oʻzbekiston Respublikasi vakolatli bankining aloqador bankning muqobil bank kafolati mavjud boʻlgan taqdirdagina yoʻl qoʻyiladi. Mazkur summadan oshadigan avans toʻlovlarini oʻtkazish faqat Oʻzbekiston Respublikasi Tashqi iqtisodiy aloqalar vazirligining xulosasi boʻyicha Oʻzbekiston Respublikasi Vazirlar Mahkamasining ruxsati bilan amalga oshiriladi”.

3. Oʻzbekiston Respublikasi Prezidentining “Budjet bilan hisob-kitoblar uchun xoʻjalik yurituvchi subyektlarning masʼuliyatini oshirish chora-tadbirlari toʻgʻrisida” 1996-yil 9-avgustdagi PF-1504-son Farmonining 5-bandi quyidagi xatboshi bilan toʻldirilsin:

“Import kontraktlari yuzasidan mazkur kontraktlar boʻyicha sheriklar boʻlmagan norezidentlar foydasiga haq toʻlanishiga yoʻl qoʻyilmaydi”.

4. Oʻzbekiston Respublikasi Prezidentining “Birjadan tashqari valyuta bozorini yanada rivojlantirish va erkinlashtirish chora-tadbirlari toʻgʻrisida” 1998-yil 1-iyuldagi PF-2010-son Farmonining 5-bandida:

birinchi xatboshidagi “sotish sanasida birjadan tashqari valyuta bozoridagi oʻrtacha sotish kursi boʻyicha” degan soʻzlar olib tashlansin;

ikkinchi xatboshidagi “operatsiya amalga oshirilgan sanada birjadan tashqari bozordagi oʻrtacha kurs boʻyicha” degan soʻzlar olib tashlansin, “ikki kun mobaynida” soʻzlari “7 ish kuni mobaynida” degan soʻzlar bilan almashtirilsin.

5. Oʻzbekiston Respublikasi Prezidentining “Bank tizimini yanada erkinlashtirish va isloh qilish borasidagi chora-tadbirlar toʻgʻrisida” 2000-yil 21-martdagi PF-2564-son Farmoni 6-bandining uchinchi xatboshidagi “naqd pulsiz hisob-kitob evaziga mahsulot yetkazib berayotgan va xizmatlar koʻrsatayotgan” soʻzlari “oʻzi ishlab chiqarayotgan mahsulotni va xizmatlarni naqd pulsiz hisob-kitob evaziga yetkazib berayotgan” deb oʻzgartirilsin.