Respublika iqtisodiyotining charm-poyabzal tarmogʻini boshqarishni takomillashtirish, bozor munosabatlarini chuqurlashtirish, raqobatbardosh mahsulot ishlab chiqarishni koʻpaytirish maqsadida:

1. Oʻzbekiston Respublikasi Davlat mulki qoʻmitasining, “Oʻzbekyengilsanoat” uyushmasining, “Oʻzbek charmi” aksiyadorlik kompaniyasining, charm, moʻyna (qorakoʻldan tashqari) xom ashyosini tayyorlash, saqlash, qayta ishlash, charmdan foydalangan holda poyabzal, charm-galantereya hamda tikuvchilik buyumlari ishlab chiqarish boʻyicha xoʻjalik yurituvchi subyektlarning quyidagi takliflari qabul qilinsin:

“Oʻzbek charmi” aksiyadorlik kompaniyasining “Oʻzbekyengilsanoat” uyushmasi tarkibidan chiqish;

“Oʻzbek charmi” aksiyadorlik kompaniyasini “Oʻzbekcharmpoyabzali” uyushmasi etib qayta tashkil qilish, qayta tashkil etilayotgan “Oʻzbek charmi” aksiyadorlik kompaniyasining charm, moʻyna (qorakoʻldan tashqari) xom ashyosini tayyorlash, saqlash, qayta ishlash boʻyicha xoʻjalik yurituvchi subyektlarni, shuningdek, sunʼiy charm, charm-galantereya buyumlari, poyabzal, charmga ishlov berish uchun oshlovchi moddalar ishlab chiqarish boʻyicha “Oʻzbekyengilsanoat” uyushmasi tarkibida boʻlgan korxonalarni ixtiyoriylik asosida uning tarkibiga kiritish.

2. “Oʻzbekcharmpoyabzali” uyushmasi respublikada charm xom ashyosining bosh tayyorlovchisi etib belgilansin va “Oʻzbekyengilsanoat” uyushmasi mana shu ishlarni amalga oshirishdan ozod qilinsin.

3. Quyidagilar “Oʻzbekcharmpoyabzali” uyushmasining asosiy vazifalari deb hisoblansin:

uyushma tarkibiga kirgan tarmoq xoʻjalik yurituvchi subyektlarining charm, moʻyna (qorakoʻldan tashqari) xom ashyosini tayyorlash, saqlash, qayta ishlash boʻyicha faoliyatini muvofiqlashtirish, ana shu xom ashyodan raqobatbardosh mahsulot — poyabzal, tikuvchilik va charm-galantereya buyumlari ishlab chiqarish;

yagona texnikaviy va investitsiya siyosatini oʻtkazish, xorijiy sarmoyalarni keng jalb etish, ilgʻor texnologiyalarni joriy qilish, kooperatsiyaning yangi tashkiliy shakllarini rivojlantirish, raqobatbardosh charm-poyabzal, galantereya va moʻyna mahsulotlari ishlab chiqarish uchun korxonalarni modernizatsiyalash hamda texnika bilan qayta jihozlash;

ichki va tashqi bozorlarning marketing tadqiqotlarini amalga oshirish, eksportga moʻljallangan raqobatbardosh mahsulotlar ishlab chiqarish hajmi va turlarini koʻpaytirish;

uyushma tarkibiga, shuningdek Oziq-ovqat sanoati korxonalari uyushmasi tarkibiga kiruvchi korxonalar va tashkilotlar, qishloq xoʻjalik kooperativlari (shirkatlari), fermer va dehqon xoʻjaliklari oʻrtasidagi xoʻjalik hamda texnologik aloqalarni shartnomaviy munosabatlar tizimini takomillashtirish yoʻli bilan mustahkamlash;

charm, moʻyna xom ashyosini tayyorlash, korxonalarni zarur moddiy, texnikaviy resurslar bilan taʼminlash, tayyor mahsulotni sotish sohasida agrosanoat integratsiyasi va kooperatsiyalashuvning yangi tashkiliy shakllarini rivojlantirish jarayonlarini chuqurlashtirish.

4. Oʻzbekiston Respublikasi Prezidentining “Respublikada charm xom ashyosi tayyorlash tizimini takomillashtirish toʻgʻrisida” 1994-yil 21-dekabrdagi PF-1025-son Farmoni 1-bandining birinchi xatboshi oʻz kuchini yoʻqotgan deb hisoblansin.

5. Oʻzbekiston Respublikasi Vazirlar Mahkamasi oʻn kunlik muddatda ushbu Farmonni amalga oshirish yuzasidan qaror qabul qilsin.