Vazirlar Mahkamasining “Angren” maxsus industrial zonasi faoliyatini tashkil etish chora-tadbirlari toʻgʻrisida” 2012-yil 29-maydagi 146-son qarorini bajarish yuzasidan Vazirlar Mahkamasi qaror qiladi:

1. “Angren” maxsus industrial zonasi direksiyasi” davlat unitar korxonasining Ustavi ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. “Angren” maxsus industrial zonasi direksiyasi” davlat unitar korxonasi (keyingi oʻrinlarda Direksiya deb ataladi) tezkor boshqaruv uchun oʻziga berilgan davlat mulki boʻlgan mulk bazasida davlat unitar korxonasi shaklida tashkil etilgan tijorat tashkiloti hisoblanadi, u oʻziga birkitilgan mulkka nisbatan, qonunda belgilangan doirada, oʻz faoliyati maqsadlariga, Muassis topshiriqlariga muvofiq egalik qilish, foydalanish va tasarruf etish huquqini amalga oshiradi.

2. Direksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, farmoyishlariga, boshqa normativ-huquqiy hujjatlarga, shuningdek ushbu Ustavga amal qiladi.

3. Direksiya yuridik shaxs hisoblanadi, alohida mulkka, mustaqil balansga, banklarda hisob raqamlariga, shu jumladan valyuta hisob raqamlariga, ramzga, shtamplar va blankalarga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.

4. Direksiyaning rasmiy nomi:

a) davlat tilida:

toʻliq nomi — “Angren” maxsus industrial zona Direktsiyasi” Davlat unitar korxonasi;

qisqartirilgan nomi — “Angren “ MIZ Direktsiyasi” DUK;

b) rus tilida:

toʻliq nomi — Gosudarstvennoye unitarnoye predpriyatiye “Direksiya spetsialnoy industrialnoy zoni “Angren”;

qisqartirilgan nomi — GUP “Direksiya SIZ “Angren”;

v) ingliz tilida:

toʻliq nomi — “Directorate of special industrial zone “Angren” State Unitary Company;

qisqartirilgan nomi — “Directorate of SIZ “Angren” SUC.

5. Direksiyaning joylashgan joyi (pochta manzili): Toshkent viloyati, Angren shahri, Istiqlol koʻchasi, 2-uy.

6. Oʻzbekiston Respublikasi Vazirlar Mahkamasi Direksiyaning muassisi (keyingi oʻrinlarda Muassis deb ataladi) hisoblanadi.

7. Direksiya oʻz nomidan qonun hujjatlarida belgilangan tartibda mulkiy va shaxsiy nomulkiy huquqlarni olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.

8. Direksiya Muassisning roziligiga koʻra tijorat tashkilotlarining, shuningdek Oʻzbekiston Respublikasi qonun hujjatlariga muvofiq yuridik shaxslarning qatnashishiga yoʻl qoʻyiladigan notijorat tashkilotlarda qatnashchi (aksiyador, aʼzo) boʻlishi mumkin.

9. Direksiya davlat boshqa korxonasining muassisi boʻlishi mumkin emas.

10. “Angren” maxsus industrial zonasi (keyingi oʻrinlarda “Angren” MIZ” deb ataladi) faoliyatini, shu jumladan “Angren” MIZni rivojlantirish davlat dasturlarining toʻliq va oʻz vaqtida bajarilishini, “Angren” MIZ hududida alohida huquqiy rejimga rioya etilishini taʼminlash yoʻli bilan tezkor boshqarish, shuningdek “Angren” MIZ hududidagi xoʻjalik faoliyati qatnashchilariga (keyingi oʻrinlarda “Angren” MIZ qatnashchilari” deb ataladi) xizmatlar koʻrsatishdan hamda ushbu Ustavda nazarda tutilgan boshqa ishlar va xizmatlardan foyda olish Direksiya faoliyatining maqsadi hisoblanadi.

11. Quyidagilar Direksiya faoliyatining asosiy yoʻnalishlari hisoblanadi:

1) “Angren” MIZ qatnashchilarini roʻyxatdan oʻtkazish va ularning reyestrini yuritish, ularga tegishli guvohnomalar berish;

2) “Angren” MIZ hududida “Angren” MIZ qatnashchilari hisoblanmaydigan boshqa xoʻjalik yurituvchi subyektlar hisobini yuritish;

3) belgilangan tartibda tanlangan investorlar bilan “Angren” MIZ hududida investitsiyalash toʻgʻrisida bitimlar, “Angren” MIZ qatnashchilari bilan faoliyat koʻrsatmay turgan korxonalarni va davlat mulki boʻlgan mol-mulkni nol xarid qiymati boʻyicha sotish hamda “Angren” MIZning Maʼmuriy kengashi (keyingi oʻrinlarda Maʼmuriy kengash deb ataladi) qarorlariga muvofiq yer uchastkalaridan foydalanish toʻgʻrisida shartnomalar tuzish;

4) belgilangan tartibda tanlangan investorlar tomonidan oʻz zimmasiga qabul qilgan majburiyatlarning zarur darajada bajarilishini nazorat qilish, keyinchalik uning natijalarini “Angren” MIZning Maʼmuriy kengashiga taqdim etish;

5) “Angren” MIZ hududida joylashgan davlat mulki boʻlgan obyektlardagi koʻchmas mulkni Direksiyaga berilgan vakolatlar doirasida boshqarish;

6) “Angren” MIZ qatnashchilariga, shu jumladan davlat organlarida ularning manfaatlarini ifodalash yoʻli bilan xizmatlar koʻrsatish;

7) Maʼmuriy kengash vakolatlariga kiruvchi masalalar boʻyicha uning majlislarida koʻrib chiqish uchun materiallar tayyorlash;

8) qabul qilingan majburiyatlar bajarilmagan taqdirda investitsiyalash toʻgʻrisidagi bitimlarni hamda faoliyat koʻrsatmay turgan korxonalarni va davlat mulki boʻlgan mol-mulkni sotish toʻgʻrisidagi shartnomalarni bekor qilish haqida Maʼmuriy kengash qarorlari asosida sudga daʼvo arizalari bilan murojaat qilish;

9) “Angren” MIZ faoliyatini tezkor boshqarish boʻyicha boshqa funksiyalarni amalga oshirish.

Oʻzbekiston Respublikasi qonun hujjatlarida ushbu Ustavda nazarda tutilgan tegishli faoliyat turining litsenziyalanishi zarurligi belgilangan taqdirda Direksiya faoliyatning ushbu turini litsenziya olmasdan, tegishli litsenziyalovchi organ bilan tuzilgan litsenziya bitimi asosida amalga oshirishga haqlidir.

12. Direksiya Oʻzbekiston Respublikasi qonun hujjatlarida taqiqlanmagan faoliyatning boshqa turlarini amalga oshirishi mumkin.

13. Direksiya Muassisga va Maʼmuriy kengashga hisobot beradi.

14. Muassis quyidagi huquqlarga ega:

Direksiya faoliyatining maqsadi va yoʻnalishlarini belgilash;

Direksiya Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

Direksiyaning ortiqcha, foydalanilmayotgan yoxud belgilangan maqsadda foydalanilmayotgan mulkini olib qoʻyish va tasarruf etish;

Direksiya tomonidan oʻziga berilgan mulkdan foydalanishdan olingan sof foydaning bir qismini yoki hammasini olish;

Direksiya mulki bilan amalga oshirilgan bitishuvlarni haqqoniy emas deb eʼtirof etish toʻgʻrisida sudga daʼvo arizasi bilan murojaat qilish;

Direksiyaga yetkazilgan zararlarni qoplash toʻgʻrisida daʼvo taqdim etish;

Direksiyani qayta tashkil etish yoki tugatish toʻgʻrisida qaror qabul qilish, tugatish komissiyasini tayinlash va tugatish balansini tasdiqlash;

qonun hujjatlarida belgilangan tartibda Direksiya rahbari bilan mehnat shartnomasini muddatidan oldin toʻxtatish;

Oʻzbekiston Respublikasi qonun hujjatlariga muvofiq boshqa huquqlarga ega boʻlish.

15. Maʼmuriy kengash Direksiya faoliyatiga rahbarlikni va uni nazorat qilishni, shuningdek “Angren” MIZning mustaqil budjeti hamda “Angren” MIZni rivojlantirish jamgʻarmasi mablagʻlaridan maqsadli foydalanilishi yuzasidan nazoratni amalga oshiradi.

16. Maʼmuriy kengash vakolatiga quyidagilar kiradi:

“Angren” MIZni rivojlantirish boʻyicha Direksiya faoliyatining strategik vazifalari va yoʻnalishlarini belgilash hamda “Angren” MIZni rivojlantirishning tegishli oʻrta muddatli va uzoq muddatli dasturlarini ishlab chiqishni tashkil etish;

“Angren” MIZning samarali faoliyatini taʼminlash uchun zarur boʻlgan tashkiliy-texnik tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Direksiyaning moliya-xoʻjalik faoliyatini har chorakda oʻrganishni tashkil etish;

har chorakda Direksiya faoliyati toʻgʻrisidagi hisobotni eshitish;

Muassis nomidan Direksiya direktorini yollash toʻgʻrisida mehnat shartnomasi (kontrakt)ni tuzish va bekor qilish;

Direksiyaning boshqaruv apparati tuzilmasini maʼqullash;

Direksiyaning shtatlar roʻyxatini va xarajatlari smetasini tasdiqlash;

Oʻzbekiston Respublikasi qonun hujjatlariga muvofiq boshqa vakolatlar.

17. Maʼmuriy kengash oʻziga yuklangan vazifalarni bajarish uchun Direksiya faoliyatiga taalluqli hujjatlarni talab qilib olish huquqiga ega. Olingan hujjatlardan Maʼmuriy kengash tomonidan faqat xizmat maqsadlarida foydalaniladi.

18. Direksiyaning joriy faoliyatiga rahbarlikni Maʼmuriy kengash tomonidan lavozimga tayinlanadigan va lavozimdan ozod etiladigan Direktor amalga oshiradi.

19. Direktor ijro etuvchi organ hisoblanadi.

20. Direktor:

Oʻzbekiston Respublikasi qonun hujjatlari talablarini bajarishga, Direksiya xodimlarining mehnat sharoitlarini muhofaza qilish va yaxshilashga, atrof muhitni muhofaza qilish va tabiiy resurslardan oqilona foydalanish sohasidagi norma va qoidalarga rioya etishga yoʻnaltirilgan tadbirlarni ishlab chiqadi va joriy etadi;

“Angren” MIZni rivojlantirish dasturlari amalga oshirilishini tashkil qiladi;

Direksiyaning asosiy faoliyatini takomillashtirishga, boshqarishning eng yangi uslublarini joriy etishga yoʻnaltirilgan tadbirlarni amalga oshirish chora-tadbirlarini koʻradi;

Direksiya nomidan ishonchnomasiz harakat qiladi, barcha tashkilotlarda, shu jumladan xorijiy tashkilotlarda uning manfaatlarini ifodalaydi;

xodimlarni ishga qabul qiladi, ular bilan mehnat shartnomalari (kontraktlari) tuzadi hamda ularni oʻzgartiradi va toʻxtatadi;

Oʻzbekiston Respublikasi qonun hujjatlarida belgilangan tartibda ishonchnomalar beradi;

kadrlarni tayyorlash va oʻqitish, ularning malakasini oshirish chora-tadbirlarini koʻradi;

Direksiyaning barcha xodimlari uchun majburiy boʻlgan buyruqlar, farmoyishlar va koʻrsatmalar chiqaradi;

Direksiyaning ichki ish tartibini va xoʻjalik faoliyatini tartibga soluvchi hujjatlarni tasdiqlaydi;

Direksiya tomonidan Oʻzbekiston Respublikasi qonun hujjatlariga rioya qilinishini tashkil etish va nazorat qilishni taʼminlaydi;

Direksiyaga yuklangan maqsadlar va vazifalarni amalga oshirish uchun zarur boʻlgan boshqa funksiyalarni amalga oshiradi.

21. Direktor muassis va Maʼmuriy kengash oldida Direksiya faoliyati toʻgʻrisida belgilangan tartibda hisobot beradi.

22. Direktor oʻz huquqlarini amalga oshirishda va vazifalarini bajarishda Direksiya manfaatlarini koʻzlagan holda harakat qilishi lozim hamda budjetga va budjetdan tashqari jamgʻarmalarga toʻlovlar, ish haqining oʻz vaqtida toʻlanishi, mehnatga oid huquqiy munosabatlardan kelib chiquvchi barcha talablarning va ularga tenglashtirilgan toʻlovlarning qondirilishi, bevosita ishlab chiqarish faoliyati bogʻliq ehtiyojlarga mablagʻlar oʻtkazilmaganligi, Direksiyaning xatti-harakatlari (harakatsizligi) bilan, shu jumladan Direksiyaga berilgan davlat mol-mulki yoʻqotilgan taqdirda yetkazilgan zarar yuzasidan qonun hujjatlarida belgilangan tartibda javob beradi.

23. Direktor “Angren” MIZning Oʻzbekiston Respublikasi Moliya vazirligi bilan kelishgan holda Maʼmuriy kengash tomonidan tasdiqlanadigan mustaqil budjet mablagʻlarining tasarruf etuvchisi hisoblanadi hamda Oʻzbekiston Respublikasi Moliya vazirligiga “Angren” MIZning mustaqil budjeti ijrosi toʻgʻrisidagi hisobotni kelishish uchun belgilangan tartibda taqdim etadi.

24. Direktor oʻz zimmasiga yuklangan vazifalarning bajarilishi, shuningdek Direksiyaga berilgan davlat mulkining saqlanishi va undan maqsadli foydalanilishi yuzasidan qonun hujjatlarida belgilangan tartibda javob beradi.

25. Direksiyaning ustav fondi “Angren” MIZ faoliyatini tezkor boshqarishni amalga oshirish uchun Muassis tomonidan oʻziga berilgan mablagʻlar, mulklar va boshqa aktivlardan iborat boʻladi.

26. Direksiya ustav fondining miqdori 1,0 mlrd soʻmni tashkil qiladi.

27. Direksiyaning ustav fondini koʻpaytirish yoki kamaytirish Oʻzbekiston Respublikasi qonun hujjatlarida belgilangan tartibda, Muassis qaroriga binoan amalga oshiriladi.

28. Muassis tomonidan Direksiyaga tezkor boshqaruv huquqi bilan birkitilgan asosiy fondlar va aylanma mablagʻlar Direksiya mulkini tashkil qiladi.

29. Direksiyaning asosiy fondlari va aylanma mablagʻlari boʻlinmaydi va ulushlar (hissalar, paylar) boʻyicha taqsimlanishi mumkin emas.

30. Maʼmuriy kengash Direksiyaga berilgan davlat mulkidan belgilangan maqsadda foydalanilishini va uning saqlanishini, shuningdek oʻzgaga berilishini Muassis nomidan nazorat qiladi.

31. Direktor Muassis bilan kelishgan holda Direksiya mulkini quyidagi holatlarda tasarruf etishi mumkin:

asosiy vositalarni sotish, ularni ijaraga yoki garovga berish;

mulkni boshqa xoʻjalik jamiyatining ustav fondiga ulush sifatida kiritish;

boshqa xoʻjalik jamiyatlarining aksiyalari (ulushlari)ni sotib olish va sotish;

mulkni boshqacha tarzda tasarruf etish.

32. Direksiya daromadi:

xizmatlar koʻrsatishdan olingan daromadlar;

Oʻzbekiston Respublikasi Moliya vazirligi bilan kelishgan holda binolar va ishnootlarni ijaraga berishdan tushumlarning bir qismi;

Oʻzbekiston Respublikasi qonun hujjatlarida taqiqlanmagan boshqa tushumlar hisobiga shakllantiriladi.

33. Direksiya oʻz tasarrufida qoladigan sof foyda hisobiga zaxira fondini, shuningdek boshqa fondlarni tashkil etishi mumkin, ularning miqdori va shakllantirish tartibi Muassis tomonidan tasdiqlanadi.

34. Direksiyada qoladigan sof foyda barcha soliqlar hamda budjetga va budjetdan tashqari jamgʻarmalarga boshqa majburiy toʻlovlar, shuningdek davlat korxonasining sof foydasidan davlat budjetiga Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi tomonidan belgilanadigan ajratmalar toʻlangandan keyin Direksiya tasarrufida qoladi va undan Maʼmuriy kengash qaroriga koʻra foydalaniladi.

35. Muassis oʻz qarori bilan begona yuridik va jismoniy shaxslarga homiylik yordami koʻrsatishga yoʻnaltiriladigan pul mablagʻlarining cheklangan summasini, ularni tasarruf etish huquqini Direktorga bergan holda belgilaydi.

36. Direksiyaning xoʻjalik faoliyati natijasida koʻrilgan zararlarini qoplash ushbu maqsadlar uchun tashkil etilgan zaxira fondi mablagʻlari hisobiga amalga oshirilishi mumkin.

37. Direksiya hisobot davri tugagach vakolatli organlarga moliya hisobotini va roʻyxati Oʻzbekiston Respublikasi qonun hujjatlarida belgilangan boshqa hujjatlarni taqdim etadi hamda hujjatlarning saqlanishi va ularning davlat tomonidan saqlashga berilishi yuzasidan belgilangan tartibda javob beradi.

38. Direksiyaning xoʻjalik subyekti sifatidagi faoliyatini nazorat qilish Maʼmuriy kengash tomonidan, Oʻzbekiston Respublikasi qonun hujjatlarida belgilangan tartibda amalga oshiriladi.

39. Direktor har chorakda Direksiya faoliyati natijalari va tasdiqlangan rivojlantirish dasturlarining amalga oshirilishi toʻgʻrisida Maʼmuriy kengashga hisobot beradi.

40. Direksiya oʻz majburiyatlari boʻyicha oʻziga tegishli mulk bilan javob beradi. Muassis Direksiyaning mulki yetarli boʻlmagan taqdirda uning majburiyatlari boʻyicha subsidiar javobgarlikni amalga oshiradi.

41. Direksiya Muassis majburiyatlari boʻyicha javob bermaydi.

42. Direksiya Muassis bilan kelishgan holda Oʻzbekiston Respublikasi hududida ham uning tashqarisida ham, Oʻzbekiston Respublikasi qonun hujjatlari talablariga rioya qilgan holda filiallar tashkil etishi va vakolatxonalar ochishi mumkin.

43. Direksiyaning filiallari va vakolatxonalari uning nomidan Direksiya tomonidan tasdiqlangan Nizom asosida faoliyat koʻrsatadi.

44. Oʻzbekiston Respublikasidan tashqarida joylashgan vakolatxonalar va filiallar Direksiya tomonidan tasdiqlangan Nizom asosida hamda hududida oʻzlari joylashgan mamlakatlarning qonun hujjatlariga muvofiq faoliyat koʻrsatadi.

45. Direksiya filiali yoki vakolatxonasining rahbari Maʼmuriy kengash bilan kelishgan holda Direktor tomonidan tayinlanadi va u bergan ishonchnoma asosida faoliyat koʻrsatadi, ishonchnoma ushbu rahbar bilan tuzilgan mehnat shartnomasi toʻxtatilgan taqdirda Direktor tomonidan bekor qilinishi kerak.

46. Direksiya tomonidan tashkil etiladigan filiallar va vakolatxonalarning majburiyatlari boʻyicha Direksiya javob beradi.

47. Direksiya Muassisning qaroriga koʻra, Oʻzbekiston Respublikasi qonun hujjatlarida nazarda tutilgan tartibda yoki sud qaroriga binoan tugatilishi yoki qayta tashkil etilishi mumkin.

48. Direksiyani tugatish Direksiyaning faoliyatining huquq va majburiyatlar huquqiy vorislik tartibida boshqa shaxslarga oʻtmagan holda toʻxtatilishiga sabab boʻladi, Direksiya qayta tashkil etilgan taqdirda huquq va majburiyatlar huquqiy vorisga oʻtadi.