Tibbiy xizmat ofitsyerlari tayyorlash tizimini yanada takomillashtirish, Oʻzbekiston Respublikasi Qurolli Kuchlari tibbiy tarkibi xodimlarining malakasini oshirish va ularni qayta tayyorlash maqsadida Vazirlar Mahkamasi qaror qiladi:

1. Oʻzbekiston Respublikasi Mudofaa vazirligi tibbiyot mutaxassislari malakasini oshirish va ularni qayta tayyorlash markazini hamda Toshkent tibbiyot akademiyasining harbiy kafedrasini qayta oʻzgartirish yoʻli bilan Toshkent tibbiyot akademiyasi huzurida Harbiy-tibbiyot fakulteti (keyingi oʻrinlarda fakultet deb ataladi) tashkil etilsin.

2. Belgilansinki, fakultet yuridik shaxs maqomiga ega boʻlgan oliy harbiy taʼlim muassasasi hisoblanadi.

3. Quyidagilar fakultetning asosiy vazifalari etib belgilansin:

yuqori intellektual salohiyatga, harbiy tibbiyot sohasida puxta bilimlarga ega, oʻz Vataniga cheksiz sadoqatli, tinch va harbiy davrda qoʻshinlarni tibbiy taʼminlashni samarali tashkil etishga qodir boʻlgan tibbiy xizmatning yuqori malakali ofitsyerlarini tayyorlash;

rezerv va zaxira tibbiy xizmatning tibbiyot boʻlinmalarini murakkab taktik sharoitlarda boshqarishga qodir boʻlgan, qoʻshinlarni tibbiy taʼminlash boʻyicha puxta bilimlarga ega ofitsyerlarini tayyorlash;

harbiy vrachlarning harbiy va kasbiy tayyorgarligi darajasini muntazam oshirishni, maxsus bilimlari va koʻnikmalarini chuqurlashtirish va yangilab borishni, yangi tibbiy texnologiyalarni oʻzlashtirishiga koʻmaklashishni nazarda tutgan holda Oʻzbekiston Respublikasi Qurolli Kuchlari tibbiy tarkibi xodimlarining malakasini oshirish va ularni qayta tayyorlashni tashkil etish;

boʻlajak tibbiy xizmat ofitsyerlarida yuksak maʼnaviy-axloqiy, psixologik va yetakchilik sifatlarini, vatanparvarlik hamda oʻz Vatanidan va mamlakat Qurolli Kuchlaridan faxrlanish, Oʻzbekiston mustaqilligi gʻoyalariga sadoqat tuygʻularini tarbiyalash, ularda keng dunyoqarashni va intellektual qobiliyatlarni rivojlantirish uchun shart-sharoitlar yaratish;

harbiy tibbiyot sohasida ilmiy tadqiqotlar olib borish, Qurolli Kuchlar tibbiy xizmatining davolash-evakuatsiya, sanitariya-gigiyena va epidemiyaga qarshi kurashish faoliyatiga zamonaviy innovatsiya texnologiyalarini joriy etishga doir takliflar ishlab chiqish;

qoʻshinlarni tibbiy taʼminlashni tashkil etish, harbiy-tibbiy kadrlarning malakasini oshirish va ularni qayta tayyorlash sohasida oʻquv-metodik adabiyotlarni yaratish va nashr etish;

mavjud oʻquv-metodik, moddiy-texnik bazani har tomonlama mustahkamlash va takomillashtirish, oʻquv jarayoniga tibbiy xizmat ofitsyerlari tayyorlashning sifat jihatidan yangi darajasini taʼminlaydigan oʻqitishning zamonaviy texnik vositalarini, pedagogik texnologiyalarni joriy etish.

4. Belgilab qoʻyilsinki:

fakultetda tibbiy xizmat ofitsyerlarini tayyorlash “Harbiy tibbiyot” oliy taʼlim yoʻnalishi boʻyicha, Oʻzbekiston Respublikasi oliy tibbiy taʼlim muassasalarining “Davolash ishi” yoʻnalishi boʻyicha oʻqishning beshinchi kursini bitirgan talabalarini ikki yil muddat bilan oʻqitish orqali amalga oshiriladi;

tanlov asosida harbiy-kasbiy tanlab olishdan oʻtgan va fakultetga qabul qilingan talabalarga Oʻzbekiston Respublikasi Mudofaa vazirligining oliy harbiy taʼlim muassasasi kursanti maqomi beriladi;

fakultetning “Harbiy tibbiyot” yoʻnalishi boʻyicha bitiruvchilariga Oʻzbekiston Respublikasi Prezidentining “Oʻzbekiston Respublikasida harbiy taʼlim tizimini takomillashtirishga doir qoʻshimcha chora-tadbirlar toʻgʻrisida” 2005-yil 19-apreldagi F-2193-son farmoyishi bilan belgilangan namunadagi oliy taʼlim toʻgʻrisidagi diplom va “harbiy vrach” malakasi beriladi;

fakultetni bitirgan tibbiy xizmat ofitsyerlari kadrlarni qayta tayyorlash tizimida olingan tor ixtisoslikka ega boʻlishgan taqdirda izlanuvchilar sifatida ilmiy ishlar olib borish hamda nomzodlik (doktorlik) dissertatsiyasini himoya qilish huquqiga egadirlar.

5. Oʻzbekiston Respublikasi Mudofaa vazirligining harbiy-tibbiyot muassasalari, Toshkent tibbiyot akademiyasining klinika va kafedralari fakultetning asosiy oʻquv bazalari etib belgilansin.

6. Toshkent tibbiyot akademiyasi huzuridagi Harbiy-tibbiyot fakultetining tuzilmasi hamda Ustavi 1 va 2-ilovalarga muvofiq tasdiqlansin.

7. Belgilab qoʻyilsinki:

fakultetning tarkibiy boʻlinmalarini shakllantirish Oʻzbekiston Respublikasi Mudofaa vazirligining belgilangan shtatlar soni doirasida amalga oshiriladi;

fakultetga rahbarlikni Oʻzbekiston Respublikasi Mudofaa vaziri tomonidan Oʻzbekiston Respublikasi Sogʻliqni saqlash vaziri bilan kelishgan holda lavozimga tayinlanadigan fakultet boshligʻi amalga oshiradi.

8. Oʻzbekiston Respublikasi Mudofaa vazirligi, Sogʻliqni saqlash vazirligi, Oliy va oʻrta maxsus taʼlim vazirligi boshqa manfaatdor vazirliklar va idoralar bilan birgalikda:

bir oy muddatda fakultetni Oʻzbekiston Respublikasi Mudofaa vazirligi harbiy-tibbiyot muassasalarining tayyorgarlikka, qoʻshinlarda amaliy ish tajribasiga ega boʻlgan mutaxassislari, shuningdek mamlakatning yetakchi klinikalari mutaxassislari orasidan professor-oʻqituvchilar va maʼmuriy-boshqaruv xodimlari bilan taʼminlasinlar;

ikki oy muddatda taʼlim yoʻnalishi boʻyicha davlat taʼlim standartini va oʻquv rejasini, Oʻzbekiston Respublikasi Qurolli Kuchlarining tibbiy tarkibi xodimlarining malakasini oshirish va ularni qayta tayyorlashga davlat talablari ishlab chiqilishini va qonun hujjatlarida belgilangan tartibda tasdiqlanishini taʼminlasinlar;

fakultetning professor-oʻqituvchilar tarkibi xodimlarining kasbiy darajasini oshirish, fakultetning moddiy-texnik bazasini takomillashtirish, taʼlim fanlari boʻyicha oʻquv-metodik adabiyotlarni yaratish va nashr etish, kursantlarning oʻqishi va yashashi uchun uy-joy-maishiy sharoitlar yaratish boʻyicha chora-tadbirlar kompleksini ishlab chiqsinlar va amalga oshirsinlar.

9. Belgilab qoʻyilsinki:

fakultetning ofitser, serjant va oddiy askar tarkiblaridagi kontrakt boʻyicha harbiy xizmatchilari hamda oʻqiyotgan kursantlari Oʻzbekiston Respublikasi Qurolli Kuchlari harbiy xizmatchilarining tegishli toifalari uchun qonun hujjatlarida nazarda tutilgan barcha taʼminotlar, kafolatlar va imtiyozlar turlari bilan taʼminlanadilar;

kalendar hisobi boʻyicha kamida oʻn yil xizmat qilgan fakultet bitiruvchilariga xizmatdan boʻshatilish chogʻida oliy taʼlim muassasasidagi oʻqigan vaqti (fakultetga qabul qilingungacha) oʻqishning bir oyini xizmatning bir oyiga hisoblagan holda haqiqiy harbiy xizmat muddatiga qoʻshiladi.

10. Belgilansinki, fakultet taʼminoti, shu jumladan harbiy xizmatchilarning pul taʼminoti hamda ishchilar va xizmatchilarga, Mudofaa vazirligining harbiy-tibbiyot muassasalari boʻlimlarining yetakchi, bosh tibbiyot mutaxassislari hamda boshliqlari orasidan (qonun hujjatlarida belgilangan tartibda soatbay ish haqi toʻlash sharti boʻyicha ishlaydigan) shtatsiz oʻqituvchilarga ish haqi toʻlovlari boʻyicha xarajatlar, tanlab olish boʻyicha tanlovlarni, shu jumladan test sinovlarini oʻtkazish bilan bogʻliq xarajatlarni qoplash har yili Oʻzbekiston Respublikasi Mudofaa vazirligiga ajratiladigan budjet mablagʻlari hisobiga amalga oshiriladi.

Bunda Toshkent tibbiyot akademiyasi professor-oʻqituvchilar tarkibi xodimlariga fakultet kursantlarini oʻqitganlik uchun mehnat haqi har yili Oʻzbekiston Respublikasi Sogʻliqni saqlash vazirligiga “Maorif” sohasi boʻyicha ajratiladigan budjet mablagʻlari doirasida amalga oshiriladi.

11. Fakultet Toshkent shahar, Ziyolilar koʻchasi, 4-uyga joylashtirilsin.

12. Oʻzbekiston Respublikasi Mudofaa vazirligi, Sogʻliqni saqlash vazirligi boshqa manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsinlar;

idoraviy normativ-huquqiy hujjatlarni ushbu qarorga muvofiqlashtirsinlar.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

1. Ushbu Ustav “Umumiy harbiy majburiyat va harbiy xizmat toʻgʻrisida”, “Taʼlim toʻgʻrisida”, “Kadrlar tayyorlash milliy dasturi toʻgʻrisida”gi Oʻzbekiston Respublikasi qonunlariga muvofiq Toshkent tibbiyot akademiyasi huzuridagi Harbiy-tibbiyot fakulteti (keyingi oʻrinlarda fakultet deb ataladi) faoliyatining huquqiy va tashkiliy asoslarini belgilaydi.

2. Fakultet tibbiy xizmat ofitsyerlarini, rezerv va zaxiradagi tibbiy xizmat ofitsyerlarini tayyorlash, Oʻzbekiston Respublikasi Qurolli Kuchlari (keyingi oʻrinlarda Qurolli Kuchlar deb ataladi) tibbiy tarkibi xodimlarining malakasini oshirish va ularni qayta tayyorlash boʻyicha oliy harbiy taʼlim muassasasi hisoblanadi.

3. Fakultet oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga hamda Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Qurolli Kuchlarining umumharbiy ustavlariga, boshqa normativ-huquqiy hujjatlarga va ushbu Ustavga amal qiladi.

4. Fakultet yuridik shaxs hisoblanadi, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy hisob raqamiga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga, muhrlarga, shtampga, oʻz faoliyati uchun zarur boʻlgan boshqa belgilar va rekvizitlarga egadir.

5. Fakultetning joylashgan joyi (pochta manzili): Toshkent shahri, Ziyolilar koʻchasi, 4-uy.

6. Ushbu Ustavda quyidagi asosiy tushunchalardan foydalaniladi:

Qurolli Kuchlarning tibbiy tarkibi xodimlari — ofitser, serjant va oddiy askar tarkiblarining kontrakt boʻyicha harbiy xizmatchilari hamda Qurolli Kuchlarning tegishli maʼlumot va malakaga ega boʻlgan, Qurolli Kuchlarning harbiy tibbiy muassasalari va harbiy-tibbiy boʻlinmalari tarkibiga kiradigan xizmatchilari;

qoʻshinlarni tibbiy taʼminlash — davolash-evakuatsiya, sanitariya-gigiyena va epidemiyaga qarshi tadbirlar, qoʻshinlarni ommaviy qirgʻin qurolidan himoya qilish boʻyicha tibbiy xizmat tadbirlari, shuningdek qoʻshinlarni tibbiyot mol-mulki bilan taʼminlash tadbirlari kompleksi;

harbiy vrach — oliy tibbiy maʼlumotli, haqiqiy harbiy xizmatdagi, vrach sifatida yoki maʼmuriy faoliyat bilan shugʻullanadigan harbiy xizmatchi;

rezerv yoki zaxiradagi tibbiy xizmat ofitseri — oliy tibbiy taʼlim muassasalarining oʻquv boʻlinmalarida harbiy tayyorgarlikdan oʻtgan, oʻqitish dasturini oʻzlashtirgan, belgilangan davlat imtihonlarini topshirgan, birlamchi ofitser unvonini olgan shaxs.

7. Tibbiy xizmat ofitsyerlari, rezerv va zaxira tibbiy xizmat ofitsyerlari tayyorlashning samarali tizimini tashkil etish, Qurolli Kuchlarning tibbiy tarkibi xodimlari malakasini oshirish va ularni qayta tayyorlash, shuningdek harbiy tibbiyot sohasida ilmiy tadqiqotlar olib borish fakultetning asosiy maqsadi hisoblanadi.

8. Quyidagilar fakultetning asosiy vazifalari hisoblanadi:

yuqori intellektual salohiyatga, harbiy tibbiyot sohasida puxta bilimlarga ega, oʻz Vataniga cheksiz sadoqatli, tinch va harbiy davrda qoʻshinlarni tibbiy taʼminlashni samarali tashkil etishga qodir boʻlgan tibbiy xizmatning yuqori malakali ofitsyerlarini tayyorlash;

rezerv va zaxira tibbiy xizmatning tibbiyot boʻlinmalarini murakkab taktik sharoitlarda boshqarishga qodir boʻlgan, qoʻshinlarni tibbiy taʼminlash boʻyicha puxta bilimlarga ega ofitsyerlarini tayyorlash;

Qurolli Kuchlar tibbiy tarkibi xodimlarining malakasini oshirish va ularni qayta tayyorlash, bunda harbiy vrachlarning harbiy va kasbiy tayyorgarligi darajasini muntazam oshirishni, maxsus bilimlari va koʻnikmalarini chuqurlashtirish va yangilab borishni, yangi tibbiy texnologiyalarni oʻzlashtirishga koʻmaklashishni nazarda tutish;

boʻlajak tibbiy xizmat ofitsyerlarida yuksak maʼnaviy-axloqiy, psixologik va yetakchilik sifatlarini, vatanparvarlik hamda oʻz Vatanidan va mamlakat Qurolli Kuchlaridan faxrlanish, Oʻzbekiston mustaqilligi gʻoyalariga sadoqat tuygʻularini tarbiyalash, ularda keng dunyoqarashni, intellektual qobiliyatlarni rivojlantirish uchun shart-sharoitlar yaratish;

harbiy tibbiyot sohasida ilmiy tadqiqotlar olib borish, Qurolli Kuchlar tibbiy xizmatining davolash-evakuatsiya, sanitariya-gigiyena va epidemiyaga qarshi kurashish faoliyatiga zamonaviy innovatsiya texnologiyalarini joriy etishga doir takliflar ishlab chiqish;

qoʻshinlarni tibbiy taʼminlashni tashkil etish, harbiy-tibbiy kadrlarning malakasini oshirish va ularni qayta tayyorlash sohasida oʻquv hamda metodik adabiyotlarni yaratish va nashr etish;

mavjud oʻquv-metodik, moddiy-texnik bazani har tomonlama mustahkamlash va takomillashtirish, oʻquv jarayoniga tibbiy xizmat ofitsyerlari tayyorlashning sifat jihatidan yangi darajasini taʼminlaydigan oʻqitishning zamonaviy texnik vositalarini, pedagogik texnologiyalarni joriy etish.

9. Oʻquv-tarbiya jarayoni oʻqitishning zamonaviy shakllari va usullaridan, ilgʻor pedagogik, axborot-kommunikatsiya va innovatsiya texnologiyalaridan foydalangan holda davlat taʼlim standartiga, shuningdek Qurolli Kuchlarning tibbiy tarkibi xodimlari malakasini oshirish va ularni qayta tayyorlash tizimiga davlat tomonidan qoʻyiladigan talablarga muvofiq ishlab chiqilgan oʻquv rejasi va dasturlar asosida tashkil etiladi va oʻtkaziladi.

10. Fakultetda ilmiy va metodik ishlar Oʻzbekiston Respublikasi Prezidentining “Fan va texnologiyalarni rivojlantirishni muvofiqlashtirish va boshqarishni takomillashtirish chora-tadbirlari toʻgʻrisida” 2006-yil 7-avgustdagi PQ-436-son qaroriga hamda boshqa normativ-huquqiy hujjatlarga muvofiq amalga oshiriladi.

11. Harbiy stajirovka va kursantlar amaliyotining boshqa turlari Oʻzbekiston Respublikasi Mudofaa vazirligining harbiy qismlarida va harbiy-tibbiyot muassasalarida oʻtkaziladi.

12. Fakultetda kursantlarni oʻqitish oʻquv rejasiga muvofiq ixtisosli fanlar boʻyicha majburiy tartibda davlat imtihonlari topshirish bilan tugallanadi.

13. Fakultetni tamomlagandan keyin bitiruvchilarga “harbiy vrach” malakasi berilgan holda Oʻzbekiston Respublikasi Prezidentining “Oʻzbekiston Respublikasida harbiy taʼlim tizimini takomillashtirishga doir qoʻshimcha chora-tadbirlar toʻgʻrisida” 2005-yil 19-apreldagi F-2193-son farmoyishi bilan belgilangan namunadagi oliy taʼlim toʻgʻrisidagi diplom beriladi. Diplomga ilovada oliy tibbiy taʼlim muassasalari va fakultetdagi butun oʻqish davri uchun barcha fanlar boʻyicha kursant tomonidan olingan reyting ballari aks ettiriladi.

14. Fakultetda oʻqitish davlat tilida va rus tilida olib boriladi.

15. Harbiy vrachlar tayyorlash kurslarining kursantlari, malaka oshirish va qayta tayyorlash kurslari tinglovchilari, shuningdek Toshkent tibbiyot akademiyasi va Toshkent farmatsevtika institutining rezerv va zaxira ofitsyerlari tayyorlash kurslariga qabul qilingan talabalari fakultetda taʼlim oluvchilar kontingenti jumlasiga kiradi.

16. Oʻzbekiston Respublikasi oliy tibbiy taʼlim muassasalarining “Davolash ishi” yoʻnalishi boʻyicha oʻqishning beshinchi kursini tamomlagan, tanlov asosida harbiy-kasbiy tanlovdan oʻtgan talabalari fakultet kursantlari etib qabul qilinadilar.

17. Fakultetda oʻqish uchun nomzodlarni harbiy-kasbiy tanlab olish Oʻzbekiston Respublikasi Prezidentining 2006-yil 14-yanvardagi PQ-257-son qarori bilan tasdiqlangan Oʻzbekiston Respublikasi fuqarolarining harbiy xizmatni oʻtashlari tartibi toʻgʻrisidagi Nizomga muvofiq amalga oshiriladi.

18. Har yili Oʻzbekiston Respublikasi Mudofaa vazirining buyrugʻi bilan fakultetda oʻqish uchun talabalar orasidan nomzodlarni tanlab olish komissiyasi tarkibi eʼlon qilinadi. Fakultet boshligʻi qabul komissiyasining raisi etib tayinlanadi. Tanlov asosida tanlab olish fakultet bazasida har yili aprel-may oylarida oʻtkaziladi.

19. Quyidagilar nomzodlarni tanlab olishga qoʻyiladigan asosiy talablar hisoblanadi:

Oʻzbekiston Respublikasi fuqaroligi;

nomzodning fakultetda oʻqishni davom ettirish xohishi toʻgʻrisidagi shaxsiy arizasi (fakultet boshligʻi nomiga beriladi);

harbiy xizmatga yaroqlilik (Vazirlar Mahkamasining 2003-yil 21-fevraldagi 95-son qarori bilan tasdiqlangan Tinch va harbiy davrda Qurolli Kuchlarda tibbiy tekshiruv toʻgʻrisidagi Nizomga muvofiq mudofaa ishlari boshqarmalari huzuridagi tibbiy tekshiruv natijalari boʻyicha, oliy harbiy taʼlim muassasasi huzuridagi harbiy-tibbiy komissiyaning yakuniy tibbiy tekshiruvi asosida aniqlanadi);

nomzodning fakultetda oʻqish tamom boʻlgandan keyin besh yil mobaynida Qurolli Kuchlarda harbiy xizmatni oʻtash majburiyati (oʻz qoʻli bilan Oʻzbekiston Respublikasi Mudofaa vaziri nomiga yozilgan raporti);

griflangan adabiyotlar va uchinchi shakl boʻyicha buyumlar bilan ishlashga ruxsat berilganligi.

20. Nomzodning shaxsiy hujjatlar yigʻmajildini rasmiylashtirish hamda griflangan adabiyotlar va buyumlar bilan ishlashga ruxsat berish nomzodning fakultetda oʻqishni davom ettirish xohishi toʻgʻrisidagi shaxsiy arizasi berilgan paytdan boshlab nomzod harbiy hisobga olingan joy boʻyicha mudofaa ishlari boʻlimlarida (boshqarmalarida) amalga oshiriladi.

21. Quyidagilar fakultetda oʻqish uchun nomzodlarni tanlov asosida tanlab olishning asosiy mezonlari hisoblanadi:

a) tibbiy tekshiruv natijalari;

b) jismoniy tayyorgarlik darajasini baholash natijalari;

v) psixologik test sinovi natijalari;

g) umumkasbiy fanlar boʻyicha test sinovlari orqali intellektual qobiliyatlarni baholash natijalari.

Test sinovlarini Vazirlar Mahkamasi huzuridagi Davlat test markazi qonun hujjatlarida belgilangan tartibda oʻtkazadi.

Test sinovlarini oʻtkazish va tashkil etish tartibi Davlat test markazi tomonidan, Oʻzbekiston Respublikasi Mudofaa vazirligi va Sogʻliqni saqlash vazirligi bilan kelishgan holda belgilanadi, keyinchalik u belgilangan tartibda Adliya vazirligida roʻyxatdan oʻtkaziladi.

22. Tanlov asosida tanlab olishni oʻtkazish tartibi va fakultetga qabul qilish mexanizmi Oʻzbekiston Respublikasi Sogʻliqni saqlash vazirligi bilan kelishgan holda Mudofaa vazirligi tomonidan belgilanadi.

23. Nomzodlarni fakultetga qabul qilish fakultet boshligʻining Oʻzbekiston Respublikasi Mudofaa vazirligi harbiy taʼlim boshqarmasi bilan kelishilgan buyrugʻi bilan amalga oshiriladi.

24. Fakultet boshligʻining nomzod fakultetga qabul qilinganligi toʻgʻrisidagi buyrugʻidan koʻchirma harbiy xizmatga chaqiriqni rasmiylashtirish uchun nomzod harbiy hisobga olingan joy boʻyicha mudofaa ishlari boʻlimiga (boshqarmasiga) va fakultetga oʻtkazish uchun oliy (tibbiy) taʼlim muassasasi rektori nomiga yuboriladi.

25. Kursantlarni kursdan kursga oʻtkazish fakultet boshligʻining buyrugʻi bilan, reyting nazorati va yakuniy nazorat natijalari boʻyicha amalga oshiriladi.

26. Fakultet kursantlari oʻzlashtirmaslik, intizomsizlik, sogʻligʻining holati boʻyicha (harbiy-tibbiy komissiyaning qarori asosida), shuningdek oʻzlariga bogʻliq boʻlmagan sabablarga koʻra oʻqishni davom ettirish imkoniyati yoʻqligi munosabati bilan oʻqishdan chetlashtirilishi mumkin (Oʻzbekiston Respublikasi Prezidentining 2006-yil 14-yanvardagi PQ-257-son qarori bilan tasdiqlangan Oʻzbekiston Respublikasi fuqarolarining harbiy xizmatni oʻtashlari tartibi toʻgʻrisidagi Nizomga muvofiq).

27. Fakultetdan chetlatilgan kursantlarni oʻqishga tiklash Oʻzbekiston Respublikasi Vazirlar Mahkamasining 2010-yil 18-iyundagi 118-son qarori bilan tasdiqlangan Oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi toʻgʻrisidagi Nizomga muvofiq amalga oshiriladi.

28. Qurolli Kuchlarning harbiy xizmatchilari va tibbiy tarkibi xizmatchilari fakultetning malaka oshirish va qayta tayyorlash kurslari tinglovchilari hisoblanadilar.

29. Kurslarni tinglovchilar bilan butlash, tinglovchilarning huquq va burchlari, shuningdek ularni oʻqishdan chetlashtirish tartibi Oʻzbekiston Respublikasi Mudofaa vazirligi tomonidan belgilanadi.

30. Fakultetning malaka oshirish va qayta tayyorlash kurslari tinglovchilari Mudofaa vazirligi va Sogʻliqni saqlash vazirligining tibbiyot muassasalari bazasida oʻqitiladi.

Harbiy-tibbiyot fakulteti shtatida ular boʻyicha tegishli oʻqituvchilar nazarda tutilmagan maxsus oʻquv fanlarini oʻqitish uchun Oʻzbekiston Respublikasi Mudofaa vazirligi harbiy-tibbiyot muassasalari boʻlimlarining yetakchi, bosh tibbiyot mutaxassislari va boshliqlari orasidan shtatsiz oʻqituvchilar soatbay haq toʻlash shartlari bilan jalb etiladi.

Shtatsiz oʻqituvchilar tomonidan ularga soatbay haq toʻlash shartlari bilan bajariladigan fanlar va mashgʻulotlar turlari boʻyicha oʻquv ishlari hajmi oʻquv yili boshida Oʻzbekiston Respublikasi Mudofaa vazirligi tomonidan tasdiqlanadi.

31. Toshkent tibbiyot akademiyasi va Toshkent farmatsevtika institutida oʻqiyotgan, rezerv va zaxira ofitsyerlarini tayyorlash dasturi boʻyicha oʻqitish uchun qabul qilingan shaxslar fakultetning rezerv va zaxira ofitsyerlarini tayyorlash kurslari talabalari hisoblanadi.

32. Kurslarni talabalar bilan butlash, talabalarning huquq va burchlari, shuningdek ularni oʻqishdan chetlashtirish tartibi “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonuniga muvofiq Oʻzbekiston Respublikasi Mudofaa vazirligi tomonidan belgilanadi.

33. Fakultet talabalarini rezerv va zaxira ofitsyerlarini tayyorlash dasturi boʻyicha oʻqitish harbiy-tibbiyot fakultetining oʻquv bazasida amalga oshiriladi.

34. Fakultet tarkibida boshqarma, kafedralar, oʻquv kurslari va taʼminot boʻlinmalari boʻladi.

35. Fakultetga rahbarlikni Oʻzbekiston Respublikasi Sogʻliqni saqlash vaziri bilan kelishgan holda Oʻzbekiston Respublikasi Mudofaa vaziri tomonidan lavozimga tayinlanadigan fakultet boshligʻi amalga oshiradi.

36. Fakultet boshligʻi tinchlik davrida va harbiy davrda fakultetga bevosita rahbarlik qiladi hamda:

fakultetning jangovar va safarbarlik tayyorgarligi;

oʻquv-tarbiya jarayonini tashkil etish, rejalashtirish va yuritish;

shaxsiy tarkibning harbiy intizomi va maʼnaviy-psixologik holati hamda harbiy xizmatning xavfsizligi;

ichki tartib;

qurol-yarogʻ, harbiy texnika va boshqa moddiy vositalarning holati va saqlanishi;

fakultetning moddiy-texnik, tibbiy, moliyaviy, ijtimoiy-huquqiy va maishiy taʼminoti uchun javob beradi.

37. Fakultet boshligʻi oʻzining oʻquv, metodik, ilmiy ishlarni tashkil etish boʻyicha faoliyatida qonun hujjatlariga amal qiladi.

38. Kafedralar boshliqlari, ularning oʻrinbosarlari, kafedralarning katta oʻqituvchilari va oʻqituvchilari lavozimidagi ofitsyerlar, shuningdek Qurolli Kuchlarning oʻqituvchilar lavozimidagi xizmatchilari fakultetning professor-oʻqituvchilar tarkibiga kiradi.

39. Quyidagilar Oʻzbekiston Respublikasi Sogʻliqni saqlash vazirligining vazifalari va funksiyalari hisoblanadi:

Davlat taʼlim standarti, davlat talablari, oʻquv rejasi, oʻqitish dasturlarining belgilangan tartibda ishlab chiqilishini va Oʻzbekiston Respublikasi Mudofaa vazirligi, Oliy va oʻrta maxsus taʼlim vazirligi bilan kelishilishini taʼminlash;

oʻquv-tarbiya jarayonini tashkil etish, ilgʻor pedagogik va axborot texnologiyalarini joriy etish boʻyicha ilmiy, amaliy va oʻquv-metodik yordam koʻrsatish;

oʻquv adabiyotlari va oʻquv-metodik adabiyotlarning ishlab chiqilishini tashkil etish;

qonun hujjatlariga muvofiq fakultetning oʻquv va moddiy-texnika bazasini takomillashtirish va rivojlantirish;

Toshkent tibbiyot akademiyasining klinikalari, kafedralari, laboratoriyalari va oʻquv auditoriyalarini fakultetning oʻquv bazasi sifatida taqdim etish;

belgilangan tartibda Qurolli Kuchlarning tibbiy tarkibi xodimlari malakasini oshirish va ularni qayta tayyorlashga koʻmaklashish.

40. Quyidagilar Oʻzbekiston Respublikasi Mudofaa vazirligining vazifalari va funksiyalari hisoblanadi:

oʻquv-tarbiya jarayonini sifatli tashkil etish, umumharbiy va harbiy-tibbiy fanlar boʻyicha ilgʻor pedagogik va axborot texnologiyalarini oʻquv jarayoniga joriy etish;

harbiy yoʻnalishdagi oʻquv, oʻquv-metodik adabiyotlarni yaratish, nashr etish va ular bilan taʼminlash;

fakultetning moddiy-texnika bazasini takomillashtirish va rivojlantirish;

Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligi bilan birgalikda fakultet faoliyatini tashkil etish boʻyicha normativ-huquqiy bazani takomillashtirish;

kontrakt boʻyicha harbiy xizmatchilarni va fakultetda harbiy xizmatni oʻtayotgan kursantlarni Qurolli Kuchlar harbiy xizmatchilarining tegishli toifalari uchun qonun hujjatlarida nazarda tutilgan taʼminot turlari bilan taʼminlash;

Oʻzbekiston Respublikasi Sogʻliqni saqlash vazirligi hamda Oliy va oʻrta maxsus taʼlim vazirligi bilan birgalikda fakultetni Mudofaa vazirligi harbiy-tibbiyot muassasalarining tayyorgarlikka, qoʻshinlarda amaliy ish tajribasiga ega boʻlgan mutaxassislaridan, shuningdek mamlakatning yetakchi klinikalari mutaxassislaridan professor-oʻqituvchilar va maʼmuriy-boshqaruv tarkibi xodimlari bilan taʼminlash.

41. Qurolli Kuchlarning tibbiy tarkibi xodimlari malakasini oshirish va ularni qayta tayyorlash fakultetda Oʻzbekiston Respublikasi Vazirlar Mahkamasining 2009-yil 18-dekabrdagi 319-son qarori bilan tasdiqlangan Tibbiyot xodimlari malakasini oshirish va ularni qayta tayyorlash tartibi toʻgʻrisidagi Nizomga muvofiq amalga oshiriladi.

42. Fakultetda tibbiy tarkib xodimlari malakasini oshirish va ularni qayta tayyorlash toʻgʻrisidagi sertifikatlar namunalari Oʻzbekiston Respublikasi Mudofaa vazirligi tomonidan tasdiqlanadi.

43. Davlat (respublika) budjetidan Oʻzbekiston Respublikasi Mudofaa vazirligi va Sogʻliqni saqlash vazirligi uchun nazarda tutiladigan mablagʻlar doirasida ajratiladigan mablagʻlar, shuningdek qonun hujjatlarida taqiqlanmagan boshqa tushumlar harbiy-tibbiyot fakultetini moliyalashtirish manbalari hisoblanadi.

44. Fakultetni qayta tashkil etish yoki tugatish qonun hujjatlariga muvofiq amalga oshiriladi.