Oʻzbekiston Respublikasi Prezidentining “Oliy taʼlim muassasalarining moddiy-texnika bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʻgʻrisida” 2011-yil 20-maydagi PQ–1533-son qarorini bajarish yuzasidan, shuningdek 2011 — 2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash dasturini amalga oshirish boʻyicha Maxsus komissiya faoliyatini takomillashtirish maqsadida Vazirlar Mahkamasi qaror qiladi:

1. 2011 — 2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash dasturini amalga oshirish boʻyicha Maxsus komissiya toʻgʻrisidagi Nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov hamda Oʻzbekiston Respublikasi Bosh vazirining oʻrinbosarlari A.N. Aripov va B.I. Zakirov zimmasiga yuklansin.

1. Ushbu Nizom 2011—2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash dasturini amalga oshirish boʻyicha Maxsus komissiya (keyingi oʻrinlarda Maxsus komissiya deb ataladi)ning faoliyatini amalga oshirish tartibini, vazifalari va vakolatlarini belgilaydi.

2. Maxsus komissiya Oʻzbekiston Respublikasi Prezidentining “Oliy taʼlim muassasalarining moddiy-texnika bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʻgʻrisida” 2011-yil 20-maydagi PQ–1533-son qarori bilan tashkil etilgan kollegial organ hisoblanadi.

3. Maxsus komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek ushbu Nizomga amal qiladi.

4. Quyidagilar Maxsus komissiyaning asosiy vazifalari hisoblanadi:

2011—2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash dasturi (keyingi oʻrinlarda Dastur deb ataladi) amalga oshirilishining tizimli monitoringini olib borishni taʼminlash hamda har yarim yillik va umuman yil yakunlari boʻyicha uning joriy ijrosi natijalarini Oʻzbekiston Respublikasi Vazirlar Mahkamasi majlislarining koʻrib chiqishi uchun kiritish;

Oʻzbekiston Respublikasi Moliya vazirligi huzuridagi Oliy taʼlim muassasalarining moddiy-texnika bazasini rivojlantirish jamgʻarmasi (keyingi oʻrinlarda Jamgʻarma deb ataladi)ga umumiy rahbarlik qilish va Jamgʻarmaga yuklangan vazifalarning bajarilishini tashkil etish;

Oʻzbekiston Respublikasi Iqtisodiyot vazirligi, Moliya vazirligi, Oliy va oʻrta maxsus taʼlim vazirligining takliflari boʻyicha oliy taʼlim muassasalari binolari va inshootlarining amaldagi texnik holatini, shuningdek har bir oliy taʼlim muassasasining moddiy-texnik taʼminlanganligini hisobga olgan holda ularni qurish, rekonstruksiya qilish, mukammal taʼmirlash va jihozlashning har yilgi manzilli dasturlarini tasdiqlash;

Jamgʻarmaning daromadlari barqaror shakllantirilishi, oʻz vaqtida moliyalashtirilishi va Jamgʻarma mablagʻlaridan maqsadli foydalanilishini doimiy nazorat qilish;

Jamgʻarma oldiga qoʻyilgan vazifalarni hal etishga manfaatdor vazirliklar, idoralar, xoʻjalik yurituvchi subyektlar va notijorat tashkilotlarini jalb etish, shuningdek xayr-ehson qiluvchilarning, shu jumladan Oʻzbekiston Respublikasi norezidentlarining grantlari va mablagʻlarini jalb etishda Jamgʻarmaga koʻmaklashish;

qonun hujjatlarida belgilangan boshqa vazifalarni amalga oshirish.

5. Maxsus komissiya ishlarni bajarish uchun quyidagi huquqlarga ega:

Maxsus komissiyaning vazifalarini amalga oshirish uchun zarur boʻlgan axborotni vazirliklar va idoralardan soʻrash va belgilangan tartibda olish;

oʻz majlislarida vazirliklar va idoralar vakillarining, shuningdek Maxsus komissiya vakolatiga tegishli boʻlgan masalalar boʻyicha Maxsus komissiya aʼzolarining axboroti va hisobotlarini eshitish;

zaruriyat boʻlganda, Oʻzbekiston Respublikasi Prezidentining “Oliy taʼlim muassasalarining moddiy-texnika bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʻgʻrisida” 2011-yil 20-maydagi PQ–1533-son qarori bilan maqullangan roʻyxatga kiritilgan oliy taʼlim muassasalari obyektlari boʻyicha tanlov tartib-qoidalari oʻtkazilishini tezlashtirish, ularning yuqori sifatli boʻlishini taʼminlashni nazarda tutgan holda loyiha va tender hujjatlarini ekspertizadan oʻtkazish muddatlari toʻgʻrisida qaror qabul qilish;

zaruriyat boʻlganda, kalendar yil mobaynida Jamgʻarma daromadlari (manbalar boʻyicha) va xarajatlari prognoz parametrlarini aniqlashtirishga, shuningdek Oʻzbekiston Respublikasi Moliya vazirligi, Iqtisodiyot vazirligi hamda Oliy va oʻrta maxsus taʼlim vazirligining, shuningdek tasarrufida oliy taʼlim muassasalari boʻlgan vazirliklar va idoralarning xulosalari asosida manzilli dasturning prognoz quvvatlariga oʻzgartirishlar kiritish;

2011—2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash dasturini amalga oshirish doirasida alohida masalalarni oʻrganish va ular boʻyicha takliflar tayyorlash uchun ishchi guruhlar tashkil etish.

Maxsus komissiya qonun hujjatlariga muvofiq boshqa huquqlarga ham ega boʻlishi mumkin.

6. Maxsus komissiyaga rais boshchilik qiladi, uning vakolatiga quyidagilar kiradi:

Maxsus komissiya majlislarining kun tartibini belgilash va ularni chaqirish;

Maxsus komissiya tomonidan qabul qilingan qarorlarning bajarilishini nazorat qilishni tashkil etish;

Maxsus komissiyaga yuklangan vazifalarning bajarilishi boʻyicha uning aʼzolari ishlarini muvofiqlashtirish;

Maxsus komissiya tomonidan tashkil etilgan ishchi guruhlar faoliyatini nazorat qilish;

Maxsus komissiyaning samarali ishlashini taʼminlash boʻyicha boshqa ishlarni bajarish.

7. Maxsus komissiya majlislarni, zaruriyatga koʻra, biroq har chorakda kamida bir marta manfaatdor vazirliklar, idoralar, xoʻjalik birlashmalari va korxonalarning rahbarlarini taklif etgan holda oʻtkazadi.

Maxsus komissiya aʼzosining tashabbusi bilan navbatdan tashqari majlis oʻtkazilishi mumkin. Maxsus komissiyaning navbatdan tashqari majlisini oʻtkazish toʻgʻrisidagi asosli talab yozma shaklda ishchi organga yuboriladi.

8. Maxsus komissiya majlisini uning raisi olib boradi. Komissiya raisi hozir boʻlmagan taqdirda majlisni uning oʻrinbosari olib boradi. Agar Maxsus komissiya majlisida uning aʼzolarining kamida toʻrtdan uch qismi hozir boʻlsa majlis huquqiy vakolatli hisoblanadi.

9. Maxsus komissiya raisi bilan kelishuv boʻyicha Maxsus komissiyaning uzrli sabablarga koʻra majlisda hozir boʻlmagan aʼzolarini ularning ovoz berish huquqisiz qatnashadigan vakillari almashtirishi mumkin.

10. Maxsus komissiya majlislarida tegishli vazirliklar va idoralarning takliflari, shuningdek ishchi guruhlar tomonidan oʻtkazilgan oʻrganishlar natijalari koʻrib chiqiladi.

11. Yuklangan vazifalarni amalga oshirish uchun Maxsus komissiya, zaruriyat boʻlganda, ishchi guruhlar tashkil etadi, ularda ishlash uchun tegishli mutaxassislarni jalb etadi.

12. Ishchi guruhlar faoliyati Maxsus komissiyaning ish rejasiga va Maxsus komissiya raisi tomonidan tasdiqlangan Dasturni amalga oshirish boʻyicha masalalarni oʻrganish jadvaliga muvofiq tashkil etiladi.

13. Ishchi guruh Dasturni amalga oshirish doirasida nazarda tutilgan oliy taʼlim muassasalari obyektlari boʻyicha qurish, rekonstruksiya qilish, mukammal taʼmirlash va jihozlashning holatini joyiga borib oʻrganadi va tahlil qiladi. Bunda oʻrganish va tahlil Maxsus komissiya raisi tomonidan tasdiqlangan oʻrganish rejasi va savolnomasiga muvofiq amalga oshiriladi.

14. Ishchi guruh joyga borgunga qadar tayyorlangan reja va oʻrganish savolnomasi tegishli oliy taʼlim muassasalariga yuboriladi, Oliy taʼlim muassasalari ular asosida zarur materiallar tayyorlanishini taʼminlaydi.

15. Ishchi guruh joyga kelgandan keyin tegishli oliy taʼlim muassasasi tomonidan tayyorlangan materiallarni, shuningdek Maxsus komissiya qarorlari bajarilishini oʻrganadi va tahlil qiladi.

Dasturni amalga oshirish doirasida nazarda tutilgan oliy taʼlim muassasalari obyektlari boʻyicha qurish, rekonstruksiya qilish, mukammal taʼmirlash va jihozlashning holatini oʻrganish ishchi guruh tomonidan bevosita tegishli oliy taʼlim muassasasiga borib, ishlab turgan, qurilayotgan, rekonstruksiya qilinayotgan va taʼmirlanayotgan obyektlarda amalga oshiriladi.

Ishchi guruh oʻz funksiyalarini amalga oshirishda:

Dasturni amalga oshirish doirasida nazarda tutilgan oliy taʼlim muassasalari obyektlari boʻyicha qurish, rekonstruksiya qilish, mukammal taʼmirlash va jihozlashning holatini oʻrganish uchun mahalliy davlat hokimiyati organlari, tegishli davlat va xoʻjalik boshqaruvi organlari, shuningdek tasarrufida oliy taʼlim muassasasi boʻlgan vazirliklar va idoralarning mutaxassislarini jalb etish;

mahalliy davlat hokimiyati organlari, davlat va xoʻjalik boshqaruvi organlari boʻlinmalaridan, shuningdek tasarrufida oliy taʼlim muassasasi boʻlgan vazirliklar va idoralardan zarur maʼlumotlar va hujjatlarni soʻrash huquqiga ega.

16. Ishchi guruh oʻrganish natijalari boʻyicha tegishli oliy taʼlim muassasasi bilan birgalikda Maxsus komissiya majlisida koʻrib chiqish uchun xulosa va zarur materiallarni tayyorlaydi. Xulosa ishchi guruh va oliy taʼlim muassasasi rahbarlari tomonidan imzolanadi hamda boshqa materiallar bilan birga Maxsus komissiyaga kiritiladi.

17. Ishchi guruhlar rahbarlari va aʼzolari hamda oliy taʼlim muassasalari rahbarlari tayyorlangan materiallarning sifati va xolisonaligi uchun shaxsan javob beradilar.

18. Oʻzbekiston Respublikasi Vazirlar Mahkamasining Taʼlim, sogʻliqni saqlash va ijtimoiy muhofaza masalalari axborot-tahlil departamenti Maxsus komissiyaning ishchi organi hisoblanadi.

19. Maxsus komissiyaning ishchi organi:

navbatdagi davr uchun Maxsus komissiyaning ish rejasi loyihasini tayyorlaydi;

Maxsus komissiyaning navbatdagi majlisiga barcha zarur materiallarning oʻz vaqtida tayyorlanishini taʼminlaydi hamda Oliy va oʻrta maxsus taʼlim vazirligidan, shuningdek tasarrufida oliy taʼlim muassasalari boʻlgan vazirliklar, idoralardan va Maxsus komissiya aʼzolaridan zarur materiallarni olish huquqiga ega boʻladi;

kun tartibidagi masalalar boʻyicha tahliliy materiallarni tayyorlashni va Maxsus komissiya majlislari oʻtkazilishini tashkil qiladi;

Maxsus komissiyaning koʻrib chiqishi uchun axborot va tahliliy materiallarni, shuningdek uning qarorlariga muvofiq boshqa materiallarni taqdim etadi.

20. Maxsus komissiya kotibi:

barcha zarur materiallar Komissiyaning navbatdagi majlisiga oʻz vaqtida tayyorlanishini taʼminlaydi;

Komissiya majlisiga materiallar tayyorlash boʻyicha ishchi guruhlar va ishchi organ ishlarini tashkil qiladi;

kun tartibidagi masalalar boʻyicha Komissiya majlislari oʻtkazilishini tashkil qiladi;

majlislarni oʻtkazish muddatlari va joyini, shuningdek taklif etiladiganlar kontingentini Maxsus komissiya raisi bilan kelishib oladi;

Maxsus komissiya aʼzolarini va taklif etilgan shaxslarni majlisning oʻtkaziladigan sanasi, vaqti, joyidan xabardor qiladi;

Maxsus komissiya qarorlarining ijrosi monitoringini olib boradi va uning natijalarini koʻrib chiqish uchun Maxsus komissiya majlisiga taqdim etadi;

Maxsus komissiya protokollarini rasmiylashtiradi va tasdiqlangan protokollarni Maxsus komissiya aʼzolariga, manfaatdor vazirliklar va idoralarga, mahalliy davlat hokimiyati organlariga yuboradi.

21. Maxsus komissiya majlisining kun tartibidagi har bir masala boʻyicha hujjatlar turkumida qaror qabul qilish uchun zarur boʻlgan materiallar (ishchi guruhlarning xulosalari, tahliliy maʼlumotlar, jadvallar va shu kabilar) hamda Maxsus komissiya qarorining loyihasi mavjud boʻlishi kerak.

22. Maxsus komissiyaning qarori majlisda qatnashayotgan komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlgan taqdirda Maxsus komissiya raisining ovozi hal qiluvchi hisoblanadi.

Maxsus komissiyaning har bir aʼzosi qabul qilinayotgan qarorlar boʻyicha oʻz fikrini yozma ravishda bildirishga haqlidir.

23. Maxsus komissiya raisi qarorlarni tezkorlik bilan qabul qilish maqsadida komissiya aʼzolari bilan kelishilgan alohida masalalar boʻyicha Maxsus komissiya qarorini soʻrov yoʻli bilan tasdiqlashi mumkin.

24. Maxsus komissiyaning qarorlari ishchi organ tomonidan Maxsus komissiya majlisi protokoli bilan rasmiylashtiriladi. Maxsus komissiya majlisining protokoliga uning barcha aʼzolari viza qoʻyadi, u masʼul kotib tomonidan imzolanadi, Maxsus komissiya raisi tomonidan tasdiqlanadi hamda bir hafta muddatda Maxsus komissiya aʼzolariga, shuningdek tasarrufida oliy taʼlim muassasalari boʻlgan manfaatdor vazirliklar va idoralarga yuboriladi.

25. Maxsus komissiya protokolining asl nusxasi hamda unga doir materiallar Oʻzbekiston Respublikasi Vazirlar Mahkamasining Taʼlim, sogʻliqni saqlash va ijtimoiy muhofaza masalalari axborot-tahlil departamentida saqlanadi.

26. Maxsus komissiyaning oʻz vakolatlari doirasida qabul qilgan qarorlari davlat boshqaruvi organlari, tasarrufida oliy taʼlim muassasalari boʻlgan vazirliklar va idoralar tomonidan bajarilishi majburiydir.

27. Maxsus komissiyaning ishchi organi Maxsus komissiya qarorlarining ijrosi nazorat qilinishini taʼminlaydi.

28. Ishchi organ Maxsus komissiya qarorlarining bajarilishini muntazam ravishda oʻrganadi va koʻrib chiqadi, zaruriyat boʻlganda Maxsus komissiya raisiga tegishli takliflar kiritadi.

29. Maxsus komissiya qabul qilingan qarorlarning bajarilishi holatini oʻz majlislarida muntazam ravishda koʻrib chiqadi.