Respublika bolalar ijtimoiy moslashuvi markazini yanada rivojlantirish va uning ijtimoiy nochor guruhlarga tegishli bolalarga va ularning oilalariga ijtimoiy-pedagogik, huquqiy va axborot-taʼlim yordami koʻrsatishga doir faoliyatini kengaytirish uchun zarur shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Xalq taʼlimi vazirligi, Respublika bolalar ijtimoiy moslashuvi markazi va Moliya vazirligining:

muhandislik tarmoqlari va kommunikatsiyalarini modernizatsiya qilish, nogiron bolalar uchun maxsus suzish basseyni qurish va zarur asbob-uskunalar va jihozlar bilan qoʻshimcha jihozlash yoʻli bilan Respublika bolalar ijtimoiy moslashuvi markazining (keyingi oʻrinlarda Markaz deb ataladi) moddiy-texnika bazasini mustahkamlashni;

2012 — 2014-yillar mobaynida Qarshi, Samarqand va Fargʻona shaharlarida Markazning mintaqaviy filiallarini bosqichma-bosqich tashkil etishni nazarda tutuvchi 1-ilovaga* muvofiq Respublika bolalar ijtimoiy moslashuvi markazi faoliyatini yanada rivojlantirish tadbirlarini amalga oshirish toʻgʻrisidagi taklifiga rozilik berilsin.

2. Qashqadaryo, Samarqand va Fargʻona viloyatlari hokimliklari:

Markazning mintaqaviy filiallarini joylashtirish uchun 1-ilovada* koʻrsatilgan muddatlarda tegishli binolar ajratsinlar;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda qurilish ishlarini moliyalashtirish hamda zarur asbob-uskunalar va jihozlar xarid qilish uchun xorijiy va mahalliy tashkilotlarning grant mablagʻlarini jalb etish yuzasidan aniq chora-tadbirlarni amalga oshirsinlar.

3. Respublika bolalar ijtimoiy moslashuvi markazi faoliyatini yanada rivojlantirish tadbirlarini amalga oshirish uchun 2-ilovaga* muvofiq roʻyxat boʻyicha xoʻjalik yurituvchi subyektlar va tashkilotlarning ular tomonidan ixtiyoriy muruvvat yordami koʻrsatish toʻgʻrisidagi tashabbusi maʼqullansin.

4. Oʻzbekiston Respublikasi Moliya vazirligi Markaz xodimlari sonining 4 nafarga koʻpayishi bilan bogʻliq qoʻshimcha xarajatlar uchun joriy yilda zarur budjet mablagʻlari ajratsin, 2012-yildan boshlab esa — ushbu xarajatlarni qoplash hamda Markazning tashkil etilayotgan mintaqaviy filiallari taʼminotiga respublika budjetining taʼlim sohasiga yoʻnaltiriladigan mablagʻlari hisobiga Oʻzbekiston Respublikasi Davlat budjeti parametrlarida mablagʻlarni nazarda tutsin.

5. Markaz, Qashqadaryo, Samarqand va Fargʻona viloyatlari hokimliklari xorijiy va mahalliy tashkilotlarning grant mablagʻlaridan maqsadli foydalanilishini taʼminlasinlar hamda har yarim yillik yakunlariga koʻra Vazirlar Mahkamasiga Respublika bolalar ijtimoiy moslashuvi markazi faoliyatini yanada rivojlantirish tadbirlarining amalga oshirilishi toʻgʻrisida axborot taqdim etsinlar.

6. Vazirlar Mahkamasining “Respublika bolalar ijtimoiy moslashuvi markazini tashkil etish toʻgʻrisida” 2004-yil 7-sentabrdagi 419-son qaroriga (Oʻzbekiston Respublikasi QT, 2004-y., 9-son, 91-modda) 3-ilovaga muvofiq oʻzgartirishlar kiritilsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. 2-bandning birinchi xatboshidagi “65” va “36” raqamlari tegishli ravishda “69” va “40” raqamlari bilan almashtirilsin.

2. 2-ilovada:

a) “Axborot-konsalting xizmati” ustunidagi “13” raqami “17” raqami bilan almashtirilsin;

b) ilova oxiridagi matnda “65” va “36” raqamlari tegishli ravishda “69” va “40” raqamlari bilan almashtirilsin.