Kommunal xizmat koʻrsatish sohasida iqtisodiy islohotlarni yanada chuqurlashtirish, tarmoqning ishlab chiqarish infratuzilmasini zamonaviylashtirish va texnika bilan qayta jihozlash, mintaqalar aholisini sifatli ichimlik suvi taʼminlashni yaxshilash maqsadida Vazirlar Mahkamasi qaror qiladi:

1. Osiyo taraqqiyot banki (OTB) Direktorlar Kengashi “Guliston, Jizzax va Qarshi shaharlarining suv taʼminoti tizimini takomillashtirish” loyihasini (keyingi oʻrinlarda “Loyiha” deb ataladi) amalga oshirish uchun Oʻzbekiston Respublikasiga toʻlov muddati 25 yil, shu jumladan imtiyozli davri besh yil boʻlgan kredit berilishini maʼqullaganligi maʼlumot uchun qabul qilinsin.

2. Belgilansinki:

“Oʻzkommunxizmat” agentligi kredit mablagʻlaridan maqsadli va samarali foydalanilishi hamda loyihaning amalga oshirilishi uchun masʼul ijro etuvchi organ hisoblanadi;

investitsiya davri (2002 — 2006-yillar)da foizlar va vositachilik haqi Osiyo taraqqiyot bankining krediti hisobiga qoplanadi;

2007-yil 1-yanvardan boshlab asosiy qarzni qoplash, kredit boʻyicha vositachilik haqi va foizlar toʻlash bilan bogʻliq xarajatlar Guliston, Jizzax va Qarshi shaharlari “Suvoqova” ishlab chiqarish boshqarmalari mablagʻlari hisobiga amalga oshiriladi.

3. Sirdaryo, Jizzax va Qashqadaryo viloyatlari hokimliklari va kommunal-foydalanish birlashmalari, Guliston, Jizzax va Qarshi shaharlari hokimliklari “Suvoqova” ishlab chiqarish boshqarmalarining oʻz mablagʻlari, budjetdan tashqari jamgʻarmalar hamda viloyatlar va shaharlar budjetlari zaxira jamgʻarmalari, shuningdek manfaatdor korxonalar va tashkilotlar mablagʻlari hisobiga Loyihani moliyalashtirishda qatnashishni taʼminlasinlar.

4. Quyidagilar:

kreditni qaytarish grafigi 1, 1a, 1b, 1v-ilovalarga* muvofiq;

Loyihani amalga oshirish boʻyicha muvofiqlashtirish kengashi tarkibi 2-ilovaga muvofiq tasdiqlansin.

4. Loyiha boʻyicha batafsil texnik-iqtisodiy hamda muhandislik-loyiha hujjatlarining, shuningdek Oʻzbekiston Respublikasi Moliya vazirligi bilan kelishgan holda kredit mablagʻlarini jamlash va qaytarish tartibi ishlab chiqilishi va tasdiqlanishi uchun masʼuliyat “Oʻzkommunxizmat” agentligiga yuklansin.

5. Quyidagilar:

Moliya vaziri Oʻzbekiston Respublikasi Hukumati nomidan Osiyo taraqqiyot banki bilan Kredit bitimini, shuningdek Oʻzbekiston Respublikasi Moliya vazirligi bilan “Oʻzkommunxizmat” agentligi oʻrtasidagi Qayta kreditlash toʻgʻrisidagi bitimni imzolashga;

“Oʻzkommunxizmat” agentligi bosh direktori “Oʻzkommunxizmat” agentligi bilan Osiyo taraqqiyot banki oʻrtasidagi Loyiha bitimini, shuningdek Guliston, Jizzax va Qarshi shaharlari hokimliklari bilan kelishgan holda koʻrsatib oʻtilgan shaharlarning “Suvoqova” ishlab chiqarish boshqarmalari bilan Qayta kreditlash toʻgʻrisidagi bitimlarni imzolashga vakil qilinsin.

6. Oʻzbekiston Respublikasi Adliya vazirligi Oʻzbekiston Respublikasi Hukumati bilan Osiyo taraqqiyot banki oʻrtasidagi Kredit bitimi, shuningdek Oʻzbekiston Respublikasi Moliya vazirligi bilan “Oʻzkommunxizmat” agentligi oʻrtasidagi Qayta kreditlash toʻgʻrisidagi bitim boʻyicha bir hafta muddatda yuridik xulosa bersin.

7. Oʻzbekiston Respublikasi Makroiqtisodiyot va statistika vazirligi va Moliya vazirligi 2003 — 2006-yillarga investitsiya dasturini shakllantirishda Loyihani amalga oshirish uchun moliyalashtirishda markazlashtirilgan manbalar hisobiga har yili 0,2 mln.AQSH dollari miqdorida kapital qoʻyilmalar limitini nazarda tutsinlar.

8. “Oʻzkommunxizmat” agentligi bir oy muddatda belgilangan tartibda 7 kishidan iborat Loyihani boshqarish guruhini tashkil etsin, shuningdek Guliston, Jizzax va Qarshi shaharlari hokimliklari bilan kelishgan holda joylarda har biri 5 kishidan iborat Loyihani amalga oshirish guruhlarini tashkil etsin.

9. Oʻzbekiston Respublikasi Hukumati va Osiyo taraqqiyot banki oʻrtasida erishilgan kelishuvga, Oʻzbekiston Respublikasining Soliq va Bojxona kodekslariga muvofiq Loyiha doirasida investitsiya davri mobaynida bevosita yetkazib beruvchilar va pudratchilardan xarid qilinadigan tovarlar (bajariladigan ishlar, xizmatlar) Hukumatning Loyihani amalga oshirishdagi ulushi sifatida soliq toʻlovlari, davlat maqsadli jamgʻarmalariga majburiy ajratmalar va bojxona toʻlovlari (yagona ijtimoiy toʻlov va bojxonada rasmiylashtirish uchun yigʻimlar bundan mustasno) toʻlashdan ozod qilinishi maʼlumot uchun qabul qilinsin.

10. Oʻzbekiston Respublikasi Tashqi ishlar vazirligi “Oʻzkommunxizmat” agentligining buyurtmanomalariga binoan mazkur Loyihani amalga oshirishda qatnashuvchi xorijiy mutaxassislarga belgilangan tartibda kirish vizalari konsullik yigʻimlari undirmasdan rasmiylashtirilishini taʼminlasin.

11. Oʻzbekiston Respublikasi Ichki ishlar vazirligi “Oʻzkommunxizmat” agentligining buyurtmanomalariga binoan Loyihani amalga oshirishda qatnashuvchi xorijiy mutaxassislarga, ularni davlat bojlari toʻlashdan ozod qilgan holda, koʻp martalik vizalarning berilishini va muddati uzaytirilishini, shuningdek ularning vaqtinchalik roʻyxatdan oʻtkazilishini va roʻyxatdan oʻtkazish muddati uzaytirilishini taʼminlasin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.