Yoshlarni maʼnaviy-axloqiy tarbiyalash ishlarini kuchaytirish, taʼlim muassasalarining oʻquvchi va talabalarini kamol topishi uchun shart-sharoitlar yaratish, shuningdek talaba yoshlarning dam olishini mazmunli tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Respublika maʼnaviyat targʻibot markazi hamda Oʻzbekiston yoshlarining “Kamolot” ijtimoiy harakati Markaziy Kengashining Toshkent shahridagi “Yoshlik” talabalar shaharchasining “Maʼnaviyat va maʼrifat” markazini Oʻzbekiston Respublikasi Oliy va oʻrta maxsus taʼlim vazirligi huzuridagi “Maʼnaviyat va maʼrifat” markaziga (keyingi oʻrinlarda Markaz deb ataladi) aylantirish yoʻli bilan uni qayta tashkil etish toʻgʻrisidagi taklifi qabul qilinsin.

2. Quyidagilar Markazning asosiy vazifalari etib belgilansin:

oliy, oʻrta maxsus, kasb-hunar taʼlim muassasalarida va talabalar (oʻquvchilar)ning turar joylarida maʼnaviy-maʼrifiy ishlar olib borish;

taʼlim tizimiga maʼnaviy-axloqiy tarbiyaning samarali uslublarini joriy etish, oʻquvchi yoshlarning dam olishini tashkil etishga metodik yordam koʻrsatish hamda ularning maʼnaviy va uygʻun kamol topishi bilan bogʻliq qiziqishlarini roʻyobga chiqarishga koʻmaklashish;

yoshlar oʻrtasida sogʻlom turmush tarzi tamoyillarini qaror toptirish, ularni giyohvandlikdan, axloqsizlikdan, ekstremistik markazlarning chetdan kirib kelayotgan halokatli taʼsirlari va tahdidlaridan hamda saviyasi past “ommaviy madaniyat”ning, reaksion mafkuralar va shiorlarning halokatli taʼsiridan himoya qilish, sogʻlom avlodni voyaga yetkazish chora-tadbirlarini yanada kuchaytirish;

yoshlar oʻrtasida ommaviy axborot-tushuntirish ishlarini va huquqiy targʻibotni tizimli asosda tashkil etish.

3. Markazning tuzilmasi 1-ilovaga muvofiq tasdiqlansin.

4. Oʻzbekiston Respublikasi Oliy va oʻrta maxsus taʼlim vazirligi huzuridagi “Maʼnaviyat va maʼrifat” markazining 2-ilovaga* muvofiq tarkibdagi Jamoatchilik kengashi tashkil etilsin.

5. Oʻzbekiston Respublikasi Oliy va oʻrta maxsus taʼlim vazirligi:

Respublika Maʼnaviyat targʻibot markazi yordamida bir oy muddatda Markazning ustavini ishlab chiqsin va belgilangan tartibda tasdiqlasin;

Oʻzbekiston Respublikasi Davlat mulki qoʻmitasi bilan birgalikda Toshkent shahar, Talabalar koʻchasi, 70-uyda joylashgan binoning Toshkent davlat texnika universiteti balansidan, shuningdek Toshkent shahridagi “Yoshlik” talabalar shaharchasining qayta tashkil etilayotgan “Maʼnaviyat va maʼrifat” markazi mol-mulki Markaz balansiga bepul berilishini belgilangan tartibda taʼminlasin;

Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi bilan kelishgan holda ikki hafta muddatda Markaz xodimlari mehnatiga haq toʻlash razryadlari va shartlarini belgilangan tartibda ishlab chiqsin va tasdiqlasin;

Markazni zarur ixtisoslikka ega boʻlgan malakali kadrlar bilan taʼminlash, shuningdek uning moddiy-texnika bazasini mustahkamlash chora-tadbirlarini koʻrsin.

6. Belgilansinki, Markaz faoliyatini moliyalashtirish Oʻzbekiston Respublikasi respublika budjeti mablagʻlari, yuridik va jismoniy shaxslarning ixtiyoriy badallari va hadyalari, xoʻjalik faoliyatidan va pulli xizmatlar koʻrsatishdan olingan mablagʻlar, shuningdek qonun hujjatlarida taqiqlanmagan boshqa manbalar mablagʻlari hisobiga amalga oshiriladi.

7. Oʻzbekiston Respublikasi Moliya vazirligi:

2011-yildan boshlab Oʻzbekiston Respublikasi Davlat budjetini tuzishda “Madaniyat va ommaviy axborot vositalari” sohasi uchun ajratiladigan mablagʻlar doirasida Markaz taʼminoti uchun zarur budjetdan ajratiladigan mablagʻlarni nazarda tutsin.

1 ta yengil xizmat avtomobilini saqlashga limit belgilasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.