Odamlarning uy-joy sharoitlarini yanada yaxshilash, fuqarolarning uy-joyni mulk qilib sotib olishga boʻlgan huquqlari roʻyobga chiqarilishini taʼminlash, aholining boʻsh pul mablagʻlarini jalb etish hisobiga Toshkent shahridagi uy-joy qurilish tajribasini respublikaning butun hududiga keng yoyish maqsadida:

1. Aholining boʻsh pul mablagʻlarini jalb etgan holda nomi yozilgan uy-joy obligatsiyalarini sotib olish yoʻli bilan uy-joylar qurilishi boʻyicha Toshkent shahar hokimligi va “Toshuyjoyjamgʻarmabank”ning ish tajribasi maʼqullansin.

“Toshkent shahrida uy-joy qurilishini davlat yoʻli bilan qoʻllab-quvvatlashni kuchaytirish toʻgʻrisida” 1996-yil 31-yanvardagi PF-1366-son Farmonning amal qilishi respublikaning barcha mintaqalariga yoyilsin.

2. Toshkent davlat-aksiyadorlik uy-joy-jamgʻarma banki — “Toshuyjoyjamgʻarmabank” muassislarining uni Oʻzbekiston davlat aksiyadorlik uy-joy-jamgʻarma banki — “Oʻzuyjoyjamgʻarmabank”iga aylantirish toʻgʻrisidagi;

Markaziy bank, “Oʻzsanoatqurilishbank” aksiyadorlari Kengashi, Qoraqalpogʻiston Respublikasi Vazirlar Kengashining viloyatlar hokimliklarining viloyat markazlari va shaharlarda joylashgan “Oʻzsanoatqurilishbank”ning yigirmata boʻlimini “Oʻzuyjoyjamgʻarmabank” tarkibiga kiritish toʻgʻrisidagi takliflari qabul qilinsin.

Qoraqalpogʻiston Respublikasi Vazirlar Kengashining Raisi, viloyatlarning hokimlari zimmasiga “Oʻzuyjoyjamgʻarmabank” boʻlimlariga xonalar ajratib berish, ularni taʼminlash va joylashtirish bilan bogʻliq barcha masalalar hal etilishi uchun javobgarlik yuklansin.

3. “Oʻzuyjoyjamgʻarmabank” va uning hududiy boʻlimlariga fuqarolar hamda yuridik shaxslarning boʻsh pul mablagʻlarini jamgʻarish, nomi yozilgan uy-joy obligatsiyalari bilan operatsiyalarni amalga oshirish, uy-joy qurilishiga kredit berish va obligatsiyalarning egalarini uy-joy bilan taʼminlash borasidagi ishlarni tashkil qilish topshirilsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 1997 — 1999-yillar mobaynida uy-joyga nisbatan vujudga kelgan talab-ehtiyojga hamda uy-joy qurilishi shart-sharoitlariga qarab, viloyat markazlaridan va viloyatga boʻysunuvchi shaharlardan boshlab aholining boʻsh pul mablagʻlarini, tijorat banklari muassasalarining kredit mablagʻlarini, shuningdek nomi yozilgan uy-joy obligatsiyalari boʻyicha sotib olinadigan uy-joy qiymatining 50 foizini qoplashga yoʻnaltiriladigan budjet mablagʻlarini jalb etgan holda uy-joy qurilishi boʻyicha ishlarni bosqichma-bosqich tashkil qilsinlar.

5. Oʻzbekiston Respublikasi Moliya vazirligi nomi yozilgan uy-joy obligatsiyalarini fuqarolar sotib olishlariga qarab:

“Oʻzuyjoyjamgʻarmabank”ning nomi yozilgan obligatsiyalari boʻyicha jismoniy shaxslar tomonidan sotib olinadigan uy-joy qiymatning 50 foizi qoplanishini taʼminlasin;

“Oʻzuyjoyjamgʻarmabank”ka yuqorida koʻrsatilgan maqsadlarda fuqarolarga uzoq muddatli kreditlar berish uchun uy-joy qurilishi qiymatining 40 foizi doirasida zarur mablagʻlarni ajratib bersin.

6. “Oʻzuyjoyjamgʻarmabank” nomi yozilgan uy-joy obligatsiyalarining egalari boʻlgan jismoniy shaxslarga uy-joy sotib olish uchun qarzni 10 yil muddat mobaynida uzish sharti bilan yillik 20 foizdan oshmaydigan stavka boʻyicha uzoq muddatli kreditlar bersin.

7. Oʻzbekiston Respublikasi Davlat matbuot qoʻmitasi, Oʻzteleradio, Milliy axborot agentligi, ommaviy axborot vositalari fuqarolarning boʻsh pul mablagʻlarini jalb etgan holda uy-joylar qurish va sotib olish borasida shaharlar hokimliklari hamda “Oʻzuyjoyjamgʻarmabank” muassasalarining amaliy ish tajribasini muntazam suratda va keng yoritsinlar.

8. “Toshkent shahrida uy-joy qurilishini davlat yoʻli bilan qoʻllab-quvvatlashni kuchaytirish toʻgʻrisida” 1996-yil 31-yanvardagi PF-1336-son Farmon 8-bandining beshinchi abzatsi oʻz kuchini yoʻqotgan deb hisoblansin.

9. Oʻzbekiston Respublikasi Vazirlar Mahkamasi ikki hafta muddatda ushbu Farmonni ijro etish yuzasidan qaror qabul qilsin.